രാജ്യത്ത് പ്രതിദിന കോവിഡ് കേസുകൾ ഉയരുന്നു; 67 ശതമാനത്തിലധികം കേരളത്തിൽ

 
Kerala Covid Updates

രാജ്യത്തെ പ്രതിദിന കോവിഡ് ബാധിതരുടെ എണ്ണം വീണ്ടും 40,000ന് മുകളിൽ. 24 മണിക്കൂറിനിടെ 44,658  പേര്‍ക്കാണ് കോവിഡ് സ്ഥിരീകരിച്ചത്. 496 പേര്‍ രോഗബാധിതരായി മരിച്ചു. 32,988 പേരാണ് രോഗമുക്തരായത്. രാജ്യത്ത് ഇതുവരെ 3,26,03,188 പേര്‍ക്കാണ് കോവിഡ് സ്ഥിരീകരിച്ചത്. ഇവരില്‍ 3,18,21,428 പേര്‍ രോഗമുക്തരായി. 4,36,861 പേര്‍ രോഗബാധിതരായി മരിച്ചു. നിലവില്‍ 3,44,899 പേരാണ് ചികിത്സയിലുള്ളത്. സജീവ രോഗികളുടെ എണ്ണത്തില്‍ 11,174 പേരുടെ വര്‍ധനവാണ് ഇന്നലെയുണ്ടായത്.  

കോവിഡ് കേസുകളുടെ എണ്ണത്തില്‍ ഏറ്റക്കുറച്ചില്‍ തുടരുമ്പോഴും രോഗമുക്തി നിരക്ക് 97 ശതമാനത്തില്‍ തുടരുകയാണ്. നിലവില്‍ 97.60 ശതമാനമാണ് രോഗമുക്തി നിരക്ക്. ആകെ രോഗബാധിതരുടെ 1.06 ശതമാനം മാത്രമാണ് നിലവില്‍ ചികിത്സയിലുള്ളത്.

പ്രതിദിന ടെസ്റ്റ് പോസിറ്റിവിറ്റി നിരക്ക് 2.45 ശതമാനമാണ്. 32 ദിവസമായി മൂന്നില്‍ താഴെയാണ് പ്രതിദിന ടിപിആര്‍. പ്രതിവാര ടിപിആര്‍ 63 ദിവസമായി മൂന്ന് ശതമാനത്തില്‍ താഴെ തുടരുകയാണ്. നിലവില്‍ ഇത് 2.10 ശതമാനമാണ്. കോവിഡ് പരിശോധന ഗണ്യമായി വര്‍ധിപ്പിച്ചിട്ടുണ്ട്. ഇതുവരെ 51.49 കോടി പരിശോധനകളാണ് നടത്തിയത്. രാജ്യവ്യാപക വാക്‌സിനേഷന്റെ ഭാഗമായി 61.22 കോടി ഡോസ് വാക്‌സിനാണ് നല്‍കിയത്.

പ്രതിദിന കോവിഡ് കേസുകളില്‍ കേരളം തന്നെയാണ് മുന്നില്‍. രാജ്യത്തെ പ്രതിദിന കേസുകളില്‍ ഏറിയപങ്കും കേരളത്തില്‍ നിന്നാണ്. ഇന്നലെ സംസ്ഥാനത്ത് 30,077 പേര്‍ക്കാണ് കോവിഡ് ബാധിച്ചത്. ആകെ കോവിഡ് ബാധിതര്‍ 39,13,506. ഇവരില്‍ 37,11,625 പേര്‍ രോഗമുക്തരായി. ആകെ മരണം 20,134 ആയി. 1,81,747 പേരാണ് ഇനി ചികിത്സയിലുള്ളത്.