ഫെമ നിയമം(ഫോറിന് എക്സ്ചേഞ്ച് മാനേജ്മെന്റ് ആക്ട്) ലംഘിച്ചുവെന്ന കേസില് പ്രമുഖ വാര്ത്താ മാധ്യമമായ ന്യൂസ്ക്ലിക്ക്, സ്ഥാപക എഡിറ്റര് പ്രബീര് പുര്കായസ്ത എന്നിവര്ക്കെതിരെ 184 കോടി രൂപ പിഴ ചുമത്തി എന്ഫോഴ്സ്മെന്റ് ഡയറക്ടറേറ്റ് (ഇഡി). പിപികെ ന്യൂസ്ക്ലിക്ക് സ്റ്റുഡിയോ പ്രൈവറ്റ് ലിമിറ്റഡ് എന്ന കമ്പനിക്ക് 120 കോടി രൂപയും, പ്രബീര് പുര്കായസ്തയ്ക്ക് വ്യക്തിപരമായി 64 കോടി രൂപയുമാണ് പിഴയായി നിശ്ചയിച്ചിരിക്കുന്നത്. നിയമവിരുദ്ധമായ രീതിയില് വിദേശ ഫണ്ട് സ്വീകരിക്കുകയും അത് വിനിയോഗിക്കുകയും ചെയ്തു എന്നാരോപിച്ച് ഫെമ സെക്ഷന് 16 പ്രകാരം ഇഡി സമര്പ്പിച്ച പരാതിയുടെ അടിസ്ഥാനത്തിലാണ് ഈ നടപടി.
കമ്പനിയും അതിന്റെ ഡയറക്ടറും വിദേശ വിനിമയ ചട്ടങ്ങള് ബോധപൂര്വവും ആസൂത്രിതവുമായാണ് ലംഘിച്ചതെന്ന് ഇഡി വക്താവ് വ്യക്തമാക്കി. ലഭ്യമായ തെളിവുകളും രേഖകളും പരിശോധിച്ച ശേഷം, റെഗുലേറ്ററി അതോറിറ്റികള്ക്ക് സമര്പ്പിച്ച സത്യവാങ്മൂലങ്ങളില് വലിയ തോതിലുള്ള ക്രമക്കേടുകള് നടന്നതായി അധികൃതര് കണ്ടെത്തി. 2018-19 കാലയളവില് കമ്പനിയുടെ ബിസിനസ് സ്വഭാവത്തെക്കുറിച്ച് തെറ്റായ വിവരങ്ങള് നല്കി 9.59 കോടി രൂപയുടെ നേരിട്ടുള്ള വിദേശ നിക്ഷേപം (എഫ്ഡിഐ) ന്യൂസ്ക്ലിക്ക് സ്വീകരിച്ചതായും ഇതിലൂടെ നിയമാനുസൃതമായ പരിശോധനകളില് നിന്ന് ഇവര് ഒഴിഞ്ഞുമാറിയതായും ഇഡി ആരോപിക്കുന്നു.
അടിയന്തരാവസ്ഥ കാലത്തെ ഒന്നാമത്തെ അറസ്റ്റ്
2018-19 നും 2023-24 നും ഇടയില് ലഭിച്ച 82.63 കോടി രൂപയുടെ വിദേശ വരുമാനം കൃത്യമായ രേഖകളില്ലാതെ കയറ്റുമതിയില് നിന്നുള്ള ലാഭമായി തെറ്റായി രേഖപ്പെടുത്തിയെന്നും ഇഡി ആരോപിക്കുന്നു. വിദേശ വിനിമയ നിയന്ത്രണങ്ങളെ മറികടക്കുന്നതിനായി ഇടപാടുകള് മനഃപൂര്വം ഇത്തരത്തില് ക്രമീകരിച്ചതാണെന്നാണ് അന്വേഷണ ഏജന്സിയുടെ കണ്ടെത്തല്. കമ്പനിയുടെ കാര്യങ്ങള് നിയന്ത്രിച്ചിരുന്ന വ്യക്തി എന്ന നിലയില് ഫെമ സെക്ഷന് 42 പ്രകാരം പ്രബീര് പുര്കായസ്ത ഈ നിയമലംഘനങ്ങള്ക്ക് ഉത്തരവാദിയാണെന്ന് അധികൃതര് ചൂണ്ടിക്കാട്ടി.
ന്യൂസ്ക്ലിക്കുമായി ബന്ധപ്പെട്ട കേസുകളില് 2021 സെപ്റ്റംബറിലാണ് ഇഡി ആദ്യമായി റെയ്ഡ് നടത്തിയത്. തുടര്ന്ന് പ്രബീര് പുര്കായസ്ത ഉള്പ്പെടെ 25-ഓളം പേരുടെ മൊഴികള് ഏജന്സി രേഖപ്പെടുത്തിയിരുന്നു. പിന്നീട് 2023 ഒക്ടോബറില് യുഎപിഎ നിയമപ്രകാരം ഡല്ഹി പോലീസ് പുര്കായസ്തയെ അറസ്റ്റ് ചെയ്തിരുന്നുവെങ്കിലും 2025 മെയ് മാസത്തില് സുപ്രീം കോടതി അദ്ദേഹത്തിന് ജാമ്യം അനുവദിച്ചു. നിലവില് ഇഡി ചുമത്തിയിരിക്കുന്ന ഈ വന്തുകയുടെ പിഴ മാധ്യമ സ്ഥാപനത്തിന് വലിയ തിരിച്ചടിയായിരിക്കുകയാണ്.
Content Summary:FEMA violation ED imposed 184 crore penalty on media firm NEWSCLICK and its founder-editor Prabir Purkayastha
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
