അന്താരാഷ്ട്ര ബഹിരാകാശ നിലയത്തിൽ കുടുങ്ങി കിടക്കുന്ന ബഹിരാകാശ യാത്രികരായ സുനിത വില്യംസിനെയും ബുച്ച് വിൽമോറിനെയും തിരികെയെത്തിക്കാൻ ഇലോൺ മസ്കിനോട് സഹായം ആവശ്യപ്പെട്ട് യുഎസ് പ്രസിഡന്റ് ഡൊണാൾഡ് ട്രംപ്. ബൈഡൻ ഭരണകൂടം സുനിതയെയും ബുച്ചിനെയും അവഗണിച്ചുവെന്നും ട്രംപ് ആരോപിച്ചു.Trump urges Musk to rescue Sunita and Butch
ധീരരായ ബഹിരാകാശ യാത്രികരെ ജോ ബൈഡൻ ബഹിരാകാശ നിലയത്തിൽ ഉപേക്ഷിച്ചു. അവരെ ഉടൻ തിരികെയെത്തിക്കണെമെന്ന് സ്പേസ് എക്സ് സിഇഒ ഇലോൺ മസ്കിനോട് താൻ ആവശ്യപ്പെട്ടിട്ടുണ്ടെന്ന് ട്രംപ് സോഷ്യൽ മീഡിയയിൽ കുറിച്ചു.
ഐഎസ്എസിൽ നിരവധി മാസങ്ങളായി കുടുങ്ങിക്കിടക്കുന്ന രണ്ട് ബഹിരാകാശയാത്രികരെ തിരിച്ചയക്കാനുള്ള ദൗത്യം സ്പേസ് എക്സ് ഉടൻ ആരംഭിക്കും. ആ ദൗത്യത്തിന്റെ പാതയിലാണ് മസ്ക്. ഗുഡ് ലക്ക് ഇലോൺ, ഡൊണാൾഡ് ട്രംപ് കൂട്ടിച്ചേർത്തു.
വിഷയത്തിൽ പ്രതികരിച്ച് ഇലോൺ മസ്കും എക്സിൽ ഒരു പോസ്റ്റ് പങ്കുവെച്ചു. ബഹിരാകാശ നിലയത്തില്‍ കുടുങ്ങിയ രണ്ട് ബഹിരാകാശയാത്രികരെ എത്രയും വേഗം തിരികെയെത്തിക്കാൻ പ്രസിഡന്റ് സ്പേസ് എക്സിനോട് ആവശ്യപ്പെട്ടു. ഞങ്ങൾ അത് ചെയ്യും. ബൈഡൻ ഭരണകൂടം ഇത്രയും നാൾ അവരെ ഉപേക്ഷിച്ചത് ഭയാനകമാണ്, മസ്ക് കുറിച്ചു.
മസ്‌കിൻ്റെ ഏറ്റവും പുതിയ പോസ്റ്റ് സൂചിപ്പിക്കുന്നത് വില്യംസും വിൽമോറും പ്രതീക്ഷിച്ചതിലും നേരത്തെ ഐഎസ്എസിൽ നിന്ന് പുറപ്പെട്ടേക്കാം എന്നാണ്.
2024 ജൂണിലാണ് ബോയിങ്ങിൻ്റെ സ്റ്റാർലൈനർ ബഹിരാകാശ പേടകത്തിൽ സുനിത വില്യംസും ബുച്ച് വിൽമോറും ഐഎസ്എസിലെത്തിയത്. തുടക്കത്തിൽ 10 ദിവസത്തെ ദൗത്യത്തിനായി ഷെഡ്യൂൾ ചെയ്തിരുന്ന ബഹിരാകാശ നിലയത്തിലെ അവരുടെ താമസം ബഹിരാകാശ പേടകം നിരവധി സാങ്കേതിക ബുദ്ധിമുട്ടുകൾ നേരിട്ടതിനെത്തുടർന്ന് നീട്ടുകയായിരുന്നു. സ്റ്റാർലൈനറിന്റെ പ്രശ്‌നങ്ങൾ പരിഹരിക്കാൻ നാസയും ബോയിംഗും ശ്രമിച്ചിട്ടും കഴിയാതെ വരികയും ബഹിരാകാശയാത്രികരെ നാട്ടിലേക്ക് തിരികെ കൊണ്ടുവരാൻ ബഹിരാകാശ പേടകം ഉപയോഗിക്കുന്നത് വളരെ അപകടകരമാണെന്ന നിഗമനത്തിലെത്തുകയും ചെയ്തു.
2024 ഓഗസ്റ്റിൽ, ക്രൂ-9 ക്യാപ്‌സ്യൂളിൽ വില്യംസിനെയും വിൽമോറിനെയും തിരികെ കൊണ്ടുവരാൻ സ്പേസ് എക്സിനോട് സഹായം ആവശ്യപ്പെട്ടതായി നാസ പ്രഖ്യാപിച്ചിരുന്നു. മസ്ക് സ്ഥാപിച്ച സ്വകാര്യ എയ്‌റോസ്‌പേസ് കമ്പനിയായ സ്പേസ് എക്സ് ഓരോ ആറ് മാസത്തിലും ഐഎസ്എസിലേക്ക് ക്രൂ റൊട്ടേഷൻ ദൗത്യങ്ങൾ നടത്തുന്നു.
രണ്ട് ബഹിരാകാശയാത്രികരുടെ തിരിച്ചുവരവിനെ ഉൾക്കൊള്ളുന്നതിനായി, നാസ ക്രൂ-9 ദൗത്യം ക്രമീകരിച്ചു. സെപ്റ്റംബറിൽ സ്പേസ് എക്സ് ഡ്രാഗൺ ക്യാപ്‌സ്യൂളിൽ വിക്ഷേപിക്കാൻ ആദ്യം നിശ്ചയിച്ചിരുന്ന നാല് ബഹിരാകാശ സഞ്ചാരികളിൽ രണ്ട് സീറ്റുകൾ നീക്കം ചെയ്തു. തുടർന്ന് വില്യംസിനും വിൽമോറിനും ഇടം ലഭിക്കുകയായിരുന്നു. 2025 ഫെബ്രുവരിയിൽ പര്യവേഷണത്തിനൊടുവിൽ അവർ മടങ്ങിവരുമെന്നാണ് പ്രതീക്ഷിക്കുന്നത്.
ക്രൂ-10 ദൗത്യത്തിനായി ഏറ്റവും പുതിയ ഡ്രാഗൺ ബഹിരാകാശ പേടകം തയ്യാറാക്കാൻ സ്പേസ് എക്സിന് കൂടുതൽ സമയം ആവശ്യമായി വന്നതാണ് ബഹിരാകാശ യാത്രികരെ തിരികെയെത്തിക്കാൻ കാലതാമസമെടുത്തത്. അതേസമയം, ബഹിരാകാശയാത്രികർ ഒറ്റപ്പെട്ടുപോയിട്ടില്ലെന്നും അവർ ആരോഗ്യത്തോടെയും നല്ല മാനസികാവസ്ഥയിലും തുടരുന്നുവെന്നും നാസ അറിയിച്ചു.Trump urges Musk to rescue Sunita and Butch
Content summary: Trump urges Elon Musk to rescue Sunita Williams and Butch Wilmore after Biden’s alleged abandonment
Elon Musk Donald trump Sunita Williams
