അമേരിക്കയുടെ നാവിക ഉപരോധത്തെച്ചൊല്ലിയുള്ള തര്ക്കം തുടരുന്നതിനിടയില്, ഹോര്മുസ് കടലിടുക്കിന്റെ നിയന്ത്രണം ‘പഴയ സ്ഥിതിയിലേക്ക്’ മാറ്റി ഇറാന്. ഇറാനിയന് തുറമുഖങ്ങള് ലക്ഷ്യമാക്കി അമേരിക്ക തുടരുന്ന ഉപരോധത്തിന് മറുപടിയായാണ് ഈ നീക്കം.
ഇറാനിയന് മാധ്യമങ്ങള് പുറത്തുവിട്ട പ്രസ്താവനയില്, ഇറാന് സൈന്യത്തിന്റെ ഓപ്പറേഷന് കമാന്ഡായ ‘ഖാതം അല്-അന്ബിയ’ യുഎസ് ഉപരോധത്തെ ‘കടല്ക്കൊള്ള’ എന്നാണ് വിശേഷിപ്പിച്ചത്. ‘അമേരിക്കയുടെ ഈ നടപടി കാരണം ഹോര്മുസ് കടലിടുക്കിന്റെ നിയന്ത്രണം പഴയ സ്ഥിതിയിലേക്ക് മടങ്ങിയിരിക്കുന്നു. ഈ തന്ത്രപ്രധാനമായ ജലപാത ഇപ്പോള് ഇറാനിയന് സായുധ സേനയുടെ കര്ശനമായ മേല്നോട്ടത്തിലും നിയന്ത്രണത്തിലുമാണ്,’ എന്ന് സൈനിക വക്താക്കള് അറിയിച്ചു. ഇറാനില് നിന്നുള്ളതോ ഇറാനിലേക്കുള്ളതോ ആയ കപ്പലുകളുടെ സഞ്ചാരസ്വാതന്ത്ര്യം അമേരിക്ക പൂര്ണ്ണമായും പുനഃസ്ഥാപിക്കുന്നത് വരെ ഹോര്മുസ് കടലിടുക്കിലെ ഈ കര്ശന നിയന്ത്രണം തുടരുമെന്നും ഇറാന് വ്യക്തമാക്കി.
യുദ്ധത്തിന് മുമ്പ് ആഗോള എണ്ണ വിതരണത്തിന്റെ അഞ്ചിലൊന്ന് കൈകാര്യം ചെയ്തിരുന്ന ഈ സുപ്രധാന ജലപാതയുടെ നിലവിലെ അവസ്ഥയെക്കുറിച്ച് പുതിയ പ്രഖ്യാപനം വലിയ ആശയക്കുഴപ്പമാണ് സൃഷ്ടിച്ചിരിക്കുന്നത്. ഹോര്മുസ് കടലിടുക്ക് കപ്പല് ഗതാഗതത്തിനായി തുറന്നുകൊടുത്തതായി ഇറാനും ഡൊണാള്ഡ് ട്രംപും കഴിഞ്ഞ ദിവസം പ്രഖ്യാപിച്ചിരുന്നു. എന്നാല് ഇറാന്റെ ആണവപദ്ധതി ഉള്പ്പെടെയുള്ള വിഷയങ്ങളില് വാഷിംഗ്ടണുമായി ഒരു കരാറിലെത്തുന്നത് വരെ ഇറാനിയന് തുറമുഖങ്ങള്ക്കുമേലുള്ള നാവിക ഉപരോധം പൂര്ണ്ണശക്തിയോടെ തുടരുമെന്ന് ട്രംപ് വ്യക്തമാക്കിയതാണ് ഇറാനെ പ്രകോപിപ്പിച്ചത്.
വെള്ളിയാഴ്ച എയര്ഫോഴ്സ് വണ്ണില് വെച്ച് മാധ്യമപ്രവര്ത്തകരോട് സംസാരിക്കവേ, ഇറാന് വിഷയത്തില് ‘ചില നല്ല വാര്ത്തകള്’ വരാനുണ്ടെന്ന് ട്രംപ് സൂചിപ്പിച്ചിരുന്നു. ‘നിങ്ങള് അതിനെക്കുറിച്ച് ഉടന് കേള്ക്കും. അത് സംഭവിക്കേണ്ട ഒന്നാണെന്നും യുക്തിപരമാണെന്നും ഞാന് വിശ്വസിക്കുന്നു. എന്താണ് സംഭവിക്കുന്നതെന്ന് നമുക്ക് നോക്കാം,’ എന്നായിരുന്നു ട്രംപിന്റെ വാക്കുകള്. അതേസമയം, ഇറാനുമായുള്ള ഇടപാടുകള് 100 ശതമാനം പൂര്ത്തിയാകുന്നത് വരെ ഉപരോധം തുടരുമെന്നും, ദീര്ഘകാല കരാറില് ഉടന് ഒപ്പുവെച്ചില്ലെങ്കില് നിലവിലെ വെടിനിര്ത്തല് തുടരാനാവില്ലെന്നും അദ്ദേഹം മുന്നറിയിപ്പ് നല്കി.
Content Summary: Iran closed the strait of Hormuz again due to US blockade. the strait had ‘reverted to its previous state, tehran said
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
