ഹിറ്റ്മാന്‍ തുടരും; ഗംഭീറിനെയും അഗാര്‍ക്കറെയും തള്ളി ബിസിസിഐ

ഞായറാഴ്ച ലോര്‍ഡ്‌സില്‍ ഇംഗ്ലണ്ടിനെതിരെ നടക്കാനിരിക്കുന്ന മൂന്നാം ഏകദിനം ഇന്ത്യന്‍ ക്രിക്കറ്റ് താരം രോഹിത് ശര്‍മ്മയുടെ കരിയറിലെ അവസാന മത്സരമായിരിക്കില്ലെന്ന് വ്യക്തമാക്കി ബി.സി.സി.ഐ സെക്രട്ടറി ദേവജിത് സൈകിയ. പിടിഐയ്ക്ക് നല്‍കിയ പ്രത്യേക അഭിമുഖത്തിലാണ് രോഹിത് ശര്‍മ്മയുടെ വിരമിക്കലുമായി ബന്ധപ്പെട്ട് മാധ്യമങ്ങളില്‍ പ്രചരിക്കുന്ന ഊഹാപോഹങ്ങള്‍ക്ക് ബിസിസിഐ സെക്രട്ടറി വിരാമമിട്ടത്.

39-കാരന്‍ രോഹിത് ശര്‍മ്മയ്ക്ക് പകരം യുവതാരം യശസ്വി ജയ്സ്വാളിന് കൂടുതല്‍ അവസരങ്ങള്‍ നല്‍കാന്‍ സെലക്ടര്‍മാര്‍ ആഗ്രഹിക്കുന്നുവെന്നും, അതിനാല്‍ ഇന്ത്യയുടെ മുന്‍ നായകനോട് കരിയര്‍ അവസാനിപ്പിക്കാന്‍ ആവശ്യപ്പെട്ടതായും ഉള്ള വാര്‍ത്തകള്‍ കഴിഞ്ഞ ദിവസങ്ങളില്‍ ശക്തമായിരുന്നു. എന്നാല്‍, ഇന്ത്യന്‍ ക്രിക്കറ്റിലെ ‘ഹിറ്റ്മാന്‍’ ടീമില്‍ തുടരുമെന്ന് സൈകിയ ഉറപ്പിച്ചു പറഞ്ഞു. മാധ്യമങ്ങളില്‍ വരുന്ന വാര്‍ത്തകള്‍ അടിസ്ഥാനരഹിതമാണെന്നും, ലോര്‍ഡ്‌സിലെ മത്സരം രോഹിത്തിന്റെ അവസാന ഏകദിനമായിരിക്കുമെന്ന തരത്തില്‍ യാതൊരുവിധ ചര്‍ച്ചകളും നടന്നിട്ടില്ലെന്നും അദ്ദേഹം വ്യക്തമാക്കി. ഇന്ത്യന്‍ ഏകദിന ടീമിലെ സ്ഥിരം അംഗമായ രോഹിത്, ടീമിന്റെ പദ്ധതികളില്‍ ഉള്ളിടത്തോളം കാലം രാജ്യത്തിനായി കളി തുടരുമെന്നും അദ്ദേഹം കൂട്ടിച്ചേര്‍ത്തു.

പ്രധാനപ്പെട്ട ഒരു മത്സരത്തിന് തൊട്ടുമുമ്പ് ഇത്തരമൊരു തീരുമാനം തന്നെ അറിയിച്ചതില്‍ രോഹിത് ശര്‍മ്മയ്ക്ക് കടുത്ത അതൃപ്തിയുണ്ടായിരുന്നു. ഒരു സീനിയര്‍ കളിക്കാരനോട് കാണിക്കുന്ന ഈ സമീപനത്തിലുള്ള വിഷമം അദ്ദേഹം പ്രകടിപ്പിക്കുകയും ചെയ്തിരുന്നു. ചീഫ് സെലക്ടര്‍ അജിത് അഗാര്‍ക്കറും മുഖ്യ പരിശീലകന്‍ ഗൗതം ഗംഭീറും ഈ വിഷയത്തെ കൈകാര്യം ചെയ്ത രീതിയില്‍ ബി.സി.സി.ഐയിലെ ഉന്നത നേതൃത്വത്തിന് അതൃപ്തിയുണ്ടായിരുന്നതായാണ് വിവരം. ഇതിനെത്തുടര്‍ന്ന് ബന്ധപ്പെട്ട എല്ലാവരുമായും നടത്തിയ ഒരു ദിവസം നീണ്ട ചര്‍ച്ചകള്‍ക്കൊടുവിലാണ് ബി.സി.സി.ഐ സെക്രട്ടറി ഔദ്യോഗിക വിശദീകരണം നല്‍കിയത്. പ്രമുഖ നിയമവിദഗ്ദ്ധന്‍ കൂടിയായ ദേവജിത് സൈകിയയ്‌ക്കൊപ്പം സ്വാധീനമുള്ള ഒരു മുന്‍ ബി.സി.സി.ഐ ഭാരവാഹിയും ഈ വിഷയം പരിഹരിക്കുന്നതില്‍ നിര്‍ണ്ണായക പങ്കുവഹിച്ചു.

300 ഏകദിന മത്സരങ്ങള്‍ എന്ന അപൂര്‍വ്വ നേട്ടത്തിലെത്താന്‍ രോഹിത് ശര്‍മ്മയ്ക്ക് ഇനി 13 മത്സരങ്ങള്‍ കൂടി മതിയാകും. വൈറ്റ് ബോള്‍ ക്രിക്കറ്റിലെ ഏറ്റവും മികച്ച താരങ്ങളില്‍ ഒരാളായ രോഹിത്, 2023-ലെ ലോകകപ്പ് ഫൈനലില്‍ ഇന്ത്യയെ എത്തിച്ചിരുന്നു. 2027-ലെ ലോകകപ്പില്‍ കളിക്കുക എന്ന ലക്ഷ്യത്തോടെ താന്‍ കഠിനാധ്വാനം ചെയ്യുകയാണെന്ന് ഒരിക്കല്‍ പിടിഐയോട് സംസാരിക്കവെ വ്യക്തമാക്കിയിരുന്നു. താരത്തിന്റെ ആ ആഗ്രഹത്തിനൊപ്പം നില്‍ക്കുമെന്നു തന്നെയാണ് ബി.സി.സി.ഐ ഇപ്പോള്‍ വ്യക്തമാക്കിയിരിക്കുന്നത്.

Content Summary; BCCI Secretary Devajit Saikia puts an end to retirement speculations, confirming that the Lord’s ODI against England will not be Rohit Sharma’s last match for India.