ലോകമെമ്പാടുമുള്ള ശാസ്ത്ര-സാങ്കേതിക വിദഗ്ദ്ധരെ രാജ്യത്തേക്ക് ആകർഷിക്കുന്നതിനായി പുതിയ ‘കെ വിസ’ (K Visa) സംവിധാനം പ്രഖ്യാപിച്ച് ചൈന. STEM (Science, Technology, Engineering, and Mathematics) മേഖലകളിൽ വൈദഗ്ദ്ധ്യമുള്ളവരെ ലക്ഷ്യമിട്ടാണ് നീക്കം. 2025 ഒക്ടോബർ 1 മുതലാണ് ഈ പുതിയ വിസ പ്രാബല്യത്തിൽ വരുന്നത്.
അമേരിക്കയിലെ H-1B വിസയുമായി ബന്ധപ്പെട്ട സമീപകാല മാറ്റങ്ങളാണ് ഈ വിസയെ കൂടുതൽ പ്രസക്തമാക്കുന്നത്. പ്രസിഡന്റ് ഡോണൾഡ് ട്രംപ് H-1B വിസയുടെ അപേക്ഷാ ഫീസ് ഒരു ലക്ഷം ഡോളറാക്കി വർദ്ധിപ്പിച്ചിരുന്നു. STEM മേഖലയില്നിന്നുള്ളവരാണ് അമേരിക്കയുടെ എച്ച് 1 ബി വിസയുടെ ആവശ്യക്കാരിലേറെയും.
ഈ സാഹചര്യത്തിൽ, ദക്ഷിണേഷ്യൻ രാജ്യങ്ങളിൽ നിന്നുള്ള പ്രതിഭകൾക്ക്, പ്രത്യേകിച്ച് ഇന്ത്യക്കാർക്ക്, ചൈനയുടെ പുതിയ കെ വിസ ഒരു പുതിയ സാധ്യതയാണ് തുറക്കുന്നത്. നിലവില് ജോലി, പഠനം, ബിസിനസ് തുടങ്ങി 12 വിഭാഗങ്ങളില്പ്പെട്ട കാര്യങ്ങള്ക്കാണ് ചൈന വിസ അനുവദിക്കുന്നത്. ഇക്കൂട്ടത്തിലേക്കാണ് പതിമൂന്നാമതായി കെ വിസ എത്തുന്നത്.
ആർക്കൊക്കെ അപേക്ഷിക്കാം?
ചൈനയിലോ വിദേശത്തോ ഉള്ള പ്രമുഖ സർവ്വകലാശാലകളിൽ നിന്ന് STEM മേഖലകളിൽ ബിരുദമോ അതിലധികമോ യോഗ്യതയുള്ള യുവ ശാസ്ത്രജ്ഞർക്കും സാങ്കേതിക വിദഗ്ദ്ധർക്കും ഈ വിസയ്ക്കായി അപേക്ഷിക്കാം. ചൈനീസ് അധികാരികൾ നിശ്ചയിച്ചിട്ടുള്ള മറ്റ് യോഗ്യതാ മാനദണ്ഡങ്ങളും അപേക്ഷകർ പാലിക്കേണ്ടതുണ്ട്. നിലവിലുള്ള മിക്ക വിസകളിൽ നിന്നും വ്യത്യസ്തമായി, കെ വിസയ്ക്ക് അപേക്ഷിക്കാൻ ചൈനയിലെ ഏതെങ്കിലും സ്ഥാപനത്തിൽ നിന്നോ തൊഴിലുടമയിൽ നിന്നോ ഉള്ള ക്ഷണക്കത്ത് ആവശ്യമില്ല എന്നതാണ് സവിശേഷത.
ഈ വിസയ്ക്ക് കൂടുതൽ കാലാവധിയുണ്ട്, കൂടാതെ രാജ്യത്ത് കൂടുതൽ കാലം താമസിക്കാനും പ്രവർത്തിക്കാനും ഇത് അവസരം നൽകുന്നു. കെ വിസയുള്ളവർക്ക് അക്കാദമിക് എക്സ്ചേഞ്ച് പരിപാടികളിലും ബിസിനസ് പ്രവർത്തനങ്ങളിലും പങ്കെടുക്കാനും അനുവാദമുണ്ട്. ചുരുക്കത്തിൽ, ലോകത്തിലെ ഏറ്റവും മികച്ച പ്രതിഭകളെ ആകർഷിക്കാനുള്ള ചൈനയുടെ നയപരമായ നീക്കമാണ് ഈ പുതിയ കെ വിസ. ഇത് വിദേശ തൊഴിലാളികൾക്ക് പുതിയ തൊഴിൽ, ഗവേഷണ അവസരങ്ങൾ നൽകാനും സാധ്യതയുണ്ട്.
content summary: New ‘K Visa’ Announced by China; STEM Professionals Can Now Fly to China
Leave a Comment