അനിശ്ചിതത്വങ്ങള്ക്കും പ്രക്ഷോഭങ്ങള്ക്കും വിരാമം കുറിച്ച് ബംഗ്ലാദേശിന് പുതിയ രാഷ്ട്രീയ നേതൃത്വം വരുന്നു. രാജ്യത്ത് നടന്ന പൊതുതിരഞ്ഞെടുപ്പില് ബംഗ്ലാദേശ് നാഷണലിസ്റ്റ് പാര്ട്ടി (ബിഎന്പി) വന് വിജയം കരസ്ഥമാക്കി. 2024-ല് നടന്ന വിദ്യാര്ത്ഥി-ജനകീയ പ്രക്ഷോഭത്തിലൂടെ ഷെയ്ഖ് ഹസീന സര്ക്കാര് പുറത്തായതിനുശേഷം നടന്ന ആദ്യ ജനാധിപത്യ തിരഞ്ഞെടുപ്പിലാണ് ബിഎന്പി അധികാരത്തിലേക്ക് തിരിച്ചെത്തുന്നത്. 300 അംഗ പാര്ലമെന്റില് (ജാതിയ സംസദ്) ബിഎന്പിയും സഖ്യകക്ഷികളും ചേര്ന്ന് 211 സീറ്റുകള് നേടി മൂന്നില് രണ്ട് ഭൂരിപക്ഷം ഉറപ്പിച്ചു.
കഴിഞ്ഞ മൂന്ന് പതിറ്റാണ്ടിനിടെ ആദ്യമായാണ് അവാമി ലീഗിന്റെ ‘ബോട്ട്’ ചിഹ്നമില്ലാതെ ബംഗ്ലാദേശ് ഒരു തിരഞ്ഞെടുപ്പിനെ നേരിട്ടത്. മുന് ഭരണകൂടത്തിന്റെ വീഴ്ചയെത്തുടര്ന്ന് അവാമി ലീഗിനെ തിരഞ്ഞെടുപ്പില് നിന്ന് വിലക്കിയിരുന്നു. ഇതോടെ ബിഎന്പിയും ജമാഅത്തെ ഇസ്ലാമി നയിക്കുന്ന 11 കക്ഷി സഖ്യവും തമ്മിലായിരുന്നു പ്രധാന മത്സരം. ജമാഅത്തെ ഇസ്ലാമി സഖ്യം 70 സീറ്റുകള് നേടി രണ്ടാമതെത്തി. എന്സിപി (നാഷണല് സിറ്റിസണ് പാര്ട്ടി) പോലുള്ള യുവജന പ്രസ്ഥാനങ്ങളുടെ സാന്നിധ്യവും ഈ തിരഞ്ഞെടുപ്പില് നിര്ണ്ണായകമായി.
17 വര്ഷത്തെ പ്രവാസജീവിതം അവസാനിപ്പിച്ച് കഴിഞ്ഞ ഡിസംബറില് മടങ്ങിയെത്തിയ താരിഖ് റഹ്മാന്റെ നേതൃത്വമാണ് ബിഎന്പിക്ക് വലിയ വിജയം സമ്മാനിച്ചത്. ലണ്ടനില് നിന്ന് തിരിച്ചെത്തിയ അദ്ദേഹം രാജ്യത്ത് നിയമവാഴ്ച പുനഃസ്ഥാപിക്കുമെന്നും തകര്ച്ച നേരിടുന്ന വസ്ത്ര നിര്മ്മാണ മേഖലയെ ശക്തിപ്പെടുത്തുമെന്നും വാഗ്ദാനം ചെയ്തിരുന്നു. തിരഞ്ഞെടുപ്പ് ഫലം പുറത്തുവന്നതിനു പിന്നാലെ, പാര്ട്ടി പ്രവര്ത്തകര് ആഹ്ലാദപ്രകടനങ്ങള് ഒഴിവാക്കണമെന്നും പകരം രാജ്യത്തിന്റെ സമാധാനത്തിനായി പ്രത്യേക പ്രാര്ത്ഥനകള് നടത്തണമെന്നും അദ്ദേഹം നിര്ദ്ദേശിച്ചു.
ബംഗ്ലാദേശിലെ ആകെ വോട്ടര്മാരുടെ 44 ശതമാനത്തോളം വരുന്ന ‘ജനറേഷന് ഇസഡ്’ (18-37 വയസുകാര്) ആണ് ഈ തിരഞ്ഞെടുപ്പിലെ വിധി നിര്ണ്ണയിച്ചത്. 2024-ലെ വിപ്ലവത്തിന് നേതൃത്വം നല്കിയ യുവതലമുറ മാറ്റത്തിനായി വോട്ട് ചെയ്തത് ബിഎന്പിക്ക് വലിയ രീതിയില് ഗുണകരമായി. അതീവ സുതാര്യമായാണ് വോട്ടെടുപ്പ് നടന്നതെന്ന് ചീഫ് ഇലക്ഷന് കമ്മീഷണര് എ.എം.എം. നസീര് ഉദ്ദീന് വ്യക്തമാക്കി. 299 സീറ്റുകളിലേക്കാണ് വോട്ടെടുപ്പ് നടന്നത്; ഒരു മണ്ഡലത്തില് സ്ഥാനാര്ത്ഥിയുടെ മരണം മൂലം പോളിങ് മാറ്റി വെച്ചിരിക്കുകയാണ്.
മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സര്ക്കാരിന് കീഴില് നടന്ന ഈ തിരഞ്ഞെടുപ്പോടെ ബംഗ്ലാദേശില് പുതിയൊരു രാഷ്ട്രീയ അധ്യായം കുറിക്കപ്പെടുകയാണ്. ചിറ്റഗോങ് ഹില് ട്രാക്ട്സ് ഉള്പ്പെടെയുള്ള പ്രദേശങ്ങളില് ബിഎന്പി നേടിയ സമ്പൂര്ണ്ണ വിജയം പാര്ട്ടിക്ക് ലഭിച്ച വലിയ ജനപിന്തുണയുടെ തെളിവായി വിലയിരുത്തപ്പെടുന്നു. വരും ദിവസങ്ങളില് താരിഖ് റഹ്മാന്റെ നേതൃത്വത്തിലുള്ള പുതിയ സര്ക്കാര് അധികാരമേല്ക്കുന്നതോടെ രാജ്യത്തെ സാമ്പത്തിക-സാമൂഹിക മേഖലകളില് വലിയ പരിഷ്കാരങ്ങള് പ്രതീക്ഷിക്കപ്പെടുന്നു.
Content Summary; Bangladesh Election; BNP won a landslide parliamentary election. BNP leader Tarique Rahman will lead the government
This post was last modified on February 13, 2026 11:33 am
Leave a Comment