മെക്സിക്കൻ സെനറ്റിൽ വിദേശ സൈനിക സാന്നിധ്യത്തെക്കുറിച്ചുള്ള ചൂടേറിയ ചർച്ചയെത്തുടർന്ന് ഭരണ-പ്രതിപക്ഷ പാർട്ടികളിലെ മുതിർന്ന നേതാക്കൾ തമ്മിൽ കയ്യാങ്കളി. ഭരണകക്ഷിയായ മോറേനാ പാർട്ടിയുടെ സെനറ്റ് പ്രസിഡന്റ് ജെറാർഡോ ഫെർണാണ്ടസ് നോറോണയും പ്രതിപക്ഷമായ ഇൻസ്റ്റിറ്റ്യൂഷണൽ റെവല്യൂഷണറി പാർട്ടിയുടെ (Pri) നേതാവ് അലജാൻഡ്രോ “അലിറ്റോ” മൊറേനോയും തമ്മിലാണ് ഏറ്റുമുട്ടിയത്.
ബുധനാഴ്ചത്തെ സെഷൻ അവസാനിക്കുമ്പോൾ ദേശീയഗാനം ആലപിച്ച ശേഷമാണ് സംഭവം. “എന്നെ സംസാരിക്കാൻ അനുവദിക്കൂ” എന്ന് മൊറേനോ ആവർത്തിച്ച് ആവശ്യപ്പെടുന്നതും, “എന്നെ തൊടരുത്” എന്ന് നോറോണ മറുപടി പറയുന്നതും തത്സമയ വീഡിയോയിൽ കാണാം. തുടർന്ന് മൊറേനോ നോറോണയുടെ കഴുത്തിൽ അടിക്കുകയും, തടയാൻ ശ്രമിച്ച നോറോണയുടെ സഹായിയെ തള്ളി താഴെയിടുകയും ചെയ്തു. മറ്റൊരു രാഷ്ട്രീയക്കാരനും കയ്യാങ്കളിയിൽ ഇടപെടുന്ന ദൃശ്യങ്ങൾ പുറത്തുവന്നിട്ടുണ്ട്.
സംഭവത്തിന് ശേഷം നടന്ന പത്രസമ്മേളനത്തിൽ നോറോണ മൊറേനോയ്ക്കെതിരെ ഗുരുതരമായ ആരോപണങ്ങൾ ഉന്നയിച്ചു. മൊറേനോ തന്നെ പ്രകോപിപ്പിക്കുകയും ശാരീരികമായി ഉപദ്രവിക്കുകയും ചെയ്തെന്ന് അദ്ദേഹം ആരോപിച്ചു. “അദ്ദേഹം എന്റെ കൈകളിൽ അടിക്കുകയും ‘ഞാൻ നിന്നെ കൊല്ലും’ എന്ന് ഭീഷണിപ്പെടുത്തുകയും ചെയ്തു,” നോറോണ പറഞ്ഞു.
എന്നാൽ, നോറോണയാണ് പ്രകോപനത്തിന് കാരണക്കാരനെന്ന് മൊറേനോ സമൂഹ മാധ്യമങ്ങളിൽ പ്രതികരിച്ചു. “നോറോണ പരിധി വിട്ടപ്പോൾ, അദ്ദേഹം എന്താണ് ചെയ്യുന്നതെന്ന് അദ്ദേഹത്തിന് നന്നായി അറിയാമായിരുന്നു. മെക്സിക്കോയെ സംരക്ഷിക്കാൻ ഞാൻ എപ്പോഴും ഭയമില്ലാതെ പ്രതികരിക്കും,” മൊറേനോ കുറിച്ചു.
യുഎസ് സൈനിക ഇടപെടലിന് പ്രതിപക്ഷം ആഹ്വാനം ചെയ്തെന്ന ഭരണകക്ഷിയുടെ ആരോപണമാണ് തർക്കത്തിന് വഴിതെളിയിച്ചത്. ഈ ആരോപണം പ്രതിപക്ഷം നിഷേധിച്ചു. എന്നാൽ, ഈ ആഴ്ച ആദ്യം Pan പാർട്ടിയിലെ ഒരു സെനറ്റർ ഫോക്സ് ന്യൂസിനോട് മെക്സിക്കോയിലെ മയക്കുമരുന്ന് കാർട്ടലുകൾക്കെതിരെ പോരാടാൻ യുഎസിന്റെ സഹായം സ്വാഗതാർഹമാണെന്ന് പറഞ്ഞിരുന്നു.
സംഭവത്തെ തുടർന്ന് അടിയന്തര സെഷൻ വിളിക്കുമെന്ന് സെനറ്റ് നേതാവ് അറിയിച്ചു. മൊറേനോയെയും മറ്റ് മൂന്ന് Pri രാഷ്ട്രീയക്കാരെയും പുറത്താക്കാൻ ശുപാർശ ചെയ്യുമെന്നും നോറോണ വ്യക്തമാക്കി. മൊറേനോയ്ക്കെതിരെ ക്രിമിനൽ കേസ് ഫയൽ ചെയ്തതായും അദ്ദേഹം എക്സിലൂടെ അറിയിച്ചു.
content summary: Brawl erupts in Mexico’s senate after debate over US military intervention to fight drug cartels
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
