തെക്കുപടിഞ്ഞാറൻ മൺസൂൺ വീണ്ടും ശക്തിപ്രാപിച്ചതോടെ ഇന്ത്യയുടെ വടക്കുകിഴക്കൻ സംസ്ഥാനങ്ങളും ഹിമാലയൻ മേഖലയിലെ സംസ്ഥാനങ്ങളും അതീവ ജാഗ്രതയിലാണ്. ഏറ്റവും ഗുരുതരമായ പ്രതിസന്ധി അസമിലാണ്. ബ്രഹ്മപുത്രയും പ്രധാന പോഷകനദികളും കരകവിഞ്ഞൊഴുകിയതോടെ സംസ്ഥാനത്തെ 12 ജില്ലകളിൽ ഏഴ് ലക്ഷത്തിലധികം ആളുകൾ പ്രളയക്കെടുതിയിലാണ്. കഴിഞ്ഞ 24 മണിക്കൂറിനിടെ 14 പേർ കൂടി മരിച്ചതോടെ പ്രളയത്തിലും മണ്ണിടിച്ചിലിലും മരിച്ചവരുടെ എണ്ണം 62 ആയി. 810 ഗ്രാമങ്ങൾ വെള്ളത്തിനടിയിലായപ്പോൾ 34,970 ഹെക്ടറിലധികം കൃഷിയിടം നശിച്ചു.
അതേസമയം, ജമ്മു-കശ്മീർ, ഹിമാചൽ പ്രദേശ്, ഉത്തരാഖണ്ഡ്, ബിഹാർ, പശ്ചിമ ബംഗാൾ, സിക്കിം, അരുണാചൽ പ്രദേശ്, മേഘാലയ, നാഗാലാൻഡ് തുടങ്ങി ഉത്തരേന്ത്യയിലെയും വടക്കുകിഴക്കൻ ഇന്ത്യയിലെയും നിരവധി സംസ്ഥാനങ്ങളിൽ ശക്തമായ മഴ തുടരുകയാണ്. അടുത്ത അഞ്ച് ദിവസവും കനത്തതോ അതിതീവ്രമായതോ ആയ മഴയ്ക്കും വെള്ളപ്പൊക്കത്തിനും മണ്ണിടിച്ചിലിനും സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് (IMD) മുന്നറിയിപ്പ് നൽകിയതോടെ വിവിധ സംസ്ഥാനങ്ങൾ ദുരന്തനിവാരണ സംവിധാനങ്ങൾ സജ്ജമാക്കിയിരിക്കുകയാണ്.
ഏറ്റവും നാശനഷ്ടം അസമിൽ
- 62 മരണങ്ങൾ റിപ്പോർട്ട് ചെയ്തു.
- 7.05 ലക്ഷത്തിലധികം ആളുകൾ പ്രളയബാധിതർ.
- 12 ജില്ലകളിൽ പ്രളയത്തിന്റെ ആഘാതം തുടരുന്നു.
- 810 ഗ്രാമങ്ങൾ വെള്ളത്തിനടിയിൽ
- 34,970.8 ഹെക്ടർ കൃഷി നശിച്ചു
- ആയിരക്കണക്കിന് ആളുകൾ ദുരിതാശ്വാസ ക്യാമ്പുകളിൽ
- റോഡുകൾ, പാലങ്ങൾ, വൈദ്യുതി, കുടിവെള്ള സംവിധാനം ഉൾപ്പെടെയുള്ള അടിസ്ഥാന സൗകര്യങ്ങൾക്ക് വ്യാപക നാശനഷ്ടം
ബ്രഹ്മപുത്ര, സുബൻസിരി, ധാൻസിരി, ദിസാങ് തുടങ്ങിയ പ്രധാന നദികളിലെ ജലനിരപ്പ് ഇപ്പോഴും അപകടനിരപ്പിന് മുകളിലാണ്. പല പ്രദേശങ്ങളിലും വെള്ളം പതുക്കെ ഇറങ്ങിത്തുടങ്ങിയെങ്കിലും പുതിയ മഴ മുന്നറിയിപ്പ് രക്ഷാപ്രവർത്തനങ്ങൾക്ക് വെല്ലുവിളിയാകുകയാണ്.
ലോകപൈതൃക പട്ടികയിലുള്ള കാസിരംഗ ദേശീയോദ്യാനത്തിന്റെ വലിയൊരു ഭാഗം വെള്ളത്തിനടിയിലാണ്. താഴ്ന്ന പ്രദേശങ്ങൾ മുങ്ങിയതോടെ കാണ്ടാമൃഗങ്ങൾ, ആനകൾ, കാട്ടുപോത്തുകൾ, മാൻവർഗങ്ങൾ തുടങ്ങിയ വന്യമൃഗങ്ങൾ ഉയർന്ന പ്രദേശങ്ങളിലേക്ക് നീങ്ങുകയാണ്. ദേശീയപാത 715-ൽ വാഹനങ്ങൾക്ക് വേഗപരിധി ഏർപ്പെടുത്തിയിട്ടുണ്ട്. വന്യജീവികളുടെ സുരക്ഷയ്ക്കായി വനംവകുപ്പ് പ്രത്യേക നിരീക്ഷണവും പട്രോളിംഗും ശക്തമാക്കിയിട്ടുണ്ട്.
സുരക്ഷിതസ്ഥാനത്തേക്ക് മാറ്റുന്നു
അസമിലെ സ്ഥിതി വിലയിരുത്താൻ കേന്ദ്ര സർക്കാർ ഇന്റർ-മിനിസ്റ്റീരിയൽ സംഘത്തെ നിയോഗിച്ചിട്ടുണ്ട്. സംഘം പ്രളയബാധിത ജില്ലകൾ സന്ദർശിച്ച് നാശനഷ്ടങ്ങൾ വിലയിരുത്തുകയും കേന്ദ്രസർക്കാരിന് റിപ്പോർട്ട് സമർപ്പിക്കുകയും ചെയ്യും.
പ്രധാനമന്ത്രി നരേന്ദ്ര മോദി അസം മുഖ്യമന്ത്രി ഹിമന്ത ബിശ്വ ശർമയുമായി ടെലിഫോണിൽ സംസാരിച്ച് സ്ഥിതിഗതികൾ വിലയിരുത്തി. രക്ഷാപ്രവർത്തനങ്ങൾക്കും പുനരധിവാസത്തിനും കേന്ദ്രത്തിന്റെ പൂർണ പിന്തുണ ഉറപ്പുനൽകിയതായി പ്രധാനമന്ത്രിയുടെ ഓഫീസ് അറിയിച്ചു.
സംസ്ഥാന സർക്കാർ, എൻഡിആർഎഫ്, എസ്ഡിആർഎഫ്, സൈന്യം, വ്യോമസേന, പ്രാദേശിക ഭരണകൂടം എന്നിവയുടെ നേതൃത്വത്തിൽ രക്ഷാപ്രവർത്തനങ്ങൾ തുടരുകയാണ്. ദുരിതാശ്വാസ ക്യാമ്പുകൾ, ഭക്ഷണ വിതരണം, മെഡിക്കൽ ക്യാമ്പുകൾ, കുടിവെള്ള വിതരണം, ബോട്ട് സർവീസുകൾ എന്നിവയും ശക്തമാക്കിയിട്ടുണ്ട്.
അരുണാചൽ, മേഘാലയ, നാഗാലാൻഡ്
അരുണാചൽ പ്രദേശിൽ കനത്ത മഴയെ തുടർന്ന് നിരവധി നദികൾ കരകവിഞ്ഞൊഴുകുകയാണ്. മലമ്പ്രദേശങ്ങളിൽ മണ്ണിടിച്ചിലും റോഡ് ഗതാഗത തടസ്സവും റിപ്പോർട്ട് ചെയ്തിട്ടുണ്ട്. ചില ജില്ലകളിൽ ദേശീയപാതകളിൽ ഗതാഗതം ഭാഗികമായി തടസ്സപ്പെട്ടു.
മേഘാലയയിൽ കനത്ത മഴ തുടരുന്നതിനാൽ ഷില്ലോങ് ഉൾപ്പെടെയുള്ള പ്രദേശങ്ങളിൽ വെള്ളക്കെട്ട് രൂപപ്പെട്ടു. നാഗാലാൻഡിലെ മലഞ്ചെരിവുകളിൽ മണ്ണിടിച്ചിൽ റിപ്പോർട്ട് ചെയ്തതോടെ ചില ഗ്രാമങ്ങളിലേക്കുള്ള ഗതാഗതം താൽക്കാലികമായി നിലച്ചു.
ഹിമാചൽ പ്രദേശിൽ ആശങ്കാജനകം
ഹിമാചൽ പ്രദേശിൽ മൺസൂൺ വീണ്ടും ശക്തിപ്രാപിച്ചതോടെ സ്ഥിതി ആശങ്കാജനകമാണ്. 134 റോഡുകൾ അടച്ചിട്ടു. ഷിംല, മാണ്ഡി, കാംഗ്ര, സിർമൗർ ജില്ലകളിൽ കനത്ത മഴ മുന്നറിയിപ്പ് നൽകിയിട്ടുണ്ട്. മലയോര മേഖലകളിൽ മണ്ണിടിച്ചിൽ സാധ്യത വർധിച്ചു. ചെറുനദികളിലും മലവെള്ളച്ചാലുകളിലും ജലനിരപ്പ് ഉയരുകയാണ്. സംസ്ഥാന ദുരന്തനിവാരണ സേനയും പൊതുമരാമത്ത് വകുപ്പും റോഡുകൾ പുനഃസ്ഥാപിക്കുന്ന പ്രവർത്തനങ്ങൾ തുടരുകയാണ്.
ഉത്തരാഖണ്ഡിലും ജമ്മു-കശ്മീരിലും ജാഗ്രത
ഉത്തരാഖണ്ഡിൽ ചാർധാം തീർഥാടന പാതകളിൽ മണ്ണിടിച്ചിൽ സാധ്യത നിലനിൽക്കുന്നതിനാൽ യാത്രക്കാർക്ക് പ്രത്യേക ജാഗ്രതാ നിർദേശം നൽകിയിട്ടുണ്ട്. ബദ്രിനാഥ്, കേദാർനാഥ്, യമുനോത്രി, ഗംഗോത്രി റൂട്ടുകളിൽ കാലാവസ്ഥാ മുന്നറിയിപ്പുകൾ നിരന്തരം നിരീക്ഷിക്കണമെന്ന് അധികൃതർ നിർദേശിച്ചു.
ജമ്മു-കശ്മീരിൽ താഴ്ന്ന പ്രദേശങ്ങളിൽ വെള്ളക്കെട്ടിനും മലമ്പ്രദേശങ്ങളിൽ മണ്ണിടിച്ചിലിനും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു.
ബിഹാർ, പശ്ചിമ ബംഗാൾ, സിക്കിം
ബിഹാറിൽ ഗംഗ, കോസി, ഗണ്ഡക് നദികളിലെ ജലനിരപ്പ് ഉയരുന്ന സാഹചര്യത്തിൽ നദീതീര ജില്ലകൾ ജാഗ്രതയിലാണ്. താഴ്ന്ന പ്രദേശങ്ങളിലുള്ള കുടുംബങ്ങളെ ആവശ്യമെങ്കിൽ മാറ്റിപ്പാർപ്പിക്കാൻ ജില്ലാ ഭരണകൂടങ്ങൾക്ക് നിർദേശം നൽകിയിട്ടുണ്ട്.
പശ്ചിമ ബംഗാളിലെ ഉത്തരബംഗാൾ ജില്ലകളായ ജൽപായ്ഗുരി, അലിപുർദുവാർ, ദാർജിലിങ് എന്നിവിടങ്ങളിൽ ശക്തമായ മഴ തുടരുകയാണ്. സിക്കിമിൽ മലവെള്ളപ്പാച്ചിലും മണ്ണിടിച്ചിലും ഉണ്ടാകാൻ സാധ്യതയുള്ളതിനാൽ വിനോദസഞ്ചാരികൾക്ക് മുന്നറിയിപ്പ് നൽകിയിട്ടുണ്ട്.
അടുത്ത 5 ദിവസം മഴ കനക്കും
ഇന്ത്യൻ കാലാവസ്ഥാ വകുപ്പിന്റെ വിലയിരുത്തൽ പ്രകാരം നിലവിൽ മൺസൂൺ ട്രഫ് സജീവമാണ്. ബംഗാൾ ഉൾക്കടലിൽ നിന്നുള്ള ഈർപ്പമുള്ള കാറ്റും ഹിമാലയൻ മേഖലയിലെ ഭൂപ്രകൃതിയും ചേർന്നാണ് വടക്കുകിഴക്കൻ ഇന്ത്യയിലും ഉത്തരേന്ത്യയിലും ശക്തമായ മഴയ്ക്ക് സാഹചര്യമൊരുക്കുന്നത്. അടുത്ത അഞ്ച് ദിവസവും അസം, മേഘാലയ, അരുണാചൽ പ്രദേശ്, നാഗാലാൻഡ്, മണിപ്പൂർ, മിസോറം, ത്രിപുര എന്നിവിടങ്ങളിൽ ശക്തമായ മഴയ്ക്ക് സാധ്യതയുണ്ടെന്ന് ഐ.എം.ഡി മുന്നറിയിപ്പ് നൽകുന്നു. ഹിമാചൽ പ്രദേശ്, ഉത്തരാഖണ്ഡ്, ജമ്മു-കശ്മീർ എന്നിവിടങ്ങളിൽ മണ്ണിടിച്ചിൽ സാധ്യതയുണ്ടെന്നും മുന്നറിയിപ്പുണ്ട്. ബിഹാർ, പശ്ചിമ ബംഗാൾ, സിക്കിം എന്നിവിടങ്ങളിൽ ഒറ്റപ്പെട്ട അതിശക്തമായ മഴയ്ക്കും സാധ്യത.
മലയോര മേഖലയിലേക്കുള്ള അനാവശ്യ യാത്രകൾ ഒഴിവാക്കണമെന്ന് വിവിധ സംസ്ഥാന ഭരണകൂടങ്ങൾ നിർദേശിച്ചിട്ടുണ്ട്. നദീതീരങ്ങളിൽ താമസിക്കുന്നവർ ജലനിരപ്പ് സംബന്ധിച്ച മുന്നറിയിപ്പുകൾ കൃത്യമായി പാലിക്കണമെന്നും, മണ്ണിടിച്ചിൽ സാധ്യതയുള്ള പ്രദേശങ്ങളിൽ രാത്രികാല യാത്ര ഒഴിവാക്കണമെന്നും അധികൃതർ നിർദേശിച്ചു.
Content Summary: Heavy monsoon rains have triggered severe flooding in Assam, affecting over 700,000 people across 12 districts and causing widespread damage to villages, agriculture, roads, and infrastructure. The Brahmaputra and its tributaries continue to flow above danger levels, while Kaziranga National Park remains inundated.
