ജമൈക്കയെയും മറ്റ് കരീബിയൻ ദ്വീപുകളെയും ലക്ഷ്യമാക്കി നീങ്ങുന്ന ചുഴലിക്കാറ്റ് മെലിസയുടെ അസാധാരണമായ തീവ്രത വർദ്ധനവിന് പിന്നിൽ ലോകമെമ്പാടുമുള്ള സമുദ്രങ്ങൾ അതിവേഗം ചൂടുപിടിക്കുന്ന പ്രതിഭാസമാണെന്ന് ശാസ്ത്രജ്ഞർ. ശനിയാഴ്ച ഉഷ്ണമേഖലാ കൊടുങ്കാറ്റ് മാത്രമായിരുന്ന മെലിസ ഞായറാഴ്ചയോടെ കാറ്റഗറി 4 ആയി മാറുകയും, തിങ്കളാഴ്ച യുഎസ് നാഷണൽ ഹറിക്കൻ സെന്റർ ഇതിനെ കാറ്റഗറി 5 ആയി ഉയർത്തുകയും ചെയ്തു.
മെലിസയുടെ കാറ്റിന്റെ വേഗത വെറും 24 മണിക്കൂറിനുള്ളിൽ 70mph-ൽ നിന്ന് 140mph ആയി വർദ്ധിച്ചു. അറ്റ്ലാന്റിക് സമുദ്രത്തിൽ രേഖപ്പെടുത്തിയ ഏറ്റവും വേഗത്തിലുള്ള തീവ്രത വർദ്ധനവിൽ ഒന്നാണിത്. തിങ്കളാഴ്ച രാവിലെ കാറ്റഗറി 5 ചുഴലിക്കാറ്റായി മാറിയതോടെ, കാറ്റിന്റെ വേഗത മണിക്കൂറിൽ 160mph (260km/h) വരെ എത്തി. കനത്ത വെള്ളപ്പൊക്കത്തിനും മണ്ണിടിച്ചിലിനും സാധ്യതയുള്ള ജമൈക്കയിലേക്ക് ചുഴലിക്കാറ്റ് സാവധാനം നീങ്ങുകയാണ്. ബുധനാഴ്ചയോടെ ഇത് ക്യൂബയും ബഹാമസും കടക്കുമെന്നാണ് ഭയപ്പെടുന്നത്.
തീവ്രതയ്ക്ക് പിന്നിലെ കാരണം
അറ്റ്ലാന്റിക്കിൽ ഈ വർഷം കാറ്റിന്റെ വേഗതയും ശക്തിയും അതിവേഗം വർധിക്കുന്ന നാലാമത്തെ കൊടുങ്കാറ്റാണ് മെലിസ. മനുഷ്യന്റെ ഇടപെടൽ മൂലമുണ്ടാകുന്ന കാലാവസ്ഥാ പ്രതിസന്ധി സമുദ്രങ്ങൾ ചൂടാകാൻ കാരണമാകുന്നതാണ് ഈ പ്രതിഭാസത്തിന് പിന്നിലെ പ്രധാന ഘടകം. യുണൈറ്റഡ് കിംഗ്ഡത്തിലെ യൂണിവേഴ്സിറ്റി ഓഫ് റീഡിംഗിലെ കാലാവസ്ഥാ നിരീക്ഷകൻ അക്ഷയ് ദിയോറസ് പറയുന്നതനുസരിച്ച്, നിലവിൽ അറ്റ്ലാന്റിക്കിന്റെ ഈ ഭാഗത്ത് താപനില ഏകദേശം 30C [86F], ആണ്, ഇത് സാധാരണയേക്കാൾ 2 to 3C വരെ കൂടുതലാണ്.
“സമുദ്രത്തിന്റെ ആഴത്തിലുള്ള പാളികൾ പോലും അസാധാരണമായി ചൂടാണ്, ഇത് കൊടുങ്കാറ്റിന് ഊർജ്ജത്തിന്റെ വലിയ ശേഖരം നൽകുന്നു,” അദ്ദേഹം കൂട്ടിച്ചേർത്തു. കൊടുങ്കാറ്റുകൾ അതിശക്തമായ സംഭവങ്ങളായി അതിവേഗം തീവ്രത വർദ്ധിപ്പിക്കാനുള്ള സാധ്യത അറ്റ്ലാന്റിക് ചുഴലിക്കാറ്റുകൾക്ക് മുൻപത്തേതിനേക്കാൾ രണ്ട് മടങ്ങ് കൂടുതലാണെന്ന് 2023-ലെ ഒരു പഠനം കണ്ടെത്തിയിരുന്നു.
സമുദ്രനിരപ്പ് ഉയരുന്നു
അധിക ചൂടിന്റെ 90% സമുദ്രങ്ങളിലേക്കാണ് പോകുന്നതെന്നും, ഇത് സമുദ്രങ്ങൾ ചൂടാകാനും സമുദ്രനിരപ്പ് ഉയരാനും കാരണമാകുന്നുവെന്നും ക്ലൈമറ്റ് സെൻട്രലിലെ മുഖ്യ കാലാവസ്ഥാ നിരീക്ഷകയായ ബെർണാഡെറ്റ് വുഡ്സ് പ്ലാക്കി പറഞ്ഞു.
“കൊടുങ്കാറ്റ് ഇല്ലാത്തപ്പോഴും ജലനിരപ്പ് ഉയരുന്നത് തീരപ്രദേശങ്ങളെ നശിപ്പിക്കുകയും ഉൾപ്രദേശങ്ങളിലേക്ക് വ്യാപിക്കുകയും ചെയ്യുന്നു.” മെലിസ പോലുള്ള കൊടുങ്കാറ്റുകൾ ദ്വീപുകളിലെ തീരദേശ അടിസ്ഥാന സൗകര്യങ്ങളെ തകർക്കുമെന്നും പ്ലാക്കി മുന്നറിയിപ്പ് നൽകുന്നു.
ഫോസിൽ ഇന്ധനങ്ങൾ കത്തിക്കുന്നത്, വനനശീകരണം തുടങ്ങിയ മനുഷ്യന്റെ പ്രവർത്തനങ്ങൾ കാരണം അറ്റ്ലാന്റിക്കിലെ ഈ അധിക ചൂട് 700 മടങ്ങ് കൂടുതലാകാൻ സാധ്യതയുണ്ടെന്ന് ക്ലൈമറ്റ് സെൻട്രൽ റിപ്പോർട്ട് ചെയ്തു.
ഈ വർഷം അറ്റ്ലാന്റിക് ചുഴലിക്കാറ്റ് സീസൺ തിരക്കേറിയതായിരിക്കുമെന്ന നാഷണൽ ഓഷ്യാനിക് ആൻഡ് അറ്റ്മോസ്ഫെറിക് അഡ്മിനിസ്ട്രേഷന്റെ (Noaa) പ്രവചനം ഇതുവരെ ഏറെക്കുറെ കൃത്യമാണ്.
content summary: Hurricane Melissa explodes to category 5, threatening catastrophic damage to jamaica
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
