കാളപ്പോരിന് മുമ്പായി മുന്‍ കാളപ്പോരുകാരന്‍ കാളയുടെ കുത്തേറ്റ് കൊല്ലപ്പെട്ടു

സ്‌പെയ്‌നിലെ അറിയപ്പെടുന്ന മുന്‍ കാളപ്പോരുകാരന്‍(മറ്റഡോര്‍) കാളയുടെ കുത്തേറ്റ് കൊല്ലപ്പെട്ടു. മലാഗയില്‍ നടന്ന വാര്‍ഷിക കാളപ്പോരിന് മുമ്പായാണ് അപകടം ഉണ്ടായത്. മലാഗ സ്വദേശിയായ 51 കാരന്‍ റിക്കാര്‍ഡോ ഒര്‍ട്ടീസാണ് കൊല്ലപ്പെട്ടതെന്ന് പരിപാടിയുടെ സംഘാടകരായ ‘ലാന്‍സസ് ഡി ഫ്യൂച്ചറോ’ പ്രസ്താവനയിലൂടെ അറിയിച്ചു.

ശനിയാഴ്ച നടക്കാനിരുന്ന ‘കോറിഡ പിക്കാസിയാന’ എന്ന പ്രശസ്തമായ കാളപ്പോരിന് മുന്നോടിയായി തൊഴുത്തില്‍ കാളകളെ കൈകാര്യം ചെയ്യുന്നതിനിടയിലാണ് അപകടമുണ്ടായത്. ഒരു കാളയുടെ കുത്തേറ്റ ഒര്‍ട്ടീസ് സംഭവസ്ഥലത്ത് വെച്ച് തന്നെ മരണപ്പെടുകയായിരുന്നു. ഇദ്ദേഹത്തിന്റെ വിയോഗത്തില്‍ അനുശോചിച്ചും ആദരമര്‍പ്പിച്ചുമാണ് ശനിയാഴ്ചത്തെ പരിപാടികള്‍ ആരംഭിച്ചത്. ടിക്കറ്റുകള്‍ നേരത്തെ തന്നെ വിറ്റുപോയിരുന്ന മത്സരത്തിന് മുന്‍പായി ഒര്‍ട്ടീസിനായി മൗനപ്രാര്‍ത്ഥനയും ചടങ്ങുകളും സംഘടിപ്പിച്ചിരുന്നു.

പ്രശസ്ത കാളപ്പോരുകാരനായിരുന്ന മാനുവല്‍ ഒര്‍ട്ടീസ് ബെനിറ്റസിന്റെ മകനായ റിക്കാര്‍ഡോ, തൊണ്ണൂറുകളുടെ തുടക്കത്തിലാണ് മലാഗയില്‍ തന്റെ കരിയര്‍ ആരംഭിച്ചത്. സജീവമായ പോരാട്ടങ്ങളില്‍ നിന്ന് വിരമിച്ച ശേഷം അദ്ദേഹം കാളപ്പോര് സംഘടിപ്പിക്കുകയും പ്രോത്സാഹിപ്പിക്കുകയും ചെയ്യുന്ന ‘ലാന്‍സസ് ഡി ഫ്യൂച്ചറോ’ എന്ന സ്ഥാപനത്തില്‍ പ്രവര്‍ത്തിച്ചു വരികയായിരുന്നു. ലോകപ്രശസ്ത ചിത്രകാരന്‍ പാബ്ലോ പിക്കാസോയുടെ സ്മരണാര്‍ത്ഥം മലാഗയിലെ ‘പ്ലാസ ഡി ടോറോസ് ലാ മാലാഗ്വേറ്റ’ സ്റ്റേഡിയത്തിലാണ് ഈ വാര്‍ഷിക മത്സരം നടക്കാറുള്ളത്. കുട്ടിക്കാലത്ത് പിക്കാസോ പതിവായി സന്ദര്‍ശിച്ചിരുന്ന ഈ സ്റ്റേഡിയത്തിന് 9,000-ത്തിലധികം ആളുകളെ ഉള്‍ക്കൊള്ളാന്‍ ശേഷിയുണ്ട്.

സ്‌പെയിനിന്റെ പാരമ്പര്യമായി കാളപ്പോരിനെ പലരും കാണുന്നുണ്ടെങ്കിലും, അടുത്ത കാലത്തായി ഇതിന്റെ ജനപ്രീതിയില്‍ വലിയ ഇടിവ് സംഭവിച്ചിട്ടുണ്ട്. മൃഗങ്ങളോടുള്ള ക്രൂരതയാണെന്ന് ചൂണ്ടിക്കാട്ടി ഇടതുപക്ഷ പാര്‍ട്ടികളും മൃഗസംരക്ഷണ സംഘടനകളും ഇതിനെ എതിര്‍ക്കുമ്പോള്‍, സ്‌പെയിനിന്റെ സാംസ്‌കാരിക തനിമ നിലനിര്‍ത്താന്‍ ഇത് ആവശ്യമാണെന്നാണ് വലതുപക്ഷ രാഷ്ട്രീയക്കാരുടെ വാദം. ഹ്യൂമന്‍ വേള്‍ഡ് ഫോര്‍ അനിമല്‍സിന്റെ കണക്കനുസരിച്ച് പ്രതിവര്‍ഷം 1,80,000 കാളകള്‍ ഇത്തരം മത്സരങ്ങളില്‍ കൊല്ലപ്പെടുന്നുണ്ട്.

ബ്രിട്ടന്‍, കാനഡ, ഇറ്റലി തുടങ്ങിയ രാജ്യങ്ങളില്‍ കാളപ്പോര് നിരോധിച്ചിട്ടുണ്ട്. അമേരിക്കയില്‍ കാളയെ കൊല്ലുന്നത് നിയമവിരുദ്ധമാണ്. കാളപ്പോരിനിടെ പരിക്കേല്‍ക്കുന്നത് പതിവാണെങ്കിലും മനുഷ്യരുടെ മരണം അപൂര്‍വ്വമായാണ് സംഭവിക്കാറുള്ളത്. 2016-ലും 1985-ലും പ്രമുഖരായ മറ്റഡോര്‍മാര്‍ ഇത്തരത്തില്‍ കൊല്ലപ്പെട്ടിരുന്നു. 2017-ല്‍ ഫ്രാന്‍സില്‍ നടന്ന സമാനമായ അപകടത്തില്‍ ഇവാന്‍ ഫാന്‍ഡിനോ എന്ന പോരാളിയും കൊല്ലപ്പെട്ടിരുന്നു.

Content Summary: Ricardo Ortiz, A retired matador was gored to death on the eve of an annual bullfight in Malaga, spain