മ്യാന്മര് അതിര്ത്തിയിലെ വ്യോമാക്രമണങ്ങളെ ഭയന്ന് ഇന്ത്യയില് അഭയം തേടിയ മ്യാൻമർ അഭയാർത്ഥികൾ നാട്ടിലേക്ക് മടങ്ങി. മ്യാൻമർ സൈന്യം നടത്തിയ വ്യോമാക്രമണങ്ങളെ ഭയന്ന് മണിപ്പൂരിലെ തങ്ഖുൽ നാഗാ ആധിപത്യമുള്ള കാംജോങ് ജില്ലയിൽ അഭയം തേടിയിരുന്ന ഏകദേശം 5,000 അഭയാർത്ഥികൾ മ്യാൻമറിലേക്ക് മടങ്ങിയതായി ഇംഫാലിൽ നിന്നുള്ള ഒരു മാധ്യമം റിപ്പോർട്ട് ചെയ്തു. ഇന്തോ-മ്യാന്മര് അതിര്ത്തിയിലെ സ്ഥിതി മെച്ചപ്പെട്ടതോടെ അഭയാർത്ഥികൾക്ക് ഇന്ത്യയിലേക്കുള്ള പ്രവേശനം സർക്കാർ നിർത്തിവെച്ചതായി റിപ്പോർട്ട് പറയുന്നു. ആഭ്യന്തരയുദ്ധം തുടരുന്ന സമയത്ത് മണിപ്പൂരിൽ നിന്നുള്ള മ്യാൻമർ അഭയാർത്ഥികളെ തിരിച്ചയക്കാനുള്ള ഇന്ത്യയുടെ തീരുമാനം വിവിധ ആഗോള മാനുഷിക സംഘടനകളിൽ നിന്ന് വിമർശനത്തിന് ഇടയാക്കിയിട്ടുണ്ട്.
2024 മെയ് മാസത്തിൽ മണിപ്പൂരിൽ നിന്നുള്ള 77 മ്യാൻമർ അഭയാർത്ഥികളെ ഇന്ത്യ നിർബന്ധിതമായി തിരിച്ചയച്ചതിനെ ഇന്റർനാഷണൽ കമ്മീഷൻ ഓഫ് ജൂറിസ്റ്റ്സ് രൂക്ഷമായി വിമർശിച്ചിരുന്നു. മ്യാൻമർ അഭയാർത്ഥികളെ നിർബന്ധിതമായി തിരിച്ചയക്കാനുള്ള പദ്ധതികൾ ഉടനടി നിർത്തണമെന്നും അദ്ദേഹം ആവശ്യപ്പെട്ടിരുന്നു. 2024 ജൂണിൽ, മ്യാൻമറിൽ നിന്നുള്ള 5,400 പേരാണ് മണിപ്പൂരിലെ തങ്ഖുൽ-നാഗ ആധിപത്യമുള്ള അതിർത്തി ജില്ലയായ കാംജോങ്ങിൽ അഭയം തേടി എത്തിയത്. വ്യോമാക്രമണവും ആക്രമങ്ങളും ഭയന്ന് ജനങ്ങൾ ഇന്ത്യയുടെ അതിർത്തി പ്രദേശങ്ങളിലേക്ക് പലായനം ചെയ്തതായി അസം റൈഫിൾസ് ഡയറക്ടർ ജനറൽ പ്രദീപ് ചന്ദ്രൻ നായർ അന്ന് ദി ഹിന്ദുവിനോട് പറഞ്ഞിരുന്നു.
ജനാധിപത്യ അനുകൂല സേനയോട് പോരാടുന്നതിനിടയിൽ, സൈനിക ഭരണകൂടം സ്വന്തം ജനതയെ ബോംബെറിഞ്ഞ് സാധാരണക്കാരുടെ ജീവനും സ്വത്തിനും വൻ നാശനഷ്ടങ്ങൾ വരുത്തിയിരുന്നു. 2023 ഡിസംബറിൽ, ഇന്ത്യയുടെ അതിർത്തിയിലെ വിമത ഗ്രൂപ്പുകൾക്കെതിരെ സൈന്യം നടത്തിയ അടിച്ചമർത്തൽ കാരണം ഏകദേശം 2,000 പേർ കാംജോങ്ങിൽ പ്രവേശിച്ചിരുന്നു. മണിപ്പൂരിലെ നാഗാ ഗ്രാമങ്ങളിലായി ഏകദേശം 7,000 അഭയാർത്ഥികൾ അഭയം പ്രാപിച്ചിട്ടുണ്ടെന്ന് അധികൃതർ കണക്കാക്കുന്നു, ഇതിൽ അഞ്ച് വയസ്സിന് താഴെയുള്ള കുട്ടികൾ ഒഴികെയുള്ള 6,000 പേരുടെ ബയോമെട്രിക്സ് ആഭ്യന്തര മന്ത്രാലയത്തിന്റെ ഉത്തരവനുസരിച്ച് സംസ്ഥാന സർക്കാർ ഇതിനകം ശേഖരിച്ചിട്ടുണ്ട്.
തദ്ദേശീയ ജനങ്ങളിൽ നിന്ന് അവരെ തിരിച്ചറിയാൻ കഴിയുന്ന തരത്തിൽ ഇന്ത്യൻ അധികാരികൾ അഭയാർത്ഥികൾക്ക് തിരിച്ചറിയൽ കാർഡുകൾ നൽകിയിട്ടുണ്ട്. സംഗായ് എക്സ്പ്രസ് റിപ്പോർട്ട് അനുസരിച്ച്, മ്യാൻമറുകൾ ക്യാമ്പുകളിൽ അഭയം പ്രാപിച്ച നാഗാ ഗ്രാമങ്ങളിൽ ചിലത് നാംലി, വാംഗ്ലി, കെ അഷാങ് ഖുല്ലെൻ, ചോറോ, പിലോംഗ്, ഫൈകോക്ക്, ഹുയിമിൻ താന, ഷാങ്കലോക് തുടങ്ങിയവയാണ്. ശേഷിക്കുന്ന അഭയാർത്ഥികൾ പകൽ സമയത്ത് കാർഷിക ജോലികൾക്കും മറ്റ് ജോലികൾക്കുമായി മ്യാൻമറിലെ അവരുടെ ഗ്രാമങ്ങളിലേക്ക് യാത്ര ചെയ്യുകയും വൈകുന്നേരം കാംജോങ്ങിലെ അവരുടെ അഭയകേന്ദ്രത്തിലേക്ക് മടങ്ങുകയും ചെയ്യാറുണ്ടെന്ന് ജൂൺ 28 ന് പ്രസിദ്ധീകരിച്ച വാർത്താ റിപ്പോർട്ടിൽ പറയുന്നു.
അസം റൈഫിൾസ്, മണിപ്പൂർ സർക്കാർ, മറ്റ് ഏജൻസികൾ എന്നിവയുടെ സഹായത്തോടെ, ഐ-കാർഡ് ഇല്ലാത്തവരെ തിരിച്ചറിയാൻ കാംജോംഗ് ജില്ലാ ഭരണകൂടം ശ്രമം നടത്തുന്നുണ്ടെന്നും, മാനുഷിക പരിഗണനയുടെ അടിസ്ഥാനത്തിൽ ഭക്ഷണവും പാത്രങ്ങൾ, ബക്കറ്റുകൾ, ടാർപോളിനുകൾ, ടിൻ ഷീറ്റുകൾ പോലുള്ള അവശ്യവസ്തുക്കളും പ്രാദേശിക ഭരണകൂടം നൽകുന്നുണ്ടെന്നും അതിൽ പറയുന്നു. മ്യാന്മർ പൗരൻമാർ ഇന്ത്യയിലേക്ക് വരുന്നതില് മിസോറാം, മണിപ്പൂര് സര്ക്കാരുകള് ജാഗ്രത പുലര്ത്തണമെന്ന് നേരത്തെ കേന്ദ്ര ആഭ്യന്തര മന്ത്രാലയം നിര്ദേശിച്ചിരുന്നു. അരുണാചല്പ്രദേശ്, നാഗാലാന്ഡ്, മണിപ്പൂര്, മിസോറാം തുടങ്ങിയ സംസ്ഥാനങ്ങളുമായി അതിര്ത്തി പങ്കിടുന്ന രാജ്യമാണ് മ്യാന്മര്. 1643 കിലോമീറ്റര് ദൈര്ഘ്യമാണ് ഇന്ത്യ- മ്യാന്മര് അതിര്ത്തിക്കുള്ളത്. ഇതില് 1472 കിലോമീറ്റര് കൃത്യമായി വേര്തിരിച്ചിട്ടുണ്ട്.
content summary: Myanmarese refugees in Manipur leave India
