ബ്രിട്ടനിലെയും ജര്മ്മനിയിലെയും ഉന്നത സൈനിക മേധാവികള് പൊതുജനങ്ങള്ക്കു മുന്നില് അത്ഭുതപൂര്വമായൊരു അഭ്യര്ത്ഥന വച്ചിരിക്കുകയാണ്.
റഷ്യയില് നിന്നുള്ള യുദ്ധഭീഷണി നേരിടാന് സജ്ജരാകണമെന്നും പുനരായുധീകരണത്തിന്റെ ‘ധാര്മ്മികമായ’ വശം പൊതുസമൂഹം അംഗീകരിക്കണമെന്നുമാണ് അവരുടെ ആവശ്യം.
യൂറോപ്പിലെ ഏറ്റവും കൂടുതല് പ്രതിരോധ ചെലവഴിക്കുന്ന രണ്ട് രാജ്യങ്ങളിലെ സൈനിക മേധാവികള് എന്ന നിലയില് മാത്രമല്ല, സുരക്ഷാ കാര്യങ്ങളില് അസ്വസ്ഥജനകമായ സത്യങ്ങള് അഭിമുഖീകരിക്കേണ്ടി വരുന്ന ഒരു ഭൂഖണ്ഡത്തിന്റെ ശബ്ദമായാണ് തങ്ങള് ഈ അഭ്യര്ത്ഥന നടത്തുന്നതെന്ന് അവര് വ്യക്തമാക്കി.
ബ്രിട്ടീഷ് ചീഫ് ഓഫ് ഡിഫന്സ് സ്റ്റാഫ് എയര് ചീഫ് മാര്ഷല് റിച്ചാര്ഡ് നൈറ്റണും ജര്മ്മന് ചീഫ് ഓഫ് ഡിഫന്സ് ജനറല് കാര്സ്റ്റണ് ബ്രൂവറും ചേര്ന്ന് ‘ഗാര്ഡിയന്’, ‘ഡി വെല്റ്റ്’ എന്നീ പത്രങ്ങളില് പ്രസിദ്ധീകരിച്ച സംയുക്ത ലേഖനത്തിലാണ് ഈ കാര്യങ്ങള് വ്യക്തമാക്കിയത്. റഷ്യയുടെ സൈനിക നിലപാട് പടിഞ്ഞാറന് രാജ്യങ്ങള്ക്ക് നേരെ കര്ശനമായ രീതിയില് മാറിയിരിക്കുകയാണെന്നും യൂറോപ്പിന്റെ സുരക്ഷയില് വലിയൊരു മാറ്റം അത്യാവശ്യമാണെന്നും അവര് പറഞ്ഞു. ശീതയുദ്ധത്തിന് ശേഷമുള്ള ഏറ്റവും വലിയ പ്രതിരോധ ചെലവ് വര്ദ്ധനവിന് ഇരുരാജ്യങ്ങളും തയ്യാറെടുക്കുന്നത് എന്തുകൊണ്ടാണെന്ന് പൊതുജനങ്ങള്ക്ക് ബോധ്യപ്പെടുത്തിക്കൊടുക്കേണ്ട കടമ തങ്ങള്ക്കുണ്ടെന്ന് അവര് എഴുതി.
‘ഈ സംരംഭത്തിന് ഒരു ധാര്മ്മിക വശമുണ്ട്. പുനരായുധീകരണം എന്നത് യുദ്ധം ആഗ്രഹിക്കലല്ല; മറിച്ച് സ്വന്തം ജനതയെ സംരക്ഷിക്കാനും സമാധാനം നിലനിര്ത്താനും നിശ്ചയിച്ചുറപ്പിച്ച രാജ്യങ്ങളുടെ ഉത്തരവാദിത്തപരമായ നടപടിയാണ്,’ അവര് ലേഖനത്തില് കുറിച്ചു. റഷ്യ യൂറോപ്പിനെ ദുര്ബലമായോ ഭിന്നിച്ചോ കാണുകയാണെങ്കില്, യുക്രെയ്നിനപ്പുറം കടന്നുകയറാന് അവര്ക്ക് ധൈര്യം ലഭിക്കുമെന്നും അവര് മുന്നറിയിപ്പ് നല്കി. ഇതിനായി ‘സമൂഹമാകെ പങ്കുചേരുന്ന പ്രതിരോധം’ ആവശ്യമാണെന്നും ഇതില് സൈനികര്ക്ക് മാത്രമല്ല, സ്വകാര്യ മേഖലയിലെ സാങ്കേതിക വിദ്യയ്ക്കും മറ്റ് സ്ഥാപനങ്ങള്ക്കും വലിയ പങ്കുണ്ടെന്നും അവര് ചൂണ്ടിക്കാട്ടി.
അതേസമയം, പുനരായുധീകരണത്തിനായി സാമ്പത്തികമായ വിട്ടുവീഴ്ചകള് ചെയ്യാന് ഇരുരാജ്യങ്ങളിലെയും വോട്ടര്മാര്ക്കിടയില് വലിയ വിമുഖതയുണ്ട്. അടുത്ത അഞ്ച് വര്ഷത്തിനുള്ളില് മൂന്നാം ലോകമഹായുദ്ധത്തിന് സാധ്യതയുണ്ടെന്ന് ഭൂരിഭാഗം പേരും വിശ്വസിക്കുമ്പോഴും, പ്രതിരോധത്തിനായി നികുതി വര്ദ്ധിപ്പിക്കുന്നതിനെയോ മറ്റ് സേവനങ്ങളിലെ ചെലവ് കുറയ്ക്കുന്നതിനെയോ ഭൂരിഭാഗം ബ്രിട്ടീഷുകാരും പിന്തുണയ്ക്കുന്നില്ല. സമാനമായ രീതിയില്, മറ്റ് നിക്ഷേപങ്ങള് വേണ്ടെന്നുവെച്ച് പ്രതിരോധത്തിന് പണം നല്കുന്നതില് ജര്മ്മന്, ഫ്രഞ്ച് വോട്ടര്മാര്ക്കിടയിലും താല്പ്പര്യം കുറഞ്ഞുവരികയാണെന്ന് പോളിറ്റിക്കോ സര്വ്വേ വ്യക്തമാക്കുന്നു.
മ്യൂണിക് സുരക്ഷാ സമ്മേളനത്തിനിടെ ബ്രിട്ടീഷ് പ്രധാനമന്ത്രി കെയര് സ്റ്റാര്മര് യൂറോപ്പുമായി അടുത്ത പ്രതിരോധ സഹകരണം ആവശ്യമാണെന്ന് ഊന്നിപ്പറഞ്ഞിരുന്നു. ‘ഞങ്ങള് പഴയ ബ്രെക്സിറ്റ് കാലത്തെ ബ്രിട്ടനല്ല’ എന്ന് പ്രഖ്യാപിച്ച അദ്ദേഹം, പ്രതിരോധ സംഭരണത്തിലും നിര്മ്മാണത്തിലും യൂറോപ്യന് സഖ്യകക്ഷികളുമായി ചേര്ന്ന് പ്രവര്ത്തിക്കുമെന്ന് വ്യക്തമാക്കി. ജര്മ്മനി ഇതിനകം തന്നെ നാറ്റോയുടെ കിഴക്കന് മേഖലയില് അയ്യായിരത്തോളം സൈനികരെ സ്ഥിരമായി വിന്യസിക്കാനും പ്രതിരോധത്തിനായി ഭരണഘടനയില് ഭേദഗതി വരുത്തി പണം ലഭ്യമാക്കാനും തീരുമാനിച്ചിട്ടുണ്ട്. ബ്രിട്ടനാകട്ടെ ആറോളം വെടിക്കോപ്പ് നിര്മ്മാണ ശാലകള് നിര്മ്മിച്ചു വരികയാണ്.
2035-ഓടെ ജിഡിപിയുടെ 5 ശതമാനം പ്രതിരോധത്തിനായി ചെലവഴിക്കുമെന്ന് കഴിഞ്ഞ വര്ഷം ഹേഗില് നടന്ന ഉച്ചകോടിയില് നാറ്റോ നേതാക്കള് തീരുമാനിച്ചിരുന്നു. ഈ നീക്കം സമ്പദ്വ്യവസ്ഥയെ ഹ്രസ്വകാലത്തേക്ക് സഹായിക്കുമെങ്കിലും, ആരോഗ്യം, ദാരിദ്ര്യനിര്മ്മാര്ജ്ജനം എന്നിവയ്ക്കുള്ള പണം പ്രതിരോധത്തിനായി മാറ്റുന്നതിനെ ബ്രിട്ടനിലെ ലേബര് പാര്ട്ടിയിലെ ഒരു വിഭാഗവും ജര്മ്മനിയിലെ ഇടത്-വലത് തീവ്ര രാഷ്ട്രീയ കക്ഷികളും എതിര്ക്കുന്നുണ്ട്.
ജര്മ്മന് ചാന്സലര് ഫ്രെഡറിക് മെര്സ് മ്യൂണിക് കോണ്ഫറന്സില് റഷ്യയുടെ ഭീഷണിയെക്കുറിച്ച് മുന്നറിയിപ്പ് നല്കി. ‘സ്വാതന്ത്ര്യം ഇനി മുതല് ഒരു സ്വാഭാവികമായ കാര്യമായി കാണാന് കഴിയില്ല,’ അദ്ദേഹം പറഞ്ഞു. ഫ്രഞ്ച് പ്രസിഡന്റ് ഇമ്മാനുവല് മാക്രോണുമായി ഫ്രാന്സിന്റെ ആണവ സുരക്ഷാ കവചത്തില് പങ്കുചേരുന്നതിനെക്കുറിച്ച് പ്രാഥമിക ചര്ച്ചകള് നടത്തിയതായും മെര്സ് വെളിപ്പെടുത്തി. ഇത് യൂറോപ്പ് സ്വന്തം നിലയില് ശക്തമായ സുരക്ഷാ തന്ത്രം വികസിപ്പിക്കേണ്ടതിന്റെ ആവശ്യകതയിലേക്കാണ് വിരല് ചൂണ്ടുന്നത്.
Content Summary; Moral case for rearmament and prepare for Russian war threat, Britain and Germany’s military leaders join appeal
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
