എക്‌സ്‌പ്ലോര്‍ ‘ദി ആര്‍ട് ഓഫ് ഡൂയിങ് നത്തിംഗ്’

ജോലിക്ക് പോകുന്നവരും, പഠിക്കാന്‍ പോകുന്നവരും, വീട്ടിലെ ജോലികള്‍ ചെയ്യുന്ന വീട്ടമ്മമാരും തുടങ്ങി കുട്ടികള്‍ മുതല്‍ എല്ലാവരും തിരക്കിലാണ്. രാവിലെ ജോലിക്ക് പോകുന്നു, സ്‌കൂളില്‍ പോകുന്നു, വീട്ടിലെ ജോലികള്‍ തീര്‍ക്കുന്നു അതിനിടയിലെ നൂറു നൂറു കാര്യങ്ങള്‍ ചെയ്ത് തീര്‍ക്കുന്നു. ഇതിനിടെ ഒരു ദിവസം അവധി കിട്ടിയാല്‍ അത് ഒന്നിനും ഒന്നിനും തികയാത്ത അവസ്ഥ. ഇതാണ് ഇപ്പോള്‍ മിക്ക ആളുകളുടെയും ദിനചര്യ. ഈ വെപ്രാളപ്പെട്ടുള്ള ഓട്ടങ്ങള്‍ക്കിടെ കുറച്ച് സമയമെങ്കിലും വെറുതെയിക്കാന്‍ ആഗ്രഹമില്ലാത്തവരായി ആരെങ്കിലുമുണ്ടാകുമോ? ഇത്തരത്തില്‍ ഇടക്കൊക്കെ ഒന്ന് വെറുതെയിരുന്ന് വിശ്രമിക്കുന്നത് നമ്മുടെ മാനസിക ആരോഗ്യത്തിന് വളരെ ഗുണകരമാണ്, അതുകൊണ്ട് തന്നെയാണ് ആര്‍ട്ട് ഓഫ് ഡൂയിങ് നത്തിംഗ് പ്രസക്തമാകുന്നതും.

തിരക്കുകളൊന്നുമില്ലാതെ സമാധാനമായി വെറുതെ ഇരിക്കുന്നതിനെ ആര്‍ട്ട് ഓഫ് ഡൂയിങ് നത്തിംഗ് എന്ന് പറയുന്നു. ഡച്ചുകാരാണ് ഇത്തരത്തിലൊരു പ്രവര്‍ത്തി കണ്ടുപിടിച്ചത്. വെറുതെയിരിക്കുന്നതിനെ വിലകുറച്ച് കാണേണ്ട എന്നാണ് ഈ പഠനങ്ങള്‍ പറയുന്നത്.

ഓരോ ദിവസവും എല്ലാവരും വെറുതെയിരിക്കുന്നതിനായി കുറച്ച് സമയം കണ്ടെത്തുക. ജോലിത്തിരക്കുകളും വീട്ട് പണികളും ഹോം വര്‍ക്കും മറ്റെല്ലാ കാര്യങ്ങളും മാറ്റിവെച്ച്്, സ്വസ്ഥമായി കുറച്ച് സമയം. ആദ്യകാലങ്ങളില്‍ 5 മിനിട്ടൊക്കെ വെറുതെ ഇരുന്നിട്ട് പിന്നീട് ഇതിന്റെ ദൈര്‍ഘ്യം കൂട്ടിക്കൊണ്ട് വരാവുന്നതാണ്. നമ്മള്‍ നമുക്ക് തന്നെ കൊടുക്കുന്ന ഈ ഇത്തിരി സമയം മാനസികാരോഗ്യത്തിന് വളരെ പ്രധാനപ്പെട്ടതാണ്. മറ്റുള്ളവര്‍ക്കായി ഒത്തിരി സമയം ചിലവാക്കാറുള്ള എല്ലാവര്‍ക്കും നമുക്ക് വേണ്ടി കൂടി മാറ്റിവെക്കാന്‍ അല്‍പം സമയമുണ്ടാകുമല്ലോ അല്ലേ? ധ്യാനമൊക്കെ പോലെ ഇതിനെയും ഒരു മാനസിക വ്യായാമമായി കാണാവുന്നതാണ്.

• മാനസികാരോഗ്യം മെച്ചപ്പെടുത്തുന്നതിന്; മാനസിക സമ്മര്‍ദ്ദം, ഉത്കണ്ഠ എന്നിവ കുറയ്ക്കാനും, മാനസിക നില മെച്ചപ്പെടുത്തുന്നതിനും വെറുതെയിരിക്കുന്നത് സഹായിക്കും. മാനസിക നില മെച്ചപ്പെടുമ്പോള്‍ തീരുമാനങ്ങളെടുക്കുന്നതിനെ പോലും അത് സ്വാധീനിക്കുന്നു.
• ക്രിയാത്മകത; നിങ്ങളുടെ മനസിലെ ക്രിയാത്മകത ഉണര്‍ത്താനും, പ്രശ്‌നപരിഹാരങ്ങള്‍ പോലും പെട്ടെന്ന് നടപ്പാക്കാനും സാധിക്കുന്നു.
• ഓര്‍മ; കുറച്ച് സമയം വെറുതെ ശാന്തമായി ഒരിടത്തിരിക്കുന്നതിലൂടെ നമ്മുടെ തലച്ചോര്‍ കൂടുതല്‍ പ്രവര്‍ത്തനക്ഷമമാവുകയും അടുക്കും ചിട്ടയോടെയും കാര്യങ്ങള്‍ ചെയ്യാന്‍ തുടങ്ങുകയും ചെയ്യും.
• ശ്രദ്ധയും ഏകാഗ്രതയും; വൈകാരികനില മെച്ചപ്പെടുത്താന്‍ സഹായിക്കുന്നത് വഴി ഏകാഗ്രതയും ശ്രദ്ധയും വര്‍ധിക്കുന്നു.

content summary; explore the art of doing nothing