തമിഴ്നാട് രാഷ്ട്രീയത്തില് പതിറ്റാണ്ടുകളായി നിലനിന്നിരുന്ന ഡിഎംകെ-എഐഎഡിഎംകെ ദ്വന്ദ്വഭരണത്തിന് അന്ത്യം കുറിക്കുന്നതിനൊപ്പം ദ്രാവിഡ രാഷ്ട്രീയത്തില് പുതിയ സഖ്യ സമവാക്യങ്ങളും രൂപപ്പെടുന്നു. തമിഴക വെട്രി കഴകം (ടിവികെ) നിയമസഭാ കക്ഷി നേതാവായി തിരഞ്ഞെടുക്കപ്പെട്ട സി. ജോസഫ് വിജയ്, നാളെ (മെയ് 7) തമിഴ്നാട് മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേല്ക്കുമെന്നാണ് വിവരം. ഏറ്റവും പുതിയ രാഷ്ട്രീയ നീക്കത്തില്, വിജയിയുടെ നേതൃത്വത്തിലുള്ള സര്ക്കാരിന് കോണ്ഗ്രസ് പിന്തുണ പ്രഖ്യാപിച്ചതോടെയാണ് ടിവികെയുടെ അധികാരലബ്ധി ഉറപ്പായിരിക്കുന്നത്.
ഡിഎംകെ-കോണ്ഗ്രസ് ബന്ധത്തില് വിള്ളല്
234 അംഗ നിയമസഭയില് 108 സീറ്റുകള് നേടിയ ടിവികെ ഏറ്റവും വലിയ ഒറ്റകക്ഷിയായി മാറിയിരുന്നു. കേവല ഭൂരിപക്ഷത്തിന് 118 സീറ്റുകള് വേണ്ടയിടത്ത് 10 സീറ്റുകളുടെ കുറവാണ് വിജയിക്കുണ്ടായിരുന്നത്. എന്നാല്, അഞ്ച് അംഗങ്ങളുള്ള കോണ്ഗ്രസ് പിന്തുണ പ്രഖ്യാപിച്ചതോടെ ടിവികെയുടെ അംഗബലം 113 ആയി ഉയര്ന്നു. ഇതോടെ ഡിഎംകെയുമായുള്ള കോണ്ഗ്രസിന്റെ 22 വര്ഷം നീണ്ട സഖ്യം തകര്ന്നുവെന്നാണ് പുറത്തു വരുന്ന വിവരങ്ങള്. 2019, 2024 ലോക്സഭാ തിരഞ്ഞെടുപ്പുകളില് വന് വിജയം നേടിയ സഖ്യത്തില് നിന്നുള്ള കോണ്ഗ്രസിന്റെ പിന്മാറ്റത്തെ ‘പിന്നില് നിന്നുള്ള കുത്ത്’ എന്നാണ് ഡിഎംകെ വക്താവ് എ. ശരവണന് വിശേഷിപ്പിച്ചത്.
കോണ്ഗ്രസിന്റെ ഉപാധികള്
മതേതര മൂല്യങ്ങള് സംരക്ഷിക്കാനും ബിജെപിയെയോ അവരുടെ ‘ബി-ടീമുകളെയോ’ അധികാരത്തില് നിന്ന് മാറ്റിനിര്ത്താനുമാണ് വിജയിയെ പിന്തുണയ്ക്കുന്നതെന്ന് കോണ്ഗ്രസ് ജനറല് സെക്രട്ടറി കെ.സി. വേണുഗോപാല് വ്യക്തമാക്കി. എന്ഡിഎ സഖ്യത്തിലോ എഐഎഡിഎംകെയുമായോ ടിവികെ സഹകരിക്കരുത് എന്ന കര്ശന ഉപാധിയിലാണ് കോണ്ഗ്രസ് പിന്തുണ. വിജയ് മന്ത്രിസഭയില് രണ്ട് മന്ത്രിസ്ഥാനങ്ങള് കോണ്ഗ്രസ് പ്രതീക്ഷിക്കുന്നുണ്ട്. മുതിര്ന്ന നേതാക്കളായ ഗിരീഷ് ചോദങ്കര്, പ്രവീണ് ചക്രവര്ത്തി എന്നിവര് ഇതുസംബന്ധിച്ച് ടിവികെ നേതൃത്വവുമായി ചര്ച്ചകള് നടത്തിക്കഴിഞ്ഞു.
മറ്റ് പാര്ട്ടികളുടെ പിന്തുണ
കോണ്ഗ്രസിന് പുറമെ ഇടതുപക്ഷ പാര്ട്ടികളായ സിപിഐഎം (2 സീറ്റ്), സിപിഐ (2), കൂടാതെ വിസികെ (2), ഐയുഎംഎല് (2) എന്നീ പാര്ട്ടികളും ടിവികെയെ പിന്തുണയ്ക്കുമെന്നാണ് സൂചന. ‘ക്രിയാത്മകമായ പിന്തുണ’ നല്കുമെന്ന് സിപിഐഎം ജനറല് സെക്രട്ടറി എം.എ. ബേബി സൂചിപ്പിച്ചു. ഇവരുടെ പിന്തുണ കൂടി ലഭിക്കുന്നതോടെ ടിവികെ സഖ്യത്തിന്റെ അംഗബലം 121 ആയി ഉയരും, ഇത് കേവല ഭൂരിപക്ഷത്തിന് മുകളിലാണ്.
കാമരാജ് മോഡല്
വിജയത്തിന് ശേഷം സോഷ്യല് മീഡിയയില് പങ്കുവെച്ച കുറിപ്പില് തമിഴ് ജനതയോട് വിജയ് നന്ദി രേഖപ്പെടുത്തി. ‘പലരും ഞങ്ങളെ പരിഹസിച്ചു, നിഷ്പക്ഷതയുടെ മുഖംമൂടി അണിഞ്ഞ് വിമര്ശിച്ചു. എന്നാല് ജനങ്ങളെ വിശ്വസിച്ച് ഒറ്റയ്ക്ക് നിന്ന ഞങ്ങളെ തമിഴ് മക്കള് ഒരു അമ്മയെപ്പോലെ ചേര്ത്തുപിടിച്ചു,’ വിജയ് കുറിച്ചു. പെരുന്തലൈവര് കാമരാജിന്റെ ഭരണമാതൃകയാണ് താന് പിന്തുടരുന്നതെന്നും രാഷ്ട്രീയത്തിനതീതമായി ജനക്ഷേമത്തിനാണ് മുന്ഗണനയെന്നും അദ്ദേഹം വ്യക്തമാക്കി.
സത്യപ്രതിജ്ഞ നാളെ?
പനയൂരിലെ പാര്ട്ടി ഓഫീസില് നടന്ന എംഎല്എമാരുടെ യോഗത്തിന് ശേഷം വിജയ് ഇന്ന് തമിഴ്നാട് ഗവര്ണര് ഇന്-ചാര്ജ് രാജേന്ദ്ര അര്ലേക്കറെ സന്ദര്ശിക്കും. സര്ക്കാര് രൂപീകരിക്കാന് അവകാശവാദം ഉന്നയിച്ചു കൊണ്ടുള്ള പിന്തുണക്കത്ത് ഗവര്ണര്ക്ക് കൈമാറുന്നതോടെ സത്യപ്രതിജ്ഞാ ചടങ്ങുകള്ക്ക് ഔദ്യോഗിക സ്ഥിരീകരണമാകും. പ്രധാനമന്ത്രി നരേന്ദ്ര മോദിയും രാഹുല് ഗാന്ധിയും വിജയിയെ അഭിനന്ദനങ്ങള് അറിയിച്ചിരുന്നു.
കരുണാനിധിക്കും ജയലളിതയ്ക്കും ശേഷം തമിഴക രാഷ്ട്രീയത്തില് ഒരു പുതിയ സൂര്യോദയത്തിനാണ് ഇപ്പോള് വഴിയൊരുങ്ങുന്നത്. ദശകങ്ങള്ക്ക് ശേഷം തമിഴ്നാട്ടില് ഒരു ഭരണകൂടത്തിന്റെ ഭാഗമാകാന് കോണ്ഗ്രസിന് സാധിക്കുന്നു എന്ന പ്രത്യേകതയും ഈ രാഷ്ട്രീയ മാറ്റത്തിനുണ്ട്.
Content Summary: A major political shift in Tamil Nadu as Congress ends its 22-year alliance with DMK to back Vijay’s TVK
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
