പൊതുവെ ശാന്തമായ സാൻ ഫ്രാൻസിസ്കോ ബേ ഏരിയ നഗരം ഇപ്പോൾ അപ്രതീക്ഷിതമായ ഭീതിയുടെ നിഴലിലാണ്. കണ്ടാൽ പാവം എന്ന് തോന്നുന്ന ഒരണ്ണാൻ ആളുകളെ ഓടിനടന്ന് ആക്രമിക്കാൻ തുടങ്ങിയതാണ് നഗരവാസികൾക്ക് പുറത്തിറങ്ങാൻ പോലും ഭയമുണ്ടാക്കുന്നത്. ഈ അക്രമകാരിയുടെ ആക്രമണത്തിൽ പരിക്കേറ്റ് രണ്ട് പേർ നിലവിൽ ആശുപത്രിയിൽ ചികിത്സ തേടിയിട്ടുണ്ട്. അപകടത്തിൻ്റെ പശ്ചാത്തലത്തിൽ, നഗരവാസികൾ അതീവ ജാഗ്രത പാലിക്കണമെന്ന് അധികൃതർ നിർദ്ദേശം നൽകി. നഗരത്തിലുടനീളമുള്ള മുന്നറിയിപ്പ് ബോർഡുകളിൽ “അണ്ണാൻ ആക്രമണം, സൂക്ഷിക്കുക!!!!!” എന്നും, “ഇതൊരു തമാശയല്ല” എന്നും കുറിച്ചിരിക്കുന്നു.
എ.ബി.സി. ന്യൂസ് റിപ്പോർട്ട് അനുസരിച്ച്, ഈ അണ്ണാൻ ഇതുവരെ കുറഞ്ഞത് അഞ്ച് പേരെയാണ് ആക്രമിച്ചിട്ടുള്ളത്. ആക്രമിക്കപ്പെട്ടവർ പറയുന്നത്, ഈ മൃഗം നേരെ മുഖത്തേക്ക് ചാടി ആക്രമിക്കുകയായിരുന്നു എന്നാണ്. ലൂക്കാസ് വാലിയിൽ ആക്രമിക്കപ്പെട്ട ഇസബെൽ കാംപോയ് എന്ന യുവതിയുടെ വാക്കുകൾ ആ ഭീകരത വ്യക്തമാക്കുന്നു.
“അവൾ എന്നെ കൊല്ലാൻ ശ്രമിച്ചു. അണ്ണാൻ തറയിൽ നിന്ന് നേരെ എൻ്റെ മുഖത്തേക്ക് ചാടി. എനിക്ക് മുഴുവൻ രക്തമായി, ഞാൻ ഉടൻ തന്നെ അവിടെ നിന്ന് ഓടി രക്ഷപെട്ടു.” നിരുപദ്രവകാരിയെന്ന് തോന്നിക്കുന്ന ഒരണ്ണാൻ ഇത്രയധികം ഭീകരത സൃഷ്ടിക്കുന്നതിലുള്ള ആശ്ചര്യം സോഷ്യൽ മീഡിയയിൽ വലിയ ചർച്ചയാണ്. പലരും തങ്ങളുടെ അനുഭവങ്ങൾ പങ്കുവെച്ചതോടെ അണ്ണാൻ ഇപ്പോൾ നെറ്റിസൺസിനിടയിൽ ‘ചെറിയ ഭൂതം’ എന്ന പേരിലാണ് അറിയപ്പെടുന്നത്.
“ഇതാരോ വളർത്താൻ ശ്രമിച്ച അണ്ണാൻ ആയിരിക്കും. എനിക്കറിയാവുന്ന ഒരാൾക്ക് വളർത്തു അണ്ണാൻ ഉണ്ടായിരുന്നു, അതൊരു ചെറിയ ഭൂതമായിരുന്നു. ഞാൻ കഴിച്ചുകൊണ്ടിരുന്ന ഒരു പിയറിനു വേണ്ടി അത് എന്നെ പലതവണ ആക്രമിച്ചിട്ടുണ്ട്,” ഒരു ഉപയോക്താവ് കുറിച്ചു.
“വന്യജീവികൾക്ക് ഭക്ഷണം നൽകുന്നത് നിർത്തണം. ഞാൻ ഗോൾഫ് കോഴ്സിലാണ് ജോലി ചെയ്തിരുന്നത്. അവിടെ കാട്ടിൽ നിന്ന് ഒരു ഭ്രാന്തൻ അണ്ണാൻ ചാടി പുറത്തുവരുന്നത് പതിവായിരുന്നു,” മറ്റൊരാൾ അഭിപ്രായപ്പെട്ടു.
സാൻ ഫ്രാൻസിസ്കോയിലെ അണ്ണാൻ ആക്രമണ വാർത്ത പുറത്തുവന്നതോടെ 2019-ൽ അലബാമയിൽ നടന്ന സമാനമായ ഒരു കേസും വീണ്ടും ചർച്ചയായി. മിക്കി പോൾക്ക് എന്നയാൾ, മെത്ത് (Methamphetamine) നൽകി ‘ആക്രമണകാരി അണ്ണാനെ’ പരിശീലിപ്പിച്ചതിന് അറസ്റ്റിലായിരുന്നു.
വന്യമൃഗത്തെ കൈവശം വെച്ചതിനും, മോഷ്ടിച്ച വസ്തുക്കൾ കൈവശം വെച്ചതിനും, തോക്ക് കൈവശം വെച്ചതിനും പോൾക്കിനെതിരെ കേസെടുത്തു. പിന്നീട് മെത്താംഫെറ്റാമൈൻ കടത്തിയതിനും കുട്ടിയെ രാസപരമായ അപകടത്തിലാക്കിയതിനും ഉൾപ്പെടെ ഇയാൾക്കെതിരെ കൂടുതൽ കുറ്റങ്ങൾ ചുമത്തിയിരുന്നു. ഈ അണ്ണാൻ ആക്രമണത്തിൻ്റെ പിന്നിലെ യഥാർത്ഥ കാരണം കണ്ടെത്താനുള്ള ശ്രമത്തിലാണ് അധികൃതർ.
content summary: ‘Attack Squirrel’ Panic Grips San Francisco
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
