കരട് ബില്ലുകള്‍ എവിടെ ഒളിപ്പിച്ചു ? ;പൊളിച്ച് പണിയില്‍ കുരുങ്ങി അന്ധവിശ്വാസ നിരോധന നിയമം

കേരളത്തിൽ വർധിച്ചുവരുന്ന അന്ധവിശ്വാസങ്ങളുടെയും ദുർമന്ത്രവാദത്തിന്റെയും മറവിൽ നടക്കുന്ന ക്രൂരതകൾക്ക് അറുതിവരുത്താൻ ഒരു നിയമം വേണമെന്ന ആവശ്യം ശക്തമാവുകയാണ്, നിയമത്തിന്റെ കരട് രൂപീകരിക്കാൻ സർക്കാർ വീണ്ടും ഒരു മൂന്നംഗ വിദഗ്ദ്ധ സമിതിയെ നിയോഗിച്ചിരിക്കുകയാണ്. മുൻ നിയമസെക്രട്ടറി ശശിധരൻ നായർ, മുൻ ഡി.ജി.പി. ജേക്കബ് പുന്നൂസ്, സംസ്ഥാന വഖഫ് ബോർഡ് ചെയർമാൻ എം.കെ. സക്കീർ എന്നിവരടങ്ങിയതാണ് പുതിയ സമിതി.

അന്ധവിശ്വാസ നിരോധന നിയമത്തിന് കരട് രൂപീകരിക്കാന്‍ മുമ്പും സമിതിയെ നിയോഗിച്ചിരുന്നു. നിയമം പ്രാബല്യത്തിൽ കൊണ്ടുവരാൻ സമിതികൾ കരടുകൾ സമർപ്പിച്ചിട്ടും, അത് നിയമമാക്കാൻ സർക്കാർ തയ്യാറായില്ല.

ലോ റിഫോർമേഷൻ കമ്മീഷൻ ഒരു ഡ്രാഫ്റ്റ് തയ്യാറാക്കി സർക്കാരിന് നൽകിയിരുന്നു. ഈ കരട് രൂപത്തിന്റെ കുറേക്കൂടി വിപുലമായ രൂപം വേണമെന്ന സർക്കാരിന്റെ ആവശ്യത്തിന്റെ അടിസ്ഥാനത്തിലാണ് ഇപ്പോൾ വീണ്ടുമൊരു സമിതിയെ രൂപീകരിച്ചതെന്ന് മുൻ കമ്മീഷന്റെ വൈസ് ചെയർമാൻ ശശിധരൻ നായർ നൽകിയ മറുപടി.

അന്ധവിശ്വാസ നിരോധന നിയമനിർമ്മാണത്തിന്റെ ചരിത്രം പരിശോധിച്ചാൽ, കേരളത്തിന്റെ ഭരണസംവിധാനങ്ങളുടെ ഇച്ഛാശക്തിയില്ലായ്മ വ്യക്തമാകും. ജസ്റ്റിസ് കെ.ടി. തോമസ് അധ്യക്ഷനായ നിയമപരിഷ്കരണ കമ്മീഷൻ സമഗ്രമായ ഒരു ബില്ലിന്റെ കരട് 2019ൽ സർക്കാരിന് സമർപ്പിച്ചിരുന്നു. ദുർമന്ത്രവാദം, ആഭിചാരക്രിയകൾ തുടങ്ങിയ മനുഷ്യത്വരഹിതമായ പ്രവർത്തികൾക്ക് കഠിനമായ ശിക്ഷ ഉറപ്പാക്കുന്നതായിരുന്നു ഈ കരട്. നരബലി പോലുള്ള കൊടുംകുറ്റകൃത്യങ്ങൾക്ക് വധശിക്ഷ വരെ ഈ ബിൽ നിർദേശിച്ചിരുന്നു. എന്നാൽ, ഈ ബിൽ നിയമമാക്കാൻ സർക്കാർ തയ്യാറായില്ല. വിശ്വാസത്തെയും അന്ധവിശ്വാസത്തെയും വേർതിരിക്കുന്നത് ബുദ്ധിമുട്ടാണ് എന്ന വാദം ഉന്നയിച്ച് 2023ൽ സർക്കാർ ഈ കരട് പിൻവലിച്ചു.

അന്ധവിശ്വാസ നിരോധന നിയമവുമായി ബന്ധപ്പെട്ട്, സർക്കാർതലത്തിൽ കാലതാമസം നേരിട്ടപ്പോൾ, രണ്ട് പ്രമുഖ സ്വകാര്യ ബില്ലുകൾ കേരള നിയമസഭയിൽ അവതരിപ്പിക്കപ്പെട്ടു. എന്നാൽ, ഇരു ബില്ലുകൾക്കും സർക്കാർ ഭാഗത്തുനിന്ന് അനുകൂലമായ പിന്തുണ ലഭിക്കുകയോ നിയമമായി മാറാൻ അനുവദിക്കുകയോ ചെയ്തില്ല.

പ്രതിപക്ഷത്തുനിന്നുള്ള മുതിർന്ന കോൺഗ്രസ് നേതാവായിരുന്ന പി.ടി. തോമസ് 2018-ൽ ‘കേരള ദുരാചാര നിർമ്മാർജ്ജനവും അന്ധവിശ്വാസ നിയന്ത്രണവും ബിൽ’ എന്ന പേരിൽ ഒരു സ്വകാര്യ ബിൽ അവതരിപ്പിച്ചു. ദുർമന്ത്രവാദം, മനുഷ്യത്വരഹിതമായ ആചാരങ്ങൾ എന്നിവയുടെ പേരിലുള്ള ചൂഷണങ്ങളെ കുറ്റകരമാക്കുക എന്നതായിരുന്നു ഈ ബില്ലിൻ്റെ പ്രധാന ലക്ഷ്യം. നരബലി പോലുള്ള സംഭവങ്ങൾ, രോഗശാന്തിക്കായി അശാസ്ത്രീയ ചികിത്സകൾ പ്രോത്സാഹിപ്പിക്കുന്നത്, ഭീഷണിപ്പെടുത്തി പണം തട്ടുന്നത് തുടങ്ങിയവയെല്ലാം ഈ ബിൽ പ്രകാരം കുറ്റകൃത്യങ്ങളായി കണക്കാക്കപ്പെടുമായിരുന്നു. എന്നാൽ, ഈ സ്വകാര്യ ബില്ലിനെ പിന്തുണയ്ക്കാൻ സർക്കാർ തയ്യാറായില്ല. നിയമ പരിഷ്കരണ കമ്മീഷൻ്റെ റിപ്പോർട്ട് സർക്കാരിൻ്റെ സജീവ പരിഗണനയിലാണെന്നും, അതിൻ്റെ അടിസ്ഥാനത്തിൽ കൂടുതൽ സമഗ്രമായ ഒരു ഔദ്യോഗിക സർക്കാർ ബിൽ ഉടൻ കൊണ്ടുവരുമെന്നും സർക്കാർ നിയമസഭയിൽ നിലപാടെടുത്തു. അതോടെ, ഈ സ്വകാര്യ ബിൽ നിയമമാക്കാനുള്ള നീക്കം പരാജയപ്പെട്ടു.

ഭരണപക്ഷത്തുനിന്നുള്ള എം.എൽ.എയായിരുന്ന കെ.ഡി. പ്രസേനൻ 2021-ൽ ‘കേരള ദുർമന്ത്രവാദ നിരോധന ബിൽ’ എന്ന പേരിൽ മറ്റൊരു സ്വകാര്യ ബിൽ അവതരിപ്പിച്ചു. അന്ധവിശ്വാസങ്ങളുടെ മറവിൽ നടക്കുന്ന ശാരീരികവും മാനസികവുമായ ചൂഷണങ്ങൾ തടയുന്നതിലായിരുന്നു ഈ ബിൽ പ്രധാനമായും ശ്രദ്ധ കേന്ദ്രീകരിച്ചത്. ചികിത്സ നിഷേധിക്കൽ, സ്ത്രീകളെയും കുട്ടികളെയും ഉപദ്രവിക്കൽ, മന്ത്രവാദത്തിലൂടെയുള്ള തട്ടിപ്പുകൾ തുടങ്ങിയവയ്ക്ക് കർശന ശിക്ഷ ഉറപ്പാക്കാൻ ബിൽ ലക്ഷ്യമിട്ടു. ഭരണകക്ഷിയിലെ അംഗമായിരുന്നിട്ടും പ്രസേനൻ്റെ ബില്ലിനും ഔദ്യോഗിക അംഗീകാരം ലഭിച്ചില്ല. നിയമത്തിൻ്റെ ഭരണഘടനാപരമായ നിലനിൽപ്പ്, വിവിധ സമുദായങ്ങളുടെ അഭിപ്രായം തേടേണ്ടതിൻ്റെ പ്രാധാന്യം, നിയമപരമായ വിശകലനത്തിൻ്റെ ആവശ്യകത എന്നിവ ചൂണ്ടിക്കാട്ടി, സമഗ്രമായ ചർച്ചകൾക്കും കൂടിയാലോചനകൾക്കും ശേഷം ഈ സ്വകാര്യ ബില്ലിൻ്റെ തുടർനടപടികൾ സർക്കാർ ഒഴിവാക്കി.

ഇത്തരത്തിൽ, ഇരുപക്ഷത്തുനിന്നുള്ള എം.എൽ.എമാർ അവതരിപ്പിച്ച ബില്ലുകളും സർക്കാർ അംഗീകരിക്കാതിരുന്നത്, അന്ധവിശ്വാസ നിരോധനം പോലെയുള്ള വിഷയങ്ങൾ വലിയ സാമൂഹിക-മതപരമായ പ്രത്യാഘാതങ്ങൾ സൃഷ്ടിക്കുന്ന ഒന്നായതിനാലാണെന്ന ആരോപണമുണ്ട്. ഏതെങ്കിലും ഒരു വ്യക്തിഗത എം.എൽ.എയുടെ സ്വകാര്യ ബില്ലിനെ ആശ്രയിക്കാതെ, നിയമവകുപ്പിൻ്റെയും വിദഗ്ധരുടെയും സഹായത്തോടെ എല്ലാ നിയമവശങ്ങളും പരിഗണിച്ച്, എതിർപ്പുകളെ പ്രതിരോധിക്കാൻ കഴിയുന്ന സമഗ്രവും ശക്തവുമായ ഒരു സർക്കാർ ബിൽ തന്നെ കൊണ്ടുവരണം എന്നതായിരുന്നു സർക്കാരിൻ്റെ പൊതുനിലപാട്. ഈ കാലതാമസമാണ് പുതിയൊരു സമിതിയെ ഇപ്പോൾ നിയമിക്കാൻ സർക്കാരിനെ പ്രേരിപ്പിച്ച ഒരു കാരണം.

പതിറ്റാണ്ടുകളായി, ഈ വിഷയത്തിൽ പഠനങ്ങളും കരടുകളും സമിതികളും നടന്നുകൊണ്ടിരിക്കുകയാണ്. മഹാരാഷ്ട്രയും കർണാടകയും പോലുള്ള സംസ്ഥാനങ്ങൾ നിയമം നടപ്പിലാക്കിയപ്പോൾ, കേരളം ഇപ്പോഴും ‘കരട് രൂപീകരിക്കുന്ന’ പ്രാരംഭ ദശയിൽത്തന്നെ നിലയുറപ്പിച്ചിരിക്കുന്നു. തിരുവല്ല നരബലി പോലുള്ള മനുഷ്യ മനഃസാക്ഷിയെ ഞെട്ടിച്ച സംഭവങ്ങൾ ആവർത്തിച്ചിട്ടും നിയമം കൊണ്ടുവരാൻ സർക്കാർ മടിച്ചതിന്റെ പ്രധാന കാരണം, ചില മത-സാമുദായിക ശക്തികളുടെ എതിർപ്പും വോട്ട് ബാങ്ക് രാഷ്ട്രീയവുമാണോ എന്ന ചോദ്യം പൊതുസമൂഹത്തിൽ ശക്തമാണ്.

പുതിയ സമിതിയെ നിയമിക്കാനുള്ള ഇപ്പോഴത്തെ നീക്കം ഹൈക്കോടതിയുടെ ഇടപെടലിനെ തുടർന്നാണ്. അന്ധവിശ്വാസങ്ങൾ തടയാൻ നിയമം കൊണ്ടുവരാത്തതിനെതിരെ സമർപ്പിച്ച ഹർജി പരിഗണിച്ചപ്പോഴാണ് സർക്കാർ പുതിയ സമിതിയെ നിയമിച്ച വിവരം കോടതിയെ അറിയിച്ചത്. അന്ധവിശ്വാസങ്ങൾ കാരണം മനുഷ്യന്റെ ജീവനും സ്വത്തിനും അപായമുണ്ടാക്കുന്ന സംഭവങ്ങൾ ദിനംപ്രതി വർധിക്കുമ്പോൾ, പഴയ കരടുകളെ തള്ളി വീണ്ടും പുതിയൊരെണ്ണം രൂപീകരിക്കാനുള്ള ശ്രമം കേവലം കണ്ണിൽ പൊടിയിടൽ ആകരുതെന്ന് ജനങ്ങൾ ആഗ്രഹിക്കുന്നു. ഈ ‘നിയമനിർമ്മാണ ശ്രമം’ മറ്റൊരു രാഷ്ട്രീയ വാഗ്ദാനം മാത്രമായി മാറുമോ എന്ന സംശയം ബാക്കിയാണ്.

content summary: Where are the draft bills of the Anti-Superstition Act, and which groups is the government afraid of, causing the delay in implementing the bill?