എണ്ണ ഇറക്കുമതിയുടെ തീരുവ 50 ശതമാനമായി ഉയർത്തിയ അമേരിക്കൻ നടപടിയെ വിമർശിച്ച് ഇന്ത്യ. തീരുമാനം ‘അന്യായവും നീതീകരിക്കാനാവാത്തതും യുക്തിരഹിതവുമാണെന്ന്’ ഇന്ത്യ ആവർത്തിച്ചു. ‘തങ്ങളുടെ ദേശീയ താൽപ്പര്യങ്ങൾ സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്ന്’ സർക്കാർ അറിയിച്ചു.
“അടുത്തിടെയായി റഷ്യയിൽ നിന്നുള്ള ഇന്ത്യയുടെ എണ്ണ ഇറക്കുമതിയെ അമേരിക്ക ലക്ഷ്യമിടുന്നുണ്ട്. ഈ വിഷയങ്ങളിൽ നമ്മുടെ നിലപാട് നേരത്തെ തന്നെ വ്യക്തമാക്കിയതാണ്. 140 കോടി ജനങ്ങളുടെ ഊർജ്ജ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് ഞങ്ങൾ ഈ ഇറക്കുമതി നടത്തുന്നത്,” വിദേശകാര്യ മന്ത്രാലയത്തിന്റെ (എംഇഎ) ഔദ്യോഗിക വക്താവ് രൺധീർ ജയ്സ്വാൾ ബുധനാഴ്ച വൈകുന്നേരം പുറത്തിറക്കിയ പ്രസ്താവനയിൽ പറഞ്ഞു.
“മറ്റു പല രാജ്യങ്ങളും തങ്ങളുടെ ദേശീയ താൽപ്പര്യങ്ങൾക്കായി റഷ്യയിൽ നിന്ന് ഊർജ്ജം വാങ്ങുന്നുണ്ട്. എന്നാൽ അവർക്കൊന്നും പ്രത്യാഘാതങ്ങളൊന്നും നേരിടേണ്ടി വരുന്നില്ല. ഈ സാഹചര്യത്തിൽ ഇന്ത്യയ്ക്കെതിരെ മാത്രം അധിക തീരുവ ചുമത്താൻ അമേരിക്ക തീരുമാനിച്ചത് വളരെ നിർഭാഗ്യകരമാണ്,” പ്രസ്താവനയിൽ പറയുന്നു.
“ഈ നടപടികൾ അന്യായവും നീതീകരിക്കാനാവാത്തതും യുക്തിരഹിതവുമാണെന്ന് ഞങ്ങൾ ആവർത്തിക്കുന്നു. ഇന്ത്യയുടെ ദേശീയ താൽപ്പര്യങ്ങൾ സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കും,” എംഇഎ പ്രസ്താവനയിൽ കൂട്ടിച്ചേർത്തു.
ഇതിനു മുൻപ് തിങ്കളാഴ്ചയും, റഷ്യയിൽ നിന്ന് എണ്ണ വാങ്ങിയതിന് ഇന്ത്യയുടെ തീരുവ “ഗണ്യമായി” വർദ്ധിപ്പിക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിരുന്നു. അന്നും ഇന്ത്യയെ ലക്ഷ്യമിടുന്നത് “അന്യായവും യുക്തിരഹിതവുമാണെന്ന്” വിദേശകാര്യ മന്ത്രാലയം (MEA) പ്രസ്താവിച്ചിരുന്നു. കൂടാതെ, രാജ്യത്തിന്റെ “ദേശീയ താൽപ്പര്യങ്ങളും സാമ്പത്തിക സുരക്ഷയും” സംരക്ഷിക്കാൻ “ആവശ്യമായ എല്ലാ നടപടികളും” സ്വീകരിക്കുമെന്നും അവർ കൂട്ടിച്ചേർത്തു.
റഷ്യയുമായുള്ള വ്യാപാരത്തിൽ യു.എസും യൂറോപ്യൻ യൂണിയനും “ഇരട്ടത്താപ്പ്” കാണിക്കുന്നുണ്ടെന്ന് ഇന്ത്യ ചൂണ്ടിക്കാട്ടി. “യുഎസ് ആണവോർജ്ജ വ്യവസായത്തിന് യുറേനിയം ഹെക്സാഫ്ലൂറൈഡും, ഇലക്ട്രിക് വാഹന വ്യവസായത്തിന് പല്ലേഡിയവും, വളങ്ങളും രാസവസ്തുക്കളും റഷ്യയിൽ നിന്ന് ഇറക്കുമതി ചെയ്യുന്നത് തുടരുകയാണെന്ന്” എംഇഎ പ്രസ്താവനയിൽ പറഞ്ഞു.
“ഇന്ത്യയെ വിമർശിക്കുന്ന രാജ്യങ്ങൾ തന്നെയാണ് റഷ്യയുമായി വ്യാപാരത്തിൽ ഏർപ്പെടുന്നത് എന്നത് വളരെ വ്യക്തമാണ്. ഞങ്ങളെപ്പോലെ അവർക്ക് അതൊരു അത്യാവശ്യ ഘടകം പോലുമല്ല,” എംഇഎ കൂട്ടിച്ചേർത്തു. റഷ്യ-യുക്രെയ്ൻ യുദ്ധം ആരംഭിച്ചതിനുശേഷം ഫോസിൽ ഇന്ധന കയറ്റുമതിയിലൂടെ മോസ്കോ 923 ബില്യൺ യൂറോ വരുമാനം നേടിയിട്ടുണ്ട്. ഇതിൽ 212 ബില്യൺ യൂറോയിലധികം യൂറോപ്യൻ യൂണിയൻ രാജ്യങ്ങളിൽ നിന്നാണെന്നാണ് കണക്കുകൾ.
ഇന്ത്യയും യുഎസും തമ്മിൽ ഇത്തരത്തിലുള്ള ശക്തമായ പ്രസ്താവനകൾ അപൂർവ്വമാണ്. 1998-ലെ ആണവ പരീക്ഷണങ്ങൾക്ക് ശേഷം യുഎസ് ഇന്ത്യക്കെതിരെ ഉപരോധം ഏർപ്പെടുത്തിയതിന് ശേഷം അമേരിക്കയുമായുള്ള ബന്ധത്തിൽ ഇന്ത്യ നേരിടുന്ന ഏറ്റവും വലിയ നയതന്ത്ര വെല്ലുവിളിയാണിത്.
ചർച്ചകൾക്ക് സർക്കാർ തങ്ങളുടെ വാതിലുകൾ തുറന്നിട്ടിരിക്കുകയാണെന്ന് ഉന്നത വൃത്തങ്ങൾ അറിയിച്ചു. അതേസമയം ഇന്ത്യൻ ഉൽപ്പന്നങ്ങളെ അന്താരാഷ്ട്ര വിപണിയിൽ മത്സരാധിഷ്ഠിതമാക്കാൻ സബ്സിഡികൾ ഉൾപ്പെടെയുള്ള വിവിധ മാർഗ്ഗങ്ങളെക്കുറിച്ചും സർക്കാർ ആലോചിക്കുന്നുണ്ട്. അമേരിക്കൻ ഉദ്യോഗസ്ഥരുമായി ചർച്ച നടത്താൻ ഇന്ത്യക്ക് ഏകദേശം മൂന്നാഴ്ച സമയമുണ്ട്.
ഈ സമയത്ത് ഉന്നതതല ചർച്ചകൾ നടക്കുമെന്നും വൃത്തങ്ങൾ സൂചിപ്പിച്ചു. ഈ സാഹചര്യം ചർച്ച ചെയ്യാനും പ്രതിസന്ധി മറികടക്കാനുള്ള വഴികൾ കണ്ടെത്താനും വാഷിംഗ്ടൺ ഡിസിയിലെ ഇന്ത്യൻ മിഷൻ യുഎസ് ഭരണകൂടവുമായി ബന്ധപ്പെടുമെന്നും വൃത്തങ്ങൾ അറിയിച്ചു.
content summary: India’s Strong Response to US Tariff Hike on Russian Oil Imports
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
