ദാന ചുഴലിക്കാറ്റ് ബംഗാൾ തീരങ്ങളിൽ അതിവേഗത്തിൽ ശക്തി പ്രാപിക്കുന്നു. ഇത് 25 തിയതിയോടെ പശ്ചിമ ബംഗാൾ ഒഡിഷ തീരങ്ങളിലെത്തുകയും വലിയ മഴക്കും രൂക്ഷമായ കാലാവസ്ഥയുണ്ടാകാനും കാരണമാകുമെന്ന് കാലാവസ്ഥ നിരീക്ഷണ കേന്ദ്രം പറയുന്നു. കാറ്റിൻ്റെ വേഗത മണിക്കൂറിൽ 120 കിലോമീറ്റർ വരെയാകുമെന്നാണ് മുന്നറിയിപ്പ്. മൽസ്യത്തൊഴിലാളികൾ ഒരു കാരണവശാലും കടലിൽ പോകരുതെന്ന് കാലാവസ്ഥ വകുപ്പ് മുന്നറിയിപ്പ് നൽകിയിട്ടുണ്ട്. കോസ്റ്റ് ഗാർഡ് വളരെയധികം ജാഗ്രത പുലർത്തുകയാണ്. റെയിൽ ഗതാഗതവും തടസ്സപ്പെട്ട അവസ്ഥയിലാണ് നിലവിൽ.
ചുഴലിക്കാറ്റിൻറെ പശ്ചാത്തലത്തിൽ 152 ട്രെയിനുകളാണ് റദ്ദാക്കിയത്. കേരളത്തിലേക്കും കന്യാകുമാരിയിലേക്കുമുള്ള ട്രെയിനുകളും റദ്ദാക്കിയിട്ടുണ്ട്. 24നുള്ള പാട്ന-എറണാകുളം എക്സ്പ്രസ് (22644), 23നുള്ള ദിബ്രൂഗഡ്-കന്യാകുമാരി (22504) തുടങ്ങിയ ട്രെയിനുകൾ ഉൾപ്പെടെയാണ് റദ്ദാക്കിയത്. ചുഴലിക്കാറ്റിനെ തുടർന്ന് ബംഗാളിലെ ഏഴ് ജില്ലകളിലെ വിദ്യാഭ്യാസ സ്ഥാപനങ്ങൾക്ക് ഒക്ടോബർ 23 മുതൽ ഒക്ടോബർ 26 വരെ അവധി പ്രഖ്യാപിച്ചു. ബംഗാളിലെ കിഴക്കൻ മിഡ്നാപൂർ, നോർത്ത് സൗത്ത് 24 പർഗാനകളെയും ചുഴലിക്കാറ്റ് കാര്യമായി ബാധിക്കും.
ചുഴലിക്കാറ്റിനോടനുബന്ധിച്ച് ഒഡിഷയിലും സമീപസംസ്ഥാനങ്ങളിലും അതിതീവ്ര മഴയ്ക്കും സാധ്യതയുണ്ട്. പുരി, ഗൻജാം, ഖോർദിയ, നയാഗഡ്, കിയോൻജർ, അൻഗുൽ, ധെൻകനാൽ, ഭദ്രക്, ബാലാസോർ, മയൂർഭഞ്ജ് ജില്ലകളിൽ 24, 25 തീയതികളിൽ അതിശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. 150 എൻഡിആർഎഫ് സേനാംഗങ്ങളുമായി വ്യോമസേനയുടെ പ്രത്യേക വിമാനം ഭുവനേശ്വറിലെത്തി. ഒഡീഷയിൽ അയ്യായിരത്തിലധികം ദുരിതാശ്വാസ ക്യാമ്പുകൾ സജ്ജമാക്കിയിട്ടുണ്ട്.
10 ലക്ഷത്തിലധികം ആളുകളെ മാറ്റിപ്പാർപ്പിക്കാനുള്ള സജ്ജീകരണങ്ങളും ഒരുക്കിയിട്ടുണ്ട്.തമിഴ്‌നാട്ടിലെയും പുതുച്ചേരിയിലെയും 9 തുറമുഖങ്ങളിൽ ചുഴലിക്കാറ്റ് മുന്നറിയിപ്പ് പ്രഖ്യാപിച്ചിട്ടുണ്ട്. ചെന്നൈ, കടലൂർ, നാഗപട്ടണം, എന്നൂർ, കാട്ടുപള്ളി, പാമ്പൻ, തൂത്തുക്കുടി, പുതുച്ചേരി, കാരയ്ക്കൽ എന്നീ തുറമുഖങ്ങൾക്കാണ് മുന്നറിയിപ്പ് നൽകിയിട്ടുള്ളത്.
* കിഴക്കൻ-മധ്യ ബംഗാൾ ഉൾക്കടലിൽ രൂപപ്പെട്ട ന്യൂനമർദം ദന ചുഴലിക്കാറ്റായി ശക്തിപ്രാപിച്ചതായി കാലാവസ്ഥ നിരീക്ഷണ വകുപ്പ് സ്ഥിരീകരിച്ചു. ഒഡീഷ-പശ്ചിമ ബംഗാൾ തീരം കടക്കുന്നതിന് മുമ്പ് കാറ്റിൻ്റെ വേഗത മണിക്കൂറിൽ 120 കി.മീ വേഗതയിൽ വീശുന്ന ശക്തമായ ചുഴലിക്കാറ്റായി മാറുമെന്നാണ് മുന്നറിയിപ്പ്.
* ഒക്ടോബർ 25 ന് പുലർച്ചെ പുരിക്കും (ഒഡീഷ) സാഗർ ദ്വീപിനും (പശ്ചിമ ബംഗാൾ) ഇടയിൽ തീരത്ത് ദാന ചുഴലിക്കാറ്റ് വീശിയടിക്കാൻ സാധ്യതയുണ്ട്. ഈ സമയത്ത് ഉയർന്ന കാറ്റിനും കഠിനമായ കാലാവസ്ഥയ്ക്കും സാധ്യതയുണ്ടെന്ന് കാലാവസ്ഥ വകുപ്പ് മുന്നറിയിപ്പ് നൽകി.
* ബുധനാഴ്ച പുലർച്ചെ 5:30 വരെ, പാരദീപിന് (ഒഡീഷ) തെക്ക് കിഴക്കായി 560 കിലോമീറ്റർ അകലെയും സാഗർ ദ്വീപിന് (പശ്ചിമ ബംഗാൾ) 630 കിലോമീറ്റർ തെക്ക്-തെക്കുകിഴക്ക് അകലെയും ഖേപുപാറയിൽ നിന്ന് 630 കിലോമീറ്റർ തെക്ക്-തെക്ക് കിഴക്കായും (ബംഗ്ലാദേശ്) ദാന ചുഴലിക്കാറ്റ് രൂപപ്പെടുന്നുവെന്നാണ് നിരീക്ഷണം. ഒഡീഷ-പശ്ചിമ ബംഗാൾ തീരങ്ങളിൽ മണിക്കൂറിൽ 60 കിലോമീറ്റർ വേഗതയിൽ കാറ്റ് വീശാൻ സാധ്യതയുള്ളതിനാൽ മത്സ്യത്തൊഴിലാളികൾ ഒക്ടോബർ 23 മുതൽ 25 വരെ കടലിൽ പോകരുതെന്ന് മുന്നറിയിപ്പ് നൽകിയിട്ടുണ്ട്, ഇത് ഒക്ടോബർ 24 രാത്രി മുതൽ മണിക്കൂറിൽ 120 കിലോമീറ്റർ വരെയാകാനും സാധ്യതയുണ്ട്. cyclone dana live updates 152 trains cancelled
* ചുഴലികാറ്റിന്റെ പശ്ചാത്തലത്തിൽ ഒക്ടോബർ 23 നും 25 നും ഇടയിൽ ഷെഡ്യൂൾ ചെയ്തിരുന്ന 150-ലധികം എക്സ്പ്രസ്, പാസഞ്ചർ ട്രെയിനുകൾ സൗത്ത് ഈസ്റ്റേൺ റെയിൽവേ (എസ്ഇആർ) റദ്ദാക്കി. ബംഗാൾ ഉൾക്കടലിൽ ഏത് അടിയന്തര സാഹചര്യവും നേരിടാൻ സജ്ജമായി കപ്പലുകളും വിമാനങ്ങളും സജ്ജമാക്കി ഇന്ത്യൻ കോസ്റ്റ് ഗാർഡ് (ഐസിജി) അതീവ ജാഗ്രതയിലാണ്.
* രക്ഷാപ്രവർത്തനത്തിനും ദുരിതാശ്വാസ പ്രവർത്തനങ്ങൾക്കുമുള്ള തയ്യാറെടുപ്പിനായി എൻഡിആർഎഫിൻ്റെ പതിമൂന്ന് ടീമുകൾ തെക്കൻ പ്രദേശങ്ങളിൽ നിലയുറപ്പിച്ചിട്ടുണ്ട്. cyclone dana live updates 152 trains cancelled
* സൗത്ത് 24 പർഗാനാസ്, പശ്ചിം, പുർബ മേദിനിപൂർ, ജാർഗ്രാം എന്നിവയുൾപ്പെടെ ദക്ഷിണ ബംഗാൾ ജില്ലകളിൽ ഒക്ടോബർ 24, 25 തീയതികളിൽ ശക്തമായതോ അതിശക്തമായതോ ആയ മഴയ്ക്ക് സാധ്യതയുണ്ട്. കൊൽക്കത്ത, ഹൗറ, ഹൂഗ്ലി എന്നിവിടങ്ങളിൽ കാര്യമായ മഴയ്ക്കുള്ള സാധ്യതയും വ്യക്തമാക്കുന്നുണ്ട്.
* ബാലസോർ, ഭദ്രക്, കേന്ദ്രപാര, മയൂർഭഞ്ച്, ജഗത്സിംഗ്പൂർ, പുരി തുടങ്ങിയ തീരദേശ ജില്ലകളിൽ പരമാവധി മുൻകരുതലുകളെടുക്കാൻ ഒഡീഷ സർക്കാർ തയ്യാറെടുക്കുകയാണ്. കനത്ത മഴയും വെള്ളപ്പൊക്ക സാധ്യതയും ഈ പ്രദേശങ്ങളിലെ പ്രധാന ആശങ്കകളാണ്.
മുൻകരുതൽ നടപടിയായി, രണ്ട് ഇന്ത്യൻ എയർഫോഴ്‌സ് (IAF) വിമാനങ്ങളും 150 NDRF ഉദ്യോഗസ്ഥരെയും ബുധനാഴ്ച ഭുവനേശ്വറിൽ വിന്യസിച്ചിട്ടുണ്ട്.
Content summary; cyclone dana live updates 152 trains cancelled high alert in bengal and odisha possibility of extreme heavy rain
