ഡാർഭംഗയിൽ രാഹുൽ ഗാന്ധിയുടെ വോട്ടർ അധികാർ യാത്രയ്ക്കിടെ ബൈക്ക് നഷ്ടപ്പെട്ട യുവാവിന് പുതിയ ബൈക്ക് സമ്മാനിച്ച് രാഹുൽ ഗാന്ധി. യാത്രയുടെ സമാപന സമ്മേളനത്തിൽ വെച്ചാണ് ശുഭം സൗരഭ് എന്ന യുവാവിന് പുതിയ ബൈക്ക് നൽകിയത്.
ഓഗസ്റ്റ് 27-ന് ആയിരുന്നു സംഭവം. ഡാർഭംഗയിൽ യാത്ര കടന്നുപോകുമ്പോൾ ശുഭം സൗരഭിന്റെ ബൈക്ക് ഹോട്ടലിന് പുറത്ത് പാർക്ക് ചെയ്തിരിക്കുകയായിരുന്നു. ഈ സമയം ചില സുരക്ഷാ ഉദ്യോഗസ്ഥർ വന്ന് ബൈക്ക് ആവശ്യപ്പെട്ടു. ആദ്യം വിസമ്മതിച്ചെങ്കിലും, സുരക്ഷാ സംഘം ബൈക്ക് കൊണ്ടുപോവുകയായിരുന്നു.
കുറച്ചുനേരം ശുഭമിനെ യാത്രയിൽ ഉൾപ്പെടുത്തിയെങ്കിലും പിന്നീട് സുരക്ഷാ ഉദ്യോഗസ്ഥർ ബൈക്കുമായി പോയി. യാത്ര കഴിഞ്ഞതിന് ശേഷം ബൈക്ക് അന്വേഷിച്ചെങ്കിലും കണ്ടെത്താനായില്ലെന്ന് ശുഭം പറഞ്ഞു.
ബൈക്ക് നഷ്ടപ്പെട്ടതിന് ശേഷം ശുഭം വളരെ വിഷമത്തിലായി. ആറുദിവസം പല ജില്ലകളിലായി അന്വേഷിച്ചെങ്കിലും ഫലമുണ്ടായില്ല. ഈ ദിവസങ്ങളിൽ തനിക്ക് ഉറങ്ങാൻ പോലും കഴിഞ്ഞില്ലെന്ന് ശുഭം വ്യക്തമാക്കി.
അദ്ദേഹത്തിന് ബൈക്ക് വെറുമൊരു വാഹനം മാത്രമല്ല, വൈകാരികമായി ഏറെ അടുപ്പമുള്ള ഒന്നായിരുന്നു.
ഒടുവിൽ, ഈ ദുരനുഭവം ഒരു വീഡിയോയായി ശുഭം സമൂഹമാധ്യമങ്ങളിൽ പങ്കുവെച്ചു. വീഡിയോ പെട്ടെന്ന് വൈറലാവുകയും രാഹുൽ ഗാന്ധിയുടെ സംഘത്തിന്റെ ശ്രദ്ധയിൽപ്പെടുകയും ചെയ്തു.
വീഡിയോ രാഹുൽ ഗാന്ധിയുടെ അടുത്തേക്ക് എത്താൻ അധികം സമയം വേണ്ടിവന്നില്ല. വീഡിയോ കണ്ടതിന് ശേഷം രാഹുൽ ഗാന്ധിയുടെ ടീം ശുഭമിനെ ബന്ധപ്പെടുകയും പുതിയ ബൈക്ക് വാഗ്ദാനം ചെയ്യുകയും ചെയ്തു.
സെപ്റ്റംബർ 1-ന് പട്നയിൽ വോട്ടർ അധികാർ യാത്രയുടെ സമാപന വേദിയിൽ വെച്ച് രാഹുൽ ഗാന്ധി ശുഭമിന് പുതിയ പൾസർ 220 ബൈക്കിന്റെ താക്കോൽ കൈമാറി.
പുതിയ ബൈക്ക് ലഭിച്ചതിന് ശേഷം ശുഭം സന്തോഷം പങ്കുവെച്ചു. “രാഹുൽ ജി താക്കോൽ തന്നപ്പോൾ എന്റെ എല്ലാ വിഷമങ്ങളും അവസാനിച്ചു. ഇപ്പോൾ എനിക്ക് ആശ്വാസമുണ്ട്,” ശുഭം പറഞ്ഞു.
content summary: Rahul Gandhi Gifts New Bike to Youth Who Lost His During ‘Voter Adhikar Yatra’
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
