ഇറാനെതിരായ സൈനിക നീക്കം അവസാനിപ്പിക്കുന്നതിനുള്ള ലക്ഷ്യ തീയതിയായി അമേരിക്ക ഏപ്രില് 9 നിശ്ചയിച്ചതായി റിപ്പോര്ട്ട്. ഇസ്രയേലി ദിനപത്രമായ ‘യെഡിയോത്ത് അഹ്റോനോത്ത്’ ആണ് ഒരു മുതിര്ന്ന ഇസ്രയേലി ഉദ്യോഗസ്ഥനെ ഉദ്ധരിച്ച് ഈ വാര്ത്ത പുറത്തുവിട്ടത്. ഇതോടെ വരാനിരിക്കുന്ന ചര്ച്ചകളിലൂടെ സംഘര്ഷത്തിന് പരിഹാരമാകുമെന്ന പ്രതീക്ഷയിലാണ് ലോകം.
യുദ്ധം അവസാനിപ്പിക്കാന് ഏകദേശം 21 ദിവസത്തെ സമയപരിധിയാണ് വാഷിംഗ്ടണ് നിശ്ചയിച്ചിരിക്കുന്നത്. ഇതിനുള്ളില് ചര്ച്ചകളിലൂടെയോ പോരാട്ടത്തിലൂടെയോ ഒരു തീരുമാനത്തില് എത്താനാണ് നീക്കം. ഇറാനും അമേരിക്കയും തമ്മിലുള്ള നിര്ണ്ണായക ചര്ച്ചകള് ഈ ആഴ്ച അവസാനം പാകിസ്ഥാനില് നടക്കുമെന്ന് പ്രതീക്ഷിക്കുന്നു. എന്നാല് ഇറാനിയന് പാര്ലമെന്റ് സ്പീക്കര് മുഹമ്മദ് ബാഗര് ഖാലിബാഫുമായി നടത്തുന്ന ആശയവിനിമയത്തിന്റെ വിശദാംശങ്ങള് അമേരിക്ക ഇസ്രായേലിന് കൈമാറിയിട്ടില്ല.
കഴിഞ്ഞ രണ്ട് ദിവസമായി ടെഹ്റാനുമായി ‘വളരെ നല്ലതും ഫലപ്രദവുമായ’ ചര്ച്ചകള് നടന്നുവരികയാണെന്ന് യുഎസ് പ്രസിഡന്റ് ഡൊണാള്ഡ് ട്രംപ് അറിയിച്ചു. ഇതിന്റെ ഭാഗമായി ഇറാന്റെ ഊര്ജ്ജ നിലയങ്ങള്ക്കും അടിസ്ഥാന സൗകര്യങ്ങള്ക്കും നേരെയുള്ള ആക്രമണങ്ങള് അഞ്ച് ദിവസത്തേക്ക് നിര്ത്തിവെക്കാന് അദ്ദേഹം ഉത്തരവിട്ടു.
ഇറാനിയന് പാര്ലമെന്റ് സ്പീക്കര് മുഹമ്മദ് ബാഗര് ഖാലിബാഫുമായി അമേരിക്ക നടത്തുന്ന ആശയവിനിമയത്തിന്റെ പൂര്ണരൂപം ഇസ്രയേലിന് കൈമാറിയിട്ടില്ല എന്നത് ശ്രദ്ധേയമാണ്. എന്നാല്, സാമ്പത്തിക-എണ്ണ വിപണികളെ സംബന്ധിച്ച ചര്ച്ചകള് നടക്കുന്നുവെന്ന വാര്ത്തകള് ‘വ്യാജമാണെന്നാണ്’ അദ്ദേഹത്തിന്റെ ഔദ്യോഗിക പ്രതികരണം.
ഫെബ്രുവരി 28-നാണ് അമേരിക്കയും ഇസ്രായേലും സംയുക്തമായി ഇറാനില് ആക്രമണം ആരംഭിച്ചത്. ആക്രമണത്തില് ഇതുവരെ ഇറാന് പരമോന്നത നേതാവ് അലി ഖമേനി ഉള്പ്പെടെ 1,340-ലധികം ആളുകള് കൊല്ലപ്പെട്ടതായാണ് കണക്കുകള്. ഇസ്രയേലിന് പുറമെ ജോര്ദാന്, ഇറാഖ്, ഗള്ഫ് രാജ്യങ്ങള് എന്നിവിടങ്ങളിലെ യുഎസ് സൈനിക കേന്ദ്രങ്ങള്ക്ക് നേരെ ഇറാന് ഡ്രോണ്-മിസൈല് ആക്രമണങ്ങള് നടത്തിയിരുന്നു. ഇത് ആഗോള എണ്ണ വിപണിയെയും വ്യോമയാന മേഖലയെയും കാര്യമായി ബാധിച്ചിട്ടുണ്ട്. ഇറാന് ഉള്പ്പെടെയുള്ള മേഖലയ്ക്ക് മുകളിലൂടെയുള്ള വിമാന സര്വീസുകള് തടസ്സപ്പെടുകയും റൂട്ടുകള് മാറ്റേണ്ടി വരികയും ചെയ്തത് വിമാനക്കമ്പനികള്ക്ക് വന് നഷ്ടമാണ് ഉണ്ടാക്കുന്നത്.
ഈ ആഴ്ച അവസാനം പാകിസ്ഥാനില് നടക്കാനിരിക്കുന്ന ചര്ച്ചകളിലാണ് ലോകരാജ്യങ്ങളുടെ കണ്ണ്. ഏപ്രില് 9 എന്ന ലക്ഷ്യ തീയതിക്ക് മുന്പായി ഇരുപക്ഷവും ഒരു ധാരണയിലെത്തുമോ അതോ പോരാട്ടം കൂടുതല് രൂക്ഷമാകുമോ എന്നാണ് ഇനി അറിയേണ്ടത്.
Content Summary: Trump orders 5 day halt on Iran strikes; April 9 targeted as war end date
