ഗ്രീന്ലാന്ഡ് പിടിച്ചെടുക്കാനുള്ള അമേരിക്കന് നീക്കങ്ങളെ പ്രതിരോധിക്കാന് കര്ശനമായ നിര്ദ്ദേശങ്ങളുമായി ഡെന്മാര്ക്ക് പ്രതിരോധ മന്ത്രാലയം. യുഎസ് സൈന്യം അധിനിവേശത്തിന് തുനിഞ്ഞാല്, ‘ആദ്യം വെടിവയ്ക്കുക, പിന്നീട് ചോദ്യങ്ങള് ചോദിക്കുക’ എന്ന നിലപാടിലേക്ക് മാറാന് ഡാനിഷ് സൈനികര്ക്ക് നിര്ദ്ദേശം ലഭിച്ചതായാണ് റിപ്പോര്ട്ട്.
ഗ്രീന്ലാന്ഡ് ലക്ഷ്യമിട്ട് ഏതെങ്കിലും തരത്തിലുള്ള വിദേശ സൈനിക അധിനിവേശമുണ്ടായാല്, പ്രത്യേക ഉത്തരവുകള്ക്കായി കാത്തുനില്ക്കാതെ തന്നെ തിരിച്ചടിക്കാന് സൈനികര്ക്ക് അനുമതി നല്കിയതായി ഡാനിഷ് പ്രതിരോധ മന്ത്രാലയം വെളിപ്പെടുത്തി. ഡാനിഷ് പത്രമായ ‘ബെര്ലിംഗ്സ്കെ’ (Berlingske) നല്കിയ റിപ്പോര്ട്ടിലാണ് ഇക്കാര്യം വ്യക്തമാക്കുന്നത്.
ഡെന്മാര്ക്കിന്റെ സ്വയംഭരണ പ്രദേശമായ ഗ്രീന്ലാന്ഡ് വിലയ്ക്ക് വാങ്ങാനോ പിടിച്ചെടുക്കാനോ താല്പ്പര്യമുണ്ടെന്ന് യുഎസ് മുന് പ്രസിഡന്റ് ഡൊണാള്ഡ് ട്രംപ് ആവര്ത്തിച്ച് വ്യക്തമാക്കിയിരുന്നു. ഇത് ഇരുരാജ്യങ്ങളും തമ്മിലുള്ള നയതന്ത്ര ബന്ധത്തില് വലിയ വിള്ളലുണ്ടാക്കി. ഗ്രീന്ലാന്ഡ് വില്പനയ്ക്കുള്ളതല്ലെന്നും തങ്ങളുടെ പരമാധികാരത്തിന്മേലുള്ള കടന്നുകയറ്റം അനുവദിക്കില്ലെന്നും ഡാനിഷ് സര്ക്കാര് നേരത്തെ തന്നെ വ്യക്തമാക്കിയിട്ടുണ്ട്.
ശീതകാല യുദ്ധനിയമങ്ങള് പുനരുജ്ജീവിപ്പിച്ച് ഡെന്മാര്ക്ക്
ഗ്രീന്ലാന്ഡിന് നേരെ വിദേശ സേനയുടെ അധിനിവേശമുണ്ടായാല് സൈനികര് സ്വീകരിക്കേണ്ട നടപടികളെക്കുറിച്ച്, 1952-ലെ ശീതയുദ്ധകാലത്തെ കര്ശനമായ നിയമങ്ങളെ ഉദ്ധരിച്ച് ‘ഇന്ഡിപെന്ഡന്റ്’ റിപ്പോര്ട്ട് ചെയ്യുന്നു. വിദേശ സേന ആക്രമിക്കാന് ശ്രമിച്ചാല്, മറ്റ് അനുമതികള്ക്കായി കാത്തുനില്ക്കാതെ തന്നെ ‘ഉടനടി യുദ്ധം ഏറ്റെടുക്കാന്’ സൈനികര്ക്ക് നിര്ദ്ദേശമുണ്ട്.
ഡാനിഷ് സൈന്യത്തിന് നല്കിയിട്ടുള്ള ഈ കര്ശനമായ നിര്ദ്ദേശത്തിന് 1940-ലെ രണ്ടാം ലോകമഹായുദ്ധ കാലത്തോളം പഴക്കമണ്ട്. അന്ന് ഡെന്മാര്ക്കിന് നേരിടേണ്ടി വന്ന കയ്പ്പേറിയ അനുഭവമാണ് ഇത്തരമൊരു നിയമത്തിന് പിന്നിലെ പ്രധാന കാരണം.
1940 ല് അപ്രതീക്ഷിതമായി നടന്ന ആക്രമണത്തിലൂടെ നാസി ജര്മ്മനി, ഡെന്മാര്ക്കിന്റെ തലസ്ഥാനമായ കോപ്പന്ഹേഗന് ഉള്പ്പെടെയുള്ള പ്രമുഖ നഗരങ്ങളുടെ നിയന്ത്രണം അതിവേഗം പിടിച്ചെടുത്തു. ജര്മ്മന് സൈന്യത്തിന്റെ പെട്ടെന്നുള്ള നീക്കങ്ങളെ ഫലപ്രദമായി പ്രതിരോധിക്കാന് അന്ന് ഡാനിഷ് സൈന്യത്തിന് സാധിച്ചില്ല. തീരുമാനങ്ങള് എടുക്കുന്നതിലുണ്ടായ കാലതാമസവും കൃത്യമായ ഉത്തരവുകളുടെ അഭാവവും രാജ്യത്തെ കീഴടങ്ങലിലേക്ക് നയിച്ചു.
ഈ പരാജയത്തില് നിന്നുള്ള പാഠം ഉള്ക്കൊണ്ടാണ്, ഭാവിയില് സമാനമായ അധിനിവേശ ശ്രമങ്ങള് ഉണ്ടായാല് ഉന്നതതല ഉത്തരവുകള്ക്കായി കാത്തുനില്ക്കാതെ തന്നെ ശത്രുവിനെ നേരിടാനുള്ള ധീരമായ തീരുമാനം ഡെന്മാര്ക്ക് കൈക്കൊണ്ടത്. ഇത് പിന്നീട് ‘ആദ്യം വെടിവയ്ക്കുക’ എന്ന കര്ശനമായ സൈനിക ചട്ടമായി മാറുകയായിരുന്നു.
ട്രംപ് ഗ്രീന്ലാന്ഡ് ആവശ്യപ്പെടുന്നതിന് പിന്നില്
ദക്ഷിണ അമേരിക്കന് രാജ്യമായ വെനിസ്വേലയില് നിക്കോളാസ് മഡുറോയുടെ സര്ക്കാരിനെതിരെ അമേരിക്ക ശക്തമായ നിലപാടുകള് സ്വീകരിക്കുകയും അട്ടിമറി നീക്കങ്ങള്ക്ക് ശ്രമിക്കുകയും ചെയ്തതിന് പിന്നാലെ, സമാനമായ ഭീഷണി മറ്റ് പ്രദേശങ്ങള്ക്കും നേരിടേണ്ടി വരുന്നുണ്ട്. ഇതില് ഏറ്റവും പ്രധാനപ്പെട്ടതാണ് ഡെന്മാര്ക്കിന്റെ ഭരണത്തിന് കീഴിലുള്ള ഗ്രീന്ലാന്ഡ്.
അമേരിക്കയുടെ പ്രതിരോധ സുരക്ഷയ്ക്ക് ഗ്രീന്ലാന്ഡ് അത്യന്താപേക്ഷിതമാണെന്ന ഉറച്ച വിശ്വാസത്തിലാണ് ഡൊണാള്ഡ് ട്രംപ്. ഗ്രീന്ലാന്ഡിന്റെ നിയന്ത്രണം ഏറ്റെടുക്കുമെന്ന ഭീഷണികള് അവസാനിപ്പിക്കണമെന്ന് ഡെന്മാര്ക്കിലെയും ഗ്രീന്ലാന്ഡിലെയും ഭരണാധികാരികള് ഔദ്യോഗികമായി ആവശ്യപ്പെട്ടിട്ടും ട്രംപ് തന്റെ നിലപാടില് മാറ്റം വരുത്താന് തയ്യാറായിട്ടില്ല.
വെറുമൊരു ഭൂമി എന്നതിലുപരി, അമേരിക്കയുടെ പ്രതിരോധത്തിന് ഒഴിച്ചുകൂടാനാവാത്ത ഇടമായാണ് ട്രംപ് ഗ്രീന്ലാന്ഡിനെ കാണുന്നത്. ആര്ട്ടിക് മേഖലയില് റഷ്യയുടെയും ചൈനയുടെയും സാന്നിധ്യം വര്ദ്ധിക്കുന്നത് അമേരിക്കയ്ക്ക് ഭീഷണിയാണെന്നും അത് തടയാന് ഗ്രീന്ലാന്ഡ് നിയന്ത്രിക്കണമെന്നുമാണ് ട്രംപിന്റെ നിലപാട്.
അതേസമയം, നാറ്റോ സഖ്യകക്ഷിയായ ഡെന്മാര്ക്കിന്റെ അധീനതയിലുള്ള ഗ്രീന്ലാന്ഡിനെ ചൊല്ലിയുള്ള തര്ക്കം കൂടുതല് സങ്കീര്ണമാകുമെന്ന സൂചനകളാണ് ട്രംപിന്റെ പുതിയ പ്രസ്താവനയിലൂടെ പുറത്തുവന്നിരിക്കുന്നത്. നാറ്റോ സഖ്യവുമായുള്ള ബന്ധം നിലനിര്ത്തുന്നതാണോ, ഗ്രീന്ലാന്ഡ് സ്വന്തമാക്കുന്നതാണോ മുന്ഗണന എന്ന ചോദ്യത്തിന്, ‘രണ്ടിലൊന്ന് തിരഞ്ഞെടുക്കേണ്ടി വന്നേക്കാം’ എന്നായിരുന്നു ന്യൂയോര്ക്ക് ടൈംസിനോട് ട്രംപ് പ്രതികരിച്ചത്. നാറ്റോയിലെ പ്രധാന അംഗമായ ഡെന്മാര്ക്കിനെ സംബന്ധിച്ചിടത്തോളം അമേരിക്കന് പ്രസിഡന്റില് നിന്നുള്ള ഇത്തരമൊരു പരാമര്ശം വലിയ ആശങ്കയുണ്ടാക്കുന്നതാണ്.
Content Summary: Denmark orders military to retaliate if US attempts to invade Greenland
This post was last modified on January 9, 2026 11:42 am
Leave a Comment