ഗാസയിലേക്ക് വിദേശ മാധ്യമപ്രവർത്തകർക്ക് പ്രവേശനം അനുവദിക്കണമെന്ന് ആവശ്യപ്പെട്ട് ബിബിസിയും പ്രമുഖ അന്താരാഷ്ട്ര വാർത്താ ഏജൻസികളായ അസോസിയേറ്റഡ് പ്രസ് (AP), ഏജൻസ് ഫ്രാൻസ്-പ്രസ് (AFP), റോയിട്ടേഴ്സ് എന്നിവയും സംയുക്തമായി ഹ്രസ്വചിത്രം പുറത്തിറക്കി. മുതിർന്ന മാധ്യമപ്രവർത്തകനായ ഡേവിഡ് ഡിംബിൾബി വിവരണം നൽകുന്ന ഈ ചിത്രം, ഇസ്രയേൽ ഏർപ്പെടുത്തിയ പ്രവേശന വിലക്കുകൾക്കെതിരെയുള്ള ശക്തമായ പ്രതിഷേധമാണ്.
2023 ഒക്ടോബർ 7-ന് ഹമാസ് നടത്തിയ ആക്രമണത്തിന് ശേഷം ഇസ്രയേൽ ഗാസയിൽ സൈനിക നടപടി ആരംഭിച്ചതു മുതൽ വിദേശ മാധ്യമപ്രവർത്തകർക്ക് അവിടേക്ക് സ്വതന്ത്രമായി പ്രവേശിക്കാൻ അനുമതിയില്ല. ചില മാധ്യമപ്രവർത്തകർക്ക് ഇസ്രയേൽ സൈന്യത്തിന്റെ നിയന്ത്രണത്തിൽ മാത്രമാണ് പ്രവേശനം ലഭിച്ചിട്ടുള്ളത്. ഈ സാഹചര്യത്തെയാണ് ചിത്രം വിമർശിക്കുന്നത്.
Also Read: ഗാസയിൽ ഇസ്രയേൽ കൊലപെടുത്തിയ 94 ശതമാനവും സാധാരണക്കാർ
“വസ്തുതകൾ ലോകത്തിന് മുന്നിലെത്തിക്കാൻ ഗാസയിലെ പലസ്തീൻ റിപ്പോർട്ടർമാർക്കൊപ്പം അവരുടെ ഭാരം പങ്കിടാൻ അന്താരാഷ്ട്ര മാധ്യമപ്രവർത്തകരെ ഗാസയിലേക്ക് പ്രവേശിപ്പിക്കണം,” എന്ന് ഡിംബിൾബി ചിത്രത്തിൽ ആവശ്യപ്പെടുന്നു. ഡി-ഡേ ലാൻഡിംഗ്, വിയറ്റ്നാം യുദ്ധം, റുവാണ്ടൻ വംശഹത്യ, യുക്രെയ്ൻ യുദ്ധം തുടങ്ങിയ നിർണായക സംഭവങ്ങൾ മാധ്യമപ്രവർത്തകർ റിപ്പോർട്ട് ചെയ്ത ദൃശ്യങ്ങളും ചിത്രത്തിൽ ഉൾപ്പെടുത്തിയിട്ടുണ്ട്. യുക്രെയ്നിൽ മാധ്യമപ്രവർത്തകർ ജീവൻ പണയംവെച്ച് റിപ്പോർട്ട് ചെയ്യുമ്പോൾ, ഗാസയിൽ ഈ ചുമതല പലസ്തീൻ മാധ്യമപ്രവർത്തകർക്ക് മാത്രമായി ഒതുങ്ങുന്നുവെന്നും ചിത്രം ചൂണ്ടിക്കാട്ടുന്നു.
വാർത്താ ഏജൻസികളുടെ നിലപാട്
ബിബിസി ന്യൂസ് സി.ഇ.ഒ ഡെബോറ ടേണസ് വിഷയത്തിൽ പ്രതികരിച്ചു. “ഹമാസിന്റെ ആക്രമണം നടന്നിട്ട് രണ്ട് വർഷത്തോളമായി. ഗാസയിൽ യുദ്ധം തുടരുമ്പോഴും വിദേശ മാധ്യമപ്രവർത്തകർക്ക് പ്രവേശനമില്ല. സത്യങ്ങൾ ലോകത്തിന് മുന്നിലെത്തിക്കാൻ പ്രാദേശിക മാധ്യമപ്രവർത്തകർക്കൊപ്പം പ്രവർത്തിക്കാൻ ഞങ്ങളെ ഗാസയിലേക്ക് അനുവദിക്കണം,” അവർ പറഞ്ഞു.
Also Read: മാധ്യമങ്ങൾക്ക് ഇരുണ്ട കാലം; 50 വർഷങ്ങൾക്കിടയിൽ മാധ്യമസ്വാതന്ത്ര്യത്തിൽ ഇടിവ്
ഗാസയിലെ മാധ്യമപ്രവർത്തകർ അനുഭവിക്കുന്ന ദുരിതങ്ങളെക്കുറിച്ച് ഈ വാർത്താ ഏജൻസികൾ നേരത്തെയും ആശങ്ക അറിയിച്ചിരുന്നു. കഴിഞ്ഞ ജൂലൈയിൽ സംയുക്ത പ്രസ്താവനയിലൂടെ വിശപ്പ്, പലായനം തുടങ്ങിയ വിഷയങ്ങളിൽ അവർ പ്രതിഷേധം രേഖപ്പെടുത്തിയിരുന്നു. യു.എൻ. മനുഷ്യാവകാശ ഓഫീസ് പറയുന്നതനുസരിച്ച്, ഇസ്രായേൽ ആക്രമണങ്ങളിൽ 248 പലസ്തീൻ മാധ്യമപ്രവർത്തകർ കൊല്ലപ്പെട്ടിട്ടുണ്ട്.
ഇസ്രായേലിന്റെ പ്രതികരണം
ഗാസയിലേക്കുള്ള പ്രവേശന വിലക്ക് സുരക്ഷാ കാരണങ്ങളാൽ ആവശ്യമാണെന്ന് ഇസ്രയേൽ ഹൈക്കോടതി മുൻപ് വിധിച്ചിരുന്നു. മാധ്യമപ്രവർത്തകർക്ക് സുരക്ഷിതമായി റിപ്പോർട്ട് ചെയ്യാൻ വേണ്ടിയാണ് സൈന്യം അവരെ യുദ്ധഭൂമിയിൽ അനുഗമിക്കുന്നതെന്നാണ് ഇസ്രയേൽ പ്രതിരോധ സേനയുടെ (IDF) നിലപാട്. അതേസമയം, തങ്ങളുടെ സേന മാധ്യമപ്രവർത്തകരെ ലക്ഷ്യമിടുന്നില്ലെന്ന് ഇസ്രയേൽ ആവർത്തിച്ച് പറയുന്നു.
Also Read: മാധ്യമപ്രവര്ത്തരെ തീവ്രവാദികളാക്കി ഇസ്രയേലിന്റെ ആസൂത്രിത ആക്രമണങ്ങള്
2023 ഒക്ടോബർ 7-ന് ഹമാസ് നടത്തിയ ആക്രമണത്തിന് മറുപടിയായാണ് ഇസ്രയേൽ ഗാസയിൽ സൈനിക നടപടി ആരംഭിച്ചത്. ഇതിൽ 1,200 പേർ കൊല്ലപ്പെടുകയും 251 പേരെ ബന്ദികളാക്കുകയും ചെയ്തിരുന്നു. ഹമാസ് നിയന്ത്രണത്തിലുള്ള ഗാസയിലെ ആരോഗ്യ മന്ത്രാലയത്തിന്റെ കണക്കനുസരിച്ച്, ഇതുവരെ 65,419-ലധികം ആളുകൾ കൊല്ലപ്പെട്ടിട്ടുണ്ട്. ഈ കണക്കുകളാണ് ഐക്യരാഷ്ട്രസഭയുൾപ്പെടെയുള്ള സംഘടനകൾ വിശ്വസനീയമായ വിവരങ്ങളായി ഉദ്ധരിക്കുന്നത്.
content summary: BBC and News Agencies Release Short Film Against Media Blackout
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
