ധാരണാപത്രം ഒപ്പ് വച്ചു, ഹോര്‍മുസും തുറന്നു; ഇറാന് ഇളവുകളൊന്നും നല്‍കിയിട്ടില്ലെന്നും ട്രംപ്

പശ്ചിമേഷ്യന്‍ സംഘര്‍ഷം അവസാനിപ്പിക്കാന്‍ യു.എസും ഇറാനും ഒരു ധാരണാപത്രത്തില്‍ ഒപ്പുവെച്ചുതായി റിപ്പോര്‍ട്ട്. എന്നാല്‍ മുന്‍പ് വൈറ്റ് ഹൗസ് വൃത്തങ്ങള്‍ സൂചിപ്പിച്ചതുപോലെ ഇറാനുമേലുള്ള ഉപരോധങ്ങള്‍ അടിയന്തരമായി നീക്കം ചെയ്യില്ലെന്നാണ് പ്രസിഡന്റ് ട്രംപ് വ്യക്തമാക്കിയിരിക്കുന്നത്.

ഫ്രാന്‍സിലെ ഏവിയന്‍-ലെസ്-ബെയ്ന്‍സില്‍ നടക്കുന്ന ജി7 ഉച്ചകോടിക്കിടെ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിനൊപ്പം മാധ്യമപ്രവര്‍ത്തകരെ കാണവേയാണ് ട്രംപ് ഇക്കാര്യം അറിയിച്ചത്. ഈ കരാറിലൂടെ ഇറാനുള്ള ഉപരോധങ്ങളില്‍ ഇളവ് ലഭിക്കുമോ എന്ന ചോദ്യത്തിന് ‘ഇല്ല, അതില്ല’ എന്നായിരുന്നു യു.എസ്. പ്രസിഡന്റിന്റെ മറുപടി. ഇത് പൂര്‍ണ്ണമായും ഇറാന്റെ പെരുമാറ്റത്തെയും നിലപാടുകളെയും അടിസ്ഥാനമാക്കിയുള്ളതാണെന്നും, അവര്‍ ചെയ്യേണ്ട കാര്യങ്ങള്‍ കൃത്യമായി ചെയ്താല്‍ മാത്രമേ ഉപരോധങ്ങള്‍ നീക്കുന്ന കാര്യം പ്രാബല്യത്തില്‍ വരികയുള്ളൂവെന്നും അദ്ദേഹം കൂട്ടിച്ചേര്‍ത്തു. ലെബനനും ഹിസ്ബുള്ള തീവ്രവാദ ഗ്രൂപ്പും തമ്മിലുള്ള കടുത്ത പോരാട്ടത്തെക്കുറിച്ച് പരാമര്‍ശിച്ച ട്രംപ്, ഈ സംഘര്‍ഷം പരിഹരിക്കാനാണ് അമേരിക്ക ആഗ്രഹിക്കുന്നതെന്നും വ്യക്തമാക്കി.

ആഗോള എണ്ണ-വാതക വിതരണത്തിന്റെ 20 ശതമാനവും കടന്നുപോകുന്ന തന്ത്രപ്രധാനമായ ഹോര്‍മുസ് കടലിടുക്ക് ഭാഗികമായി വീണ്ടും തുറക്കാന്‍ സാധിച്ചതിനെ ട്രംപ് പ്രശംസിച്ചു. ഇതുസംബന്ധിച്ച കരാറില്‍ ഒപ്പുവെച്ചതായും അദ്ദേഹം സ്ഥിരീകരിച്ചു. കഴിഞ്ഞ മൂന്ന് മാസമായി തുടരുന്ന ഗള്‍ഫ് എണ്ണ വിതരണ തടസ്സവും അതുവഴി ആഗോള വിപണിയിലുണ്ടായ വലിയ സാമ്പത്തിക പ്രതിസന്ധിയും പരിഹരിക്കാന്‍ ഈ നടപടി സഹായിക്കും.

അതേസമയം, ധാരണാപത്രത്തിന്റെ പൂര്‍ണ്ണരൂപം പുറത്തുവിടണമെന്ന ആവശ്യവുമായി പ്രതിപക്ഷം രംഗത്തെത്തിയിട്ടുണ്ട്. വരും ദിവസങ്ങളില്‍, മിക്കവാറും വെള്ളിയാഴ്ച നടക്കുന്ന ഔദ്യോഗിക ഒപ്പുവെക്കല്‍ ചടങ്ങിന് ശേഷം കരാറിന്റെ വിവരങ്ങള്‍ പൊതുജനങ്ങള്‍ക്ക് ലഭ്യമാക്കുമെന്ന് ട്രംപ് അറിയിച്ചു. എന്നാല്‍, അമേരിക്കന്‍ ജനതയ്ക്ക് പൂര്‍ണ്ണമായ സുതാര്യത ആവശ്യമാണെന്നും, ഈ ‘ധാരണയില്‍’ എന്തൊക്കെയാണ് അടങ്ങിയിരിക്കുന്നതെന്നും, നമ്മുടെ സൈനികര്‍ ഇനിയും അപകടത്തിലാകുമോ എന്നും വ്യക്തമാക്കണമെന്ന് യു.എസ്. സെനറ്റിലെ ഡെമോക്രാറ്റിക് ലീഡര്‍ ചക് ഷുമര്‍ ആവശ്യപ്പെട്ടു.

സ്വിറ്റ്‌സര്‍ലന്‍ഡിലെ ജനീവയില്‍ വെള്ളിയാഴ്ച നടക്കുന്ന ഔദ്യോഗിക ഒപ്പുവെക്കല്‍ ചടങ്ങില്‍ താന്‍ പങ്കെടുക്കില്ലെന്നും തനിക്ക് പകരം യു.എസ്. വൈസ് പ്രസിഡന്റ് ജെ.ഡി. വാന്‍സ് ചടങ്ങില്‍ പങ്കെടുക്കുമെന്നും ട്രംപ് സൂചിപ്പിച്ചു. ഇറാനുമായി ഉണ്ടാക്കിയ ഈ കരാര്‍ ലോകത്തിന് വലിയ വിജയം സമ്മാനിക്കുമെന്നും, പശ്ചിമേഷ്യയില്‍ വലിയ നല്ല മാറ്റങ്ങള്‍ സംഭവിക്കാന്‍ പോകുകയാണെന്നും അദ്ദേഹം പ്രത്യാശ പ്രകടിപ്പിച്ചു. കരാര്‍ വാര്‍ത്തകള്‍ പുറത്തുവന്നതോടെ ആഗോള വിപണിയില്‍ എണ്ണവില കുത്തനെ ഇടിയുകയും ഓഹരി വിപണി വന്‍ കുതിച്ചുചാട്ടം നടത്തുകയും ചെയ്തിട്ടുണ്ട്.

Content Summary; US President Donald Trump announced a historic MoU with Iran to end the West Asia conflict and partially reopen the Strait of Hormuz, while clarifying no immediate sanctions relief will be granted.