ഓരോ ദിവസവും അഞ്ചോളം എന്‍കൗണ്ടറുകള്‍; യോഗി ഭരണത്തില്‍ പൊലീസ് കൊന്നത് 289 ‘കുറ്റവാളി’കളെ

ഉത്തര്‍പ്രദേശില്‍ യോഗി ആദിത്യനാഥ് മുഖ്യമന്ത്രിയായി അധികാരമേറ്റ 2017 മാര്‍ച്ച് മുതല്‍ ഇതുവരെ സംസ്ഥാനത്ത് 17,043 പൊലീസ് എന്‍കൗണ്ടറുകള്‍ (ഏറ്റുമുട്ടലുകള്‍) നടന്നതായി യു.പി സര്‍ക്കാരിന്റെ വെളിപ്പെടുത്തല്‍. തിങ്കളാഴ്ച പുറത്തിറക്കിയ ഔദ്യോഗിക വാര്‍ത്താക്കുറിപ്പിലാണ് സര്‍ക്കാര്‍ ഈ ഞെട്ടിക്കുന്ന കണക്കുകള്‍ പുറത്തുവിട്ടത്. ഇത് പ്രകാരം സംസ്ഥാനത്ത് പ്രതിദിനം ശരാശരി അഞ്ചോളം എന്‍കൗണ്ടറുകള്‍ നടക്കുന്നുണ്ടെന്നാണ് കണക്കുകള്‍ സൂചിപ്പിക്കുന്നത്.

സംസ്ഥാനത്തെ സംഘടിത കുറ്റകൃത്യങ്ങളും ഗുരുതരമായ മറ്റ് കുറ്റകൃത്യങ്ങളും അടിച്ചമര്‍ത്തുക എന്ന ലക്ഷ്യത്തോടെ നടത്തിയ ഈ വ്യാപകമായ നടപടികളില്‍ 289 ‘കുറ്റവാളികള്‍’ കൊല്ലപ്പെടുകയും 11,834 പേര്‍ക്ക് പരിക്കേല്‍ക്കുകയും ചെയ്തതായി സര്‍ക്കാര്‍ അവകാശപ്പെടുന്നു. ഇതേ കാലയളവില്‍ 34,253 കുറ്റവാളികളെ പൊലീസ് അറസ്റ്റ് ചെയ്തിട്ടുണ്ട്. കുറ്റവാളികളുമായുള്ള ഏറ്റുമുട്ടലില്‍ 18 പൊലീസ് ഉദ്യോഗസ്ഥര്‍ക്ക് ജീവന്‍ നഷ്ടപ്പെടുകയും 1,852 പൊലീസുകാര്‍ക്ക് പരിക്കേല്‍ക്കുകയും ചെയ്തിട്ടുണ്ടെന്നും റിപ്പോര്‍ട്ടില്‍ വ്യക്തമാക്കുന്നു.

സംസ്ഥാനത്ത് ഏറ്റവും കൂടുതല്‍ പൊലീസ് ഏറ്റുമുട്ടല്‍ കൊലപാതകങ്ങള്‍ രേഖപ്പെടുത്തിയിരിക്കുന്നത് മീററ്റ് സോണിലാണ്. ഇവിടെ നടന്ന 4,813 ഏറ്റുമുട്ടലുകളിലായി 97 കുപ്രസിദ്ധ കുറ്റവാളികള്‍ കൊല്ലപ്പെടുകയും 3,513 പേര്‍ക്ക് പരിക്കേല്‍ക്കുകയും 8,921 പേര്‍ അറസ്റ്റിലാവുകയും ചെയ്തു. ഈ ഓപ്പറേഷനുകളില്‍ രണ്ട് പൊലീസുകാര്‍ കൊല്ലപ്പെടുകയും 477 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. മരണസംഖ്യയില്‍ രണ്ടാമതുള്ള വാരണാസി സോണില്‍ 1,292 ഏറ്റുമുട്ടലുകളിലായി 29 കുറ്റവാളികള്‍ കൊല്ലപ്പെട്ടു. ഇവിടെ 2,426 പേര്‍ അറസ്റ്റിലാവുകയും 907 കുറ്റവാളികള്‍ക്കും 104 പൊലീസുകാര്‍ക്കും പരിക്കേല്‍ക്കുകയും ചെയ്തു. മൂന്നാം സ്ഥാനത്തുള്ള ആഗ്ര സോണില്‍ 2,449 ഏറ്റുമുട്ടലുകളില്‍ നിന്ന് 24 പേരാണ് കൊല്ലപ്പെട്ടത്. ആഗ്രയില്‍ 5,845 പേര്‍ അറസ്റ്റിലാവുകയും 968 കുറ്റവാളികള്‍ക്കും 62 പൊലീസുകാര്‍ക്കും പരിക്കേല്‍ക്കുകയും ചെയ്തു.

മറ്റ് മേഖലകളിലെ കണക്കുകള്‍ പരിശോധിച്ചാല്‍ ബറേലി സോണില്‍ 21 പേരും (2,222 ഏറ്റുമുട്ടലുകള്‍), ലഖ്‌നൗ സോണില്‍ 20 പേരും (971 ഏറ്റുമുട്ടലുകള്‍), കാണ്‍പൂര്‍ സോണില്‍ 12 പേരും (791 ഏറ്റുമുട്ടലുകള്‍), പ്രയാഗ്രാജ് സോണില്‍ 11 പേരും (643 ഏറ്റുമുട്ടലുകള്‍), ഗൗതം ബുദ്ധ നഗര്‍ സോണില്‍ 9 പേരും (1,144 ഏറ്റുമുട്ടലുകള്‍), ഗോരഖ്പൂര്‍ സോണില്‍ 8 പേരും (699 ഏറ്റുമുട്ടലുകള്‍) കൊല്ലപ്പെട്ടിട്ടുണ്ട്. വിവിധ പൊലീസ് കമ്മീഷണറേറ്റുകളില്‍ ഏറ്റവും കൂടുതല്‍ മരണങ്ങള്‍ നടന്നത് ഗാസിയാബാദിലാണ്; 789 ഏറ്റുമുട്ടലുകളിലായി 18 പേര്‍. ലഖ്‌നൗ കമ്മീഷണറേറ്റില്‍ 12 പേരും (147 ഏറ്റുമുട്ടലുകള്‍), ആഗ്ര കമ്മീഷണറേറ്റില്‍ 10 പേരും (489 ഏറ്റുമുട്ടലുകള്‍), വാരണാസി കമ്മീഷണറേറ്റില്‍ 8 പേരും (146 ഏറ്റുമുട്ടലുകള്‍), പ്രയാഗ്രാജ് കമ്മീഷണറേറ്റില്‍ 6 പേരും (150 ഏറ്റുമുട്ടലുകള്‍), കാണ്‍പൂര്‍ കമ്മീഷണറേറ്റില്‍ 4 പേരും (253 ഏറ്റുമുട്ടലുകള്‍) എന്‍കൗണ്ടറുകളില്‍ കൊല്ലപ്പെട്ടു.

മേയ് 6, 7 തീയതികളിലായി സംസ്ഥാനത്ത് മൂന്ന് പേരുടെ മരണത്തിനും 35 പേര്‍ക്ക് പരിക്കേല്‍ക്കുന്നതിനും ഇടയാക്കിയ 35 എന്‍കൗണ്ടറുകള്‍ നടന്ന് കൃത്യം ഒരാഴ്ച പിന്നിടുമ്പോഴാണ് സര്‍ക്കാര്‍ ഈ വിശദമായ കണക്കുകള്‍ പുറത്തുവിടുന്നത് എന്നത് ശ്രദ്ധേയമാണ്. ഈ ഏറ്റുമുട്ടലുകളിലെല്ലാം തന്നെ സമാനമായ ഒരു രീതിയാണ് പൊലീസ് അവലംബിച്ചിട്ടുള്ളത്. പ്രതികള്‍ പൊലീസിന് നേരെ വെടിയുതിര്‍ത്ത് രക്ഷപ്പെടാന്‍ ശ്രമിക്കുമ്പോള്‍, പൊലീസ് തിരിച്ചടിക്കുന്നതിനിടയില്‍ പ്രതികളുടെ കാലിന് വെടിയേല്‍ക്കുകയാണ് ചെയ്യാറുള്ളത്.

എന്നിരുന്നാലും, ഉത്തര്‍പ്രദേശിലെ ഇത്തരം എന്‍കൗണ്ടറുകള്‍ക്കെതിരെ ജനുവരിയില്‍ അലഹബാദ് ഹൈക്കോടതി കടുത്ത വിമര്‍ശനം ഉന്നയിച്ചിരുന്നു. യുപിയില്‍ എന്‍കൗണ്ടറുകള്‍ ഒരു ‘ദൈനംദിന ശീലമായി’ മാറിയിരിക്കുകയാണെന്നും, മുതിര്‍ന്ന ഉദ്യോഗസ്ഥരെ പ്രീതിപ്പെടുത്താനോ പ്രതികളെ പാഠം പഠിപ്പിക്കാനോ വേണ്ടിയാണ് ഇവ നടപ്പിലാക്കുന്നതെന്നും കോടതി നിരീക്ഷിച്ചിരുന്നു. കാലിന് വെടിയേറ്റ് അറസ്റ്റിലായ മൂന്ന് പ്രതികളുടെ ജാമ്യാപേക്ഷ പരിഗണിക്കവെയാണ് ജസ്റ്റിസ് അരുണ്‍ കുമാര്‍ സിംഗ് ദേശ്വാളിന്റെ ബെഞ്ച് ഈ പരാമര്‍ശം നടത്തിയത്. മോഷണം പോലുള്ള ചെറിയ കുറ്റകൃത്യങ്ങളില്‍ പോലും, സംഭവത്തെ ഒരു പൊലീസ് എന്‍കൗണ്ടറായി ചിത്രീകരിച്ച് പൊലീസ് വിവേചനരഹിതമായി വെടിയുതിര്‍ക്കുന്ന കേസുകള്‍ കോടതിക്ക് മുന്നില്‍ നിരന്തരം വരുന്നുണ്ടെന്നും ഹൈക്കോടതി അന്ന് തുറന്നടിച്ചിരുന്നു.

Content Summary: UP Government data reveals 17,043 police encounters in Uttar Pradesh since March 2017 under CM Yogi Adityanath, leading to the deaths of 289 criminals