ചൈനയുമായി ബന്ധമുണ്ടെന്ന ആരോപണത്തെ തുടർന്ന് പൗരത്വത്തിലടക്കം പ്രതിസന്ധിയിലായിരിക്കുകയാണ് ഫിലിപ്പിൻസിലെ മേയർ ആലീസ് ഗുവോ. റെയ്ഡ് ചെയ്യപ്പെട്ട ഒരു ഓഫ്ഷോർ ഗെയിമിംഗ് കമ്പനിയുമായി ബന്ധപ്പെട്ട വിവരങ്ങൾ പുറത്തുവന്നതിനെ തുടർന്നാണ് ആരോപണങ്ങൾ ശക്തമായിരിക്കുന്നത്. ആലീസ് ചൈനയിൽ നിന്നാണെന്നും, മറ്റൊരു സ്ത്രീയുടെ ഐഡന്റിറ്റി ഉപയോഗിച്ച് പോരുന്നതായും ആക്ഷേപങ്ങൾ ഉയരുന്നുണ്ട്. philipino mayor Alice Guo
നാഷണൽ ബ്യൂറോ ഓഫ് ഇൻവെസ്റ്റിഗേഷൻ (എൻബിഐ) ആലീസ് ഗുവോയുടെ വിരലടയാളം പരിശോധിച്ചിരുന്നു. പരിശോധനയിൽ മേയറുടെ വിരലടയാളം 2003 ൽ ചൈനീസ് പാസ്പോർട്ടുമായി ഫിലിപ്പിൻസിൽ എത്തിയ ഗുവോ ഹുവ പിംഗ് എന്ന കൗമാരക്കാരിയുടെ വിരലടയാളവും ഒന്നാണെന്ന് കണ്ടെത്തി. ഫിലിപ്പിൻസിലെ ഓഫ്ഷോർ ഗെയിമിംഗ് ഓപ്പറേറ്റർമാരെ കുറിച്ച് അന്വേഷിക്കുന്ന ഫിലിപ്പൈൻ സെനറ്റർ റിസ ഹോണ്ടിവെറോസാണ് വ്യാഴാഴ്ച ഈ വിവരം പുറത്ത് വിട്ടത്. ”ഇക്കാര്യത്തിൽ എനിക്കുണ്ടായിരുന്ന സംശയമാണ് സ്ഥിരീകരിക്കപ്പെട്ടിരിക്കുന്നത്. ‘മേയർ ആലീസ്’ ഒരു വ്യാജ ഫിലിപ്പിനോ ആണ്.
പോഗോ ( ഫിലിപ്പിൻ ഓഫ്ഷോർ ഗെയിമിംഗ് ഓപ്പറേറ്ററാണ് പോഗോ. രാജ്യത്തിന് പുറത്തുള്ള കളിക്കാർക്ക് ഓൺലൈൻ ചൂതാട്ടത്തിന് അവസരമൊരുക്കുന്ന കമ്പനികളാണിത്. ) നടത്തുന്ന കുറ്റകൃത്യങ്ങൾ സുഗമമാക്കാൻ ഫിലിപ്പിനോ പൗരത്വം ഉണ്ടെന്ന് അവകാശപ്പെടുന്ന ഒരു ചൈനീസ് പൗരയാണ് അവർ” സെനറ്റർ റിസ പുറത്തുവിട്ട പ്രസ്താവനയിൽ ആരോപിക്കുന്നു. ക്വോ വാറൻ്റോ പെറ്റീഷൻ എന്ന പേരിൽ ഒരു കേസ് വേഗത്തിൽ ഫയൽ ചെയ്യാൻ ഹോണ്ടിവേറോസ് സോളിസിറ്റർ ജനറലിൻ്റെ ഓഫീസിനോട് ആവശ്യപ്പെട്ടിട്ടുണ്ട്. പൗരത്വത്തിൻ്റെ അടിസ്ഥാനത്തിൽ ആലീസ് ഗുവോ മേയർ സ്ഥാനം വഹിക്കാൻ യോഗ്യത ഉണ്ടോ എന്ന് തീരുമാനിക്കാനാണ് പെറ്റീഷൻ.
ഫിംഗർപ്രിന്റിന്റെ ഫലങ്ങൾ പുറത്തുവന്നത് കേസ് ഫയൽ ചെയ്യുന്നത് വേഗത്തിലാക്കുമെന്നും, ജൂലൈയിൽ നിയമപരമായ നടപടി സ്വീകരിച്ചേക്കുമെന്നും ഫിലിപ്പിൻ സോളിസിറ്റർ ജനറൽ മെനാർഡോ ഗുവേര അറിയിച്ചതായി അന്തരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. മേയറുടെ ഓഫീസ് പരിധിയിൽപ്പെടുന്ന ടാർലാക് പ്രവിശ്യയിലെ പട്ടണമായ ബംബനിലെ 80,000 ചതുരശ്ര മീറ്റർ പോഗോ, അധികൃതർ റെയ്ഡ് ചെയ്തതിനെ തുടർന്നാണ് ആലീസിനെ തേടി വിമർശനങ്ങൾ എത്തി തുടങ്ങിയത്. മാർച്ചിലെ റെയ്ഡിനിടെ 700 ഓളം തൊഴിലാളികളെ രക്ഷപ്പെടുത്തുകയും അഴിമതികൾ പോലുള്ള കുറ്റകൃത്യങ്ങളുടെ തെളിവുകൾ കണ്ടെത്തുകയും ചെയ്തിരുന്നു.
റെയ്ഡിനിടെ, ബില്ലിംഗ് സ്റ്റേറ്റ്മെൻ്റും ആലീസ് ഗുവോയുടെ പേരിൽ രജിസ്റ്റർ ചെയ്ത വാഹനവും അധികൃതർ കണ്ടെത്തി. പോഗോ സൗകര്യം നിർമ്മിച്ച സ്ഥലത്തിൻ്റെ ഭാഗിക ഉടമസ്ഥത അവർക്കുണ്ടെന്നും വ്യക്തമായിരുന്നു. പ്രധാനമായും ചൈനീസ് ഉപഭോക്താക്കളെ പരിപാലിക്കുന്ന ഫിലിപ്പീൻസിൽ പ്രവർത്തിക്കുന്ന ഓൺലൈൻ ചൂതാട്ട കമ്പനികളാണ് പോഗോസ്. മനുഷ്യക്കടത്ത്, തട്ടിക്കൊണ്ടുപോകൽ, വഞ്ചന തുടങ്ങി വിവിധ ക്രിമിനൽ പ്രവർത്തനങ്ങളുമായി ഇവർ ബന്ധപ്പെട്ടിരിക്കുന്നു. ഈ സൗകര്യങ്ങളിൽ ജോലി ചെയ്യുന്ന ചൈനീസ് തൊഴിലാളികളുടെ ഉയർന്ന അളവും അവരുമായി ബന്ധപ്പെട്ട നിയമവിരുദ്ധ പ്രവർത്തനങ്ങളും സൂക്ഷ്മപരിശോധനയ്ക്കും വിമർശനത്തിനും ഇടയാക്കിയിട്ടുണ്ട്.
ബന്ധപ്പെട്ട കുറ്റകൃത്യങ്ങൾ തടയുന്നതിന് ഈ മേഖലയെ അടിച്ചമർത്താനും ശ്രമിക്കുന്നുണ്ട്. 17 വയസ്സുള്ളപ്പോൾ മാത്രമാണ് ജനന സർട്ടിഫിക്കറ്റ് രജിസ്റ്റർ ചെയ്തതെന്ന് മെയ് 7 ന് സെനറ്റ് ഹിയറിംഗിനിടെ സമ്മതിച്ചതോടെയാണ് ആലീസിന്റെ ഐഡൻ്റിറ്റിയെക്കുറിച്ചുള്ള സംശയങ്ങൾ ആദ്യം ഉയർന്നത്. വീട്ടിൽ പഠിച്ചിരുന്നതിനാൽ തനിക്ക് സ്കൂൾ രേഖകളൊന്നും ഇല്ലെന്നായിരുന്നു മേയർ വാദിച്ചത്. മേയർ സ്ഥാനത്തേക്ക് മത്സരിക്കുന്നതിന് ഒരു വർഷം മുമ്പ്, 2021-ൽ ബംബൻ പട്ടണത്തിൽ മാത്രമാണ് അവർ വോട്ട് രേഖപ്പെടുത്തിയത്. താൻ ഒരു ചൈനീസ് പൗരയാണെന്ന എല്ലാ ആരോപണങ്ങളും ആലീസ് നിഷേധിച്ചു, ചൈനക്കാരനായ അച്ഛൻ്റെയും ഫിലിപ്പിൻകാരിയായ അമ്മയുടെയും മകളാണ് താനെന്നും പിതാവിൻ്റെ കൃഷിയിടത്തിലാണ് താൻ വളർന്നതെന്നും അവർ പറഞ്ഞു. എന്നാൽ ജൂണിൽ, സെനറ്റർ ഷെർവിൻ ഗച്ചാലിയൻ, ആലിസ് ഗുവോ ചൈനയിലെ ഫുജിയാനിൽ ഗുവോ ഹുവാ പിംഗ് എന്ന പേരിൽ ജനിച്ചെന്നും 13-ാം വയസ്സിൽ ഫിലിപ്പിൻസിൽ എത്തിയെന്നും കാണിക്കുന്ന രേഖകൾ ഹാജരാക്കിയിരുന്നു.
ആലീസ് ലീൽ ഗുവോ എന്ന മറ്റൊരു സ്ത്രീയുടെ തിരിച്ചറിയൽ രേഖകൾ എൻബിഐ പിന്നീട് ഹാജരാക്കി, അവർ ടാർലാക്കിലാണ് ജനിച്ചതെന്നും മേയർ അവകാശപ്പെട്ട അതേ ജനനത്തീയതിയാണെന്നും കാണിക്കുന്നു. ഇത് ഐഡൻ്റിറ്റി മോഷണത്തിന് തെളിവാണോ എന്ന് ഹോണ്ടിവെറോസ് ചോദിക്കുന്നു. ആലീസിന്റെ ഐഡൻ്റിറ്റിയെക്കുറിച്ചുള്ള വെളിപ്പെടുത്തലുകളെത്തുടർന്ന്, മേയറുടെ ഭൂതകാലത്തിലേക്ക് തങ്ങളുടെ അന്വേഷണം തുടരുമെന്ന് സെനറ്റർ റിസ ഹോണ്ടിവെറോസ് പറഞ്ഞു.
Content summary ; philipino mayor Alice Guo, who has been accused of being a spy
