യുഎസ്-ഇസ്രയേല്-ഇറാന് രണ്ടാഴ്ചത്തെ വെടിനിര്ത്തല് കരാര് പ്രതിസന്ധിയില്. പ്രഖ്യാപനം വന്ന് മണിക്കൂറുകള്ക്കകം തന്നെയാണ് വീണ്ടും ഭയത്തിന്റെതായ അന്തരീക്ഷം ഉരുണ്ടുകൂടിയത്. കരാറിലെ വ്യവസ്ഥകളെക്കുറിച്ച് ഇരുപക്ഷവും വ്യത്യസ്തമായ വ്യാഖ്യാനങ്ങള് നല്കിയതും ലബനനില് ഇസ്രയേല് ബോംബാക്രമണം ശക്തമാക്കിയതുമാണ് സമാധാന ശ്രമങ്ങളെ തിരിച്ചടിയാക്കിയത്. ഇസ്രയേല് കരാര് ലംഘിച്ചുവെന്ന് ആരോപിച്ച് ഹോര്മുസ് കടലിടുക്കിലൂടെയുള്ള എണ്ണക്കപ്പലുകളുടെ ഗതാഗതം ഇറാന് തടഞ്ഞു.
ഇറാനും പാകിസ്താനും ചേര്ന്ന് നടപ്പിലാക്കിയ വെടിനിര്ത്തല് കരാറില് ലബനനും ഉള്പ്പെട്ടിട്ടുണ്ടെന്നായിരുന്നു ഇറാന്റെ വാദം. എന്നാല് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു ഇത് തള്ളി. ലബനനിലെ നൂറിലധികം ലക്ഷ്യസ്ഥാനങ്ങളില് ഇസ്രയേല് നടത്തിയ കനത്ത ആക്രമണത്തില് 254 പേര് കൊല്ലപ്പെട്ടു. ലബനനിലെ സംഘര്ഷം വെവ്വേറെ കാണേണ്ടതാണെന്നും അത് കരാറിന്റെ ഭാഗമല്ലെന്നും അമേരിക്കന് പ്രസിഡന്റ് ഡൊണാള്ഡ് ട്രംപും വ്യക്തമാക്കി. ഇസ്രയേലിന്റെ ഈ ആക്രമണത്തെ ‘ഭയാനകം’ എന്നാണ് യുഎന് മനുഷ്യാവകാശ മേധാവി വോള്ക്കര് ടര്ക്ക് വിശേഷിപ്പിച്ചത്.
വെടിനിര്ത്തല് കരാറിലെ പല വ്യവസ്ഥകളും ഇസ്രയേലും അമേരിക്കയും ലംഘിച്ചതായി ഇറാന് പാര്ലമെന്റ് സ്പീക്കര് മുഹമ്മദ് ബാഘര് ഖാലിബാഫ് കുറ്റപ്പെടുത്തി. യുറേനിയം സമ്പുഷ്ടമാക്കാന് ഇറാന് അവകാശമില്ലെന്ന അമേരിക്കയുടെ നിലപാട് അംഗീകരിക്കാനാവില്ലെന്നും ഇത്തരം സാഹചര്യത്തില് ചര്ച്ചകള് അര്ത്ഥശൂന്യമാണെന്നും അദ്ദേഹം പറഞ്ഞു. ഇതേത്തുടര്ന്ന് ഹോര്മുസ് കടലിടുക്കിലൂടെയുള്ള കപ്പല് ഗതാഗതം ഇറാന് നിയന്ത്രിച്ചു. ഇറാന് സൈന്യത്തിന്റെ അനുമതിയോടെ മാത്രമേ കപ്പലുകള്ക്ക് കടന്നുപോകാന് കഴിയൂ എന്ന നിബന്ധന നിലനില്ക്കുന്നതിനാല് രാജ്യാന്തര വിപണിയില് ആശങ്ക തുടരുകയാണ്.
അതേസമയം, ലബനന് വിഷയത്തിലുണ്ടായ തര്ക്കം ഒരു ‘സ്വാഭാവികമായ തെറ്റിദ്ധാരണ’ മാത്രമാണെന്ന് യുഎസ് വൈസ് പ്രസിഡന്റ് ജെ.ഡി. വാന്സ് പ്രതികരിച്ചു. ലബനന് വെടിനിര്ത്തലിന്റെ ഭാഗമാകുമെന്ന് അമേരിക്ക വാഗ്ദാനം നല്കിയിട്ടില്ലെന്ന് അദ്ദേഹം വ്യക്തമാക്കി. ഇസ്രയേലില് നെതന്യാഹുവിനെതിരെ പ്രതിപക്ഷവും രംഗത്തെത്തിയിട്ടുണ്ട്. യുദ്ധത്തില് പൂര്ണ്ണ വിജയം നേടുമെന്ന് പ്രഖ്യാപിച്ച നെതന്യാഹു രാജ്യത്തിന് ഒരു ‘നയതന്ത്ര ദുരന്തമാണ്’ സമ്മാനിച്ചതെന്ന് പ്രതിപക്ഷ നേതാവ് യെയര് ലാപിഡ് കുറ്റപ്പെടുത്തി.
സംഘര്ഷം നിലനില്ക്കുമ്പോഴും വരുംദിവസങ്ങളില് പാകിസ്താനിലെ ഇസ്ലാമാബാദില് ചര്ച്ചകള് തുടരാനാണ് അമേരിക്കയുടെ നീക്കം. ജെ.ഡി. വാന്സ്, ജാരദ് കുഷ്നര് തുടങ്ങിയവര് നയിക്കുന്ന അമേരിക്കന് സംഘം ശനിയാഴ്ച ഇറാന് വിദേശകാര്യ മന്ത്രിയുമായി ചര്ച്ച നടത്തും. ഇറാന്റെ പക്കലുള്ള സമ്പുഷ്ടീകരിച്ച യുറേനിയം ശേഖരം നശിപ്പിക്കുന്നത് സംബന്ധിച്ചായിരിക്കും പ്രധാന ചര്ച്ചകള് നടക്കുക. കരാര് പരാജയപ്പെട്ടാല് സൈനിക നീക്കത്തിലൂടെ യുറേനിയം ശേഖരം നശിപ്പിക്കുമെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് മുന്നറിയിപ്പ് നല്കി.
ഇതിനിടെ, യുദ്ധത്തില് അമേരിക്കയോട് സഹകരിക്കാത്ത നാറ്റോ സഖ്യകക്ഷികളോടുള്ള അതൃപ്തി ട്രംപ് പരസ്യമാക്കി. നാറ്റോയില് നിന്ന് പുറത്തുപോകുന്നതിനെക്കുറിച്ച് ട്രംപ് ആലോചിക്കുന്നതായി അദ്ദേഹത്തിന്റെ പ്രസ് സെക്രട്ടറി കരോലിന് ലീവിറ്റ് സ്ഥിരീകരിച്ചു. എന്നാല് ഭൂരിഭാഗം യൂറോപ്യന് രാജ്യങ്ങളും യുദ്ധകാലത്ത് സഹായിച്ചിട്ടുണ്ടെന്ന് നാറ്റോ സെക്രട്ടറി ജനറല് മാര്ക്ക് റുട്ടെ പ്രതികരിച്ചു. വരും ദിവസങ്ങളില് നടക്കുന്ന ചര്ച്ചകള് മാത്രമേ മേഖലയില് സമാധാനം പുനഃസ്ഥാപിക്കപ്പെടുമോ എന്ന് വ്യക്തമാക്കുകയുള്ളൂ.
Content Summary: Israel continues attacks in Lebanon; Iran alleges breach of ceasefire agreement. Iran blocks oil tankers in Hormuz
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
