അന്തരിച്ച ശതകോടീശ്വരനും ലൈംഗിക കുറ്റവാളിയുമായ ജെഫ്രി എപ്സ്റ്റീനുമായി ബന്ധപ്പെട്ട മുപ്പതിനായിരത്തോളം പേജുകള് വരുന്ന പുതിയ രേഖകള് യുഎസ് നീതിന്യായ വകുപ്പ് പുറത്തുവിട്ടു. പ്രസിഡന്റ് ഡൊണാള്ഡ് ട്രംപ്, ഡേവിഡ് കോപ്പര്ഫീല്ഡ്, ആന്ഡ്രൂ രാജകുമാരന് തുടങ്ങിയ പ്രമുഖരെക്കുറിച്ചുള്ള നിര്ണായക പരാമര്ശങ്ങള് ഈ ഫയലുകളിലുണ്ട്.
1990-കളില് ഡൊണാള്ഡ് ട്രംപ് പലതവണ എപ്സ്റ്റീന്റെ സ്വകാര്യ വിമാനത്തില് യാത്ര ചെയ്തിരുന്നതായി രേഖകള് സൂചിപ്പിക്കുന്നു. 2020 ജനുവരിയില് ഒരു യുഎസ് അറ്റോര്ണി അയച്ച ഇമെയില് പ്രകാരം, 1993-നും 1996-നും ഇടയില് കുറഞ്ഞത് എട്ട് തവണയെങ്കിലും ട്രംപ് ഈ വിമാനത്തില് യാത്ര ചെയ്തിട്ടുണ്ട്. ചില യാത്രകളില് ട്രംപിനൊപ്പം ഭാര്യ മാര്ല മാപ്പിള്സ്, മക്കളായ ടിഫാനി, എറിക് എന്നിവരും ഉണ്ടായിരുന്നു.
ഒരു വിമാനയാത്രയില് എപ്സ്റ്റീനും ട്രംപും മാത്രമായിരുന്നു യാത്രക്കാര്. മറ്റൊരു യാത്രയില് 20 വയസ്സുള്ള ഒരു യുവതിയും ഇവര്ക്കൊപ്പമുണ്ടായിരുന്നു. എന്നാല് ഈ യാത്രകളില് എന്തെങ്കിലും നിയമവിരുദ്ധമായ കാര്യങ്ങള് നടന്നതായി രേഖകളില് സൂചനയില്ല.
ഈ ആരോപണങ്ങള് അടിസ്ഥാനരഹിതമാണെന്നും 2020-ലെ തിരഞ്ഞെടുപ്പിന് തൊട്ടുമുമ്പ് മനഃപൂര്വം കെട്ടിച്ചമച്ചതാണെന്നും നീതിന്യായ വകുപ്പ് പ്രസ്താവനയില് പറഞ്ഞു.
എപ്സ്റ്റീന് ജയിലില് കഴിയുന്ന സമയത്ത് ഒളിമ്പിക് ജിംനാസ്റ്റിക്സ് കോച്ച് ലാറി നാസറിന് അയച്ചതെന്ന് കരുതപ്പെടുന്ന ഒരു കത്തും ഫയലിലുണ്ട്. എന്നാല് ഇത് വ്യാജമാണെന്ന് പിന്നീട് സ്ഥിരീകരിച്ചു. സാമ്പത്തിക ശാസ്ത്രജ്ഞന് ലാറി സമ്മേഴ്സ്, ആന്ഡ്രൂ രാജകുമാരന് എന്നിവരെക്കുറിച്ചുള്ള കൂടുതല് വിവരങ്ങളും രേഖകളില് ഉള്പ്പെടുന്നു.
പ്രശസ്ത മജീഷ്യന് ഡേവിഡ് കോപ്പര്ഫീല്ഡിനെതിരെ ഉയര്ന്ന ബലാത്സംഗ ആരോപണങ്ങളെക്കുറിച്ചും ഫയലുകളില് പരാമര്ശമുണ്ട്. എപ്സ്റ്റീന്റെ വീട്ടിലെത്തുന്ന പെണ്കുട്ടികള്ക്ക് കോപ്പര്ഫീല്ഡിന്റെ ഷോയുടെ ‘ബാക്ക് സ്റ്റേജ് പാസുകള്’ സമ്മാനമായി നല്കാറുണ്ടായിരുന്നുവെന്ന് രേഖകള് പറയുന്നു. എന്നാല് താന് ഈ കേസുകളില് നിന്ന് നേരത്തെ തന്നെ കുറ്റവിമുക്തനാക്കപ്പെട്ടതാണെന്ന് കോപ്പര്ഫീല്ഡ് മുന്പ് വ്യക്തമാക്കിയിട്ടുണ്ട്.
എപ്സ്റ്റീന്റെ വീട്ടിലെ സേഫില് നിന്നും കണ്ടെത്തിയ ഒരു ഓസ്ട്രിയന് പാസ്പോര്ട്ടിന്റെ ചിത്രവും പുറത്തുവന്നിട്ടുണ്ട്. ഇതില് എപ്സ്റ്റീന്റെ ചിത്രമാണുള്ളതെങ്കിലും ‘മരിയസ് ഫോര്ട്ടെല്നി’ എന്ന ആളുടെ പേരും സൗദി അറേബ്യയിലെ വിലാസവുമാണ് നല്കിയിരിക്കുന്നത്.
എപ്സ്റ്റീന്റെ പത്ത് കൂട്ടാളികളെക്കുറിച്ച് നീതിന്യായ വകുപ്പ് അന്വേഷിച്ചിരുന്നതായി ഫയലുകള് വ്യക്തമാക്കുന്നുണ്ടെന്ന് ഡെമോക്രാറ്റിക് നേതാവ് ചക്ക് ഷുമര് പറഞ്ഞു. എന്തുകൊണ്ടാണ് ഇവര്ക്കെതിരെ കേസെടുക്കാതിരുന്നത് എന്നതില് വ്യക്തത വേണമെന്നും അദ്ദേഹം ആവശ്യപ്പെട്ടു.
Content Summary; Newly released Epstein files includes many references to Donald Trump. US president was on a flight in the 1990s with Epstein
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
