ചരിത്രത്തെ എത്രകണ്ട് ഇല്ലാതാക്കാന് ശ്രമിക്കുന്നു അത്രകണ്ട് ചരിത്രം ശക്തമായി ജനങ്ങളിലേക്ക് തിരിച്ചെത്തും. അതാണ് നെഹ്റു യുവ കേന്ദ്രത്തിന്റെ പുനര്നാമം ചെയ്യാനുള്ള കേന്ദ്ര സര്ക്കാര് തീരുമാനത്തെ കുറിച്ച് ഓര്മിപ്പിക്കാനുള്ളത്. ഇന്ത്യയെ കെട്ടിപ്പടുത്തുന്നതിലും യുവശക്തിയെ വാര്ത്തെടുക്കുന്നതിലും ദേശീയ നേതൃത്വം നല്കിയ ജവഹര് ലാല് നെഹ്റുവിന്റെ ഓര്മ ഇല്ലാതാക്കാന് ബി ജെ പി സര്ക്കാര് എത്ര ശ്രമിച്ചാലും അതൊന്നും ചരിത്ര വിസ്മൃതിയാവില്ല.
അഞ്ചു പതിറ്റാണ്ടിലേറെയായി യുവജനശാക്തീകരണത്തിനായി പ്രവര്ത്തിച്ച് വരുന്ന ഒരു സുപ്രധാന സ്ഥാപനമാണ് നെഹ്റു യുവ കേന്ദ്രം (NYK). അതിനെ ‘മേരാ യുവ ഭാരത്’ എന്ന് പുനര്നാമം ചെയ്യാനുള്ള കേന്ദ്ര സര്ക്കാരിന്റെ തീരുമാനം നെഹ്റുവിനോടുള്ള വിരോധം തന്നെയാണ്.
2023-ല് നെഹ്റു സ്മാരക മ്യൂസിയവും ലൈബ്രറിയും (NMML) ‘പ്രധാന്മന്ത്രി സംഗ്രഹാലയ’ എന്ന് പുനര്നാമകരണം ചെയ്തതിന്റെ തുടര്ച്ചയായുള്ള ഈ നീക്കം ഉയര്ത്തുന്ന ചോദ്യം ഏറെ പ്രസക്തമാണ്. കേന്ദ്ര സ്ഥാപനങ്ങളുടെ പേര് മാറ്റുന്നതിലൂടെ നെഹ്റുവിന്റെ പേരും ആ പാരമ്പര്യവും ചരിത്രത്തില് നിന്ന് തേച്ചുമായ്ക്കാനാകുമോ?
1972-ല് യുവജന- കായിക കാര്യ മന്ത്രാലയത്തിന് കീഴിലാണ് നെഹ്റു യുവ കേന്ദ്ര സ്ഥാപിതമായത്. ഇന്ത്യന് യുവാക്കളുടെ ശക്തിയിലും കഴിവിലുമുള്ള നെഹ്റുവിന്റെ ഉറച്ച വിശ്വാസമായിരുന്നു അതിന്റെ പിറവിക്ക് പിന്നിലെ ആധാര ശക്തി. വിദ്യാഭ്യാസം, നേതൃത്വം, സാമൂഹ്യ സേവനം, ദേശീയോദ്ഗ്രഥനം എന്നിവയിലൂന്നിയാണ് നെഹ്രുവിയന് ദര്ശനം. സ്വാശ്രയപരമായ കഴിവുകള് വികസിപ്പിക്കുന്നതിനും ജനാധിപത്യപരവും മതേതരവുമായ മൂല്യങ്ങള് വളര്ത്തിയെടുക്കുന്നതിനുമായി രൂപകല്പ്പന ചെയ്ത പരിപാടികളിലൂടെ ദശലക്ഷക്കണക്കിന് ആളുകളെ നെഹ്റു യുവ കേന്ദ്രം ശാക്തീകരിക്കുകയുണ്ടായി.
ഈ പുനര് നാമകരണത്തിന് മുമ്പുണ്ടായ സമാന നടപടിയാണ് 2023-ല് നെഹ്റു സ്മാരക മ്യൂസിയം & ലൈബ്രറിയുടെ പേര് മാറ്റി പ്രധാന്മന്ത്രി സംഗ്രഹാലയ എന്നാക്കി മാറ്റിയത്.
തീന് മൂര്ത്തി ഭവനത്തില് സ്ഥിതി ചെയ്യുന്ന ഈ സ്ഥാപനം സ്വതന്ത്ര ഇന്ത്യയുടെ ആദ്യ പ്രധാനമന്ത്രി ജവാഹര്ലാല് നെഹ്റുവിന്റെ ഔദ്യോഗിക വസതിയായിരുന്നതിനാല് അദ്ദേഹം മരിച്ച ശേഷം 1964-ല് അത് നെഹ്റുവിന്റെ സ്മരണാര്ത്ഥം ഒരു മ്യൂസിയമായി മാറ്റുകയായിരുന്നു.
1964 നവംബര് 14-ന്, നെഹ്റുവിന്റെ 75-ാമത് ജന്മദിനത്തില്, രാഷ്ട്രപതി ഡോ: എസ്. രാധാകൃഷ്ണന് ഈ മ്യൂസിയം രാഷ്ട്രത്തിന് സമര്പ്പിച്ചു. പിന്നീട് 1966-ല്, ചരിത്ര ഗവേഷണത്തിന് വേണ്ടിയുള്ള നെഹ്റു മെമ്മോറിയല് മ്യൂസിയം & ലൈബ്രറി (NMML) രൂപീകരിച്ചു. ആ ചരിത്ര സ്മാരകം വെറുമൊരു വസതി മാത്രമായിരുന്നില്ല. സ്വാതന്ത്ര്യാനന്തര ഭാരതത്തിന്റെ ഭരണ സിരാ കേന്ദ്രവും നിരവധി ഗവേഷണ പ്രവര്ത്തനങ്ങള്ക്ക് ആസ്ഥാനമായി മാറിയ നെഹ്റുവിയന് ആദര്ശങ്ങളുടെ ഒരു കലവറയുമായിരുന്നു ഈ ചരിത്ര സൗധം. അത് കൊണ്ട് തന്നെ രാഷ്ട്രത്തെ രൂപപ്പെടുത്തുന്നതില് നെഹ്റുവിന്റെ നിര്ണായകമായ സംഭാവനയെ ലഘൂകരിക്കാനുള്ള ശ്രമമായിട്ടാണ് ഇതിന്റെ പുനര് നാമകരണത്തെ പലരും കാണുന്നത്.
ചരിത്ര സ്ഥാപനങ്ങളില് നിന്നും പദ്ധതികളില് നിന്നും നെഹ്റുവിന്റെ പേര് നീക്കം ചെയ്യാന് നടക്കുന്ന ശ്രമങ്ങള് ചരിത്രത്തിന്റെ തിരുത്തി എഴുത്ത് മാത്രമായല്ല കാണേണ്ടത്. അത് രാഷ്ട്രീയമായ ആശയ ഭീതിയില് നിന്ന് ഉടലെടുത്തതാണ്. ജനാധിപത്യം, മതേതരത്വം, എല്ലാവരെയും ഉള്കൊള്ളുന്ന സാമൂഹിക സമത്വം, ശാസ്ത്രീയമായ ഉള്കാഴ്ച്ച എന്നിവയെ പ്രതിനിധീകരിക്കുന്നതാണ് നെഹ്റുവിന്റെ പൈതൃകം.
ഇവയുടെ പ്രതിഫലനം തന്നെ വര്ഗീയതയ്ക്കും, ചങ്ങാത്ത മുതലാളിത്തം, സ്വേച്ഛാധിപത്യ ഭരണം എന്നിവയ്ക്ക് എതിരെ ഒരു പാഠമാകുന്നു. ബഹുസ്വരവും സമത്വപരവുമായ ഇന്ത്യയെക്കുറിച്ചുള്ള നെഹ്രുവിയന് ദര്ശനം, ഇടുങ്ങിയതും കൂടുതല് വിഭാഗീയവുമായ ആഖ്യാനങ്ങള്ക്ക് അനുയോജ്യമായ രീതിയില് ചരിത്രത്തെ പുനര്നിര്മ്മിക്കാന് ആഗ്രഹിക്കുന്നവര്ക്ക് ഒരു തടസ്സമാണ് ഹേതുപൂര്വ്വമല്ലാത്ത സിദ്ധാന്തത്തെ യുക്തികൊണ്ടും, സ്വേച്ഛാധിപത്യത്തെ സ്വാതന്ത്ര്യംകൊണ്ടും, വിഭാഗീയതയെ ഐക്യംകൊണ്ടും വെല്ലുവിളിച്ച നേതാവായിരുന്നു ജവാഹര്ലാല് നെഹ്റു. ചരിത്രത്തില് ഇന്നും പ്രഭ പരത്തുന്ന അദ്ദേഹത്തെ ഇല്ലാതാക്കാനുള്ള ശ്രമങ്ങള് നെഹ്റുവിന്റെ കാലിക പ്രസക്തിക്കുള്ള അംഗീകാരമാണ്.
യുവജനങ്ങള്ക്ക് നെഹ്റു ഇന്നും ഒരു മാര്ഗദര്ശിയാണ് യുവതയെ ഇന്ത്യയുടെ നിര്മ്മാണത്തില് പ്രധാന പങ്കാളികളായി നെഹ്റു കണ്ടിരുന്നു. അതുകൊണ്ടാണ് അദ്ദേഹം IIT, IIM, AIIMS പോലുള്ള ആധുനിക വിദ്യാഭ്യാസ സ്ഥാപനങ്ങള് സ്ഥാപിച്ചത്. ഇനി വരാന് പോകുന്ന തലമുറകള്ക്കും നെഹ്റു ഒരു മാര്ഗദര്ശിയായിരിക്കും. വിദ്യാര്ത്ഥികള്ക്കും യുവാക്കള്ക്കും വേണ്ടി അദ്ദേഹം നടത്തിയ പ്രസംഗങ്ങള് പുരോഗമനപരവും നീതിയുക്തവുമായ ഒരു സമൂഹം കെട്ടിപ്പടുക്കുന്നതില് യുവതയുടെ പങ്കിനെ ഊന്നിപ്പറയുന്നതായിരുന്നു. ”ഭാവി യുവതയുടേതാണ്. നമ്മുടെ രാഷ്ട്രനിര്മാണ ചുമതല നിങ്ങളുടെ കൈകളിലായിരിക്കണം” എന്ന അദ്ദേഹത്തിന്റെ പ്രസ്താവന ഇന്ന് പോലും അനേകര്ക്ക് പ്രചോദനമാണ്. ഭിന്നിപ്പിലൂടെയല്ലാതെ കാഴ്ചപ്പാടിലൂടെ പ്രചോദനം നല്കാന് കഴിയുന്ന നേതാക്കളെ തിരയുന്ന ഈ കാലത്ത് പ്രത്യേകിച്ചും.
നെഹ്റുവിന്റെ ഭരണം അടിസ്ഥാനപരമായി പഞ്ച സ്തംഭങ്ങളില് ഊന്നിയായിരുന്നു:
1. ചേരിചേരാ നയം – ശീതയുദ്ധകാലത്തെ തന്ത്രപരമായ സ്വാതന്ത്ര്യം.
2. മതേതരത്വം- എല്ലാ മതങ്ങള്ക്കും തുല്യ ബഹുമാനവും സംരക്ഷണവും.
3. സോഷ്യലിസം – ആസൂത്രിത വികസനത്തിലൂടെ തുല്യമായ വിതരണം.
4. ജനാധിപത്യം- സ്ഥാപനപരമായ ശക്തി, അഭിപ്രായ സ്വാതന്ത്ര്യം, പൗരസ്വാതന്ത്ര്യം.
5. ശക്തമായ, ആധുനിക രാഷ്ട്രം – രാഷ്ട്രനിര്മ്മാണത്തിനുള്ള അടിസ്ഥാനമായി വ്യവസായവല്ക്കരണവും അടിസ്ഥാന സൗകര്യങ്ങളും.
ഇന്ന്, ഈ തൂണുകള് നാള്ക്കു നാള് ഭീഷണി നേരിടുകയാണ്. തന്ത്രപരമായ സ്വയംഭരണം പക്ഷപാതപരമായ സഖ്യങ്ങള്ക്ക് വഴിമാറുന്നു. വര്ഗീയ വാചാടോപങ്ങള് മതേതരത്വത്തെ ദുര്ബലപ്പെടുത്തുന്നു. സാമ്പത്തിക അസമത്വം അനിയന്ത്രിതമായി വളരുന്നു. ഭരണാധിപത്യത്തിന്റെ പേരില് പലപ്പോഴും വിയോജിപ്പുകള് അടിച്ചമര്ത്തപ്പെടുന്നു. ‘ശക്തമായ രാഷ്ട്രം’ ഇപ്പോള് നിരീക്ഷണത്തിലേക്കും അടിച്ചമര്ത്തലിലേക്കും ചായുകയാണ്.
ചരിത്രം എന്നത് തുടച്ചുമാറ്റാന് കഴിയുന്ന ഒരു ബ്ലാക്ക്ബോര്ഡല്ല. കെട്ടിടങ്ങളില് നിന്ന് പേരുകള് നീക്കം ചെയ്യാന് കഴിയും, പക്ഷേ ആശയങ്ങള് അത്ര എളുപ്പത്തില് മായ്ക്കാന് കഴിയില്ല. നെഹ്റുവിന്റെ പൈതൃകം വഹിക്കുന്ന സ്ഥാപനങ്ങളുടെ പേരു മാറ്റാന് കാണിക്കുന്ന ധൃതിയും അദ്ദേഹത്തിന്റെ ആദര്ശങ്ങളുടെ സ്വാധീനത്തെ ഭയപ്പെടുന്നു എന്നതിന്റെ തെളിവാണ്. അത് നെഹ്റുവിയന് ആശയങ്ങളുടെ കാലിക പ്രസക്തിക്കുള്ള അംഗീകാരമാണ്.
ജവഹര്ലാല് നെഹ്റുവിന്റെ പേര് ഫലകങ്ങളില് നിന്നും ലെറ്റര്ഹെഡുകളില് നിന്നും മാഞ്ഞുപോയേക്കാം, പക്ഷേ അദ്ദേഹത്തിന്റെ പൈതൃകം ഇന്ത്യയുടെ ഭരണഘടനയിലും സ്ഥാപനങ്ങളിലും ജനഹൃദയങ്ങളിലും മായാതെ പതിഞ്ഞ് കിടക്കും. ആധുനികവും മതേതരവും ജനാധിപത്യപരവുമായ ഒരു ഇന്ത്യയെക്കുറിച്ചുള്ള അദ്ദേഹത്തിന്റെ ദര്ശനം, എല്ലാവരെയും ഉള്ക്കൊള്ളുന്നതും പുരോഗമനപരവുമായ ഒരു രാഷ്ട്രത്തില് വിശ്വസിക്കുന്നവരെ എക്കാലത്തും പ്രചോദിപ്പിച്ചു കൊണ്ടേയിരിക്കും.
നെഹ്റുവിന്റെ ഇന്ത്യ ഭൂതകാലത്തിന്റെ ഒരു അവശിഷ്ടമല്ല- അത് ഭാവിയിലേക്കുള്ള ഒരു പ്രതീക്ഷയാണ്. ഒരു പുനര്നാമകരണത്തിനും അത് മായ്ക്കാന് കഴിയില്ല. Jawaharlal Nehru’s 61 st death anniversary. BJP government is trying to erase Nehru’s name
Content Summary; Jawaharlal Nehru’s 61 st death anniversary. BJP government is trying to erase Nehru’s name
Support Azhimukham
ജനാധിപത്യത്തിന്റെ നിലനിൽപ്പിന് സ്വതന്ത്ര മാധ്യമങ്ങൾ ആവശ്യമാണ്. സ്വതന്ത്രമായി പ്രവർത്തിക്കുന്ന മാധ്യമ സ്ഥാപനങ്ങൾക്കാകട്ടെ പൊതുജനങ്ങളുടെ പിന്തുണയും അത്യാവശ്യമാണ്. ഭയരഹിതമായ അന്വേഷണാത്മക റിപ്പോർട്ടിങ്ങും ആഴത്തിലുള്ള വിശകലനങ്ങളും 'അഴിമുഖ'ത്തിൽ തുടരുന്നതിന് ദയവായി ഞങ്ങളെ പിന്തുണയ്ക്കുക.
