അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ബിഗ് ബ്യൂട്ടിഫുൾ ബില്ലിനെതിരെ വിമർശനം ഉന്നയിച്ച് വീണ്ടും രംഗത്തെത്തിയിരിക്കുകയാണ് ശതകോടീശ്വരൻ ഇലോൺ മസ്ക്. ബില്ലിനെ പിന്തുണയ്ക്കാൻ തീരുമാനിക്കുന്ന നിയമസഭാംഗങ്ങളെ പുറത്താക്കുമെന്നും പുതിയ പാർട്ടി രൂപീകരിക്കുമെന്നുമാണ് മസ്കിന്റെ വെല്ലുവിളി.
യുഎസ് പ്രസിഡൻ്റ് ഡൊണാൾഡ് ട്രംപ് മുന്നോട്ടുവച്ച ‘ബിഗ് ബ്യൂട്ടിഫുൾ ബിൽ ( One Big Beautiful Bill )’ നടപ്പിലാക്കുന്നതിനെതിരെ ഇലോൺ മസ്ക് പലപ്പോഴായി രംഗത്തുവന്നിരുന്നു. സാധാരണ ജനങ്ങളുടെ ജീവിതത്തെ നേരിട്ട് ബാധിക്കുന്ന ബില്ലാണിതെന്ന വിമർശനം നേരത്തെ ഉയർന്നു കഴിഞ്ഞതാണ്. ജനപ്രിയമല്ലാത്ത ഈ ബില്ലിനെ പിന്തുണയ്ക്കാൻ തീരുമാനിക്കുന്ന നിയമസഭാംഗങ്ങളെ പുറത്താക്കുമെന്ന് പ്രത്യക്ഷ വെല്ലുവിളി നടത്തിയിരിക്കുകയാണ് ഇപ്പോൾ മസ്ക്. ചെലവ് കുറയ്ക്കും എന്ന് വാഗ്ദാനം നൽകി തെരഞ്ഞെടുപ്പിൽ മത്സരിച്ച് ജയിച്ച ശേഷം ചരിത്രത്തിലെ തന്നെ ഏറ്റവും വലിയ കടം വരുത്തിവെക്കാനുള്ള ബില്ലിന് വോട്ട് നൽകുന്ന കോൺഗ്രസ് അംഗങ്ങൾ നാണംകെട്ട് തലകുനിക്കേണ്ട സാഹചര്യമാണെന്നും മസ്ക് എക്സിൽ കുറിക്കുന്നുണ്ട്. കഴിഞ്ഞ മെയ്മാസം വരെ പ്രസിഡൻഷ്യൽ ഉപദേശകനായിരുന്ന മസ്ക് ഇപ്പോൾ നിശിതമായി ട്രംപിനെ വിമർശിക്കുകയാണ്.
ബില്ലുമായി ബന്ധപ്പെട്ട് സെനറ്റിൽ വോട്ടെടുപ്പ് പുരോഗമിക്കുകയാണ്. വോട്ടെടുപ്പ് നടക്കുകയാണെങ്കിലും ബില്ലിൽ ഭേദഗതികൾ വരാൻ സാധ്യതയുണ്ട് എന്നാണ് സൂചന. ജൂലൈ നാലിനകം ബിൽ പാസ്സാക്കണമെന്നാണ് ട്രംപിന്റെ നിർദ്ദേശം. ഈ ആഴ്ച കൊണ്ടുതന്നെ ഫൈനൽ വോട്ടെടുപ്പ് നടത്തിയേക്കും. ഈ ബിൽ പ്രാബല്യത്തിൽ വരുന്നതോടെ സാമൂഹിക ക്ഷേമ പദ്ധതികൾ വെട്ടിക്കുറക്കുകയും രാജ്യത്തിന്റെ കടബാധ്യത കൂടുകയും ചെയ്യുമെന്നാണ് വിമർശിക്കുന്നവരുടെ വിലയിരുത്തൽ. സെനറ്റിൽ വോട്ടെടുപ്പ് പൂർത്തിയാക്കി ട്രംപ് ഈ ബിൽ പാസാക്കിയാൽ പുതിയ രാഷ്ട്രീയ പാർട്ടി ആരംഭിക്കുമെന്നും മസ്ക്ക് മുന്നറിയിപ്പ് നൽകിയിട്ടുണ്ട്. ‘അമേരിക്കൻ പാർട്ടി’ എന്ന പേരിലായിരിക്കും പുതിയ പാർട്ടി രൂപീകരിക്കുക എന്നും മസ്ക് അറിയിച്ചു കഴിഞ്ഞു. ജനങ്ങളുടെ നന്മയ്ക്ക് വേണ്ടിയായിരിക്കും ഈ പാർട്ടി ആരംഭിക്കുന്നതെന്നും അദ്ദേഹം എക്സ് പോസ്റ്റിൽ കുറിച്ചിരുന്നു. ബിൽ പാസാക്കുന്നതിന്റെ തൊട്ടടുത്ത ദിവസം തന്നെ പാർട്ടി ആരംഭിക്കുമെന്നു തരത്തിലുള്ള ഭീഷണിയാണ് മസ്ക് ഉയർത്തുന്നത്.
മുൻ യുഎസ് പ്രസിഡന്റ് ജോ ബൈഡൻ ഭരണത്തിലിരുന്നപ്പോൾ മസ്കിന് ഉപകാരപ്പെടുന്ന വിവിധ മേഖലകളിൽ നൽകിയിരുന്ന സഹായങ്ങൾ അവസാനിപ്പിക്കുന്നു എന്നതാണ് ഇക്കാര്യത്തിലെ മാസ്കിന്റെ വിമർശങ്ങൾക്ക് വഴിവെച്ചത്. പ്രതേകിച്ചും പുനരുപയോഗ ഊർജങ്ങളായ സോളാർ, ബാറ്ററി നിർമാണം, വിൻഡ് തുടങ്ങിയവയ്ക്ക് നൽകിയിരുന്ന ടാക്സ് ക്രെഡിറ്റുകൾ ഈ ബിൽ പ്രാബല്യത്തിൽ വരുന്നതോടെ നഷ്ടമാകും. ഇതാണ് ‘ബിഗ് ബ്യൂട്ടിഫുൾ ബിൽ’ നടപ്പിലാക്കുന്നതിന് എതിരെയുള്ള ഇലോൺ മസ്കിന്റെ എതിർപ്പിന് പ്രധാന കാരണമായിരിക്കുന്നത്. ട്രംപിന്റെ നികുതി നയങ്ങളെ ശക്തമായി വിമശിച്ച് കൊണ്ട് തന്നെയാണ് മസ്ക് പലപ്പോഴായി രംഗത്തെത്തിയതും ഇക്കാരണം കൊണ്ടാണ് ഇതിന്റെ ഫലമായി ട്രംപ് ഭരണകൂടത്തിന്റെ കാര്യക്ഷമതാ വകുപ്പിന്റെ മേധാവി സ്ഥാനവും ട്രംപ് കൈയൊഴിഞ്ഞിരുന്നു. ഇതോടെ ഇരുവർക്കുമിടയിലെ രാഷ്ട്രീയ പോര് ശക്തമാവുകയും ചെയ്തു. ഇതിന് പിന്നാലെ ട്രംപിനെതിരെ ആരോപണങ്ങളുമായും മസ്ക് രംഗത്തുവന്നിരുന്നു.
content summary: Elon Musk plans to launch the ‘America Party’ if lawmakers approve Trump’s ‘Big, Beautiful Bill’
