പോക്സോ കേസില് കേന്ദ്ര ആഭ്യന്തര സഹമന്ത്രി ബണ്ടി സഞ്ജയ് കുമാറിന്റെ മകന് ബണ്ടി സായ് ഭാഗീരഥിനെ തെലങ്കാന പോലീസ് അറസ്റ്റ് ചെയ്തു. പ്രായപൂര്ത്തിയാകാത്ത പെണ്കുട്ടിയെ ലൈംഗികമായി പീഡിപ്പിച്ചതിന് ശനിയാഴ്ച വൈകുന്നേരത്തോടെ ഇയാളെ പോലീസ് കസ്റ്റഡിയിലെടുത്തത്. വ്യാപകമായ തിരച്ചിലിനൊടുവില് ശനിയാഴ്ച രാത്രി 8.15 ഓടെയാണ് പ്രതിയെ പിടികൂടിയതെന്നും തുടര്ന്ന് പെത്ബഷീരാബാദ് പോലീസ് സ്റ്റേഷനിലേക്ക് മാറ്റിയതായും സൈബരാബാദ് പോലീസ് കമ്മീഷണര് എം. രമേഷ് മാധ്യമങ്ങളെ അറിയിച്ചു. പ്രതിയെ വൈദ്യപരിശോധനയ്ക്ക് വിധേയനാക്കിയ ശേഷം ഹൈദരാബാദിലെ പ്രാദേശിക മജിസ്ട്രേറ്റിന് മുന്നില് ഹാജരാക്കുമെന്നും കമ്മീഷണര് വ്യക്തമാക്കിയിട്ടുണ്ട്.
എന്നാല്, തന്റെ മകന് സ്വന്തം ഇഷ്ടപ്രകാരമാണ് പോലീസിന് മുന്നില് ഹാജരായതെന്നാണ് കേന്ദ്രമന്ത്രി ബണ്ടി സഞ്ജയ് കുമാറിന്റെ പ്രതികരണം. മകനെതിരെ ഉയര്ന്ന ആരോപണങ്ങളുടെ പശ്ചാത്തലത്തിലും നിയമത്തോടുള്ള ആദരവ് മുന്നിര്ത്തിയും ചോദ്യം ചെയ്യലിനായി നിയമോപദേശകന്റെ സാന്നിധ്യത്തില് മകനെ ശനിയാഴ്ച പോലീസിന് കൈമാറുകയായിരുന്നു എന്ന് മന്ത്രി പറഞ്ഞു. താന് തെറ്റൊന്നും ചെയ്തിട്ടില്ലെന്ന് മകന് ആവര്ത്തിച്ച് വ്യക്തമാക്കുന്നുണ്ടെന്നും മന്ത്രി കൂട്ടിച്ചേര്ത്തു. പരാതി ലഭിച്ച ഉടന് തന്നെ മകനെ പോലീസില് ഏല്പ്പിക്കാന് ഉദ്ദേശിച്ചിരുന്നതാണ്. എന്നാല് അഭിഭാഷകരുമായി ആലോചിക്കുകയും തങ്ങളുടെ പക്കലുള്ള തെളിവുകള് അവര്ക്ക് മുന്നില് ഹാജരാക്കുകയും ചെയ്തു. തെളിവുകള് പരിശോധിച്ച അഭിഭാഷകര് ഈ കേസ് കോടതി റദ്ദാക്കാന് സാധ്യതയുണ്ടെന്നും ജാമ്യം ഉറപ്പായും ലഭിക്കുമെന്നും ആത്മവിശ്വാസം പ്രകടിപ്പിച്ചതിനാലാണ് നടപടികളില് നേരിയ താമസമുണ്ടായതെന്നും അദ്ദേഹം വിശദീകരിച്ചു.
അറസ്റ്റിന് മുന്നോടിയായി ശനിയാഴ്ച പകല് സമയത്ത് സായ് ഭാഗീരഥിനെതിരെ തെലങ്കാന പോലീസ് ലുക്ക് ഔട്ട് സര്ക്കുലര് പുറപ്പെടുവിച്ചിരുന്നു. കൂടാതെ കരിംനഗറിലുള്ള കേന്ദ്രമന്ത്രിയുടെ വസതിയിലും, ഹൈദരാബാദിലെ ബഞ്ചാര ഹില്സിലുള്ള ബന്ധുവിന്റെ വീട്ടിലും യുസഫ്ഗുഡയിലെ സുഹൃത്തുക്കളുടെ വീടുകളിലും പോലീസ് ഒരേസമയം പരിശോധന നടത്തുകയും ചെയ്തിരുന്നു.
ഭീഷണിയും പീഡനവും: പരാതിയിലെ വിശദാംശങ്ങള്
2025 ജൂണില് പരസ്പരമുള്ള സുഹൃത്തുക്കള് വഴിയാണ് പ്രതിയും 17 വയസ്സുകാരിയായ പെണ്കുട്ടിയും പരിചയപ്പെടുന്നത്. തുടര്ന്ന് 2025 ഒക്ടോബര് മുതല് ഡിസംബര് വരെയുള്ള കാലയളവില് സായ് ഭാഗീരഥ് പെണ്കുട്ടിയെ ലൈംഗികമായി പീഡിപ്പിച്ചു എന്നാണ് കേസ്. മേയ് 8-ന് പെണ്കുട്ടിയുടെ അമ്മ പെത്ബഷീരാബാദ് പോലീസ് സ്റ്റേഷനില് നല്കിയ പരാതിയിലാണ് ക്രൂരമായ പീഡനവിവരങ്ങള് പുറത്തുവന്നത്. പ്രതി പെണ്കുട്ടിയെ നിരന്തരം ലൈംഗികമായി ചൂഷണം ചെയ്യുകയും വൈകാരികമായി ബ്ലാക്ക്മെയില് ചെയ്യുകയും ചെയ്തതായി പരാതിയില് പറയുന്നു. പെണ്കുട്ടിയെ സൗഹൃദങ്ങളില് നിന്നും മറ്റും ഒറ്റപ്പെടുത്തുകയും അവളുടെ വിദ്യാഭ്യാസ-കരിയര് സംബന്ധമായ തീരുമാനങ്ങള് പ്രതി തന്റെ നിയന്ത്രണത്തിലാക്കാന് ശ്രമിക്കുകയും ചെയ്തുവെന്നും പരാതിയിലുണ്ട്.
സ്ത്രീത്വത്തെ അപമാനിക്കല്, ലൈംഗിക അതിക്രമം, പോക്സോ നിയമത്തിലെ വിവിധ വകുപ്പുകള് എന്നിവ ചുമത്തിയാണ് പോലീസ് ആദ്യം കേസെടുത്തത്. എന്നാല് പിന്നീട് പെണ്കുട്ടിയുടെ രഹസ്യ മൊഴി രേഖപ്പെടുത്തിയതിന് ശേഷം, കൂടുതല് ഗുരുതരമായ ‘അഗ്രവേറ്റഡ് സെക്ഷ്വല് അസാള്ട്ട്’ എന്ന വകുപ്പുകൂടി പ്രതിക്കെതിരെ പോലീസ് ചുമത്തുകയായിരുന്നു.
ഹൈക്കോടതിയില് നാടകീയ രംഗങ്ങള്
അറസ്റ്റില് നിന്ന് ഇടക്കാല സംരക്ഷണം ആവശ്യപ്പെട്ട് സായ് ഭാഗീരഥ് തെലങ്കാന ഹൈക്കോടതിയെ സമീപിച്ചിരുന്നെങ്കിലും വെള്ളിയാഴ്ച രാത്രി കോടതി ഈ ആവശ്യം നിരാകരിച്ചു. കര്ശനമായ നിബന്ധനകളോടെ ഇടക്കാല മുന്കൂര് ജാമ്യം അനുവദിക്കണമെന്നും അറസ്റ്റ് തടയണമെന്നും പ്രതിഭാഗത്തിന് വേണ്ടി ഹാജരായ മുതിര്ന്ന അഭിഭാഷകന് എസ്. നിരഞ്ജന് റെഡ്ഡി വാദിച്ചെങ്കിലും കോടതി ഇത് അംഗീകരിച്ചില്ല. ഇരയായ പെണ്കുട്ടിയുടെ മൊഴി താന് വിശദമായല്ലെങ്കിലും പ്രാഥമികമായി പരിശോധിച്ചുവെന്നും ഈ ഘട്ടത്തില് പ്രതിക്ക് യാതൊരുവിധ ഇടക്കാല ഉത്തരവും നല്കാന് കഴിയില്ലെന്നും ഹര്ജി പരിഗണിച്ച ജസ്റ്റിസ് ടി. മാധവി ദേവി വ്യക്തമാക്കി. രണ്ട് മണിക്കൂറിലധികം നീണ്ട വാദപ്രതിവാദങ്ങള്ക്കൊടുവിലായിരുന്നു കോടതിയുടെ ഈ നിരീക്ഷണം.
വളരെ നാടകീയമായ രംഗങ്ങള്ക്കാണ് ഹൈക്കോടതിയിലെ വാദം കേള്ക്കല് സാക്ഷ്യം വഹിച്ചത്. ഈ ഉന്നതതല കേസുമായി ബന്ധപ്പെട്ട് ജഡ്ജിയെ ‘സ്വാധീനിക്കാന്’ ശ്രമം നടക്കുന്നുണ്ടെന്ന തരത്തില് സോഷ്യല് മീഡിയയില് വലിയ രീതിയിലുള്ള അപവാദ പ്രചാരണങ്ങള് നടക്കുന്നുണ്ടെന്ന് കോടതി ചൂണ്ടിക്കാട്ടി. ഇത്തരം പ്രചാരണങ്ങളെ ഭയന്ന് കേസ് കേള്ക്കുന്നതില് നിന്നും താന് ഒളിച്ചോടില്ലെന്നും കൃത്യമായ ഉത്തരവ് പുറപ്പെടുവിക്കുമെന്നും ജഡ്ജി വ്യക്തമാക്കി. കേസ് ഈ ബെഞ്ച് കേള്ക്കുന്നതില് എന്തെങ്കിലും വിയോജിപ്പുണ്ടോ എന്ന് പെണ്കുട്ടിയുടെ അഭിഭാഷകനോട് ജഡ്ജി ചോദിച്ചെങ്കിലും, തങ്ങള്ക്ക് പൂര്ണ്ണ വിശ്വാസമുണ്ടെന്നും കോടതിക്ക് വാദം കേള്ക്കാമെന്നുമാണ് പെണ്കുട്ടിയുടെ ഭാഗം മറുപടി നല്കിയത്.
തുടര്ന്ന് വാദം പുനരാരംഭിച്ച പ്രതിഭാഗം അഭിഭാഷകന് നിരഞ്ജന് റെഡ്ഡി, പോക്സോ കേസുകളില് മുന്പ് ഇടക്കാല മുന്കൂര് ജാമ്യം അനുവദിച്ച ചില മുന്കാല വിധികള് കോടതിക്ക് മുന്നില് ഉദ്ധരിച്ചു. ആദ്യത്തെ എഫ്.ഐ.ആറില് പെണ്കുട്ടിയുടെ ഭാഗത്ത് നിന്നും ഗുരുതരമായ പീഡനാരോപണങ്ങള് ഉണ്ടായിരുന്നില്ലെന്നും എന്നാല് പിന്നീട് നല്കിയ മൊഴിയില് പല കൂട്ടിച്ചേര്ക്കലുകളും വരുത്തിയാണ് ഗുരുതരമായ വകുപ്പുകള് ചേര്ത്തതെന്നും അദ്ദേഹം വാദിച്ചു. ആദ്യ പരാതിയില് ഇല്ലാത്ത കാര്യങ്ങള് പിന്നീട് കൂട്ടിച്ചേര്ത്തത് സംശയാസ്പദമാണെന്നും അതിന്റെ ആനുകൂല്യം പ്രതിക്ക് നല്കണമെന്നും അദ്ദേഹം ആവശ്യപ്പെട്ടു.
ഇതിനിടെ, പെണ്കുട്ടിയുടെ കുടുംബം തന്നെ ഭീഷണിപ്പെടുത്തി പണം തട്ടാന് ശ്രമിക്കുകയാണെന്ന് കാണിച്ച് സായ് ഭാഗീരഥും പോലീസില് ഒരു പരാതി നല്കിയിട്ടുണ്ട്. പെണ്കുട്ടിയെ വിവാഹം കഴിക്കണമെന്നും അല്ലെങ്കില് 5 കോടി രൂപ നല്കണമെന്നും ആവശ്യപ്പെട്ട് പെണ്കുട്ടിയുടെ കുടുംബം തന്നെ നിര്ബന്ധിക്കുകയാണെന്നാണ് പ്രതിയുടെ ആരോപണം.
എന്നാല് ഇരയായ പെണ്കുട്ടി പ്രായപൂര്ത്തിയാകാത്ത ആളാണെന്നും പോക്സോ കേസില് മുന്കൂര് ജാമ്യം അനുവദിക്കുന്ന പ്രശ്നമേ ഉദിക്കുന്നില്ലെന്നും പ്രോസിക്യൂഷന് ശക്തമായി വാദിച്ചു. പ്രതി അതീവ സ്വാധീനമുള്ള രാഷ്ട്രീയ പശ്ചാത്തലത്തില് നിന്നുള്ളയാളാണെന്ന് ചൂണ്ടിക്കാണിച്ച പ്രോസിക്യൂഷന്, പ്രതി പുറത്തിറങ്ങിയാല് ഇരയായ പെണ്കുട്ടിയുടെയും കുടുംബത്തിന്റെയും മനസ്സിലുണ്ടാകുന്ന ഭയവും സുരക്ഷിതത്വമില്ലായ്മയും കോടതി കണക്കിലെടുക്കണമെന്നും ആവശ്യപ്പെട്ടു. ഈ വാദങ്ങള് കൂടി പരിഗണിച്ചാണ് ഹൈക്കോടതി പ്രതിയുടെ ഹര്ജി തള്ളിയതും തൊട്ടുപിന്നാലെ ശനിയാഴ്ച രാത്രിയോടെ പോലീസ് അറസ്റ്റിലേക്ക് നീങ്ങിയതും.
Content Summary: Union Minister Bandi Sanjay Kumar’s son, Bandi Sai Bhageerath, has been arrested by Telangana police in a POCSO case
This post was last modified on May 17, 2026 9:23 am
Leave a Comment