മാധ്യമ ഭീമനായ റൂപർട്ട് മർഡോക്കിനും അദ്ദേഹത്തിൻ്റെ ഉടമസ്ഥതയിലുള്ള ‘വാൾ സ്ട്രീറ്റ് ജേർണൽ’ പത്രത്തിലെ രണ്ട് പത്രപ്രവർത്തകർക്കുമെതിരെ മാനനഷ്ടക്കേസ് ഫയൽ ചെയ്ത് അമേരിക്കൻ പ്രസിഡന്റ് ഡൊണാൾഡ് ട്രംപ്. ലൈംഗിക കുറ്റവാളിയായ ജെഫ്രി എപ്സ്റ്റൈന് ട്രംപ് ലൈംഗികപരമായ ചിത്രം വരച്ച് നൽകിയെന്ന് ആരോപിക്കുന്ന ഒരു റിപ്പോർട്ട് ജേർണൽ പ്രസിദ്ധീകരിച്ചതിനെ തുടർന്നാണ് ഈ നീക്കം. ട്രംപിൻ്റെ അഭിഭാഷകർ വെള്ളിയാഴ്ച മയാമിയിലെ ഫെഡറൽ കോടതിയിലാണ് കേസ് ഫയൽ ചെയ്തത്.
‘വാൾ സ്ട്രീറ്റ് ജേർണൽ’ പത്രം, അതിൻ്റെ മാതൃ കമ്പനികളായ ‘ഡോ ജോൺസ്’, ‘ന്യൂസ് കോർപ്’ എന്നിവയും കേസിൽ പ്രതികളാണ്. 2003-ൽ എപ്സ്റ്റൈന്റെ 50-ാം പിറന്നാളിന് ട്രംപ് ലൈംഗിക സൂചനകളുള്ള ഒരു ചിത്രവും ആശംസാ കാർഡും അയച്ചുവെന്ന് ജേർണൽ റിപ്പോർട്ട് ചെയ്തിരുന്നു. കൂടാതെ, ഇരുവരും തമ്മിലുള്ള രഹസ്യങ്ങളെക്കുറിച്ച് പരാമർശിച്ചതായും പത്രം പറയുന്നു. ഈ റിപ്പോർട്ട് തൻ്റെ പ്രതിച്ഛായക്ക് കോട്ടം വരുത്തിയെന്ന് ചൂണ്ടിക്കാട്ടിയാണ് ട്രംപ് നിയമനടപടി സ്വീകരിച്ചിരിക്കുന്നത്. ഈ കേസിനെക്കുറിച്ച് മർഡോക്കിന്റെ ഭാഗത്തുനിന്ന് ഇതുവരെ ഔദ്യോഗിക പ്രതികരണമൊന്നും വന്നിട്ടില്ല.
റിപ്പോർട്ട് അനുസരിച്ച്, എപ്സ്റ്റൈൻ്റെ 50-ാം പിറന്നാളിനായി അദ്ദേഹത്തിൻ്റെ സുഹൃത്തായിരുന്ന ഗിസ്ലെയ്ൻ മാക്സ്വെൽ തയ്യാറാക്കിയ പിറന്നാൾ ആൽബത്തിലേക്കുള്ള സംഭാവനയായിരുന്നു ഈ കത്ത്. പ്രായപൂർത്തിയാകാത്ത പെൺകുട്ടികളെ ലൈംഗിക ആവശ്യങ്ങൾക്കായി ഉപയോഗിച്ച കേസിൽ കുറ്റക്കാരിയാണെന്ന് കണ്ടെത്തിയതിനെ തുടർന്ന് മാക്സ്വെൽ നിലവിൽ 20 വർഷത്തെ തടവ് ശിക്ഷ അനുഭവിച്ചുവരികയാണ്.
“അതിലെ ചിത്രത്തിൽ, രണ്ട് ചെറിയ വളഞ്ഞ വരകൾ സ്ത്രീയുടെ സ്തനങ്ങളെയും, ‘ഡൊണാൾഡ്’ എന്ന് വളഞ്ഞൊടിഞ്ഞ ഒപ്പ് അവളുടെ അരക്കെട്ടിന് താഴെയുള്ള രോമങ്ങളെയും സൂചിപ്പിക്കുന്നു,” എന്ന് വാൾ സ്ട്രീറ്റ് ജേർണൽ റിപ്പോർട്ട് ചെയ്തു. “സന്തോഷം നിറഞ്ഞ ജന്മദിനം ആശംസിക്കുന്നു, ഓരോ ദിവസവും ഓരോ പുതിയ രഹസ്യമായിരിക്കട്ടെ” എന്ന് കത്തിൽ എഴുതിയിരുന്നതായും പത്രം പറയുന്നു.
എന്നാൽ, ഈ റിപ്പോർട്ട് ട്രംപ് നിഷേധിച്ചു. കത്ത് വ്യാജമാണെന്നും, മർഡോക്കിനെതിരെ നല്കാൻ പദ്ധതിയിട്ടിട്ടുണ്ടെന്ന് താൻ മുന്നറിയിപ്പ് നൽകിയതായും തന്റെ സാമൂഹ്യ മാധ്യമമായ ‘ട്രൂത്ത് സോഷ്യലി’ലൂടെ ട്രംപ് അറിയിച്ചു.
“ശ്രദ്ധിക്കാമെന്ന് മർഡോക്ക് പറഞ്ഞിരുന്നു, പക്ഷെ അദ്ദേഹത്തിന് അതിനുള്ള അധികാരം ഇല്ലാത്തതിനാൽ അത് ചെയ്യാൻ കഴിഞ്ഞില്ല. അതിനാൽ അവർ തെറ്റായതും അപകീർത്തികരവുമായ വാർത്തയുമായി മുന്നോട്ട് പോകുകയാണ്. ‘വാൾ സ്ട്രീറ്റ് ജേർണൽ’, ‘ന്യൂസ് കോർപ്’, റൂപർട്ട് മർഡോക്ക് എന്നിവർക്കെതിരെ ഉടൻ തന്നെ കേസ് കൊടുക്കും,”ട്രംപ് കുറിച്ചു.
“എൻ്റെ ഭാഷ ക്ഷമിക്കണം, പക്ഷേ ഈ വാർത്ത തീർത്തും അസംബന്ധമാണ്, ‘വാൾ സ്ട്രീറ്റ് ജേർണലി’ന് ഇത് പ്രസിദ്ധീകരിച്ചതിൽ ലജ്ജ തോന്നണം. എവിടെയാണ് ഈ കത്ത്? അവർ ഇത് പ്രസിദ്ധീകരിക്കുന്നതിന് മുൻപ് ഞങ്ങളെ കാണിച്ചില്ലെന്ന് അറിഞ്ഞാൽ നിങ്ങൾ ഞെട്ടുമോ? ഇത് ഡൊണാൾഡ് ട്രംപ് ചെയ്തതാണെന്ന് ആരെങ്കിലും വിശ്വസിക്കുമോ ?”, വൈസ് പ്രസിഡന്റ് ജെ.ഡി. വാൻസ് റിപ്പോർട്ടിനെ പരിഹസിച്ച് രംഗത്തെത്തി.
അധികാരത്തിലിരിക്കെ ഒരു മാധ്യമ സ്ഥാപനത്തിനെതിരെ ഡൊണാൾഡ് ട്രംപ് ഫയൽ ചെയ്യുന്ന ആദ്യത്തെ കേസാണിത്. വൈറ്റ് ഹൗസിലേക്ക് മടങ്ങിയെത്തുന്നതിന് മുൻപും അദ്ദേഹം മാധ്യമങ്ങൾക്കെതിരെ നിരവധി കേസുകൾ നൽകിയിട്ടുണ്ട്. ഇത് സ്വതന്ത്രമായ അഭിപ്രായപ്രകടനത്തെ തടയുമോ എന്ന ആശങ്കകൾ ഉയർത്തിയിരുന്നു.
അദ്ദേഹത്തിന്റെ മിക്ക നിയമപോരാട്ടങ്ങളും പരാജയപ്പെട്ടെങ്കിലും, കഴിഞ്ഞ ഒരു വർഷത്തിനിടെ എ.ബി.സി. ന്യൂസിനും പാരാമൗണ്ടിനുമെതിരെ നൽകിയ കേസുകളിൽ നിന്ന് 30 ദശലക്ഷം ഡോളറിലധികം തുക നഷ്ടപരിഹാരമായി ട്രംപ് നേടിയിട്ടുണ്ട്.
നിലവിലെ കേസ്, ട്രംപും മാധ്യമ മുതലാളി റൂപർട്ട് മർഡോക്കും തമ്മിലുള്ള ബന്ധത്തിൽ ഒരു പുതിയ വഴിത്തിരിവാണ്. മർഡോക്കിന്റെ ഫോക്സ് ന്യൂസ് ട്രംപിനെ ശക്തമായി പിന്തുണയ്ക്കുന്ന ഒരു മാധ്യമ സ്ഥാപനമാണ്. കഴിഞ്ഞ ഫെബ്രുവരിയിൽ ട്രംപ് മർഡോക്കിനെ ഓവൽ ഓഫീസിലേക്ക് ക്ഷണിക്കുകയും, അദ്ദേഹത്തെ “ഒരു ഇതിഹാസം” എന്നും “അത്ഭുതകരമായ വ്യക്തി” എന്നും വിശേഷിപ്പിക്കുകയും ചെയ്തിരുന്നു. ഈ പുതിയ കേസ് ഇരുവരും തമ്മിലുള്ള ബന്ധത്തിൽ വിള്ളൽ വീഴ്ത്തിയിരിക്കുകയാണ്.
ജെഫ്രി എപ്സ്റ്റൈൻ കേസുമായി ബന്ധപ്പെട്ട ഫയലുകൾ പുറത്തുവിടാത്തതിനെ തുടർന്ന് പ്രസിഡന്റ് ഡൊണാൾഡ് ട്രംപ് സ്വന്തം അനുയായികളിൽ നിന്ന് വലിയ വിമർശനം നേരിടുകയാണ്. ഈ ആഴ്ച പുറത്തുവന്ന ഒരു റോയിട്ടേഴ്സ്/ഇപ്സോസ് വോട്ടെടുപ്പ് അനുസരിച്ച്, 69% ആളുകളും എപ്സ്റ്റൈൻ്റെ ഇടപാടുകാരുമായി ബന്ധപ്പെട്ട വിവരങ്ങൾ സർക്കാർ മറച്ചുവെക്കുകയാണെന്ന് വിശ്വസിക്കുന്നു. 6% ആളുകൾ മാത്രമാണ് ഇതിനോട് വിയോജിച്ചത്, ഏകദേശം നാലിലൊന്ന് പേർക്ക് ഇതിനെക്കുറിച്ച് ഉറപ്പില്ലായിരുന്നു.
സർക്കാർ ഈ വിഷയത്തിൽ എന്തെങ്കിലും ഒളിച്ചുവെക്കുന്നു എന്ന ആരോപണം തണുപ്പിക്കാൻ, ട്രംപ് വെള്ളിയാഴ്ച അറ്റോർണി ജനറൽ പാമ് ബോണ്ടിയോട്, എപ്സ്റ്റൈൻ്റെ കേസിൽ ഗ്രാൻഡ് ജൂറി നൽകിയ മൊഴികൾ പുറത്തുവിടാൻ ആവശ്യപ്പെടാൻ ഉത്തരവിട്ടു. സാധാരണയായി രഹസ്യമായി സൂക്ഷിക്കുന്ന ഈ വിവരങ്ങൾ പുറത്തുവിടാനുള്ള അസാധാരണമായ ഈ ആവശ്യം, “വ്യാപകമായ പൊതുതാൽപര്യം” ചൂണ്ടിക്കാണിച്ച് ബോണ്ടി ന്യൂയോർക്കിലെ കോടതിയിൽ ഫയൽ ചെയ്തു.
നേരത്തെ, “ജെഫ്രി എപ്സ്റ്റൈന് ലഭിക്കുന്ന അനാവശ്യമായ പ്രചാരണം” ചൂണ്ടിക്കാണിച്ച് ഈ വിവരങ്ങൾ പുറത്തുവിടാൻ നീതിന്യായ വകുപ്പിന് താൻ അനുമതി നൽകിയതായി ട്രംപ് ട്രൂത്ത് സോഷ്യൽ എന്ന തൻ്റെ പ്ലാറ്റ്ഫോമിലൂടെ അറിയിച്ചിരുന്നു. എന്നാൽ, നീതിന്യായ വകുപ്പിൻ്റെയും എഫ്.ബി.ഐ.യുടെയും കൈവശമുള്ള എല്ലാ ഫയലുകളും പുറത്തുവിടാൻ അനുമതി നൽകിയിട്ടില്ലെന്ന് അദ്ദേഹം വ്യക്തമാക്കി.
ട്രംപിന്റെയും മറ്റ് നിരവധി ഉന്നത വ്യക്തികളുടെയും ദീർഘകാല സുഹൃത്തായിരുന്ന എപ്സ്റ്റൈനെ, ന്യൂയോർക്കിലെയും ഫ്ലോറിഡയിലെയും അദ്ദേഹത്തിന്റെ വീടുകളിൽ വെച്ച് ഡസൻ കണക്കിന് പ്രായപൂർത്തിയാകാത്ത പെൺകുട്ടികളെ ലൈംഗികമായി ദുരുപയോഗം ചെയ്തു എന്ന കുറ്റത്തിന് വിചാരണ കാത്തിരിക്കവേ ന്യൂയോർക്കിലെ ജയിലിൽ മരിച്ച നിലയിൽ കണ്ടെത്തുകയായിരുന്നു. ആത്മഹത്യയാണെന്ന് പ്രഖ്യാപിച്ച എപ്സ്റ്റൈന്റെ മരണം, പ്രത്യേകിച്ച് ട്രംപിന്റെ തീവ്ര വലതുപക്ഷ വോട്ടർമാർക്കിടയിൽ, സമ്പന്നരായ ശിശുപീഡകരുടെ ഒരു അന്താരാഷ്ട്ര ഗൂഢാലോചനയെക്കുറിച്ചുള്ള സിദ്ധാന്തങ്ങൾക്ക് തിരികൊളുത്തി.
ഈ വർഷം ജനുവരിയിൽ ട്രംപ് രണ്ടാമത്തെ തവണ അധികാരത്തിൽ തിരിച്ചെത്തിയപ്പോൾ, അദ്ദേഹത്തിന്റെ അനുയായികൾ എപ്സ്റ്റൈന്റെ ഇടപാടുകാരുടെ പട്ടിക പുറത്തുവിടാൻ ആവശ്യപ്പെട്ടിരുന്നു. എന്നാൽ, അറ്റോർണി ജനറൽ പാമ് ബോണ്ടി ഈ മാസം അത്തരമൊരു പട്ടിക നിലവിലില്ലെന്ന് ഔദ്യോഗികമായി അറിയിക്കുകയായിരുന്നു.
content summary: Trump sues Wall Street Journal and Rupert Murdoch over Epstein report
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
