മുണ്ടക്കൈയിലേക്കുള്ള ജീവനാഡിയായി മാറിയ ബെയ്‌ലി പാലത്തിന്റെ ചരിത്രം

വയനാട്ടിൽ കനത്ത മഴക്കിടയിലും സൈന്യമുൾപ്പെടെ രക്ഷാപ്രവർത്തനത്തിലാണ്. ഉരുൾ പൊട്ടിയതോടെ മുണ്ടക്കൈയിലേക്ക് കടക്കാനുള്ള പ്രധാന പാലം തകർന്നിരുന്നു. ഇതോടെ രക്ഷാപ്രവർത്തനത്തിന് വേണ്ടി താൽകാലിക പാലം നിർമ്മിക്കുകയാണ് സൈന്യം. ഡിഎസ്സി ക്യാപ്റ്റൻ പുരൻ സിങ് നഥാവതിന്റെ നേതൃത്വത്തിൽ പാലത്തിന്റെ നിർമ്മാണം അവസാന ഘട്ടത്തിലാണ്. Bailey Bridge Aiding Wayanad Rescue

എന്താണ് ബെയ്‌ലി പാലം?

രണ്ടാം ലോകമഹായുദ്ധസമയത്താണ് ആദ്യമായി ബെയ്‌ലി ബ്രിഡ്ജുകൾ എന്നറിയപ്പെടുന്ന താത്കാലിക പാലങ്ങൾ ഉപയോഗിച്ച് തുടങ്ങിയത്. 1940-41 കാലഘട്ടത്തിൽ ബ്രിട്ടീഷുകാരാണ് ബെയ്‌ലി പാലങ്ങൾ വികസിപ്പിച്ചത്. മുൻകൂട്ടി നിർമ്മിക്കപ്പെട്ട പാലത്തിന്റെ ഭാഗങ്ങൾ ആ പ്രദേശത്ത് വച്ച് കൂട്ടിയോജിപ്പിക്കുകയാണ് പതിവ്. ഇവ കൂട്ടിച്ചേർക്കാൻ പ്രത്യേക ഉപകരണങ്ങൾ ആവശ്യമില്ല, ആവശ്യമായ ഭാഗങ്ങൾ എളുപ്പത്തിൽ കൊണ്ടുപോകാനും കഴിയും. പ്രകൃതിദുരന്തങ്ങളുടെ സമയത്തും നിർമ്മാണ പദ്ധതികളിലും താൽക്കാലിക പാതകൾ സൃഷ്ടിക്കാൻ ഈ പാലങ്ങൾ വ്യാപകമായി ഉപയോഗിച്ചു പോരുന്നുണ്ട്. ഉരുക്കും തടിയുമാണ് പാലത്തിൻറെ പ്രധാന ഘടകങ്ങൾ. വലിയ ഭാരമില്ലാത്ത രീതിയിൽ നിർമിക്കുന്ന ഇവ ചുമന്ന് കൊണ്ട് പോകാൻ കഴിയും.

എന്താണ് ചരിത്രം

ബ്രിട്ടീഷ് സിവിൽ സർവീസ് ഉദ്യോഗസ്‌ഥനായിരുന്ന ഡൊണാൾഡ് ബെയ്‌ലിയുടെ ഹോബികളിൽ ഒന്നായിരുന്നു പാലങ്ങളുടെ നിർമ്മാണം. 1936-ൽ അദ്ദേഹം പാലത്തിന്റെ ആശയം മുന്നോട്ടുവച്ചു. എന്നാൽ അക്കാലത്ത് അതൊരു പ്രായോഗിക പദ്ധതിയായി പരിഗണിക്കപ്പെട്ടില്ല. രണ്ടാം ലോകമഹായുദ്ധസമയത്ത്, 1940-ൽ, ഒരു കവറിന് പിന്നിൽ അദ്ദേഹം തൻ്റെ പാലത്തിന്റെ ആശയം വരച്ചു. 1941 ഫെബ്രുവരി 14-ന്, മെയ് 1-നകം ഒരു പൂർണ്ണ വലിപ്പമുള്ള പാലം നിർമ്മിക്കാൻ സർക്കാർ അദ്ദേഹത്തോട് ആവശ്യപ്പെട്ടു. റാൽഫ് ഫ്രീമാൻ്റെ സഹായത്തോടെ ബെയ്‌ലി പാലം നിർമ്മിച്ചു. 1940 ഡിസംബറിൽ ആരംഭിച്ച് ഡോർസെറ്റിൽ അവർ പാലം പരീക്ഷിച്ചു. പിന്നീട് 1941-ൽ അവർ ഒരു നദിക്ക് കുറുകെ പാലം സ്ഥാപിക്കുകയും അത് ശക്തമാണെന്ന് ഉറപ്പാക്കാൻ
കനമുള്ള  ടാങ്കുകൾ കയറ്റുകയും ചെയ്തു. ആവോൺ നദിക്കും സ്റ്റൗർ നദിക്കും അടുത്തുള്ള ചതുപ്പു പ്രദേശത്തെ (സ്റ്റാൻപിറ്റ് ചതുപ്പുകൾ) കുറുകെ മുറിക്കുന്ന മതർ സില്ലേഴ്സ് ചാനലിന് മുകളിലൂടെയാണ് ആദ്യമായി ഈ പാലം നിർമ്മിച്ചത്.അത് ഇന്നും നിലനിൽക്കുന്നുണ്ട്.

ആയിരക്കണക്കിന് തൊഴിലാളികളും ലിറ്റിൽവുഡ്സ് ഉൾപ്പെടെ 650-ലധികം കമ്പനികളും ഉൾപ്പെട്ടതോടെ 1941 ജൂലൈയിൽ പാലത്തിൻ്റെ പൂർണ്ണ നിർമ്മാണം ആരംഭിച്ചു. 1941 ഡിസംബറോടെ, ആദ്യത്തെ ബെയ്‌ലി പാലങ്ങൾ സൈന്യം ഉപയോഗിച്ചു. അവോൺ, സ്റ്റൂർ നദികൾക്ക് സമീപം പാലം പരീക്ഷിച്ചു, പിന്നീട് 1942-ൽ വടക്കേ ആഫ്രിക്കയിലെ കോർപ്സ് ഓഫ് റോയൽ എഞ്ചിനീയർമാർ ഇത് ഉപയോഗിച്ചു. ഒടുവിൽ ഈ പാലങ്ങൾക്ക് ഡൊണാൾഡ് ബെയ്‌ലിയുടെ പേര് നൽകുകയായിരുന്നു.

എന്താണ് പ്രത്യേകത

വളരെ വേഗത്തിലും വഴക്കത്തിലും നിർമ്മിക്കാൻ കഴിയുന്നവയാണ് ബെയ്‌ലി പാലങ്ങൾ. നിർമ്മാണത്തിന് ധാരാളം സ്ഥലവും പണവും സമയവും എടുക്കുന്ന പരമ്പരാഗത പാലങ്ങളിൽ നിന്ന് വ്യത്യസ്തമായി, സൈറ്റിൽ എളുപ്പത്തിൽ കൂട്ടിച്ചേർക്കാനും വേർപെടുത്താനും വേണ്ടിയാണ് ബെയ്‌ലി പാലങ്ങൾ രൂപകൽപ്പന ചെയ്‌തിരിക്കുന്നത്.  പാലത്തിൻ്റെ പ്രധാന ഭാഗങ്ങൾ ഒരു ഫാക്ടറിയിൽ മുൻകൂട്ടി നിർമ്മിക്കും. ഉയർന്ന നിലവാരമുള്ള ഇവ ഭാരം കുറഞ്ഞതായിരിക്കും. ബെയ്‌ലി പാലത്തിൻ്റെ ഏറ്റവും ചെറിയ ഭാഗത്തെ ബെയ്‌ലി പാനൽ എന്ന് വിളിക്കുന്നു. ഈ പാനലുകൾ ചതുരാകൃതിയിലുള്ള സ്റ്റീൽ ഫ്രെയിമുകളാണ്, അവ പലതരം പാലങ്ങൾ നിർമ്മിക്കാൻ വ്യത്യസ്ത രീതികളിൽ ഒന്നിച്ച് ചേർക്കാം. ബോൾട്ടുകൾ ഉപയോഗിച്ച് പാനലുകൾ ബന്ധിപ്പിച്ച് മറ്റ് ഭാഗങ്ങളുമായി യോജിപ്പിച്ച് പാലം വേഗത്തിൽ നിർമ്മിക്കാറുണ്ട്.

കേരളത്തിലെ ബെയ്‌ലി പാലങ്ങൾ

റാന്നിയിൽ പമ്പാ നദിക്ക് കുറുകെയാണ് ആദ്യമായി ബെയ്‍ലി പാലങ്ങൾ നിർമ്മിച്ചത്. 36 വർഷം പഴക്കമുള്ള പാലം 1996 നവംബർ എട്ടിന് തകർന്ന് വീഴുകയായിരുന്നു. ഇതോടെ രണ്ടുമാസക്കാലം പാലം ഉപയോഗിച്ചു. അതിനുശേഷം കേരളത്തെ നടുക്കിയ വയനാട് ഉരുൾപൊട്ടലിലാണ് രക്ഷാപ്രവർത്തനത്തിന് ഇത് ഉപയോഗിച്ച് കൊണ്ടിരിക്കുന്നത്.

Content summary; Portable Bridge Developed During World War 2 Is Aiding Wayanad Rescue Bailey Bridge Aiding Wayanad Rescue