മിഡില് ഈസ്റ്റിലെ സംഘര്ഷങ്ങള്ക്കിടയിലും സുരക്ഷിത താവളമെന്ന് ലോകം വിശ്വസിച്ചിരുന്ന ദുബായി ഉള്പ്പെടെ, ഗള്ഫ് രാഷ്ട്രങ്ങളുടെ ആത്മവിശ്വാസം തകര്ക്കുകയാണ് യുഎസ്-ഇസ്രയേല്- ഇറാന് യുദ്ധം. യുദ്ധം തുടങ്ങിയശേഷം ഈ മാസം ദുബായ് മാളിലൂടെ യുഎഇ പ്രസിഡന്റ് ഷെയ്ഖ് മുഹമ്മദ് ബിന് സായിദ് നടത്തിയ സന്ദര്ശനം ജനങ്ങള്ക്ക് ആത്മവിശ്വാസം നല്കാന് ലക്ഷ്യമിട്ടുള്ളതായിരുന്നു. പക്ഷേ, യാഥാര്ത്ഥ്യം ഭയാനകമാണെന്നാണ് ദി വാള്സ്ട്രീറ്റ് ജേര്ണല് അവരുടെ റിപ്പോര്ട്ടിലൂടെ പങ്കുവയ്ക്കുന്ന വിവരം.
ഇനിയും ‘സുരക്ഷിത താവളം’ ആണോ?
ലോകത്തിലെ ഏറ്റവും വലിയ സാമ്പത്തിക കേന്ദ്രങ്ങളിലൊന്ന് എന്ന ഇമേജ് ദുബായ് കൊണ്ടു നടക്കുന്നത്, ‘ മിഡില് ഈസ്റ്റില് സംഘര്ഷങ്ങള് ബാധിക്കാത്ത ഒരിടം’ എന്ന ലേബലിലായിരുന്നു. എന്നാല് കഴിഞ്ഞദിവസങ്ങളില് ബുര്ജ് അല് അറബ് ഹോട്ടലിനും ദുബായ് തുറമുഖത്തിനും നേരെയുണ്ടായ മിസൈല്-ഡ്രോണ് ആക്രമണങ്ങള് ഈ വിശ്വാസത്തെ തകര്ത്തു. ഉയരമുള്ള കെട്ടിടങ്ങളോ സാമ്പത്തിക ശക്തിയോ ആധുനിക ആയുധങ്ങളോ ഇറാന്റെ ആക്രമണങ്ങളില് നിന്ന് തങ്ങളെ പൂര്ണമായി സംരക്ഷിക്കില്ലെന്ന് ഗള്ഫ് രാഷ്ട്രങ്ങള് തിരിച്ചറിഞ്ഞു തുടങ്ങിയിരിക്കുന്നു.
സാമ്പത്തിക പ്രത്യാഘാതങ്ങള്
യുദ്ധം തുടങ്ങിയതോടെ ആഗോള നിക്ഷേപകര് തങ്ങളുടെ പണം കൂടുതല് സുരക്ഷിതമായ മേഖലകളിലേക്ക് മാറ്റാന് ശ്രമിക്കുകയാണ്. റിയല് എസ്റ്റേറ്റ് ഇടപാടുകള് മരവിപ്പിക്കപ്പെട്ടു. സിംഗപ്പൂര് പോലുള്ള രാജ്യങ്ങളിലെ നിയമ സ്ഥാപനങ്ങളിലേക്ക് ദുബായില് നിന്ന് ആസ്തികള് മാറ്റുന്നതിനെക്കുറിച്ചുള്ള അന്വേഷണങ്ങള് പ്രവഹിക്കുകയാണ്. ‘മിഡില് ഈസ്റ്റിലല്ല’ എന്ന തോന്നല് ഉണ്ടാക്കി നിക്ഷേപകരെ ആകര്ഷിച്ചിരുന്ന യുഎഇക്ക്, തങ്ങള് ലോകത്തിലെ ഏറ്റവും അസ്ഥിരമായ ഒരു മേഖലയിലാണ് ജീവിക്കുന്നതെന്ന ബോധ്യം ഇപ്പോള് തിരികെ വന്നിരിക്കുന്നു.
സൗദിയും ഖത്തറും നേരിടുന്ന പ്രതിസന്ധി
സൗദി അറേബ്യയുടെ ‘വിഷന് 2030’ പദ്ധതിയെയും യുദ്ധം സാരമായി ബാധിച്ചിട്ടുണ്ട്. വിദേശ നിക്ഷേപകരെ ആശ്രയിച്ച് നടപ്പിലാക്കുന്ന വമ്പന് ടൂറിസം-വിനോദ പദ്ധതികള്ക്ക് മേഖലയിലെ ഈ അരക്ഷിതാവസ്ഥ വലിയ വെല്ലുവിളിയാണ്. ഖത്തറാകട്ടെ തങ്ങളുടെ വിമാനത്താവളങ്ങള് നിയന്ത്രിക്കാനും പ്രകൃതിവാതക കയറ്റുമതി താല്ക്കാലികമായി നിര്ത്താനും നിര്ബന്ധിതരായിരിക്കുന്നു. കുവൈറ്റ്, ബഹ്റൈന് തുടങ്ങിയ രാജ്യങ്ങളും നിക്ഷേപം ആകര്ഷിക്കാന് പാടുപെടുകയാണ്.
ഒഴിഞ്ഞുപോക്ക്
ദുബായിലെ ആഡംബര ജീവിതം ആസ്വദിച്ചിരുന്ന പല വിദേശികളും ഇപ്പോള് നഗരം വിടുകയാണ്. യുദ്ധവിമാനങ്ങളുടെ ശബ്ദവും സ്ഫോടനങ്ങളും തങ്ങളെ ഭയപ്പെടുത്തുന്നതായി വിദേശ നിക്ഷേപകര് സാക്ഷ്യപ്പെടുത്തുന്നു. കെപിഎംജി , ഗൂഗിള് തുടങ്ങിയ ആഗോള കമ്പനികള് തങ്ങളുടെ ജീവനക്കാരെ ദുബായില് നിന്ന് ഒഴിപ്പിച്ചു കഴിഞ്ഞു. പല ബാങ്കുകളും ജീവനക്കാരോട് വീട്ടിലിരുന്ന് ജോലി ചെയ്യാന് നിര്ദ്ദേശിച്ചു. വിനോദസഞ്ചാര മേഖലയിലും വന് ഇടിവ് രേഖപ്പെടുത്തിയിട്ടുണ്ട്. ഈ വര്ഷം അന്താരാഷ്ട്ര സഞ്ചാരികളുടെ എണ്ണത്തില് 27% വരെ കുറവുണ്ടാകുമെന്നും ഇത് 56 ബില്യണ് ഡോളറിന്റെ നഷ്ടത്തിന് കാരണമാകുമെന്നും കണക്കാക്കപ്പെടുന്നു.
ഭാവി വെല്ലുവിളികള്
ഇറാന് ആക്രമണങ്ങള് അവസാനിപ്പിച്ചാല് പോലും, തൊട്ടടുത്ത് (വെറും 80 മൈല് അകലെ) ആയുധസജ്ജമായ ഒരു രാജ്യം ശത്രുവായി നില്ക്കുന്നത് ദുബായിയെപ്പോലുള്ള നഗരങ്ങളുടെ വളര്ച്ചയ്ക്ക് വലിയ തടസ്സമാകും. വിദേശികളെ ആകര്ഷിക്കാന് നടപ്പിലാക്കിയ ഉദാരമായ നിയമങ്ങളും ആഡംബര സൗകര്യങ്ങളും മാത്രം ഇനി നിക്ഷേപകരെ പിടിച്ചുനിര്ത്താന് പര്യാപ്തമാകില്ല. ഇസ്രയേലിനെപ്പോലെ ബങ്കറുകളോ കൃത്യമായ അലേര്ട്ട് സംവിധാനങ്ങളോ ഇല്ലാത്ത ഗള്ഫ് നഗരങ്ങള് യുദ്ധത്തെ നേരിടാന് സജ്ജമല്ലെന്നതും ആശങ്ക വര്ദ്ധിപ്പിക്കുന്നു.
ശുഭാപ്തി വിശ്വാസം
എങ്കിലും, യുഎഇ ഭരണകൂടം ശുഭാപ്തിവിശ്വാസം കൈവിടുന്നില്ല. ഈ പ്രതിസന്ധിയെ അതിജീവിക്കുമെന്നും ടൂറിസവും ബിസിനസ്സും പൂര്വ്വാധികം ശക്തിയോടെ തിരിച്ചുവരുമെന്നും അധികൃതര് അവകാശപ്പെടുന്നു. എന്നാല് നിക്ഷേപകരുടെ മനസ്സില് പടര്ന്ന ഭീതി അത്ര പെട്ടെന്ന് മാഞ്ഞുപോകില്ലെന്നാണ് സാമ്പത്തിക വിദഗ്ധരുടെ വിലയിരുത്തല്.
Content Summary: As the Iran war shatters the Gulf nations’ claim of being a ‘safe haven. Dubai is in fear due to Iran’s missile and drone strikes
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
