‘ഞാന്‍ പരമാവധി ശ്രമിച്ചു, പക്ഷേ എല്ലാം അവസാനിച്ചിരിക്കുന്നു: വിരമിക്കല്‍ പ്രഖ്യാപിച്ച് നെയ്മര്‍

ലോകകപ്പില്‍ നിന്നും പുറത്തായതിന് പിന്നാലെ ബ്രസീല്‍ ആരാധകരെ ഞെട്ടിച്ച് ഇതിഹാസ താരം നെയ്മര്‍ ജൂനിയറിന്റെ വിരമിക്കല്‍ പ്രഖ്യാപനം. ന്യൂജേഴ്സിയിലെ മെറ്റ്ലൈഫ് സ്റ്റേഡിയത്തില്‍ നടന്ന പ്രീ-ക്വാര്‍ട്ടര്‍ പോരാട്ടത്തില്‍ അഞ്ച് തവണ ലോക ചാമ്പ്യന്മാരായ ബ്രസീലിനെ കരുത്തരായ നോര്‍വെ ഒന്നിനെതിരെ രണ്ട് ഗോളുകള്‍ക്കാണ് പരാജയപ്പെടുത്തിയത്. ഇതോടെ ബ്രസീല്‍ ടൂര്‍ണമെന്റില്‍ നിന്ന് പുറത്തായി. ഈ ഹൃദയഭേദകമായ തോല്‍വിയോടെയാണ് നെയ്മറിന്റെ അന്താരാഷ്ട്ര കരിയറിനും കണ്ണീരോടെ അന്ത്യമായിരിക്കുന്നത്.

നോര്‍വെയോടേറ്റ തോല്‍വിക്ക് പിന്നാലെ കളംവിടുമ്പോള്‍ വിതുമ്പലടക്കാന്‍ കഴിയാതിരുന്ന നെയ്മര്‍, ഇനിയൊരു തവണ കൂടി താന്‍ കാനറിപ്പടയുടെ മഞ്ഞക്കുപ്പായത്തില്‍ കളിക്കളത്തില്‍ ഇറങ്ങില്ലെന്ന് ഔദ്യോഗികമായി സ്ഥിരീകരിച്ചു. തന്റെ കരിയറിലെ അവസാന മത്സരത്തിന് സാക്ഷ്യം വഹിച്ച അതേ മെറ്റ്ലൈഫ് സ്റ്റേഡിയത്തെ ചൂണ്ടിക്കാണിച്ചുകൊണ്ട് താരം വികാരാധീനനായി സംസാരിച്ചു. 2010-ല്‍ അമേരിക്കയ്ക്കെതിരായ സൗഹൃദ മത്സരത്തിലൂടെ ബ്രസീല്‍ ജേഴ്സിയില്‍ തന്റെ അരങ്ങേറ്റം കുറിച്ചതും ഇതേ സ്റ്റേഡിയത്തിലായിരുന്നു. ‘ഞാന്‍ പരമാവധി ശ്രമിച്ചു, ഒരുപാട് ശ്രമിച്ചു… പക്ഷേ ഇപ്പോള്‍ എല്ലാം അവസാനിച്ചിരിക്കുന്നു! ഞാന്‍ എവിടെയാണോ തുടങ്ങിയത്, അവിടെത്തന്നെ ഇത് പൂര്‍ത്തിയാക്കുകയാണ്,’ നെയ്മര്‍ പറഞ്ഞു. മത്സരത്തില്‍ പകരക്കാരനായി കളത്തിലിറങ്ങിയ നെയ്മര്‍ അവസാന നിമിഷങ്ങളില്‍ ഒരു പെനാല്‍റ്റിയിലൂടെ ഗോള്‍ നേടി പ്രതീക്ഷ നല്‍കിയെങ്കിലും ടീമിനെ തോല്‍വിയില്‍ നിന്ന് രക്ഷിക്കാന്‍ അത് മതിയാകുമായിരുന്നില്ല.

34-ാം വയസ്സില്‍ അന്താരാഷ്ട്ര ഫുട്‌ബോളിന്റെ പടിയിറങ്ങുമ്പോള്‍ ബ്രസീലിനായി 130 മത്സരങ്ങളില്‍ നിന്ന് 80 ഗോളുകളും 58 അസിസ്റ്റുകളും നെയ്മര്‍ സ്വന്തം പേരില്‍ കുറിച്ചിട്ടുണ്ട്. ക്ലബ്ബ് തലത്തില്‍ നിരവധി ട്രോഫികള്‍ വാരിക്കൂട്ടിയ നെയ്മര്‍ക്ക് പക്ഷേ, ദേശീയ ടീമിനൊപ്പം വലിയൊരു കിരീടം നേടുക എന്ന സ്വപ്നം പൂര്‍ത്തിയാക്കാനായില്ല. 2013-ല്‍ നേടിയ കോണ്‍ഫെഡറേഷന്‍സ് കപ്പ് മാത്രമാണ് ബ്രസീലിന്റെ സീനിയര്‍ ടീമിനൊപ്പം നെയ്മര്‍ക്ക് നേടാനായ ഏക പ്രധാന കിരീടം.

1990-ന് ശേഷം ആദ്യമായാണ് ബ്രസീല്‍ ലോകകപ്പിന്റെ പ്രീ-ക്വാര്‍ട്ടര്‍ ഘട്ടത്തില്‍ തന്നെ പുറത്താകുന്നത്. ഈ അപ്രതീക്ഷിത പുറത്താകല്‍ ലോകകപ്പ് ചരിത്രത്തിലെ ഏറ്റവും വിജയകരമായ ഈ ടീമിനെ വലിയൊരു പ്രതിസന്ധിയിലേക്കാണ് തള്ളിവിട്ടിരിക്കുന്നത്. തങ്ങളുടെ ആദ്യ ലോകകപ്പ് വിജയത്തിന് ശേഷം ബ്രസീല്‍ നേരിടുന്ന ഏറ്റവും നീണ്ട കിരീട വരള്‍ച്ചയാണിത്. ഇതോടെ, വരാനിരിക്കുന്ന 2030 ലോകകപ്പ് ആകുമ്പോഴേക്ക് ബ്രസീല്‍ ലോകകിരീടം തൊട്ടിട്ട് 28 വര്‍ഷങ്ങള്‍ പൂര്‍ത്തിയാകും.

Content Summary; Neymar announces emotional retirement from international football. Brazil suffers a shocking World Cup 2026 exit after a 2-1 loss to Norway at MetLife Stadium.