യുണൈറ്റഡ് അറബ് എമിറേറ്റ്സിലെ (യുഎഇ) പ്രമുഖ നിയമ സ്ഥാപനങ്ങള് ജീവനക്കാരോട് ഓഫീസുകളില് നേരിട്ട് ഹാജരാകാന് ആവശ്യപ്പെട്ടിരിക്കുന്നത് വലിയ പ്രതിഷേധങ്ങള്ക്ക് കാരണമായിരിക്കുന്നു. ഇറാനുമായുള്ള യുദ്ധം ആരംഭിച്ചപ്പോള് രാജ്യം വിട്ടുപോയ അഭിഭാഷകരാണ് പ്രതിഷേധവുമായി രംഗത്തുവന്നിരിക്കുന്നത്. ജോണ്സ് ഡേ, ക്ലിയറി ഗോട്ട്ലീബ് സ്റ്റീന് ആന്ഡ് ഹാമില്ട്ടണ് തുടങ്ങിയ അമേരിക്കന് നിയമ സ്ഥാപനങ്ങള് ദുബായിലെയും അബുദാബിയിലെയും തങ്ങളുടെ ഓഫീസുകളില് ജോലിക്ക് ഹാജരാകാന് അടുത്ത ആഴ്ച മുതല് ജീവനക്കാരോട് നിര്ദ്ദേശിച്ചതായാണ് വിവരം.
നേരത്തെ പ്രഖ്യാപിച്ച ഇളവുകള്ക്ക് വിപരീതമായി ഓഫീസിലേക്ക് മടങ്ങാന് ആവശ്യപ്പെടുന്നത് ജീവനക്കാരില് അതൃപ്തിയുണ്ടാക്കിയിട്ടുണ്ട്. ഇറാന് സംഘര്ഷം തുടങ്ങിയപ്പോള് സുരക്ഷാ കാരണങ്ങളാല് മറ്റു രാജ്യങ്ങളിലേക്ക് മാറിയ പല അഭിഭാഷകര്ക്കും തിരികെ വരാന് വലിയ സാമ്പത്തിക ബാധ്യതയുണ്ട്. യുഎസ്-ഇറാന് വെടിനിര്ത്തല് കരാര് വളരെ ദുര്ബലമാണെന്നും, അതിനാല് വീണ്ടും യുഎഇയിലേക്ക് മടങ്ങുന്നത് സുരക്ഷിതമല്ലെന്നും ഒരു അമേരിക്കന് സ്ഥാപനത്തിലെ അഭിഭാഷകന് ആശങ്ക പ്രകടിപ്പിച്ചു. യുഎസ് പ്രസിഡന്റ് ഡൊണാള്ഡ് ട്രംപ് വെടിനിര്ത്തല് കാലാവധി അനിശ്ചിതകാലത്തേക്ക് നീട്ടിയിട്ടുണ്ടെങ്കിലും അതിന്റെ ഭാവിയില് ആര്ക്കും ഉറപ്പില്ല.
ഇറാനും യുഎസും ഇസ്രയേലും തമ്മിലുള്ള യുദ്ധം പൊട്ടിപ്പുറപ്പെട്ടപ്പോള് ഔദ്യോഗിക മാര്ഗ്ഗനിര്ദ്ദേശങ്ങള് പാലിച്ച് ജീവനക്കാരോട് വീട്ടിലിരുന്ന് ജോലി ചെയ്യാന് നിയമ സ്ഥാപനങ്ങള് ആവശ്യപ്പെട്ടിരുന്നു. എന്നാല് ഇറാന് ആക്രമണങ്ങള് അവസാനിച്ചതോടെ യുഎസ് എംബസി തങ്ങളുടെ സുരക്ഷാ നിര്ദ്ദേശങ്ങള് പിന്വലിച്ചു. ജീവനക്കാരുടെ മടക്കം സുഗമമാക്കാന് ചില സ്ഥാപനങ്ങള് യാത്രാച്ചെലവ് വഹിക്കാമെന്ന് വാഗ്ദാനം നല്കിയിട്ടുണ്ട്. മെയ് 4 മുതല് അബുദാബി ഓഫീസിലേക്ക് മടങ്ങാന് ആവശ്യപ്പെട്ട ക്ലിയറി ഗോട്ട്ലീബ്, ജീവനക്കാരുടെ മടക്കയാത്രാ ചെലവ് വഹിക്കുമെന്ന് അറിയിച്ചിട്ടുണ്ട്. മറ്റു ചില സ്ഥാപനങ്ങളും സമാനമായ വാഗ്ദാനങ്ങള് പരിഗണിക്കുന്നുണ്ട്.
ദുബായിലെ സാമ്പത്തിക കേന്ദ്രത്തിലെ ഓഫീസുകളില് ഹാജരാകുന്നത് നിലവില് നിര്ബന്ധമല്ലെങ്കിലും, ക്ലയന്റുകളുമായി നേരിട്ട് ബന്ധം പുലര്ത്താന് അഭിഭാഷകര് ഓഫീസില് എത്തണമെന്ന് സ്ഥാപനങ്ങള് പ്രോത്സാഹിപ്പിക്കുന്നുണ്ട്. ചില ക്ലയന്റുകള് തങ്ങളുടെ ഉപദേശകര് നേരിട്ട് മീറ്റിംഗുകളില് പങ്കെടുക്കണമെന്ന് നിര്ബന്ധം പിടിക്കുന്നതായി ഒരു പ്രമുഖ അമേരിക്കന് ലോ ഫേമിലെ പാര്ട്ണര് ചൂണ്ടിക്കാട്ടി. സ്കൂളുകള് വീണ്ടും തുറന്ന സാഹചര്യത്തില് മുതിര്ന്നവര് ഓഫീസിലേക്ക് തിരിച്ചെത്തേണ്ട സമയമാണിതെന്ന് മറ്റൊരു മുതിര്ന്ന അഭിഭാഷകനും അഭിപ്രായപ്പെട്ടു.
അതേസമയം, യുദ്ധം തുടങ്ങിയപ്പോള് ദുബായ് വിട്ടുപോയ പ്രൊഫഷണലുകളോട് തനിക്ക് സഹതാപമില്ലെന്ന് പ്രാദേശിക നിയമ സ്ഥാപനത്തിന്റെ മാനേജിംഗ് പാര്ട്ണറായ അഹമ്മദ് ഇബ്രാഹിം പറഞ്ഞു. ഈ നടപടി സമ്പദ്വ്യവസ്ഥയ്ക്ക് ദോഷകരമാണെന്നും അദ്ദേഹം കൂട്ടിച്ചേര്ത്തു. പ്രവാസികളുടെ ചെലവാക്കലിനെ ആശ്രയിക്കുന്ന ദുബായ് സമ്പദ്വ്യവസ്ഥയില്, ഇത്തരം കൊഴിഞ്ഞുപോക്കുകള് തിരിച്ചടിയാണ്. പഴയതുപോലെ ഇടപാടുകള് പൂര്ത്തിയാക്കി തിരിച്ചുപോകുന്ന ‘സ്യൂട്ട്കേസ് ബാങ്കിംഗ്’ രീതിക്ക് പകരം, ഇവിടെ ദീര്ഘകാലത്തേക്ക് തുടരാന് തയ്യാറാണെന്ന് തെളിയിക്കാനുള്ള അവസരമായാണ് പലരും ഈ പ്രതിസന്ധിയെ കാണുന്നത്. ബ്ലാക്ക്റോക്ക്, ബ്രൂക്ക്ഫീല്ഡ് തുടങ്ങിയ വമ്പന് നിക്ഷേപ ഗ്രൂപ്പുകളുടെ മേധാവികള് ഈ മാസം യുഎഇയില് സന്ദര്ശനം നടത്തിയത് ഈ മേഖലയിലുള്ള വിശ്വാസം വര്ദ്ധിപ്പിക്കുന്നുണ്ട്. ബേക്കര് മക്കെന്സി ഉള്പ്പെടെയുള്ള അന്താരാഷ്ട്ര നിയമ സ്ഥാപനങ്ങളും ജീവനക്കാരോട് ഓഫീസിലേക്ക് മടങ്ങാന് ആവശ്യപ്പെട്ടിട്ടുണ്ട്.
Content Summary: UAE Law Firms Push for Return to Office, Sparking Backlash From Lawyers After Regional Conflict
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
