ഓപ്പറേഷൻ സിന്ദൂറിന് ശേഷം ഏകദേശം 2000ത്തിലധികം അനധികൃത കുടിയേറ്റക്കാരായ ബംഗ്ലാദേശികളെ അതിർത്തിയിൽ നിന്നും തിരിച്ചയച്ചുവെന്ന് ഇന്ത്യൻ അധികാരികൾ അറിയിച്ചതായി ഇന്ത്യൻ എക്സ്പ്രസ് റിപ്പോർട്ട് ചെയ്തു. കുടിയേറ്റക്കാരുടെ ഐഡന്റിറ്റി പരിശോധിച്ച ശേഷമാണ് അതിർത്തിയിൽ നിന്നും മടക്കി അയച്ചതെന്നാണ് റിപ്പോർട്ടിൽ പറയുന്നത്.
ത്രിപുര, മേഘാലയ, അസം എന്നിവിടങ്ങളിലെ ബംഗ്ലാദേശ് അതിർത്തിയിലാണ് സർക്കാർ നടപടി കേന്ദ്രീകരിച്ചിരിക്കുന്നതെന്ന് വൃത്തങ്ങൾ അറിയിച്ചു. നടപടി ആരംഭിച്ച ആദ്യ സംസ്ഥാനങ്ങളിലൊന്ന് ഗുജറാത്താണ്. കാരണം ഏറ്റവും കൂടുതൽ കുടിയേറ്റക്കാരെ പിടികൂടിയത് ഗുജറാത്തിലാണ്. ഡൽഹിയിൽ നിന്നും ഹരിയാനയിൽ നിന്നും ധാരാളം കുടിയേറ്റക്കാരെ തിരിച്ചയച്ചിട്ടുണ്ട്. മറ്റുള്ളവരെ അസം, മഹാരാഷ്ട്ര, രാജസ്ഥാൻ എന്നിവിടങ്ങളിൽ നിന്ന് പിടികൂടിയിട്ടുണ്ടെന്നും വൃത്തങ്ങൾ കൂട്ടിച്ചേർത്തു.
കുടിയേറ്റക്കാർക്കെതിരെയുള്ള നടപടികൾ പുരോഗമിക്കുകയാണെന്നും സർക്കാർ വൃത്തങ്ങൾ അറിയിച്ചു. ഏപ്രിൽ പഹൽഗാം ആക്രമണത്തിന് തൊട്ടുപിന്നാലെയാണ് പ്രവർത്തനം ആരംഭിച്ചത്. മെയ് 7 ന് ഓപ്പറേഷൻ സിന്ദൂർ ആരംഭിച്ചതിനുശേഷം ഇത് കൂടുതൽ ശക്തമാക്കിയിട്ടുണ്ട് . എല്ലാ സംസ്ഥാനങ്ങളോടും രേഖകൾ പരിശോധിച്ച് സംശയിക്കപ്പെടുന്ന അനധികൃത കുടിയേറ്റക്കാരെ പിടികൂടാൻ ആവശ്യപ്പെട്ടിട്ടുണ്ട്.
കൂടുതൽ സംസ്ഥാനങ്ങളെ കൂടി പരിശോധനയിൽ ഉൾപ്പെടുത്തിയിട്ടുള്ളതായാണ് ലഭിക്കുന്ന വിവരം. വിഷയത്തിൽ ആഭ്യന്തര മന്ത്രാലയം വ്യക്തമായ നിർദ്ദേശങ്ങൾ നൽകിയിട്ടുണ്ടെന്നും സംസ്ഥാനങ്ങൾ സഹകരിക്കുന്നുണ്ടെന്നും ഒരു മുതിർന്ന സർക്കാർ ഉദ്യോഗസ്ഥൻ പറഞ്ഞതായി റിപ്പോർട്ടിൽ പറയുന്നു.
പിടികൂടുന്ന കുടിയേറ്റക്കാരെ ഇന്ത്യൻ വ്യോമസേനയുടെ (IAF) വിമാനങ്ങളിൽ അതിർത്തി പ്രദേശങ്ങളിലേക്ക് കൊണ്ടുപോകുന്നു, അവിടെ അവരെ അതിർത്തി സുരക്ഷാ സേനയ്ക്ക് (BSF) കൈമാറുകയും താൽക്കാലിക ക്യാമ്പുകളിൽ പാർപ്പിക്കുകയും ചെയ്യുന്നു. കുടിയേറ്റക്കാർക്ക്ആവശ്യമെങ്കിൽ ഭക്ഷണവും ബംഗ്ലാദേശി കറൻസിയും നൽകാൻ നിർദേശിച്ചിട്ടുണ്ട്.
രാഷ്ട്രീയ കാരണങ്ങളാലല്ല ത്രിപുര, മേഘാലയ, അസം എന്നീ അതിർത്തി സംസ്ഥാനങ്ങൾ തിരഞ്ഞെടുത്തതെന്നും നാടുകടത്തൽ എളുപ്പത്തിലാക്കാനാണെന്നും ഒരു സുരക്ഷാ ഉദ്യോഗസ്ഥൻ വ്യക്തമാക്കി. ഗ്രാമങ്ങളിലൂടെയും വീടുകളിലൂടെയും കടന്നുപോകുന്ന അതിർത്തിയായതിനാലും ഇരുവശത്തുമുള്ള കുടുംബബന്ധങ്ങൾ കാരണവും പശ്ചിമ ബംഗാളിൽ നിന്നുള്ള ആളുകളെ പിന്നോട്ട് തള്ളുന്നത് ബുദ്ധിമുട്ടാണ്. ഇത് ക്രമസമാധാന പ്രശ്നങ്ങൾക്ക് കാരണമാകും.
മാധ്യമങ്ങളിൽ വ്യാപകമായ വാർത്തകൾ വന്നതിനെത്തുടർന്ന് അറസ്റ്റ് ഭയന്ന് ഏകദേശം 2,000 കുടിയേറ്റക്കാർ സ്വമേധയാ ബംഗ്ലാദേശിലേക്ക് മടങ്ങിയതായി മറ്റൊരു ഉദ്യോഗസ്ഥൻ പറഞ്ഞു .
ബോർഡർ ഗാർഡ്സ് ബംഗ്ലാദേശ് (BGB) സഹകരിച്ചുകൊണ്ടാണ് തുടക്കത്തിൽ പ്രവർത്തനം നടന്നത്. മിക്ക കുടിയേറ്റക്കാരും നടപടിയോട് സഹകരിച്ചുവെന്ന് റിപ്പോർട്ടിൽ പറയുന്നു.
പലരും ദരിദ്രരായ തൊഴിലാളികളാണ്. തടങ്കലിലോ ജയിലിലോ പോകുന്നതിനുപകരം കുടുംബങ്ങളിലേക്ക് മടങ്ങാൻ ആണ് അവർ ആഗ്രഹിക്കുന്നതെന്ന് റിപ്പോർട്ട് വ്യക്തമാക്കുന്നു. അതിർത്തിയിൽ നിന്ന് തങ്ങളെ കൂട്ടിക്കൊണ്ടുപോകാൻ അവർ ബംഗ്ലാദേശിലെ തങ്ങളുടെ കുടുംബങ്ങളെ പോലും ബന്ധപ്പെടുന്നു.
അതേസമയം, നാടുകടത്തപ്പെടുന്നവരുടെ എണ്ണം ഉയർന്നാൽ ബംഗ്ലാദേശുമായി സംഘർഷമുണ്ടാകാൻ സാധ്യതയുണ്ടെന്ന് ഉദ്യോഗസ്ഥർ പ്രതീക്ഷിക്കുന്നതായി റിപ്പോർട്ടിൽ പറയുന്നു. മുൻകാല ഗവൺമെന്റുകളുടെ കാലങ്ങളിൽ സമാനമായ ശ്രമങ്ങൾ പലപ്പോഴും സംഘർഷങ്ങളിൽ അവസാനിച്ചിട്ടുണ്ട്. നാടുകടത്തപ്പെട്ട എല്ലാ വ്യക്തികളുടെയും ബയോമെട്രിക് ഡാറ്റ ശേഖരിച്ച് ദേശീയ ഇമിഗ്രേഷൻ ഡാറ്റാബേസുമായി ബന്ധിപ്പിക്കുന്നതിലാണ് സർക്കാർ ഇപ്പോൾ പ്രവർത്തിക്കുന്നു.
Content Summary: India pushed back 2000 Bangladesh immigrants
