ഹോളിവുഡ് സിനിമാക്കഥയല്ല; യുഎസ് സേനയിലെ ‘സെറെ’ ട്രെയ്‌നിംഗ്

ഇറാനില്‍ തകര്‍ന്നു വീണ എഫ്-15 യുദ്ധവിമാനത്തിലെ പൈലറ്റിനെ സാഹസികമായി രക്ഷപ്പെടുത്തിയ വാര്‍ത്തയ്ക്ക് പിന്നാലെ, ശത്രുരാജ്യങ്ങളില്‍ അകപ്പെട്ടുപോകുന്ന സൈനികര്‍ക്ക് യുഎസ് നല്‍കുന്ന അതികഠിനമായ പരിശീലനമുറകള്‍ ചര്‍ച്ചയാകുന്നു. ‘സെറെ’ (SERE) എന്നറിയപ്പെടുന്ന ഈ പ്രത്യേക പരിശീലനം ‘സര്‍വൈവല്‍, ഇവേഷന്‍, റെസിസ്റ്റന്‍സ് ആന്‍ഡ് എസ്‌കേപ്പ്’ (Survival, Evasion, Resistance and Escape) അഥവാ അതിജീവനം, പിടികൊടുക്കാതിരിക്കല്‍, പ്രതിരോധം, രക്ഷപ്പെടല്‍ എന്നിവയുടെ ചുരുക്കപ്പേരാണ്. ‘അന്തസ്സോടെ തിരികെ വരിക’ എന്നതാണ് ഈ പരിശീലനത്തിന്റെ പ്രധാന ലക്ഷ്യമായി എയര്‍ഫോഴ്‌സ് പറയുന്നത്.

വാഷിംഗ്ടണ്‍ ആസ്ഥാനമായുള്ള മിഷേല്‍ ഇന്‍സ്റ്റിറ്റ്യൂട്ട് ഡീന്‍ ഡേവിഡ് എ. ഡെപ്റ്റുലയുടെ അഭിപ്രായത്തില്‍, യുദ്ധവിമാനങ്ങള്‍ തകര്‍ന്ന് പെട്ടെന്നൊരു നിമിഷം ശത്രുപാളയത്തില്‍ ഒറ്റപ്പെട്ടുപോകുന്ന പൈലറ്റുമാര്‍ക്ക് ജീവന്‍ നിലനിര്‍ത്താനും ശത്രുക്കളുടെ പിടിയിലാകാതെ രക്ഷപ്പെടാനും ഈ പരിശീലനം അത്യന്താപേക്ഷിതമാണ്. ഇക്കഴിഞ്ഞ ദിവസം ഇറാനില്‍ നിന്ന് രക്ഷപ്പെടുത്തിയ ഉദ്യോഗസ്ഥന്‍ ഗുരുതരമായി പരിക്കേറ്റിട്ടും 36 മണിക്കൂറോളം ശത്രുക്കളുടെ കണ്ണുവെട്ടിച്ച് മലനിരകളില്‍ കഴിഞ്ഞത് ഇത്തരത്തിലുള്ള പരിശീലനത്തിന്റെ കരുത്തിലാണ്. അദ്ദേഹം പിടിയിലായിരുന്നെങ്കില്‍ അത് ഇറാന് വലിയൊരു രാഷ്ട്രീയ വിജയവും യുഎസിനെതിരെയുള്ള പ്രചാരണായുധവുമായി മാറുമായിരുന്നു.

‘സെറെ’ പരിശീലനത്തിന്റെ നാല് പ്രധാന ഘട്ടങ്ങള്‍ താഴെ പറയുന്നവയാണ്:

അതിജീവനം (Survive)

വിമാനം തകരുമ്പോള്‍ പാരച്യൂട്ടില്‍ രക്ഷപ്പെട്ടിറങ്ങുന്ന പൈലറ്റ് ശാരീരികമായും മാനസികമായും വലിയ വെല്ലുവിളികളാണ് നേരിടുന്നത്. ‘സര്‍വൈവല്‍’ (SURVIVAL) എന്ന വാക്കിന്റെ ഓരോ അക്ഷരത്തിലും അടങ്ങിയിരിക്കുന്ന നിര്‍ദ്ദേശങ്ങള്‍ പൈലറ്റുമാര്‍ പഠിച്ചിരിക്കണം. മുറിവുകള്‍ ചികിത്സിക്കുക, ഒളിത്താവളം കണ്ടെത്തുക, കഠിനമായ സാഹചര്യങ്ങളെ സധൈര്യം നേരിടുക എന്നിവ ഇതില്‍ ഉള്‍പ്പെടുന്നു. മരുഭൂമികള്‍ മുതല്‍ അതിശൈത്യമുള്ള ആര്‍ട്ടിക് മേഖലകളില്‍ വരെ എങ്ങനെ ജീവന്‍ നിലനിര്‍ത്താമെന്നും പുഴകളില്‍ നിന്ന് വെള്ളം ശേഖരിക്കാനും കാക്റ്റസും വണ്ടുകളും ഭക്ഷണമാക്കാനും വരെ ഇവര്‍ക്ക് പരിശീലനം നല്‍കുന്നു.

പിടികൊടുക്കാതിരിക്കല്‍ (Evade)

ശത്രുക്കളുടെ പിടിയിലാകാതിരിക്കുക എന്നതാണ് ഇതിന്റെ ലക്ഷ്യം. ഓരോ ദൗത്യത്തിന് മുന്‍പും വിമാനം തകര്‍ന്നാല്‍ രക്ഷപ്പെടേണ്ട കൃത്യമായ പ്ലാനുകള്‍ പൈലറ്റും ബേസ് ക്യാമ്പും തമ്മില്‍ ധാരണയിലെത്തിയിട്ടുണ്ടാകും. 1995-ല്‍ ബോസ്‌നിയന്‍ യുദ്ധകാലത്ത് വിമാനം തകര്‍ന്ന് വീണ ക്യാപ്റ്റന്‍ സ്‌കോട്ട് ഒഗ്രാഡി ആറ് ദിവസമാണ് ശത്രുമേഖലയില്‍ ഒളിച്ചു കഴിഞ്ഞത്. രാത്രികാലങ്ങളില്‍ മാത്രം സഞ്ചരിച്ചും ഉറുമ്പുകളെ ഭക്ഷണമാക്കിയും അദ്ദേഹം റേഡിയോ സന്ദേശങ്ങളിലൂടെ സഹായം തേടി.

പ്രതിരോധം (Resist)

ശത്രുക്കള്‍ക്ക് മുന്‍പില്‍ അകപ്പെട്ടാല്‍ എങ്ങനെ പ്രതിരോധിക്കണം എന്നതിനെക്കുറിച്ച് രഹസ്യമായ പരിശീലനങ്ങളാണ് നല്‍കുന്നത്. ജനീവ കണ്‍വെന്‍ഷന്‍ നിയമങ്ങള്‍ പാലിച്ച് യുദ്ധമുറകള്‍ പ്രയോഗിക്കാനും പൈലറ്റുമാര്‍ക്ക് അറിവുണ്ടാകും. കൊറിയന്‍ യുദ്ധകാലത്ത് തടവിലാക്കപ്പെട്ട അമേരിക്കന്‍ സൈനികര്‍ നേരിട്ട ദുരനുഭവങ്ങളില്‍ നിന്നാണ് ഈ പരിശീലന പദ്ധതി രൂപപ്പെട്ടത്. ശത്രുക്കള്‍ക്ക് മുന്‍പില്‍ കീഴടങ്ങാതെ തന്റെ പേര്, റാങ്ക്, ജനനത്തീയതി, സര്‍വീസ് നമ്പര്‍ എന്നിവയല്ലാതെ മറ്റ് വിവരങ്ങളൊന്നും കൈമാറാന്‍ പാടില്ലെന്ന കര്‍ശന നിയമം ഇവര്‍ക്കുണ്ട്.

രക്ഷപ്പെടല്‍ (Escape)

ഒടുവില്‍ സുരക്ഷിതമായി സ്വന്തം രാജ്യത്തേക്ക് മടങ്ങുക എന്നതാണ് ഇതിന്റെ അന്തിമ ലക്ഷ്യം. വാഷിംഗ്ടണിലെ ഫെയര്‍ചൈല്‍ഡ് എയര്‍ഫോഴ്‌സ് ബേസ് ആസ്ഥാനമായാണ് ഈ പരിശീലനം നടക്കുന്നത്. ശത്രുക്കളുടെ കണ്ണുവെട്ടിച്ച് സിഗ്‌നല്‍ ഫ്‌ലെയറുകളും റേഡിയോ സംവിധാനങ്ങളും ഉപയോഗിച്ച് രക്ഷാസേനയെ വിവരം അറിയിക്കുന്നതിലും ഇവര്‍ വിദഗ്ധരാണ്. ഇത്തരത്തില്‍ ആധുനിക സാങ്കേതികവിദ്യയുടെയും കഠിനമായ ആത്മധൈര്യത്തിന്റെയും ബലത്തിലാണ് ഓരോ വ്യോമസേന ഉദ്യോഗസ്ഥനും ശത്രുരാജ്യങ്ങളില്‍ നിന്ന് മരണത്തെ തോല്‍പ്പിച്ച് തിരികെ വരുന്നത്.

Content Summary: What is SERE , How do U.S. elite forces without getting caught by the enemy during special missions? US-Iran War