യുഎസ് സഹായത്തിനായി ട്രംപ് ലോബികൾക്ക് പണം നൽകി ദരിദ്ര രാഷ്ട്രങ്ങൾ; തുറമുഖങ്ങളും അപൂർവ ധാതുക്കളും വാഗ്ദാനം

ലോകത്തിലെ ദരിദ്ര രാജ്യങ്ങളില്‍ പലതും അമേരിക്കൻ പ്രസിഡന്റ് ഡൊണാള്‍ഡ് ട്രംപുമായി ബന്ധമുള്ള ലോബികള്‍ക്ക് ദശലക്ഷക്കണക്കിന് പണം നല്‍കുന്നതായി ഗ്ലോബൽ വിറ്റ്‌നസ് നടത്തിയ അന്വേഷണത്തിൽ കണ്ടെത്തി. യുഎസ് ദേശീയ താൽപ്പര്യങ്ങൾക്ക് മുൻഗണന നൽകുന്ന “അമേരിക്ക ആദ്യം”നയത്തിൽ ശ്രദ്ധ കേന്ദ്രീകരിച്ച്, അന്താരാഷ്ട്ര വികസന പരിപാടികൾക്കുള്ള ഫണ്ടിംഗിൽ ട്രംപ് ഭരണകൂടം വെട്ടിച്ചുരുക്കലുകൾ നടത്തിയിട്ടുണ്ട്. ഈ വെട്ടിചുരുക്കലുകളുടെ ആഘാതം ലഘൂകരിക്കാനുള്ള ശ്രമമാണിതെന്നും ദി ഗാർഡിയൻ റിപ്പോർട്ട് ചെയ്യുന്നു. യുഎസ് വിദേശ മാനുഷിക സഹായം വെട്ടിക്കുറച്ചതിന് ശേഷം ട്രംപുമായി നേരിട്ട് ബന്ധമുള്ള വ്യക്തികളുമായി ലോബിയിംഗ് കരാറുകളിൽ ഒപ്പുവച്ച 11രാജ്യങ്ങളിൽ സൊമാലിയ, ഹെയ്തി, യെമൻ എന്നിവയും ഉൾപ്പെടുന്നു. മാനുഷികമോ സൈനികമോ ആയ പിന്തുണയ്ക്ക് പകരമായി പല രാജ്യങ്ങളും ധാതുക്കൾ ഉൾപ്പെടെയുള്ള നിർണായക പ്രകൃതിവിഭവങ്ങൾ കൈമാറ്റം ചെയ്യാൻ ആരംഭിച്ചതായി അന്വേഷണത്തിൽ കണ്ടെത്തി.

ട്രംപ് ഏജൻസിയെ പിരിച്ചുവിട്ടതിനെ തുടർന്ന് കഴിഞ്ഞ ആഴ്ചയാണ് യുഎസ്എഐഡി ഔദ്യോഗികമായി അടച്ചുപൂട്ടിയത്. അഞ്ച് വർഷത്തിനുള്ളിൽ 14 ദശലക്ഷത്തിലധികം മരണങ്ങൾക്ക് ഈ നീക്കം കാരണമാകുമെന്ന് വിദഗ്ധർ മുന്നറിയിപ്പ് നൽകിയിരുന്നു. പ്രകൃതി വിഭവങ്ങളുടെ ചൂഷണത്തിന് ഇരയാകുന്ന താഴ്ന്ന വരുമാനമുള്ള രാജ്യങ്ങൾക്ക് ട്രംപിന്റെ നീക്കം കൂടുതൽ പ്രതികൂലമായി മാറുമെന്ന് ഗ്ലോബൽ വിറ്റ്‌നസിന്റെ പരിവർത്തന ധാതുക്കൾക്കായുള്ള നയ മേധാവി എമിലി സ്റ്റുവർട്ട് അഭിപ്രായപ്പെട്ടു. നവംബറിലെ യുഎസ് തിരഞ്ഞെടുപ്പിന് ശേഷം കഴിഞ്ഞ ആറ് മാസ കാലയളവിനുള്ളിൽ, ട്രംപുമായി ബന്ധപ്പെട്ട ലോബിയിംഗ് സ്ഥാപനങ്ങളും, ലോകത്തിലെ ഏറ്റവും വികസിതമായ ചില രാജ്യങ്ങളും തമ്മിൽ 17 മില്യൺ ഡോളറിന്റെ കരാറുകളിൽ ഒപ്പുവച്ചതായി രേഖകൾ കാണിക്കുന്നു.

ഈ രാജ്യങ്ങൾ USAID യുടെ ഏറ്റവും ഉയർന്ന സ്വീകർത്താക്കളിൽ ഉൾപ്പെട്ടവയാണ്. ചില രാജ്യങ്ങൾ ഒന്നിലധികം കരാറുകളിൽ ഒപ്പുവച്ചതായും യുഎസ് ഫോറിൻ ഏജന്റുമാരുടെ രജിസ്ട്രേഷൻ നിയമപ്രകാരം സമർപ്പിച്ച രേഖകൾ കാണിക്കുന്നു. വർഷങ്ങളായി ധാതുസമ്പത്തിനെച്ചൊല്ലി വൻതോതിലുള്ള അടിച്ചമർത്തലും കുടിയിറക്കവും സംഘർഷങ്ങളും നേരിട്ട ഡെമോക്രാറ്റിക് റിപ്പബ്ലിക് ഓഫ് കോംഗോയും (ഡിആർസി) അതിൽ ഉൾപ്പെടുന്നു. റുവാണ്ടയുടെ പിന്തുണയുള്ള M23 വിമതരുടെ മുന്നേറ്റത്തിനെതിരെ അമേരിക്കയുടെ പിന്തുണയ്ക്കായാണ് ധാതു കരാറിൽ ഡിആർസി ഏർപ്പെടുന്നത്. കരാറിലൂടെ അമേരിക്കൻ കമ്പനികൾക്ക് ലിഥിയം, കൊബാൾട്ട്, കോൾട്ടൻ എന്നിവ ലഭ്യമാക്കുന്നു.

മുൻകാല യുഎസ്എഐഡിയിലെ മുൻനിര സ്വീകർത്താവായ ഡിആർസി, ലോബിയിസ്റ്റുകളായ ബ്രയാൻ ബല്ലാർഡിന്റെ ഉടമസ്ഥതയിലുള്ള ബല്ലാർഡ് പാർട്ണർമാരുമായി 1.2 മില്യൺ ഡോളറിന്റെ കരാറിലാണ് ഒപ്പിട്ടിരിക്കുന്നത്. 2016 ലെ യുഎസ് തിരഞ്ഞെടുപ്പിനും ഏറെ മുമ്പുതന്നെ ട്രംപിന് വേണ്ടി കമ്പനി ലോബിയിംഗ് നടത്തിയിരുന്നു. കൂടാതെ യുഎസ് പ്രസിഡന്റിന്റെ രാഷ്ട്രീയ പ്രചാരണത്തിലും പ്രധാന ദാതാവായിരുന്നു ബല്ലാർഡ് പാർട്ണർസ്. സൊമാലിയയും യെമനും ബിജിആർ ഗവൺമെന്റ് അഫയേഴ്‌സുമായി യഥാക്രമം $550,000, $372,000 എന്നീ കരാറുകളിൽ ഒപ്പുവെച്ചിട്ടുണ്ട്. മുൻ ബിജിആർ പങ്കാളിയായ ഷോൺ ഡഫി ഇപ്പോൾ ട്രംപിന്റെ ഗതാഗത സെക്രട്ടറിയാണ്, യുഎസ് പ്രസിഡന്റിനും ലോബിയിംഗ് സ്ഥാപനത്തിനും ഇടയിലുള്ള എണ്ണമറ്റ കണ്ണികളിൽ ഒന്നാണിത്.

കടുത്ത ദാരിദ്ര്യം നേരിടുന്ന, എന്നാൽ ധാതു സമ്പന്ന രാജ്യമായ പാകിസ്ഥാനും ട്രംപുമായി ബന്ധപ്പെട്ട ലോബിയിസ്റ്റുകളുമായി പ്രതിമാസം 450,000 ഡോളറിന്റെ രണ്ട് കരാറുകളിൽ ഏർപ്പെട്ടിട്ടുണ്ട്. ട്രംപിന്റെ മുൻ അംഗരക്ഷകനും സുരക്ഷാ ഉപദേഷ്ടാവുമായ കീത്ത് ഷില്ലർ ഉൾപ്പെടെ ട്രംപിന്റെ അടുത്ത വൃത്തത്തിലുള്ള നിരവധി വ്യക്തികളുമായി പാകിസ്ഥാൻ ഇടപാടുകളിൽ ഏർപ്പെട്ടിട്ടുണ്ട്. പ്രധാന പ്രകൃതി വിഭവങ്ങളിലേക്കുള്ള പ്രവേശനം, പ്രത്യേകിച്ച് അപൂർവ ഭൂമി ധാതുക്കളിലേക്കുള്ള പ്രവേശനമാണ് ട്രംപിന്റെ മുൻഗണന വിഷയങ്ങൾ. ഇവ യുഎസ് സുരക്ഷയ്ക്ക് നിർണായകമാണെന്ന് കണക്കാക്കപ്പെടുന്നു, എന്നാൽ അവയ്ക്കുള്ള ആഗോള വിതരണ ശൃംഖലകളിൽ ചൈനയാണ് ആധിപത്യം പുലർത്തുന്നത്.

യുഎസ് പിന്തുണയ്ക്ക് പകരമായി മറ്റ് രാജ്യങ്ങൾ അവരുടെ തുറമുഖങ്ങൾ, സൈനിക താവളങ്ങൾ, അപൂർവ ഭൂമി എന്നിവയിലേക്ക് പ്രത്യേക പ്രവേശനം അനുവദിക്കുന്നു. സർക്കാരുകളും ലോബിയിസ്റ്റുകളും തമ്മിലുള്ള ബന്ധം അത്ര പുതിയ കാര്യമല്ലെങ്കിലും ഇതിനു പിന്നിലെ വിശാലവും ചൂഷണപരവുമായ നീക്കങ്ങളിൽ ആശങ്കയുണ്ടെന്ന് സംഘടന വ്യക്തമാക്കി.

”പരമ്പരാഗത യുഎസ് വിദേശ സഹായ പദ്ധതികളിൽ ശ്രദ്ധേയവും ഗണ്യമായതുമായ കുറവ് ഉണ്ടായിട്ടുണ്ട്. അതേസമയം, ആഗോളതലത്തിൽ നിർണായക ധാതുക്കളിലേക്കുള്ള പ്രവേശനം ഉറപ്പാക്കുന്നതിന് യുഎസ് ഭരണകൂടത്തിന്റെ വ്യക്തവും ആക്രമണാത്മകവുമായ സമ്മർദ്ദമുണ്ട്. ഇത് തന്ത്രപരവും സാമ്പത്തികവുമായ താൽപ്പര്യങ്ങളാൽ നയിക്കപ്പെടുന്നു, സൈനിക താവളങ്ങൾ അല്ലെങ്കിൽ തുറമുഖ പ്രവേശനം പോലുള്ളവയ്ക്ക് പകരമായി, ഭരണകൂടം സഹായമോ സൈനിക സഹായമോ വാഗ്ദാനം ചെയ്യാൻ തയ്യാറാണ്. എന്നാൽ ഇടപാടുകൾ സുതാര്യവും നീതിയുക്തവുമായിരിക്കണം. എല്ലാവർക്കും സുരക്ഷിതമായ ഒരു ലോകം സൃഷ്ടിക്കുന്നതിൽ അന്താരാഷ്ട്ര സഹായം വഹിക്കുന്ന പങ്ക് തിരിച്ചറിയേണ്ടത് അത്യാവശ്യമാണ്” സ്റ്റുവർട്ട് പറഞ്ഞു.

content summary: Lobbyists linked to Donald Trump paid millions by world’s poorest countries