കേരളത്തിൽ തെരുവുനായ്ക്കളുടെ ശല്യം ഒരു വലിയ സാമൂഹിക പ്രശ്നമായി മാറിയിരിക്കുകയാണ്. ജനങ്ങൾക്ക് പുറത്തിറങ്ങാൻ പോലും ഭയക്കുന്ന അവസ്ഥയാണെന്ന് ഹൈക്കോടതി പോലും ചൂണ്ടിക്കാട്ടി. കുട്ടികളെയടക്കം നായ്ക്കൾ ആക്രമിക്കുന്നത് പതിവായതോടെ, ഈ വിഷയത്തിൽ അടിയന്തര പരിഹാരം കണ്ടെത്തേണ്ടതിന്റെ ഗൗരവം കോടതിക്ക് പോലും എടുത്തുപറയേണ്ടി വന്നു. തെരുവുനായ ആക്രമണങ്ങളിൽ പരിക്കേറ്റവർക്ക് നഷ്ടപരിഹാരം നൽകുന്നതുമായി ബന്ധപ്പെട്ട ഹർജികൾ പരിഗണിക്കവേയാണ് ഹൈക്കോടതിയുടെ ഇടപെടൽ.
എന്നാൽ, ഈ പ്രശ്നത്തിന് ഒരു പരിഹാരം കാണുന്നതിൽ നിലവിലുള്ള നിയമപ്രകാരം സർക്കാരിന് പരിമിതികളുണ്ടെന്ന് ബന്ധപ്പെട്ടവരും വ്യക്തമാക്കി കഴിഞ്ഞു. നിയമം അനുവദിക്കുന്നത് നായ്ക്കളുടെ പ്രത്യുൽപ്പാദനം നിയന്ത്രിക്കാനുള്ള എ.ബി.സി. (Animal Birth Control) പ്രവർത്തനങ്ങൾ മാത്രമാണ്. മറ്റ് നടപടികളൊന്നും നിയമപരമായി സാധ്യമല്ല.
‘നിലവിലുള്ള നിയമപ്രകാരം എന്താണോ ചെയ്യാൻ പറ്റുന്നത്, അത് സർക്കാർ ചെയ്യുന്നുണ്ട്, ആകെ ചെയ്യാൻ പറ്റുന്നത് അനിമല് ബര്ത്ത് കണ്ട്രോള് മാത്രമാണ്. മറ്റൊന്നും ചെയ്യാൻ സാധിക്കില്ലലോ? ഈ എ.ബി.സി (അനിമൽ ബർത്ത് കൺട്രോൾ) പ്രവർത്തനങ്ങൾക്ക് പ്രധാനമായും രണ്ട് കാര്യങ്ങളാണ് തടസ്സമാകുന്നത്. ഒന്ന്, എ.ബി.സി. ചട്ടങ്ങൾ പ്രായോഗികമല്ല എന്നുള്ളതാണ്. പിന്നെ, എവിടെയൊക്കെ എ.ബി.സി. കേന്ദ്രങ്ങൾ തുടങ്ങാൻ സർക്കാർ നോക്കിയാലും അവിടെയൊന്നും ജനങ്ങൾ സമ്മതിക്കുന്നില്ല. എന്തിന്, കേന്ദ്രങ്ങൾ തുടങ്ങിയ സ്ഥലങ്ങളിൽ പോലും തുറക്കാൻ പറ്റാത്ത അവസ്ഥയുണ്ട്! തലശ്ശേരി മുനിസിപ്പാലിറ്റി ഒരു ഉദാഹരണമാണ്. അവിടുത്തെ കേന്ദ്രം രണ്ട് വർഷമായി പൂട്ടിയിട്ടിരിക്കുകയാണ്, ഇതുവരെ തുറക്കാൻ സാധിച്ചിട്ടില്ല’ തദ്ദേശസ്വയംഭരണ വകുപ്പ് മന്ത്രി എം ബി രാജേഷ് അഴിമുഖത്തോട് വ്യക്തമാക്കി.
152 ബ്ലോക്കുകളിലായി മൊബൈൽ പോർട്ടബിൾ എബിസി കേന്ദ്രങ്ങൾ കൊണ്ടുവരാനാണ് നിലവിലെ സാഹചര്യത്തിൽ സർക്കാർ തീരുമാനിച്ചിരിക്കുന്നതെന്ന് മന്ത്രി പറയുന്നു. നിലവിലെ എബിസി കേന്ദ്രങ്ങൾക്കുള്ള അത്രയും എതിർപ്പ് പദ്ധതിക്ക് ജനങ്ങളിൽ നിന്ന് ഉണ്ടാകില്ലെന്ന പ്രതീക്ഷയിലാണ് സർക്കാർ. നടപടികൾ പൂർത്തിയാകാൻ മൂന്ന് മാസമെങ്കിലും എടുക്കുമെന്നാണ് വിവരം.
ജനങ്ങളുടെ എതിർപ്പ്
‘നായ്ക്കളെ പിടിച്ചുകൊണ്ടുവന്നാൽ നമുക്ക് ചെയ്യാൻ കഴിയുന്ന ഒരേയൊരു കാര്യം വന്ധ്യംകരണം (sterilization) മാത്രമാണ്. അതിനുള്ള എ.ബി.സി. കേന്ദ്രങ്ങൾ സ്ഥാപിക്കുക എന്നതാണ് പ്രധാന പ്രശ്നം. നായ്ക്കളെ പിടിക്കുന്നവർക്ക് ഇപ്പോൾ കൂടുതൽ പൈസ കൊടുക്കുന്നുണ്ട്. കഴിഞ്ഞ രണ്ട് വർഷമായി തദ്ദേശ സ്ഥാപനങ്ങൾ എ.ബി.സി. കേന്ദ്രങ്ങൾക്കായി നൂറ് കോടി രൂപ നീക്കിവെച്ചിട്ടും, അതിൽ വെറും പതിമൂന്ന് കോടി രൂപ മാത്രമേ വിനിയോഗിക്കാൻ കഴിഞ്ഞിട്ടുള്ളൂ. കാരണം, ഈ കേന്ദ്രങ്ങൾ സ്ഥാപിക്കാൻ ആരും സമ്മതിക്കുന്നില്ല. ഒരു പട്ടി കടിച്ചാൽ ആളുകൾ സർക്കാരിനെയാണ് കുറ്റം പറയുന്നത്.
പക്ഷേ, നിയമപരമായി സർക്കാരിന് ചെയ്യാൻ കഴിയുന്ന ഒരേയൊരു കാര്യം എ.ബി.സി. കേന്ദ്രങ്ങൾ സ്ഥാപിക്കുകയും നായയുടെ പ്രത്യുൽപ്പാദനം നിയന്ത്രിക്കുകയും ചെയ്യുക എന്നതാണ്. വേറെ ഒന്നിനും നിയമം അനുവദിക്കുന്നില്ല. ലക്ഷക്കണക്കിന് തെരുവുനായ്ക്കളുണ്ട്. ഓരോന്നിനെയും പിടിച്ചുകൊണ്ടുപോയി വന്ധ്യംകരിച്ച് തിരിച്ച് കൊണ്ടുവരാൻ എത്ര കാലമെടുക്കുമെന്ന് ഓർത്താൽ മതി. നേരത്തെ കുടുംബശ്രീയുടെ നേതൃത്വത്തിൽ വന്ധ്യംകരണ പരിപാടികൾ നന്നായി നടന്നിരുന്നു. എന്നാൽ, ഇപ്പോഴുള്ള നിയമങ്ങൾ കാരണം ആ കേന്ദ്രങ്ങളെല്ലാം പൂട്ടിപ്പോയി’. കേന്ദ്രചട്ടങ്ങളുടെ നിബന്ധനകളുയർത്തുന്ന വെല്ലുവിളിയും ചട്ടങ്ങൾപ്രകാരം നടപടി സ്വീകരിക്കുമ്പോഴുള്ള ജനങ്ങളുടെ എതിർപ്പും ഇപ്പോൾ വലിയ പ്രതിസന്ധി സൃഷ്ടിക്കുകയാണ്, പ്രശ്ന പരിഹാരത്തിന് ചട്ടങ്ങൾ കുറച്ചുകൂടി ലളിതമാക്കണമെന്ന ആവശ്യമാണ് സർക്കാർ ഉന്നയിക്കുന്നതെന്നും മന്ത്രി വ്യക്തമാക്കി.
അതേ സമയം, ജനങ്ങളുടെ എതിർപ്പിന് പുറമേ, പല എ.ബി.സി. കേന്ദ്രങ്ങളുടെയും പ്രവർത്തനങ്ങൾ പാതിവഴിയിലായതിന് കാരണമായി തദ്ദേശസ്വയംഭരണ സ്ഥാപനങ്ങള് ചൂണ്ടിക്കാട്ടിയത് നായപിടുത്തക്കാര്ക്ക് നൽകുന്ന കൂലി കുറവാണെന്ന പ്രശ്നങ്ങളായിരുന്നു.
പകർച്ച വ്യാധി പ്രതിരോധ ചട്ടത്തിലെ ഉപവകുപ്പുകളിൽ വിശദീകരിക്കുന്നത് പ്രകാരം തദ്ദേശ സ്ഥാപനങ്ങൾക്ക് ബോധ്യപ്പെട്ടാൽ രോഗ ബാധിതരായ തെരുവ് നായ്ക്കളെ ദയാവധത്തിന് വിധേയമാക്കാൻ തദ്ദേശ വകുപ്പ് മന്ത്രി എം ബി രാജേഷ്, മൃഗസംരക്ഷണ വകുപ്പ് മന്ത്രി ജെ ചിഞ്ചുറാണി എന്നിവരുടെ നേതൃത്വത്തിൽ ജൂലൈ 16 ന് ചേർന്ന ഉന്നതതല യോഗം തീരുമാനിച്ചിരുന്നു.
ബ്ലോക്ക് തലത്തിലാകും പുതിയ പോർട്ടബിൾ എ ബി സി കേന്ദ്രങ്ങൾ കൊണ്ടു പോവുക. ഒരു പ്രദേശത്തെ തെരുവ് നായ്ക്കളെ എ ബി സി കേന്ദ്രത്തിലെത്തിച്ചു വന്ധ്യകരണമോ ദയാവധമോ മറ്റു ചികിത്സയോ നൽകാനുള്ള സൗകര്യങ്ങൾ ഇതിലുണ്ടാകും. വെറ്റിനറി സർജനും ടെക്നീഷ്യനും അതാത് ബ്ലോക്കിലെ തദ്ദേശ സ്ഥാപനങ്ങൾ നിയോഗിക്കുന്ന നായ പിടുത്തക്കാരും ഉൾപ്പെടുന്നതാണ് ഒരു യൂണിറ്റ്.
‘
എ.ബി.സി നിയമങ്ങൾ
തെരുവുനായ്ക്കളെ നിയന്ത്രിക്കുന്നതുമായി ബന്ധപ്പെട്ട് ഇന്ത്യയിൽ നിലവിലുള്ള നിയമങ്ങളെയാണ് സാധാരണയായി ABC നിയമങ്ങൾ (Animal Birth Control Rules) എന്ന് പറയുന്നത്. മൃഗങ്ങളോടുള്ള ക്രൂരത തടയുന്നതിനുള്ള നിയമം 1960 (Prevention of Cruelty to Animals Act, 1960) അനുസരിച്ച് കേന്ദ്രസർക്കാർ പുറത്തിറക്കിയ ചട്ടങ്ങളാണിവ. ഏറ്റവും പുതിയ ചട്ടങ്ങൾ അനിമൽ ബർത്ത് കൺട്രോൾ (ABC) റൂൾസ്, 2023 ആണ്. 2023 മാർച്ച് 10-നാണ് ഇത് പ്രസിദ്ധീകരിച്ചത്. മുൻപുണ്ടായിരുന്ന 2001-ലെ എ.ബി.സി. cite_start റൂൾസിന് പകരമായാണ് ഈ പുതിയ ചട്ടങ്ങൾ നിലവിൽ വന്നത്.
തെരുവുനായ്ക്കളുടെ എണ്ണം മനുഷ്യത്വപരമായി നിയന്ത്രിക്കുക എന്നതാണ് എ.ബി.സിയുടെ പ്രധാന ലക്ഷ്യം. നായ്ക്കൾക്ക് പേവിഷബാധ വാക്സിൻ നൽകി രോഗം ഇല്ലാതാക്കുക, തെരുവുനായ്ക്കളുമായി ബന്ധപ്പെട്ട പ്രശ്നങ്ങൾ കുറയ്ക്കുക, നായ്ക്കൾക്ക് സുരക്ഷിതവും മാന്യവുമായ ജീവിത സാഹചര്യം ഒരുക്കുക എന്നിവയും ഇതിൽ ഉൾപ്പെടുന്നു.
നായ്ക്കളെ പിടികൂടി വന്ധ്യംകരണം നടത്തുകയും പേവിഷബാധയ്ക്കെതിരായ വാക്സിൻ നൽകുകയും ചെയ്യണം എന്നതാണ് എ.ബി.സി. പദ്ധതിയുടെ കാതൽ. വന്ധ്യംകരണത്തിന് ശേഷമോ അല്ലാതെയോ തെരുവുനായ്ക്കളെ ഒരു സ്ഥലത്തുനിന്ന് പിടിച്ച് മറ്റൊരു സ്ഥലത്തേക്ക് മാറ്റാൻ പാടില്ല. പിടികൂടിയ അതേ സ്ഥലത്തുതന്നെ അവയെ തിരികെ വിടണം.
എ.ബി.സി. പരിപാടികൾ നടപ്പാക്കാനുള്ള ചുമതല അതത് തദ്ദേശ സ്വയംഭരണ സ്ഥാപനങ്ങൾക്കാണ് (പഞ്ചായത്ത്, മുനിസിപ്പാലിറ്റി, കോർപ്പറേഷൻ). ഇതിനായി അവർക്ക് സ്വന്തം വെറ്ററിനറി ഡോക്ടർമാരെ നിയോഗിക്കുകയോ അനിമൽ വെൽഫെയർ ബോർഡ് ഓഫ് ഇന്ത്യ (AWBI) അംഗീകരിച്ചിട്ടുള്ള മൃഗക്ഷേമ സംഘടനകളുടെ സഹായം തേടുകയോ ചെയ്യാം.
സംസ്ഥാന, ജില്ലാ, പ്രാദേശിക തലങ്ങളിൽ എ.ബി.സി. പ്രവർത്തനങ്ങൾ നിരീക്ഷിക്കാൻ കമ്മിറ്റികൾ രൂപീകരിക്കണം. എ.ബി.സി. കേന്ദ്രങ്ങൾക്ക് ബോർഡിന്റെ അംഗീകാര സർട്ടിഫിക്കറ്റ് നിർബന്ധമാണ്. അംഗീകാരമില്ലാതെ ഒരു കേന്ദ്രത്തിനും എ.ബി.സി. പരിപാടി നടത്താൻ കഴിയില്ല. ഓരോ എ.ബി.സി. കേന്ദ്രത്തിലും ആവശ്യത്തിന് കെനലുകൾ, വെറ്ററിനറി ആശുപത്രി സൗകര്യങ്ങൾ, നായ്ക്കളെ കൊണ്ടുപോകാനുള്ള വാഹനങ്ങൾ, മാലിന്യം സംസ്കരിക്കാനുള്ള സംവിധാനം, സിസിടിവി തുടങ്ങിയവ ഉണ്ടായിരിക്കണം.ചെറിയ തദ്ദേശ സ്ഥാപനങ്ങളിൽ മൊബൈൽ ഓപ്പറേഷൻ തിയേറ്റർ വാനുകൾ സജ്ജീകരിക്കാനും നിയമം നിർദേശിക്കുന്നു.
നായ്ക്കളെ പിടികൂടിയതും, വന്ധ്യംകരിച്ചതും, വാക്സിൻ നൽകിയതും, തിരികെ വിട്ടതും, മരണപ്പെട്ടതുമായ എല്ലാ വിവരങ്ങളും ഓരോ എ.ബി.സി. കേന്ദ്രവും രേഖപ്പെടുത്തണം. നിയമ ലംഘനം ശ്രദ്ധയിൽപ്പെട്ടാൽ ബോർഡിന് കാരണം കാണിക്കൽ നോട്ടീസ് നൽകാനും, അംഗീകാരം റദ്ദാക്കാനും, സ്ഥാപനങ്ങളെ കരിമ്പട്ടികയിൽ പെടുത്താനും അധികാരമുണ്ട്.
ചികിത്സയില്ലാത്ത രോഗങ്ങളോ ഗുരുതരമായ പരിക്കുകളോ ഉള്ള നായ്ക്കളെ, ഒരു യോഗ്യനായ വെറ്ററിനറി ഡോക്ടറുടെ സർട്ടിഫിക്കേഷനോടുകൂടി മനുഷ്യത്വപരമായ രീതിയിൽ ദയാവധം ചെയ്യാൻ ഈ ചട്ടങ്ങളിൽ അനുവാദമുണ്ട്.
എന്നാൽ, പേവിഷബാധയുള്ള നായ്ക്കളെ ദയാവധം ചെയ്യാൻ നിയമം അനുവദിക്കുന്നില്ല. തെരുവുനായ്ക്കളുടെ എണ്ണം നിയന്ത്രിക്കുന്നതിനും മനുഷ്യരുമായി സമാധാനപരമായ സഹവർത്തിത്വം ഉറപ്പാക്കുന്നതിനും ലക്ഷ്യമിട്ടുള്ള നിയമമാണിത്. എന്നാൽ, ഇവയുടെ പ്രായോഗികമായ നടപ്പാക്കലിലെ വെല്ലുവിളികളെയാണ് വിനയായി സംസ്ഥാന സർക്കാരും ചൂണ്ടിക്കാട്ടുന്നത്.
content summary: Kerala’s Stray Dog Menace: Legal Hurdles and Public Fear
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
