'മലയാളികള്‍ എഴുതാതെ പോയ ജീവിതാനുഭവങ്ങള്‍ അടയാളപ്പെടുത്തിയ ഗുര്‍ണയെ കേരളം കേള്‍ക്കാതെ പോയി'

 
Abdulrazak Gurnah
കേരളത്തെ ചരിത്ര സന്ദര്‍ഭങ്ങളിലൂടെ മനസിലാക്കിയ ഏക സാഹിത്യ നൊബേല്‍ ജേതാവ് ഗുര്‍ണയായിരിക്കും

മലയാളികള്‍ എഴുതാതെ പോയ, അവര്‍ക്കുകൂടി ബാധകമായ ജീവിതാനുഭവങ്ങള്‍ തന്റെ നോവലില്‍ അടയാളപ്പെടുത്തിയ എഴുത്തുകാരനാണ് സാഹിത്യത്തിനുള്ള നൊബേല്‍ പുരസ്‌കാരം നേടിയ അബ്ദുറസാഖ് ഗുര്‍ണയെന്ന് മാധ്യമപ്രവര്‍ത്തകനും കേരള സാഹിത്യ അക്കാദമി അവാര്‍ഡ് ജേതാവുമായ മുസഫര്‍ അഹമ്മദ്. ഗുര്‍ണയുടെ കേരളത്തെക്കുറിച്ചുള്ള അറിവും കാഴ്ചപ്പാടും നമ്മള്‍ കേള്‍ക്കാതെ പോകുന്നു. അദ്ദേഹത്തിന് കേരളത്തെക്കുറിച്ച്, പ്രത്യേകിച്ചും മലബാറിനെയും അതിന്റെ ചരിത്ര പ്രാധാന്യത്തെക്കുറിച്ചും കൃത്യമായി അറിയാമായിരുന്നു. കേരളത്തെക്കുറിച്ചുള്ള അറിവ് ഗുര്‍ണ തന്റെ പ്രഭാഷണങ്ങള്‍, അഭിമുഖങ്ങള്‍ എന്നിവയില്‍ വ്യക്തമാക്കുന്നുണ്ട്. എന്നാല്‍ മലയാളികള്‍ ഗുര്‍ണയുടെ സാഹിത്യത്തെക്കുറിച്ചെഴുതുമ്പോള്‍ ഈ പ്രധാനപ്പെട്ട കാര്യം കടന്നുവരുന്നേയില്ല. കേരളം കാണാത്ത, എന്നാല്‍ കേരളത്തെ ചരിത്ര സന്ദര്‍ഭങ്ങളിലൂടെ മനസിലാക്കിയ ഏക സാഹിത്യ നൊബേല്‍ ജേതാവ് ഗുര്‍ണയായിരിക്കും -മുസഫര്‍ പറഞ്ഞു.

ഗുര്‍ണയുടെ ശൃംഖലാ പ്രദേശങ്ങള്‍ എന്ന ആശയത്തില്‍, മലബാര്‍ ഇന്ത്യന്‍ മഹാസമുദ്രതീരങ്ങളിലെ സുപ്രധാന പ്രദേശമാണ്. ഗുര്‍ണ ജനിച്ച സാന്‍സിബാറും ഇന്ത്യന്‍ മഹാസമുദ്ര പ്രദേശം ആയതിനാല്‍, തന്റെ നാടുമായി ബന്ധപ്പെട്ടു കിടക്കുന്ന ശൃംഖലാ ദേശങ്ങളെക്കുറിച്ചു മനസിലാക്കാന്‍ അതീവ താല്‍പര്യവും ജാഗ്രതയും അദ്ദേഹം കാണിച്ചിട്ടുണ്ട്. അദ്ദേഹത്തിന്റെ 'കേരള ബന്ധ'ത്തിനുമുള്ള ഭൂരാഷ്ട്രതന്ത്രപരമായ കാരണവും അതാണെന്ന് മുസഫര്‍ പറഞ്ഞു.

മുസഫര്‍ അഹമ്മദ്
മുസഫര്‍ അഹമ്മദ്

ഗുര്‍ണയുടെ സാഹിത്യത്തെ ഇന്ത്യന്‍ മഹാസമുദ്രതീര ആഖ്യാനമായി കാണേണ്ടതുണ്ട്. അതിന് മലബാര്‍ തീരത്തിന്റെ ചരിത്രമാണ് മലയാളിയെ ഏറ്റവും കൂടുതല്‍ സഹായിക്കുകയെന്ന യാഥാര്‍ഥ്യം കാണാതെ പോകുന്നു. ഗുര്‍ണക്കുണ്ടായ പലായന അനുഭവം കോളനി കാലത്ത് മലബാറിലുമുണ്ടായിട്ടുണ്ട്. തൊഴില്‍ പ്രവാസത്തിനു തൊട്ടുമുമ്പുള്ള മലബാര്‍ ചരിത്രം, അതിലെ കോളനി വാഴ്ചയുടെ അനുഭവങ്ങള്‍, സമുദ്രപാതയിലും കരയിലും തൂക്കുമരങ്ങളിലുമായി ഒഴുകിയ മനുഷ്യരക്തം, ഇതിനെല്ലാം ഗുര്‍ണയുടെ സാഹിത്യ-ചിന്താ ലോകങ്ങളോട് വലിയ സമാനതയുണ്ട്. ഗൂര്‍ണ എഴുതി, മലയാളികള്‍ ഇതൊന്നും സാഹിത്യത്തില്‍ കൊണ്ടു വന്നില്ല. ഒരു വായനക്കാരന്‍ എന്ന നിലയില്‍ ഗൂര്‍ണയുടെ സാഹിത്യം മലയാളി എഴുതാതെ പോയ സാഹിത്യമാണെന്ന തോന്നലും ഉണ്ടാക്കുന്നു. നമുക്ക് നഷ്ടമായ സാഹിത്യം കൂടിയാണത്.

ഗുര്‍ണയുടെ ജന്മദേശമായ സാന്‍സിബാര്‍ അടിമച്ചന്തകളുടേയും കച്ചവടത്തിന്റേയും കേന്ദ്രമായിരുന്നു. കേരള ചരിത്രം വിനില്‍ പോളിന്റെ 'അടിമ ചരിത്ര'ത്തിന്റെ പശ്ചാത്തലത്തില്‍ കൂടി വായിക്കുമ്പോള്‍ അധിനിവേശ കാലത്ത് സാന്‍സിബാറും കേരളവും എങ്ങിനെ സമാനമായ ദുരന്താനുഭവങ്ങളിലൂടെ കടന്നുപോയി എന്ന് മനസിലാക്കാനാവും. അറബ് നാടുകളില്‍ ഒമാനിലേക്കാണ് സാന്‍സിബാറിലെ അടിമകളെ മുഖ്യമായും കൊണ്ടുപോയത്. പോര്‍ച്ചുഗീസുകാര്‍ മലബാറില്‍ ഹജ്ജ് കപ്പല്‍ മുക്കിക്കളഞ്ഞ്, നിരവധി പേരെ കൊന്നതിനു സമനമായ സംഭവങ്ങള്‍ കിഴക്കനാഫ്രിക്കയിലുമുണ്ടായിട്ടുണ്ട്. ഗുഡ്സും (ചരക്കുകള്‍) ഗോഡ്സും (ദൈവങ്ങള്‍) എങ്ങനെ ഈ സമുദ്രപാതയിലൂടെ യമനിലും ആഫ്രിക്കയിലും മലബാറിലും എത്തിച്ചേര്‍ന്നു എന്നതിനെക്കുറിച്ചാലോചിക്കുമ്പോഴും സമാനതകള്‍ കണ്ടെത്താം.

സെമിറ്റിക്ക് മതങ്ങള്‍ എവിടെയാണെങ്കിലും അതിന്റെ സാംസ്‌ക്കാരിക പരിസരങ്ങളില്‍ നിന്നും എഴുതപ്പെടുന്ന സാഹിത്യത്തിന് പല സമാനതകളും കാണാനാകും. 'പിഞ്ഞാണത്തിലെഴുത്ത്' തുടങ്ങിയ കാര്യങ്ങള്‍ ഇത്തരം കൃതികളിലെല്ലാം കടന്നുവരുന്നത് സമാനതകളുടെ ലോകത്തേക്ക് നമ്മെ കൂട്ടിക്കൊണ്ടുപോകും. പുനത്തില്‍ കുഞ്ഞബ്ദുള്ളയുടെ 'സ്മാരക ശിലകളി'ല്‍ ഇങ്ങനെയുള്ള ചില സന്ദര്‍ഭങ്ങള്‍  കണ്ടെത്താന്‍ കഴിയും. പി.എ മുഹമ്മദ് കോയയുടെ 'സുല്‍ത്താന്‍ വീട്' അത്തരത്തിലുള്ള ഒരു രചനയാണ്. നോവലിലെ കഥാപാത്രങ്ങള്‍ ഇതേ മഹാസമുദ്ര തീരവാസികളാണെന്നതാണ് വസ്തുത. ഇന്ന് ആ നോവലിനെ അങ്ങനെ പുനര്‍വായിക്കാന്‍ കഴിയും. തിക്കോടിയന്റെ 'ചുവന്ന കടല്‍' ഈ നിരയിലെ മറ്റൊരു പ്രധാന കൃതിയാണ്. പക്ഷെ 'ചുവന്ന കടലി'നെ നമ്മള്‍ ഗൗരവമായി കണ്ടില്ലെന്നും മുസഫര്‍ അഭിപ്രായപ്പെടുന്നു. 

വക്കം മൗലവി മെമ്മോറിയല്‍ ആന്‍ഡ് റിസര്‍ച്ച് സെന്ററിന്റെയും ഇന്‍സ്റ്റിറ്റ്യൂട്ട് ഫോര്‍ ഗ്ലോബല്‍ സൗത്ത് സ്റ്റഡീസ് ആന്‍ഡ് റിസര്‍ച്ചിന്റെയും ആഭിമുഖ്യത്തില്‍ നടന്ന ചര്‍ച്ചയില്‍ 'ഗുര്‍ണയുടെ ഭൂപടത്തിലെ കേരളം' എന്ന വിഷയത്തില്‍ സംസാരിക്കുമ്പോഴായിരുന്നു മുസഫര്‍ അഹമ്മദ് ഗുര്‍ണയുടെ 'കേരള ബന്ധം' വീശദീകരിച്ചത്. മഹാത്മാഗാന്ധി സര്‍വകലാശാലയിലെ പശ്ചിമേഷ്യ-പ്രവാസ പഠന വിദഗ്ധന്‍ ഡോ. എം.വി. ബിജുലാല്‍ ആധ്യക്ഷത വഹിച്ചു. കേരള ചരിത്ര ഗവേഷ കൗണ്‍സില്‍ ചെയര്‍മാന്‍ ഡോ. മൈക്കള്‍ തരകന്‍, സാഹിത്യ അക്കാദമി വൈസ് പ്രസിഡന്റ് ഖദീജ മുംതാസ്, ഡോ. കെ.എം. സീതി, ഡോ. ഉമര്‍ തറമേല്‍, ഡോ. വി. മാത്യു കുര്യന്‍ എന്നിവര്‍ സംസാരിച്ചു. ഡോ. ബി. ഇഖ്ബാല്‍, ഡോ. പി.പി. രവീന്ദ്രന്‍, പ്രൊഫ. സെബാസ്റ്റ്യന്‍ വട്ടമറ്റം തുടങ്ങിയവരും സംബന്ധിച്ചു.