ജ്യോതി ആന്റിയാണ് ലോഹി സാറിനെയും സിദ്ദിഖ് സാറിനെയും പരിചയപ്പെടുത്തുന്നത്.
ഓണം റിലീസായ ബ്രദേഴ്സ് ഡേയില്‍ പ്രധാന കഥാ പാത്രത്തെ അവതരിപ്പിച്ച് മലയാള സിനിമയിൽ കൂടി ചുവടുറപ്പിക്കുകയാണ് തെന്നിന്ത്യൻ താരം പ്രസന്ന. അഭിനയ മികവ് കൊണ്ട് കേരളത്തിന്റെ ശ്രദ്ധ പിടിച്ച് പറ്റുമ്പോള്‍ മലയാളത്തോടും മലയാള സിനികളോടുമുള്ള തന്റെ സ്നേഹത്തിനും അടുപ്പത്തിനുമുള്ള കാരണം വെളിപ്പെടുത്തുകയാണ് താരം. വനിത ഓൺലൈനിന് നൽകിയ അഭിമുഖത്തിലാണ് പ്രസന്ന തന്റെ താൽപര്യങ്ങള്‍ പറയുന്നത്.
മലയാളത്തിൽ അഭിനയിക്കാൻ വേണ്ടി കരിയറിന്റെ തുടക്കത്തിൽ തന്നെ ഭാഷാപുസ്തകം വാങ്ങി മലയാളം പഠിക്കുകയായിരുന്നു താനെന്നാണ് പ്രസന്ന പറയുന്നത്. കുട്ടിക്കാലം തൊട്ടേ മലയാള സിനിമയാണ് കൂടുതൽ കണ്ടിരുന്നത്. ബന്ധങ്ങളുടെ ആഴം മലയാള സിനിമയിൽ മനോഹരമായാണ് ചിത്രീകരിക്കുക. അതു നിങ്ങളുടെ സംസ്കാരത്തിന്റെ പ്രത്യേകതയാകാം പ്രസന്ന പറയുന്നു.
അങ്ങനെയാണ് മലയാളം പഠിക്കാനുള്ള ആഗ്രഹം വളരുന്നത്. ‘30 ദിവസം കൊണ്ട് മലയാളം പഠിക്കാം’ എന്ന ബുക്കാണ് തന്നെ സഹായിച്ചത്. അത് വാങ്ങിത്തന്നത് നാട്ടിൽ അയൽവാസികളായിരുന്ന ജ്യോതി ആന്റിയാണ്. അവരുടെ മകൾ ചൈതന്യ മുപ്പതോളം സിനിമകളിൽ ചൈൽഡ് ആർട്ടിസ്റ്റായിരുന്നു. അങ്ങനെ ഒരു സിനിമാ ബന്ധം കുടി ഉണ്ടായി. ജ്യോതി ആന്റിയാണ് ലോഹി സാറിനെയും സിദ്ദിഖ് സാറിനെയും പരിചയപ്പെടുത്തുന്നത്. എല്ലാവരും എന്നോട് മലയാളം പഠിക്കണമെന്ന് ആവശ്യപ്പെട്ടു. പക്ഷേ, പിന്നീട് തമിഴിൽ തിരക്കായി.”- പ്രസന്ന പറയുന്നു.
എന്നാൽ, ആദ്യ സിനിമയിൽ അഭിനയിക്കും വരെ വീട്ടിൽ നിന്ന് തങ്ങളെല്ലാവരും കൂടി ഒരു സിനിമയ്ക്കു പോലും പോയിട്ടില്ലെന്നും പ്രസന്ന പറയുന്നു. “കുട്ടിക്കാലം തൊട്ടേ സിനിമാമോഹമുണ്ടായിരുന്നു. എന്നാൽ ഭെല്ലിൽ ജീവനക്കാരനായിരുന്ന അച്ഛൻ വലിയ സ്ട്രിക്ടായിരുന്നു. മകനെ എൻജിനീയറാകണമെന്നായിരുന്നു അച്ഛന്റെ ആഗ്രഹം. എനിക്ക് സ്വപ്നം സിനിമയും” പ്രസന്ന പറയുന്നു.
എന്നാല്‍, ഭർത്താവിന്റെ മലയാളം സംസാരിക്കുന്നതിനെ കുറിച്ച് ഭാര്യുയും നടിയുമായ സ്നേഹ പങ്കുവയ്ക്കുന്നത് മറ്റൊരു നിരീക്ഷണമാണ്. പ്രസന്നയ്ക്ക് തീർച്ചയായും ഒരു മലയാളി കാമുകി ഉണ്ടായിട്ടുണ്ടാകണമെന്നാണ് സ്നേഹയുടെ അഭിപ്രായം. അതുപോലെയാണ് മലയാളം സംസാരിക്കുന്നത്. എന്നാൽ ഇക്കാര്യം പ്രസന്ന സമ്മതിക്കില്ല. താനും ഇപ്പൊള്‍ എല്ലാവരോടും അങ്ങനെ തന്നെയാണ് പറയുകയെന്നും സ്നേഹ പറയുന്നു.
