നീലയും ചുവപ്പും മഞ്ഞയും ഇടകലർന്ന വസ്ത്രവും ചുവന്ന തൂവലുകളുമുള്ള തൊപ്പിയും ധരിച്ച് വത്തിക്കാൻ കവാടങ്ങളിൽ കാവൽനിൽക്കുന്ന സ്വിസ് ഗാർഡുകൾ സന്ദർശകർക്ക് എന്നും കൗതുകക്കാഴ്ചയാണ്. വത്തിക്കാന്റെ സൈന്യമായ സ്വിസ് ഗാർഡുകളുടെ പ്രധാന ചുമതല പോപ്പിനെ സംരക്ഷിക്കുക എന്നതാണ്. ലോകത്തിലെ ഏറ്റവും ചെറിയ സൈന്യവും ഇവർ തന്നെയാണ്.
നിലവിൽ ജീവിച്ചിരിക്കുന്ന പോപ്പ് ഇല്ലാത്തതിനാൽ സ്വിസ് ഗാർഡുകൾ ഫ്രാൻസിസ് മാർപാപ്പയുടെ ശവസംസ്കാര ചടങ്ങുകളിലും വരാനിരിക്കുന്ന കോൺക്ലേവിലും വത്തിക്കാൻ സിറ്റിയെയും റോമിനെയും സംരക്ഷിക്കാൻ ചുമതലപ്പെടുത്തിയ ഇറ്റാലിയൻ പോലീസും സൈന്യവും ഉൾപ്പെടെ ഒരു വലിയ സുരക്ഷാ പ്രവർത്തനത്തിന്റെ ഭാഗമാകും.
പരമ്പരാഗത ആയുധമായ കുന്തവും അരയിലണിയുന്ന ചെറുവാളും ഉണ്ടെങ്കിലും
സ്വിസ് ഗാർഡുകൾ നിരായുധരാണെന്നാണ് കണക്കാക്കുന്നത്. അതേസമയം, കായികബലത്തിലും അഭ്യാസത്തിലും ഇവർ മുൻപന്തിയിലാണ്.
അക്രമികളാരെങ്കിലും വന്നാൽ അവരെ സ്വിസ് ഗാർഡുകൾ കായികബലമുപയോഗിച്ച് കീഴ്പ്പെടുത്തും. ശേഷം ഉപദ്രവിക്കാതെ ഇറ്റാലിയൻ പോലീസിന് കൈമാറുകയാണ് പതിവ്.
19 മുതല്‍ 30 വരെ പ്രായപരിധിയിലുള്ളവരാണ് സൈനികരാകുന്നത്. ഇവർ സ്വിസ്സ് പൗരന്മാരും കത്തോലിക്കരുമായിരിക്കണം. മാത്രമല്ല, ജന്മനാടായ സ്വിറ്റ്സര്‍ലന്റിൽ പരിശീലനം നേടിയവർക്കാണ് സൈനികരാകാൻ കഴിയുക. വത്തിക്കാനിലെ സേവനകാലമൊക്കെയും സൈനികർ അവിവാഹിതരായിരിക്കും.
1500 കളുടെ തുടക്കം മുതൽ സ്വിസ് ഗാർഡുകൾ വത്തിക്കാനെ സേവിച്ചുവരുന്നു. സ്വിറ്റ്സര്‍ലന്റില്‍ ദാരിദ്ര്യവും തൊഴിലില്ലായ്മയും നിലനിന്നിരുന്ന സമയത്താണ് കൂടുതൽ യുവാക്കൾ പട്ടാളത്തില്‍ച്ചേരുന്നത്. 1506 ലാണ് ജൂലിയസ് രണ്ടാമന്‍ മാർപാപ്പമാരോടുള്ള മാന്യതക്കും കരബലത്തിനും വിശ്വാസ്യതയ്ക്കും പ്രശസ്തി കേട്ട സ്വിസ്സ് യുവാക്കളെ വത്തിക്കാന്റെ സേവനത്തിനായി ക്ഷണിച്ചത്. അതോടെ സ്വിസ്സ് സൈന്യത്തിന്റെ വത്തിക്കാനിലെ ചരിത്രത്തിന് തുടക്കമായി.
മാർപാപ്പയുടെ അംഗരക്ഷകർ എന്നതാണ് ഇവരുടെ ഏറ്റവും വലിയ പ്രത്യേകത. യൂറോപ്പിലെ ഭീകരാക്രമണങ്ങൾ തടയുന്നതിനും ഈ വർഷത്തെ കത്തോലിക്കാ ജൂബിലിക്ക് തയ്യാറെടുക്കുന്നതിനുമായി 2018 ൽ ഫ്രാൻസിസ് മാർപാപ്പ സ്വിസ് ഗാർഡുകളുടെ എണ്ണം 110 ൽ നിന്ന് 135 ആയി വർദ്ധിപ്പിച്ചിരുന്നു. ഹാൽബെർഡ് ആണ് സൈന്യത്തിന്റെ പരമ്പരാഗത ആയുധം. എന്നാൽ സ്റ്റൺ ഗൺ ഉൾപ്പെടെയുള്ള ആധുനിക ആയുധങ്ങൾ ഉപയോഗിക്കാൻ ഗാർഡുകൾക്ക് പരിശീലനം നൽകിയിട്ടുണ്ട്.
കാസ സാന്താ മാർട്ടയിലെ വസതിയിൽ പോപ്പ് ഫ്രാൻസിസിന്റെ മൃതദേഹം വയ്ക്കുമ്പോൾ അതിനു കാവൽ നിൽക്കുക എന്നതാണ് നിലവിൽ സൈനികരുടെ ദൗത്യം. ശവസംസ്കാര ചടങ്ങുകൾക്ക് ശേഷം, സ്വിസ് ഗാർഡുകൾ ഫ്രാൻസിസ് മാർപാപ്പയുടെ ശവപ്പെട്ടി റോമിലെ എസ്ക്വിലിനോ പ്രദേശത്തുള്ള സെന്റ് മേരി മേജർ ബസിലിക്കയിലേക്ക് കൊണ്ടുപോകാൻ സഹായിക്കും. അവിടെ അദ്ദേഹം തിരഞ്ഞെടുത്ത ഒരു ശവകുടീരത്തിൽ അദ്ദേഹത്തെ അടക്കം ചെയ്യും.
വത്തിക്കാൻ നഗരത്തിന്റെ അതിർത്തികളിൽ പട്രോളിംഗ് നടത്തുന്ന പതിവ് ഡ്യൂട്ടി തുടരുന്നതിനൊപ്പം പുതിയ മാർപാപ്പയെ തിരഞ്ഞെടുക്കുന്ന സിസ്റ്റൈൻ ചാപ്പലിലെ കോൺക്ലേവിനും അവർ കാവൽ നിൽക്കും.
Content Summary: Vatican’s Swiss Guards: The Unarmed Army Protecting the Pope
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
