പതിനായിരങ്ങളുടെ മരണത്തിനിടയാക്കിയ രണ്ട് വർഷം നീണ്ട രക്തരൂക്ഷിതമായ സംഘർഷത്തിന് അന്ത്യം കുറിക്കാൻ ലക്ഷ്യമിട്ടുള്ള വെടിനിർത്തൽ കരാർ നടപ്പാക്കുന്നതിനുള്ള നടപടികൾക്ക് ഇസ്രയേൽ സർക്കാരും ഹമാസും തുടക്കം കുറിച്ചു. ഈജിപ്തിൽ നടന്ന ചർച്ചകൾക്ക് പിന്നാലെ പ്രഖ്യാപിക്കപ്പെട്ട കരാറിനെ ഇസ്രയേലികളും പലസ്തീനികളും ആഹ്ലാദത്തോടെയാണ് വരവേറ്റത്.
യു.എസ്. പ്രസിഡന്റ് ഡൊണാൾഡ് ട്രംപ് കഴിഞ്ഞയാഴ്ച അവതരിപ്പിച്ച “സമാധാന നിർദ്ദേശമാണ്” (Peace Proposal) നിർണ്ണായകമായ ഈ കരാറിന് വഴിയൊരുക്കിയത്. ഇതിനെത്തുടർന്ന് ഈജിപ്തിലെ ഷാം-എൽ ഷെയ്ഖിൽ വെച്ച് ഹമാസും ഇസ്രയേലും തമ്മിൽ പരോക്ഷ ചർച്ചകൾ നടന്നിരുന്നു.
വ്യാഴാഴ്ച രാത്രി വൈകി പുറത്തിറക്കിയ പ്രസ്താവനയിൽ, ജീവിച്ചിരിക്കുന്നവരും മരിച്ചവരുമായ എല്ലാ ബന്ദികളെയും മോചിപ്പിക്കാനുള്ള ചട്ടക്കൂടിന് ഇസ്രയേൽ സർക്കാർ അംഗീകാരം നൽകിയതായി അറിയിച്ചു.
ട്രംപിന്റെ പ്രഖ്യാപനമനുസരിച്ച്, ഹമാസിന്റെ പക്കലുള്ള 48 ബന്ദികളെ അടുത്ത തിങ്കളാഴ്ചയോ ചൊവ്വാഴ്ചയോ മോചിപ്പിക്കും. ഈ കരാറോടെ ഗാസയിലെ യുദ്ധം അവസാനിച്ചതായും ട്രംപ് പ്രഖ്യാപിച്ചു. വെടിനിർത്തൽ കരാർ നിരീക്ഷിക്കാനും പിന്തുണ നൽകാനുമായി യുഎസ് 200 സൈനികരെ ഇസ്രയേലിലേക്ക് അയക്കാനും തീരുമാനിച്ചിട്ടുണ്ട്.
ഇസ്രയേലി മന്ത്രിസഭ കരാറിന് അംഗീകാരം നൽകിയാൽ ഉടൻ വെടിനിർത്തൽ പ്രാബല്യത്തിൽ വരും. ബന്ദികളെ 72 മണിക്കൂറിനുള്ളിൽ മോചിപ്പിക്കുമെന്നും റിപ്പോർട്ടുകളുണ്ട്. ഇസ്രയേൽ സൈന്യം ഗാസ മുനമ്പിലെ ഒരു നിശ്ചിത അതിർത്തിയിലേക്ക് പിൻവാങ്ങും.
ഇത് ഗാസയുടെ 53% ഇസ്രയേൽ നിയന്ത്രണത്തിലാക്കിയുള്ള രീതിയിലാകും. ഇതിനു പകരമായി ഇസ്രയേൽ ഏകദേശം 2,000 പലസ്തീൻ തടവുകാരെ മോചിപ്പിക്കും. എങ്കിലും, പ്രമുഖ നേതാവായ മർവാൻ ബർഗൂതിയെ ഈ പട്ടികയിൽ ഉൾപ്പെടുത്തില്ല.
ഹമാസ് നേതാക്കൾ നൽകുന്ന ഉറപ്പനുസരിച്ച്, ഗാസയിലെ യുദ്ധം ശാശ്വതമായി അവസാനിക്കുമെന്ന ഉറപ്പ് അമേരിക്ക, അറബ് മധ്യസ്ഥർ, തുർക്കി എന്നിവരിൽ നിന്ന് ലഭിച്ചിട്ടുണ്ട്.
വെടിനിർത്തൽ പ്രഖ്യാപനത്തെ തുടർന്ന് ടെൽ അവീവിലെ തെരുവുകളിൽ ആയിരക്കണക്കിന് ഇസ്രയേലികൾ സന്തോഷം പ്രകടിപ്പിച്ച് നൃത്തം ചെയ്യുകയും ഇസ്രായേലി, അമേരിക്കൻ പതാകകൾ വീശുകയും ചെയ്തു.
എന്നാൽ, ഗാസയിൽ ആഹ്ലാദം പൂർണമല്ല. പലരും കരാർ തകരുമോയെന്ന ഭയം പ്രകടിപ്പിച്ചു. “ഇതിനുമുൻപ് പലതവണ ഇത് സംഭവിച്ചതാണ്, ഓരോ തവണയും ഞങ്ങൾ നിരാശരായി. അതുകൊണ്ട് ഇത്തവണ ഭയവും ആശങ്കയുമാണ് സന്തോഷത്തേക്കാൾ വലുത്,” ഗാസ സിറ്റിയിൽ നിന്ന് പലായനം ചെയ്ത 47-കാരിയായ ഓല അൽ-നസ്ലി പറഞ്ഞു.
ഗാസയിൽ സഹായം എത്തിക്കാൻ യുഎൻ ഏജൻസികൾ തയ്യാറെടുക്കുമ്പോൾ, “തോക്കുകൾ നിശബ്ദമാക്കുന്നതിനേക്കാൾ കൂടുതൽ കാര്യങ്ങൾ ഈ വെടിനിർത്തലിന് ആവശ്യമുണ്ട്,” എന്ന് യു.എൻ. സെക്രട്ടറി ജനറൽ അന്റോണിയോ ഗുട്ടെറസ് ആവശ്യപ്പെട്ടു. തകർന്ന ഗാസയുടെ അടിസ്ഥാന സൗകര്യങ്ങൾ പുനർനിർമ്മിക്കാനും മാനുഷിക സഹായം തടസ്സമില്ലാതെ എത്തിക്കാനും അദ്ദേഹം ആഹ്വാനം ചെയ്തു.
content summary: Israel’s government approves hostage and ceasefire deal
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
