യുഎസ് പ്രസിഡൻ്റ് ഡൊണാൾഡ് ട്രംപിൻ്റെ വിശ്വസ്തൻ ചാർലി കിർക്കിനെ വെടിവെച്ചുകൊന്ന സംഭവത്തിലെ പ്രതിയെന്ന് സംശയിക്കുന്നയാളുടെ പുതിയ വീഡിയോ പുറത്തുവിട്ട് ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ. ചാർലി കിർക്കിന്റെ കൊലപാതകത്തിന് ഉപയോഗിച്ചതെന്ന് സംശയിക്കുന്ന ആയുധം കണ്ടെത്തിയതായും റിപ്പോർട്ടുകളുണ്ട്. അതേസമയം, പ്രതിക്കായുള്ള തിരച്ചിൽ ഇപ്പോഴും തുടരുകയാണ്. യൂട്ടാ ഡിപ്പാർട്ട്മെന്റ് ഓഫ് പബ്ലിക് സേഫ്റ്റിയും പുതിയ വീഡിയോ പുറത്തുവിട്ടിട്ടുണ്ട്.
ഇതുവരെ നടത്തിയ അന്വേഷണത്തിൽ, സർവ്വകലാശാലയ്ക്ക് സമീപമുള്ള ഒരു വനപ്രദേശത്തു നിന്നാണ് ഒരു ആയുധവും വെടിയുണ്ടകളും പോലീസ് കണ്ടെത്തിയത്. കൂടാതെ, വെടിവെപ്പ് നടന്ന കെട്ടിടത്തിന്റെ മുകളിൽ നിന്ന് ഷൂവിന്റെ പാടുകൾ, കൈത്തണ്ടയുടെ അടയാളം, കൈപ്പത്തിയുടെ മുദ്ര എന്നിവ ഉൾപ്പെടെയുള്ള തെളിവുകളും ശേഖരിച്ചിട്ടുണ്ട്. ഈ വീഡിയോയിൽ കാണുന്ന വ്യക്തിയെക്കുറിച്ച് വിവരങ്ങൾ നൽകാൻ പൊതുജനങ്ങളോട് എഫ്ബിഐ ആവശ്യപ്പെട്ടിട്ടുണ്ട്.
വ്യാഴാഴ്ച രാത്രി നടത്തിയ പത്രസമ്മേളനത്തിൽ, യൂട്ടാ ഡിപ്പാർട്ട്മെന്റ് ഓഫ് പബ്ലിക് സേഫ്റ്റി കമ്മീഷണർ ബ്യൂ മേസൺ പ്രതിയുടെ പുതിയ വീഡിയോയെക്കുറിച്ച് വിശദീകരിച്ചതായി ടൈംസ് ഓഫ് ഇന്ത്യയുടെ റിപ്പോർട്ടിൽ പറയുന്നു. പ്രതി യൂട്ടാ വാലി യൂണിവേഴ്സിറ്റി ക്യാമ്പസ് കെട്ടിടത്തിന്റെ മേൽക്കൂരയിലൂടെ ഓടുന്നതും താഴേക്ക് ചാടുന്നതും വീഡിയോയിൽ കാണാം. തുടർന്ന് ഇയാൾ വനപ്രദേശത്തേക്ക് ഓടി രക്ഷപ്പെട്ടു. അമേരിക്കൻ പതാകയും അതിൽ ഒരു കഴുകന്റെ ചിത്രവുമുള്ള ഷർട്ടാണ് ഇയാൾ ധരിച്ചിരുന്നത്.
കുറ്റകൃത്യം നടത്തിയ വ്യക്തിയെ കണ്ടെത്താൻ 20 ഫെഡറൽ, സംസ്ഥാന, പ്രാദേശിക നിയമ നിർവ്വഹണ ഏജൻസികൾ ഒരുമിച്ച് പ്രവർത്തിക്കുന്നുണ്ടെന്നും, ഇതിനോടകം 200-ഓളം ആളുകളെ ചോദ്യം ചെയ്തെന്നും ഗവർണർ അറിയിച്ചു. പ്രതിയെ തിരിച്ചറിയാനും അറസ്റ്റ് ചെയ്യാനും സഹായിക്കുന്ന വിവരങ്ങൾക്ക്100,000 ഡോളർ (88,31,301 രൂപ) പാരിതോഷികം എഫ്ബിഐ വാഗ്ദാനം ചെയ്തിട്ടുണ്ട്.
പ്രതിയെ പിടികൂടുമെന്ന് ആത്മവിശ്വാസം പ്രകടിപ്പിച്ച ഗവർണർ കോക്സ്, ഈ കേസിൽ പ്രതിക്ക് വധശിക്ഷ ഉറപ്പാക്കാനുള്ള നിയമപരമായ നടപടികൾ സ്വീകരിക്കുമെന്നും കൂട്ടിച്ചേർത്തു. പ്രതിയുടേതെന്ന് കരുതുന്ന പുതിയ വീഡിയോകൾ സാമൂഹിക മാധ്യമങ്ങളിൽ പ്രത്യക്ഷപ്പെട്ടുകൊണ്ടിരിക്കുകയാണ്. ഏറ്റവും പുതിയ വീഡിയോയിൽ, യൂട്ടാ വാലി യൂണിവേഴ്സിറ്റിക്ക് സമീപമുള്ള ഒരു റെസിഡൻഷ്യൽ ഏരിയയിലൂടെ ഇയാൾ മുടന്തി നടക്കുന്നതായി കാണാമെന്നും ടൈംസ് ഓഫ് ഇന്ത്യ പുറത്തുവിട്ട റിപ്പോർട്ടിൽ പറയുന്നു.
Content Summary: Charlie Kirk murder; search for the suspect continues, FBI offers ₹89 lakh reward
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
