കേരള പൊലീസിന്റെ കൃത്യനിര്വഹണത്തെക്കുറിച്ച് വ്യാപകമായ പരാതി ഉയരുമ്പോഴും മൊത്തത്തില് ആക്ഷേപിക്കേണ്ടതില്ലെന്ന വാദവും അതിനൊപ്പം ഉണ്ടാകാറുണ്ട്. അത് ശരിയാണെന്ന് തെളിയിക്കുന്ന ഒരു ഉദ്ദാഹരണം കൂടി ഇതാ… ആംഡ് പൊലീസ് ബറ്റാലിയന് ഡി ഐ ജി ഷെഫീന് അഹമ്മദ് കെ ഐപിഎസ് ചൂണ്ടിക്കാണിച്ചിരിക്കുന്ന മൂന്നു പൊലീസുകാര്, കേരള പൊലീസിന് മൊത്തത്തില് അഭിമാനമായി മാറിയിരിക്കുകയാണ്.
ആ സംഭവം ഇങ്ങനെയാണ്; സെപ്തംബര് 26 ആം തീയതി രാത്രി 12.15 ഓടെ ഡി ഐ ജി ഷെഫീന് അഹമ്മദ് തന്റെ സ്വകാര്യ കാര് ഓടിച്ചു വരുമ്പോള് തിരുവനന്തപുരം തകരപ്പറമ്പ് ജംഗ്ഷനില്വച്ച് വഞ്ചിയൂര് പൊലീസ് സ്റ്റേഷനിലെ എ എസ് ഐ ജയകുമാര് സിപിഒ മാരായ അനില് കുമാര്, അജിത് കുമാര് എന്നിവരുടെ നേതൃത്വത്തില് കൈ കാണിച്ചു നിര്ത്തി. വാഹനം ഓടിക്കുന്നയാള് ഡി ഐ ജി ആണെന്ന് പൊലീസുകാര്ക്ക് തിരിച്ചറിയാന് കഴിഞ്ഞില്ല. ഡി ഐ ജി ആകട്ടെ താന് ആരാണെന്ന് പറയാന് നില്ക്കാതെ ഒരു സാധാരണ ഡ്രൈവറെ പോലെ പൊലീസുകാരുടെ ചെക്കിംഗിന് വിധേയനായി നിന്നു. ബ്രീത്ത് അനലൈസര് ഉപയോഗിക്കാന് പറഞ്ഞപ്പോള് അനുസരിച്ചു. തന്റെ കാറിന്റെ ഡിക്കി വരെ തുറന്നു നോക്കി നടത്തിയ പരിശോധനനയ്ക്കും ഡി ഐ ജി പൂര്ണമായി സഹകരിച്ചു.
സാധാരണ ഇത്തരം സാഹചര്യങ്ങളില് സീനിയര് ഓഫിസര്മാരുടെ അപ്രീതിക്ക് ഇരകളാവുകയാണ് പൊലീസുകാര് പതിവെങ്കിലും ഡി ഐ ജി ഷെഫീന് അഹമ്മദില് നിന്നും ഉണ്ടായത് അങ്ങനെയൊരു പ്രതികരണം അല്ലായിരുന്നു. തന്റെ വാഹനം പരിശോധിച്ച പൊലീസുകാര്ക്ക് ക്യാഷ് അവാര്ഡും ജിഎസ്ഇ യും നല്കുകയാണ് ഷെഫീന് അഹമ്മദ് ചെയ്തത്. പൊലീസുകാരുടെ ആത്മാര്ത്ഥതയും ജോലിയോടുള്ള ബഹുമാനവും എടുത്തു പറഞ്ഞാണ് ഡി ഐ ജി അഭിനന്ദിച്ചിരിക്കുന്നത്. തന്റെ വാഹന പരിശോധന സമയത്ത് പൊലീസുകാരില് നിന്നും ഉണ്ടായ മാന്യമായ പെരുമാറ്റവും തീര്ച്ചയായും അഭിനന്ദിക്കപ്പെടേണ്ട കാര്യമാണെന്നും ഡി ഐ ജി പറയുന്നു.
