ആൻ്റിബയോട്ടിക്കുകളെ പ്രതിരോധിക്കാൻ ശേഷിയുള്ള നൈറ്റ്മെയർ ബാക്ടീരിയകളുടെ (nightmare bacteria) സാന്നിധ്യം ആശങ്കാജനകമായ അളവിലാണ് അമേരിക്കയിൽ വർധിക്കുന്നത്. ഇത് ഗുരുതരമായ ആഗോള ആരോഗ്യ പ്രതിസന്ധിക്ക് വഴിവെക്കുന്നതായി സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ (CDC) പുറത്തുവിട്ട റിപ്പോർട്ടിൽ പറയുന്നു. 2019-നും 2023-നും ഇടയിൽ ഇത്തരം അണുബാധകൾ 70 ശതമാനത്തോളം വർധിച്ചതായി റിപ്പോർട്ടിൽ ചൂണ്ടിക്കാട്ടുന്നു. ആൻ്റിബയോട്ടിക്കുകളുടെ അമിത ഉപയോഗം, കോവിഡ്-19 മഹാമാരിയുടെ സ്വാധീനം തുടങ്ങിയ ഘടകങ്ങളാണ് ഈ പ്രതിസന്ധിക്ക് പിന്നിൽ. ഈ കണ്ടെത്തലുകൾ ഒരു രാജ്യത്തിന്റെ മാത്രം പ്രശ്നമല്ലെന്നും, മറിച്ച് ആഗോളതലത്തിൽ ഗുരുതരമായ പ്രത്യാഘാതങ്ങൾ ഉണ്ടാക്കുമെന്നും ഇത് സൂചിപ്പിക്കുന്നു.
ഈ അപകടകരമായ അവസ്ഥയ്ക്ക് പിന്നിൽ NDM ജീൻ (New Delhi metallo-β-lactamase) ഉള്ള ബാക്ടീരിയകളാണ് പ്രധാന വില്ലൻ. മുമ്പ് യുഎസിന് പുറത്ത് മാത്രം കണ്ടിരുന്ന ഈ ബാക്ടീരിയ ഇപ്പോൾ അവിടെയും ഭീഷണി ഉയർത്തുന്നു. ഇതിനെതിരെയുള്ള ഒരേയൊരു പ്രതിരോധമായി കരുതിയിരുന്ന കാർബപെനെംസ് എന്ന ആൻ്റിബയോട്ടിക്കിനെയും ഈ ബാക്ടീരിയകൾക്ക് പ്രതിരോധിക്കാൻ കഴിയും.
അണുബാധ വർധിക്കുന്നതിന് പിന്നിൽ
ആൻ്റിബയോട്ടിക്കുകൾ അനാവശ്യമായി ഉപയോഗിക്കുന്നതും, ഡോക്ടർ നിർദ്ദേശിച്ച കോഴ്സ് പൂർത്തിയാക്കാത്തതും ബാക്ടീരിയകൾക്ക് മരുന്നുകളോട് പൊരുത്തപ്പെടാനുള്ള ശേഷി നൽകുന്നു. കോവിഡ് കാലത്ത് ആൻ്റിബയോട്ടിക്കുകളുടെ ഉപയോഗം വളരെയധികം വർധിച്ചത് ഈ പ്രതിരോധശേഷിക്ക് ആക്കം കൂട്ടിയിട്ടുണ്ടെന്ന് ഗവേഷകർ പറയുന്നു. ഈ റിപ്പോർട്ടിനായി 29 സംസ്ഥാനങ്ങളിൽ നിന്നുള്ള വിവരങ്ങൾ മാത്രമേ ലഭ്യമായിട്ടുള്ളൂ. അതിനാൽ, യഥാർത്ഥ കണക്കുകൾ ഇതിലും വളരെ കൂടുതലായിരിക്കാം.
ആഗോള ദുരന്തത്തിലേക്കുള്ള സൂചന
NDM ജീൻ അടങ്ങിയ ബാക്ടീരിയകൾ അമേരിക്കയിൽ മാത്രമല്ല, ലോകത്തിന്റെ മറ്റ് ഭാഗങ്ങളിലും പ്രശ്നമുണ്ടാക്കുന്നുണ്ട്. ഇന്ത്യയിലും പാക്കിസ്ഥാനിലും ഈ ബാക്ടീരിയ വ്യാപകമാണ്. ആൻ്റിബയോട്ടിക്കുകളുടെ അമിത ഉപയോഗവും, ആശുപത്രികളിലെ തിരക്കും ഇതിന് കാരണമാകുന്നു. യൂറോപ്പ്, ആഫ്രിക്ക, ലാറ്റിനമേരിക്ക എന്നിവിടങ്ങളിലും ഈ ബാക്ടീരിയകളുടെ സാന്നിധ്യം കണ്ടെത്തിയിട്ടുണ്ട്.
Content Summary: ‘Nightmare Bacteria’ infections in America
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
