മാറ്റങ്ങളുടെ മാർപാപ്പയെന്ന് ലോകമാകെ വിശേഷിപ്പിച്ച പോപ്പ് ഫ്രാൻസിന്റെ സംസ്കാര ശുശ്രൂഷകൾക്കായി വത്തിക്കാൻ ഒരുങ്ങി കഴിഞ്ഞു. അമേരിക്കൻ പ്രസിഡന്റ് ഡൊണാൾഡ് ട്രംപും യുക്രേനിയൻ പ്രസിഡന്റ് വ്ളോദിമർ സെലൻസ്കിയും ഉൾപ്പെടെയുള്ള ലോകനേതാക്കൾ മാർപാപ്പയ്ക്ക് അന്തിമോപചാരം അർപ്പിക്കാനായി വത്തിക്കാനിൽ എത്തിച്ചേർന്നിട്ടുണ്ട്. ഈ ബുധനാഴ്ച പോപ്പ് ഫ്രാൻസിസ് ലോകത്തോട് വിട പറഞ്ഞത് മുതൽ അടുത്ത മാർപാപ്പയാര് എന്ന ചർച്ചകളും പുരോഗമിക്കുന്നുണ്ട്. മാർപാപ്പയുടെ മരണത്തിൽ 9 ദിവസത്തെ ദുഃഖാചരണത്തിന് ശേഷമായിരിക്കും പിൻഗാമിയെ തിരഞ്ഞെടുക്കാനുള്ള നടപടികൾ ആരംഭിക്കുക. പാപ്പൽ കോൺക്ലേവ് എന്ന പേരിൽ നടക്കുന്ന സമ്മേളനത്തിൽ രഹസ്യ വോട്ടെടുപ്പിലൂടെയാവും മാർപാപ്പയെ തിരഞ്ഞെടുക്കുക. അന്ത്യശുശ്രൂഷ കഴിയുന്നതോടെ പാപ്പൽ കോൺക്ലേവിനായുള്ള തയ്യാറെടുപ്പിലേക്ക് കടക്കും നഗരം. ഈ സന്ദർഭത്തിൽ അടുത്ത മാർപാപ്പയാരെന്നത് സംബന്ധിച്ച വാതുവയ്പ്പുകളും നിരവധിയാണ്. വെബ്സൈറ്റുകളെ അടിസ്ഥാനമാക്കിയതാണ് ഇത്തരത്തിലുള്ള വാതുവയ്പ്പുകൾ കൂടുതലും നടക്കുന്നത്. ഇതിൽ ഏറ്റവും മുന്നിട്ട് നിൽക്കുന്നത് ക്രിപ്റ്റോ അടിസ്ഥാനപ്പെടുത്തി ചൂതാട്ടം നടത്തുന്ന വെബ്സൈറ്റായ പോളി മാർക്കറ്റാണ്. മാർപാപ്പ തിരഞ്ഞെടുപ്പുകളിലെ ചൂതാട്ടത്തിന് ഒരു നീണ്ട ചരിത്രമാണുള്ളത്. പതിനാറാം നൂറ്റാണ്ട് മുതൽ ഇത് പ്രാബല്യത്തിലുണ്ടായിരുന്നു എന്നാണ് ചരിത്രം.
വെള്ളിയാഴ്ച രാവിലെയോട് ഏകദേശം 25,61,03,151.60 രൂപയുടെ വാതുവയ്പ്പുകളാണ് പോളിമാർക്കറ്റ് സ്വീകരിച്ചിരിക്കുന്നത്. വെബ്സൈറ്റിലെ കണക്കുപ്രകാരം ഇറ്റാലിയൻ പൗരനായ കർദിനാൾ പിയട്രോ പരോളിനാണ് സാധ്യത പട്ടികയിൽ മുൻപന്തിയിൽ. 37 ശതമാനം ആളുകളാണ് ഇദ്ദേഹത്തിന് വോട്ട് ചെയ്തിരിക്കുന്നത്. ഏറ്റവും വലിയ തുക വാതുവച്ചിരിക്കുന്നതും കർദിനാൾ പിയട്രോ പരോളിന്റെ പേരിൽ തന്നെ. രാജ്യത്ത് വാതുവയ്പ്പ് നിയമവിരുദ്ധമായതിനാൽ തന്നെ കർശനമായ നിയന്ത്രണങ്ങൾക്ക് വിധേയമായി മാത്രമാണ് പോളിമാർക്കറ്റ് പ്രവർത്തിക്കുന്നത്. പിയട്രോ പരോളിന് ശേഷം സാധ്യത പട്ടികയിൽ ഏറ്റവും കൂടുതൽ വോട്ട് നേടിയിരിക്കുന്നത് ഫിലിപ്പിനോ ലൂയിസ് അൻ്റോണിയോ ഗോകിം ടാഗ്ലെ ആണ്. പോളിമാർക്കറ്റിൽ ഇദ്ദേഹത്തിന്റെ മൂല്യം 32 ശതമാനമാണ്. 67 വയസുകാരനായ ഇദ്ദേഹം ഏഷ്യൻ ഫ്രാൻസിസ് എന്നാണ് അറിയപ്പെടുന്നത്. സാമൂഹ്യ നീതിയ്ക്കായി നിലകൊള്ളുന്നത് കൊണ്ടാണ് ഇദ്ദേഹത്തെ ഏഷ്യൻ ഫ്രാൻസിസ് എന്ന് വിശേഷിപ്പിക്കുന്നത്. ഏഴ് ശതമാനം വോട്ടുകളോടെ പീറ്റർ എർഡോ ആണ് മൂന്നാ സ്ഥാനത്ത് നിൽക്കുന്നത് എന്നാൽ ഇതൊരു വിദൂര സാധ്യതയായാണ് പോളി മാർക്കറ്റിന്റെ വിലയിരുത്തൽ. പോളി മാർക്കറ്റിന്റെ കണക്കനുസരിച്ച് ഘാനയിലെ പീറ്റർ ടർക്കസണാണ് അടുത്ത സാധ്യത ആറു ശതമാനം വോട്ടുകളാണ് ഇദ്ദേഹം നേടിയിരിക്കുന്നത്.
സാധ്യത പട്ടികയിലെ 13 കർദിനൾമാരെയും ഉൾപ്പെടുത്തിയാണ് പോളി മാർക്കറ്റിന്റെ വാതുവയ്പ്പ്. പോളി മാർക്കറ്റിന് പുറമേ പാഡി പവർ, സ്കൈ ബെറ്റ്, ലാഡ്ബ്രോക്കുകൾ എന്നീ ഓൺലൈൻ ചൂതാട്ട വെബ്സൈറ്റുകളും സൗജന്യമായ വാതുവയ്പ്പുകൾ നടത്തുന്നുണ്ട്. ഫ്രാൻസിസ് മാർപാപ്പയ്ക്ക് പ്രിയങ്കരനാണ് പിയട്രോ പരോളിൻ, ആ സാധ്യത മുൻനിർത്തിയാണ് പിയട്രോ പരോളിൻ അടുത്ത മാർപാപ്പയായേക്കാമെന്ന് പോളി മാർക്കറ്റിന്റെ വിലയിരുത്തൽ.
content summary: Intense betting is taking place on the online platform Polymarket over who will succeed Pope Francis
