ഒപെക് വിട്ട് യുഎഇ; ഗള്‍ഫ് രാഷ്ട്രീയത്തില്‍ വഴിത്തിരിവാകുന്ന ‘എമിറാത്തി സ്വാതന്ത്ര്യപ്രഖ്യാപനം’

സൗദി അറേബ്യയുടെ നേതൃത്വത്തില്‍ ഗള്‍ഫ് രാഷ്ട്രത്തലവന്മാരുടെ ഉച്ചകോടി നടക്കാനിരിക്കെ, ആഗോള ഊര്‍ജ്ജ-രാഷ്ട്രീയ മേഖലകളെ പിടിച്ചുലയ്ക്കുന്ന സുപ്രധാന പ്രഖ്യാപനവുമായി യുണൈറ്റഡ് അറബ് എമിറേറ്റ്‌സ് (യുഎഇ). അന്താരാഷ്ട്ര എണ്ണ ഉല്‍പ്പാദക രാജ്യങ്ങളുടെ കൂട്ടായ്മയായ ‘ഒപെക്കില്‍’ (OPEC) നിന്ന് തങ്ങള്‍ പിന്മാറുകയാണെന്ന യുഎഇയുടെ പ്രഖ്യാപനം മിഡില്‍ ഈസ്റ്റിലെ മാറുന്ന അധികാര സമവാക്യങ്ങളുടെ ശക്തമായ സൂചനയായാണ് വിലയിരുത്തപ്പെടുന്നത്. സൗദി കിരീടാവകാശി മുഹമ്മദ് ബിന്‍ സല്‍മാന്‍ ഉച്ചകോടിക്ക് തുടക്കം കുറിച്ച അതേ സമയത്തുതന്നെ പുറത്തുവന്ന ഈ തീരുമാനം, പ്രാദേശിക സഖ്യങ്ങളില്‍ യുഎഇ ഇനി വിട്ടുവീഴ്ചയ്ക്ക് തയ്യാറല്ലെന്ന പ്രഖ്യാപനമായി മാറി.

അകന്നുപോകുന്ന സഖ്യങ്ങള്‍

കഴിഞ്ഞ കുറച്ചു കാലങ്ങളായി സൗദി അറേബ്യയും യുഎഇയും തമ്മില്‍ നിലനിന്നിരുന്ന അഭിപ്രായവ്യത്യാസങ്ങള്‍ ഈ തീരുമാനത്തോടെ പരസ്യമായിരിക്കുകയാണ്. സാംസ്‌കാരികമായും സാമ്പത്തികമായും ദീര്‍ഘകാലമായി നിലനിന്നിരുന്ന ബന്ധങ്ങള്‍ ഇറാന്‍ വിഷയത്തെച്ചൊല്ലിയാണ് പ്രധാനമായും ഉലഞ്ഞത്. ഗള്‍ഫ് രാജ്യങ്ങള്‍ക്ക് നേരെ ഇറാന്‍ നടത്തുന്ന മിസൈല്‍-ഡ്രോണ്‍ ആക്രമണങ്ങളില്‍ അയല്‍രാജ്യങ്ങള്‍ സ്വീകരിക്കുന്ന മൃദുസമീപനത്തില്‍ യുഎഇക്ക് കടുത്ത അതൃപ്തിയുണ്ട്. ഇറാന്റെ ആക്രമണങ്ങളെ പ്രതിരോധിക്കുന്നതില്‍ അറബ്-ഇസ്ലാമിക് കൂട്ടായ്മകള്‍ പരാജയപ്പെട്ടുവെന്നും, ഗള്‍ഫ് ഐക്യം വെറും വാക്കുകളില്‍ ഒതുങ്ങിയെന്നുമാണ് യുഎഇയുടെ നിലപാട്.

എണ്ണ വിപണിയിലെ തന്ത്രങ്ങള്‍

സ്വന്തം സാമ്പത്തിക താല്പര്യങ്ങള്‍ സംരക്ഷിക്കുന്നതിനായി ഏകപക്ഷീയമായി എണ്ണ ഉല്‍പ്പാദനം വര്‍ധിപ്പിക്കാനാണ് ഒപെക് വിടുന്നതിലൂടെ യുഎഇ ലക്ഷ്യമിടുന്നത്. ഫോസില്‍ ഇന്ധനങ്ങളുടെ കാലം കഴിയുന്നതിന് മുന്‍പ് തങ്ങളുടെ എണ്ണശേഖരം പരമാവധി വിറ്റഴിക്കാനുള്ള നീക്കത്തിലാണ് അബുദാബി. എന്നാല്‍ എണ്ണവില ഉയര്‍ത്തി നിര്‍ത്താന്‍ ഉല്‍പ്പാദന നിയന്ത്രണം വേണമെന്ന സൗദിയുടെ നിലപാട് ഇതിന് തടസ്സമായിരുന്നു. സൗദിയുടെ സാമ്പത്തിക പരിഷ്‌കാരങ്ങള്‍ക്കും വലിയ പദ്ധതികള്‍ക്കും ഉയര്‍ന്ന എണ്ണവില അത്യന്താപേക്ഷിതമാണെന്നിരിക്കെ, യുഎഇയുടെ ഈ നീക്കം ഇരുരാജ്യങ്ങളും തമ്മിലുള്ള സാമ്പത്തിക മത്സരത്തിനും വഴിവെക്കും.

പുതിയ യുഎഇ: ഒരു സ്വതന്ത്ര ശക്തി

പ്രാദേശികവും ആഗോളവുമായ വിഷയങ്ങളില്‍ യുഎഇ സ്വീകരിക്കുന്ന വേറിട്ട പാത ശ്രദ്ധേയമാണ്. ഇസ്രയേലുമായുള്ള സഖ്യം ശക്തമാക്കുന്നത് മുതല്‍ സുഡാന്‍, യമന്‍ ആഭ്യന്തര യുദ്ധങ്ങളില്‍ സ്വീകരിക്കുന്ന നിലപാടുകള്‍ വരെ ഇതിന് ഉദാഹരണമാണ്. സുഡാനില്‍ സൗദിയും ഈജിപ്തും പിന്തുണയ്ക്കുന്ന സര്‍ക്കാരിന് വിരുദ്ധമായി പാരാമിലിട്ടറി വിഭാഗത്തെയാണ് യുഎഇ പിന്തുണയ്ക്കുന്നതെന്ന് ആരോപണമുണ്ട്. ‘ഇതൊരു എമിറാത്തി സ്വാതന്ത്ര്യപ്രഖ്യാപനമാണ്’ എന്നാണ് രാഷ്ട്രീയ നിരീക്ഷകര്‍ ഇതിനെ വിശേഷിപ്പിക്കുന്നത്. ഇനിമുതല്‍ തങ്ങളുടെ താല്പര്യങ്ങള്‍ക്ക് വിരുദ്ധമായ സ്ഥാപനങ്ങളിലോ സഖ്യങ്ങളിലോ യുഎഇ ഭാഗമാകില്ലെന്ന സന്ദേശമാണ് ഇതിലൂടെ നല്‍കുന്നത്.

ഭൗമരാഷ്ട്രീയ പ്രത്യാഘാതങ്ങള്‍

അമേരിക്കയുടെ സുരക്ഷാ കവചം പഴയതുപോലെ ഫലപ്രദമല്ലെന്ന തിരിച്ചറിവും ഗള്‍ഫ് രാജ്യങ്ങളെ സ്വന്തം നിലയ്ക്ക് നീങ്ങാന്‍ പ്രേരിപ്പിക്കുന്നുണ്ട്. അറബ് ലീഗ്, ഗള്‍ഫ് സഹകരണ കൗണ്‍സില്‍ (ജിസിസി) തുടങ്ങിയ സംഘടനകളില്‍ നിന്നും യുഎഇ വരും ദിവസങ്ങളില്‍ പിന്മാറാന്‍ സാധ്യതയുണ്ടെന്ന അഭ്യൂഹങ്ങള്‍ ശക്തമാണ്. രണ്ട് ട്രില്യണ്‍ ഡോളറിലധികം വരുന്ന പരമാധികാര സമ്പത്തുള്ള യുഎഇ, വരും കാലങ്ങളില്‍ മിഡില്‍ ഈസ്റ്റില്‍ ഒരു സ്വതന്ത്ര ശക്തിയായി ഉയര്‍ന്നു വരുമെന്നത് ഉറപ്പായിരിക്കുകയാണ്.

അറബ് ഐക്യം എന്നത് വെറും പൊള്ളയായ വാഗ്ദാനമാണെന്നും, യുദ്ധസമയത്ത് യഥാര്‍ത്ഥ സുഹൃത്തുക്കള്‍ ആരാണെന്ന് തിരിച്ചറിഞ്ഞുവെന്നുമാണ് യുഎഇ കേന്ദ്രങ്ങളില്‍ നിന്നുള്ള പ്രതികരണം. സൗദി അറേബ്യയോടുള്ള വിധേയത്വം അവസാനിപ്പിച്ച്, ഒരു പുതിയ ആഗോളശക്തിയായി സ്വയം പ്രതിഷ്ഠിക്കാനുള്ള യുഎഇയുടെ ശ്രമങ്ങള്‍ മിഡില്‍ ഈസ്റ്റിന്റെ ഭാവിയെ എങ്ങനെ മാറ്റിമറിക്കുമെന്ന് ലോകം ഉറ്റുനോക്കുകയാണ്.

Content Summary: UAE announces its withdrawal from OPEC amid rising tensions with Saudi Arabia. and the impact on Gulf solidarity.”