അമേരിക്കൻ ദമ്പതികളായ ലിൻഡ്സെയും ടിം പിയേഴ്സും വർഷങ്ങളായി ഒരു കുഞ്ഞിനായി കാത്തിരിക്കുകയായിരുന്നു. അവരുടെ പ്രാർത്ഥനകൾക്കും നേർച്ചകൾക്കും ഒടുവിൽ വൈദ്യശാസ്ത്രം ഉത്തരം നൽകി. 1994-ൽ ശീതീകരിച്ച് സൂക്ഷിച്ച ഭ്രൂണത്തിൽ നിന്നാണ് ദമ്പതികൾക്ക് തഡ്ഡിയസ് ഡാനിയൽ പിയേഴ്സ് എന്ന ആൺകുഞ്ഞ് പിറന്നിരിക്കുന്നത്. “ഏറ്റവും പ്രായം കൂടിയ കുഞ്ഞ്” എന്ന ലോക റെക്കോർഡും ഇനി ഡാനിയേലിന്റെ പേരിലാണ്. 62-കാരിയായ ലിൻഡ ആർച്ചേർഡിന്റേതാണ് ഈ ഭ്രൂണം.
1990-കളുടെ തുടക്കത്തിൽ ഗർഭിണിയാകാൻ ബുദ്ധിമുട്ടിയ ലിൻഡ ആർച്ചേർഡും അവരുടെ മുൻ ഭർത്താവും ചേർന്നാണ് ഐവിഎഫ് വഴി ഭ്രൂണം ആദ്യം സൃഷ്ടിച്ചത്. അവർ സൃഷ്ടിച്ച നാല് ഭ്രൂണങ്ങളിൽ ഒന്നിൽ നിന്നാണ് ഇപ്പോൾ 30 വയസ്സുള്ള ഒരു മകൾ ജനിച്ചത്. ബാക്കിയുണ്ടായിരുന്ന ഭ്രൂണങ്ങൾ വിവാഹമോചനത്തിന് ശേഷം ലിൻഡയുടെ സംരക്ഷണയിൽ ശീതീകരിച്ച് സൂക്ഷിക്കുകയായിരുന്നു.
“ഞങ്ങൾക്ക് ഒരു കുഞ്ഞിനെ വേണമെന്നേ ഉണ്ടായിരുന്നുള്ളൂ. ഇത് ഒരു റെക്കോർഡ് സൃഷ്ടിക്കാനായി ചെയ്തതല്ല” ലിൻഡ്സെ പറഞ്ഞു.
ഒരു കുഞ്ഞിനെ ആഗ്രഹിക്കുന്നവർക്ക് വേണ്ടിയുള്ള ചികിത്സയാണ് IVF അഥവാ ഇൻ വിട്രോ ഫെർട്ടിലൈസേഷൻ. ഈ ചികിത്സാരീതിയിൽ, സ്ത്രീയുടെ അണ്ഡവും പുരുഷൻ്റെ ബീജവും ഒരു ലാബിൽ വെച്ച് സംയോജിപ്പിച്ച് ഭ്രൂണം ഉണ്ടാക്കുന്നു. പിന്നീട് ഈ ഭ്രൂണം ഗർഭപാത്രത്തിൽ നിക്ഷേപിക്കുകയാണ് ചെയ്യുന്നത്. ഭാവിയിൽ ഉപയോഗിക്കാനായി ഭ്രൂണങ്ങൾ ശീതീകരിച്ച് സൂക്ഷിക്കാനും സാധിക്കും.
ഭർത്താവുമായി പിരിഞ്ഞ ശേഷം, ഭ്രൂണങ്ങളുടെ അവകാശം ലിൻഡ ആർച്ചേർഡിന് ലഭിച്ചു. പിന്നീട് അവർ ഭ്രൂണം “ദത്തെടുക്കുന്നതിനെ” കുറിച്ച് മനസ്സിലാക്കി. ഈ രീതിയിൽ, ഭ്രൂണം ദാനം ചെയ്യുന്നവർക്കും അത് സ്വീകരിക്കുന്നവർക്കും തങ്ങൾക്കിണങ്ങിയ ആളുകളെ തിരഞ്ഞെടുക്കാൻ അവസരമുണ്ട്. തൻ്റെ ഭ്രൂണം വെളുത്ത വർഗക്കാരായ, ക്രിസ്ത്യൻ ദമ്പതികൾക്ക് നൽകണമെന്ന് ലിൻഡ ആർച്ചേർഡ് ആഗ്രഹിച്ചു. അങ്ങനെയാണ് ഈ ഭ്രൂണം ദത്തെടുക്കാൻ ലിൻഡ്സെയും ടിം പിയേഴ്സും മുന്നോട്ട് വന്നത്.
പ്രസവസമയത്ത് ചില ബുദ്ധിമുട്ടുകൾ ഉണ്ടായെങ്കിലും, താനും കുഞ്ഞും ഇപ്പോൾ സുഖമായിരിക്കുന്നുവെന്ന് ലിൻഡ്സെ പറഞ്ഞു. “അവൻ വളരെ ശാന്തനാണ്. ഈ അമൂല്യമായ കുഞ്ഞിനെ ലഭിച്ചതിൽ ഞങ്ങൾ അത്ഭുതപ്പെടുന്നു,” അവർ കൂട്ടിച്ചേർത്തു.
തഡ്ഡീസിൻ്റെ ചിത്രങ്ങൾ ലിൻഡ്സെ അയച്ചപ്പോൾ, തൻ്റെ മകളുടെ കുഞ്ഞായിരിക്കുമ്പോഴുള്ള രൂപവുമായി അവൻ വലിയ സാമ്യമുണ്ടെന്ന് ലിൻഡ് ആർച്ചേർഡ് പറഞ്ഞു. “ഞാൻ എൻ്റെ ബേബി ബുക്ക് എടുത്ത് രണ്ടുപേരെയും താരതമ്യം ചെയ്തു, അവർ സഹോദരീസഹോദരന്മാരാണെന്നതിൽ എനിക്ക് സംശയമില്ല,” അവർ വ്യക്തമാക്കി.
തഡ്ഡിയസ് ഡാനിയൽ പിയേഴ്സിൻ്റെ ഭ്രൂണം കൈമാറ്റം ചെയ്ത ക്ലിനിക്കിൻ്റെ മേധാവി, ജോൺ ഗോർഡൻ എന്ന ഡോക്ടറാണ്. റീഫോണ്ട് പ്രെസ്ബിറ്റേറിയൻ വിശ്വാസിയായ അദ്ദേഹം, ശീതീകരിച്ച് സൂക്ഷിച്ചിട്ടുള്ള ഭ്രൂണങ്ങളുടെ എണ്ണം കുറയ്ക്കാൻ പ്രവർത്തിക്കുകയാണ്.
യുകെയിൽ IVF വഴി ജനിക്കുന്ന കുട്ടികളുടെ എണ്ണം ഗണ്യമായി വർധിച്ചിട്ടുണ്ട്. 2000-ൽ മൊത്തം ജനനങ്ങളുടെ 1.3% മാത്രമായിരുന്നെങ്കിൽ, 2023-ൽ ഇത് 3.1% ആയി ഉയർന്നു. ഓരോ 32 ജനനങ്ങളിലും ഒന്ന് IVF വഴിയാണ്. 40-നും 44-നും ഇടയിൽ പ്രായമുള്ള സ്ത്രീകളിൽ 11% പ്രസവങ്ങളും IVF വഴിയാണ്. യുഎസിലെ മൊത്തം ജനനങ്ങളിൽ ഏകദേശം 2% IVF വഴിയാണ്.
content summary: World’s ‘oldest baby’ born from embryo frozen in 1994
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
